«Әм һʹәмушк жи дьхԝазьн вәгәрʹьн жийина хԝәйә бәре».—Ангела Меркел, Сәрәкԝәкʹила Алманйайе.

 Дьбәкә тӧ ԛайил и тʹәви гьлийе ве кʹӧлфәте, чьмки пандемийа COVID-19 бәрдәԝам дькә нав тʹәмамийа дьнйайеда сәр жийина мәрьва һʹӧкӧм кә. Ле чь те һʹәсабе жийина «бәре»? Мәрьв чь дьхԝазьн бькьн?

•   Вәгәрʹандьна жийина бәре. Һьнә мәрьв дьхԝазьн диса ԝәʹде хԝә тʹәви һәвал у пьсмамед хԝә дәрбаз кьн, һәв һʹәмез кьн, дәсте хԝә бькьнә дәсте һәв у рʹеԝитийе бькьн. Ентони Фаучи a дьбежә, ԝәки «бона һьнә мәрийа жийина бәре», те һʹәсабе һәрʹьнә «ресторана, театра у щийед дьн».

•   Башкьрьна жийине. Бона һьнә мәрьва ԝәʹде ньһа мәщала лапә рʹьнд ә, кӧ жийина хԝә жь йа бәре дьһа баштьр кьн. Ԝана тʹьре кӧ дьнйайеда һәнә тьштед ӧса, кӧ гәрәке бенә гӧһастьне, мәсәлә хәбата ӧса, кӧ гәләк ԝәʹдә у ԛәԝат жь мә дьстиньн, ӧса жи нәһәԛийа жь бо мьләт у статуса мәрьвайә сосйали, у тьштед кӧ сәр пʹсихика мәрьва һʹӧкӧм дьбьн. Клаус Шваб, һʹимдаре Форума Аборийейә Һʹәмдьнйайе ӧса дьбежә: «Пандемийа мәщаләкә мәхсус дьдә мә, сәва кӧ бьфькьрьн дәрһәԛа жийина хԝә у ахьрийа хԝә, у паше дьнйайе бьгӧһезьн».

 Һәнә мәрьв дьфькьрьн, кӧ ида ԝе нькарьбьн вәгәрʹьн «жийина хԝәйә бәре», чьмки пандемийайе гәләк проблем пешда анийә. Мәсәлә, гәләка хәбата хԝә, мала хԝә, сьһʹәт-ԛәԝата хԝә у һәла һе жи мәрьвед хԝәйи һʹьзкьри ӧнда кьрьнә.

 Һәмьки тʹӧ кәс жь мә нькарә сәд сәләфи бежә, кӧ чахе пандемийа хьлаз бә, жийин ԝе чь щурʹәйи бә (Ԝаиз 9:11). Чь жи һәбә, Кʹьтеба Пироз дькарә али мә бькә, ԝәки бь реали сәр ахьрийе бьньһерʹьн у һазьр бьн бона ԝе йәке, чь кӧ ԝе паше бьбә. Кʹьтеба Пироз ӧса жи гьли дькә дәрһәԛа ахьрийа ӧса хԝәш, кӧ әм нә жи дькарьн бьдьнә бәр чʹәʹве хԝә.

 Гәләк ԝәхт пешда Кʹьтеба Пирозда һатийә пʹехәмбәртикьрьне, кӧ «ахьрийа ве дьнйайе», нәхԝәшийед һʹал ԝе бәла бьн (Луԛа 21:11; Мәтта 24:3). Һәрге әм әве йәке һьлдьн һʹәсаб чахе дьфькьрьн дәрһәԛа COVID-19, әме фәʹм бькьн ԝәки әԝ пандемийа, мина ԛәԝьмандьнед дьн ча шәрʹ, әʹрдһәжед мәзьн у хәлайи избаткьрьна пʹехәмбәртийа Кʹьтеба Пироз ьн, кӧ иро тенә сери.

 Занәбуна ве йәке ча дькарә аликʹарийе бьдә: Дьбә кӧ дәрәща пандемийайева гьредайи, баш бә. Ле Кʹьтеба Пирозда те готьне, ԝәки әм «рʹожед ахьрийеда зәманен» хьрабда дьжин (2 Тимотʹейо 3:1). Занәбуна ве йәке али мә дькә бь реали бьньһерʹьн сәр жийине.

 Кʹьтеба Пироз али мә дькә, ԝәки ньһерʹандьна рʹаст хԝәй кьн. Дьнйа мә кӧ бь чәтьнайа тʹьжә йә, зутьрәке ԝе бе гӧһастьне. Гәло әв чь гӧһастьн ьн?

 Кʹьтеба Пирозда нә кӧ тʹәне һатийә пʹехәмбәртикьрьне дәрһәԛа проблемед кӧ иро рʹасти мә тен, ле ӧса жи ахьрийа баш соз дьдә, чь кӧ ида бәр шемике йә. Сәрԝертийа мәрьва нькарә бьгьһижә ахьрийа ӧса баш, чьмки тʹәне Хԝәде дькарә әве йәке бькә. Кʹьтеба Пироз ӧса дьбежә: «Әԝе жь чʹәʹвед ԝан һʹәму һесьред ԝан паԛьж кә у иди мьрьне тʹӧнәбә, нә шин, нә гьри, нә еш-ешук, чьмки тьштед бәре дәрбаз бун» (Әʹйанти 21:4).

 Йаһоԝа b Хԝәде мәрʹа соз дьдә: «Ва әз һәр тьшти ну чедькьм» (Әʹйанти 21:5). Әԝ ԝе һʹәму проблемед дьнйайе бьдә һьлдане, ӧса жи чәтьнайед кӧ жь бо пандемийайе пешда һатьнә. Хԝәде ԝе ван кʹәрәма бьдә мә:

•   Сьһʹәт-ԛәԝата һʹәмуйа алийе физики у психикида пʹьрʹ баш бә, ӧса жи ԝе нәхԝәши у мьрьн тʹӧнә бә (Ишайа 25:8; 33:24).

•   Хәбат ԝе ләзәте бинә у тʹӧ кәс ԝе жь бо хәбата гьран нәчәрчьрә у ԛьдум нәкʹәвә (Ишайа 65:22, 23).

•   Щәм мәрьва ԝе кемасийа тʹӧ тьшти тʹӧнә бә, нә жи ԝе кʹәсиби у бьрчибун һәбә (Зәбур 72:12, 13; 145:16).

•   Һәр кәс ԝе жь еша емосийали аза бә. Хԝәде ӧса жи ԝе мәрьвед мәйи незик, пашда вәгәрʹинә жийине (Ишайа 65:17; Кʹаред Шандийа 24:15).

 Занәбуна ве йәке ча дькарә аликʹарийе бьдә: Кʹьтеба Пирозда те готьне: «Әв һевийа мә ԝәк ләнгәре» йә (Ибрани 6:19). Һевийа ви щурʹәйи мә дьшьдинә. Әԝ али мә дькә кӧ дәрәщед чәтьнда тәйах кьн, кем хәмгин бьн у шабуна хԝә жи ӧнда нәкьн.

 Ле әм дькарьн итʹбарийа хԝә Кʹьтеба Пироз биньн? Бьньһерʹә готар, «Кʹьтеба Пироз; Канийа Рʹастийе йә».

•   Жийина хԝә ԛимәт кьн

   Рʹез: «Ԛимәта занәбуне у биланийе ԝе йәкеда нә, кӧ әԝ жийина ԝан хԝәйи дькә, кʹи кӧ әԝ ԛазанщ дькә» (Ԝаиз 7:12, ДТʹ).

   Әв чь те һʹәсабе: Сафикьрьнед билани бькә, кӧ нәхԝәш нәкʹәви. Ԛәйдед бона сьһʹәт-ԛәԝате у бехофийе һьлдә һʹәсаб. Пебьһʹәсә кӧ мьһала тәда алийе пандемийайеда һʹал ча нә, чьԛас мәрьва ваксина кьрьнә у чь дькари бьки кӧ хԝә хԝәй ки.

•   Фәсал бә

   Рʹез: «Йе сәрԝахт дьтьрсә у жь хьрабийе дур дькʹәвә, ле йе ахмах дьԛьлԛьлә у щӧләʹт дьбә» (Мәтʹәлок 14:16, ИМ).

   Әв чь те һʹәсабе: Бәрдәԝам кә ԝан тьшта бькә, чь кӧ ԝе сьһʹәт-ԛәԝата тә бьпарезьн. Ль гора гьлийе експерта, нәхԝәшийа коронавирусе ԝе диса дьреж бькʹьшинә.

•   Информасийа бь итʹбар бьдә хәбате

   Рʹез: «Мәрьве сахьке дьле хԝә һәр готьне баԝәр дькә, ле йе аԛьл дина хԝә дьдә гавед хԝә» (Мәтʹәлок 14:15, ИМ).

   Әв чь те һʹәсабе: Рʹьнд бьфькьрә дәрһәԛа ве йәке, һәла тӧ кʹижан информасийайе һьлди һʹәсаб. Һәрге тӧ бьди хәбате информасийа жь канийа беитʹбар, тӧйе зийане бьди сьһʹәт-ԛәԝата хԝә.

•   Бь позитив бьфькьрә

   Рʹез: «Нәпьрсә: ‹Чьма рʹожед бәре жь йед ньһа четьр бун?› Чьмки әв пьрс нә бь шәһрәзайи йә» (Ԝаиз 7:10, ИМ).

   Әв чь те һʹәсабе: Һини дәрәща хԝәйә ньһа бә. Кем бьфькьрә дәрһәԛа ԝе йәке, кӧ пешийа пандемийайе жийина тә чь щурʹәйи бу у бәрхԝәнәкʹәвә бона ԝан мәщала, кʹижан кӧ тә жь бо пандемийайе ӧнда кьр.

•   Ԛәдьр һьндава мәрьвед дьн бьдә кʹьфше.

   Рʹез: «Ԛәдьре һʹәмуйа бьгьрьн» (1 Пәтрус 2:17).

   Әв чь те һʹәсабе: Реаксийа мәрийа сәр пандемийайе у сәр ахьрийа кӧ әԝ пәй хԝә тинә, жь һәв щӧдә дьбьн. Ԛәдьре сафикьрьна мәрьва бьгьрә, ле нәһелә ԝәки сәр сафикьрьна тәйә баш һʹӧкӧм кьн. Мәʹрифәт бә һьндава мәрьвед кӧ ваксина нәкьрьнә, илаһи һьндава йед әʹмьрда мәзьн у йед кӧ проблемед ԝанә сьһʹәт-ԛәԝатева гьредайи, һәнә.

•   Сәбьр кьн

   Рʹез: «Һʹьзкьрьн думькдьреж у ширьн ә» (1 Корьнтʹи 13:4).

   Әв чь те һʹәсабе: Һьндава ԝан мәрьвада ԛәнщ бә, йед кӧ дьтьрсьн вәгәрʹьнә шьхӧлед хԝәйи бәре. Ле чахе мьһала тәда һʹал баш дьбә, синоред ковидева гьредайи тенә һьлдане у тӧ ида дькари гәләк тьшт бьки, һьнге һьндава хԝәда бь сәбьр бә у ләз нәкʹәвә кӧ һʹәму тьшти щарәкерʹа бьки.

 Һевийа жь Кʹьтеба Пироз дәрһәԛа ахьрийа баш, Шәʹдед Йаһоԝа ԛәԝи дькә у али ԝан дькә, ԝәки ԝәʹде пандемийайе жи шабуна хԝә ӧнда нәкьн. Әԝана ӧса жи тʹәвайи дьщьвьн, сәва кӧ Хԝәде бьһʹәбиньн, чь кӧ ԛәԝате дьдә ԝан (Ибрани 10:24, 25). Ԝәʹде пандемийайе щьватед Шәʹдед Йаһоԝа бь онлайн дәрбаз дьбьн. Әм һʹәмуйа тʹәглиф дькьн, кӧ тʹәви мә сәр щьвата текли бьн.

 Әв щьват хенщи Шәʹдед Йаһоԝа ӧса жи али мәрьвед дьн дькьн. Мәсәлә, кʹӧлфәтәк кӧ бь COVID-19 нәхԝәш бу, тʹәглифа Шәʹдед Йаһоԝа ԛәбул кьр, кӧ бь онлайн сәр щьватед ԝан текли бә. Әԝан щьвата алийе емосийалида али ԝе кьрьн. Әԝ дьбежә: «Тʹәви Шәʹдед Йаһоԝа әз хԝә ча пʹара ве малбәте тʹәхмин дькьм. Хԝәндьна Кʹьтеба Пироз рʹьһʹәтийа дьл дьдә мьн. Әв али мьн дькә дина хԝә бьдьмә ахьрийа баш, нә кӧ сәр проблемед хԝә. Спас кӧ ԝә али мьн кьр кӧ незики Хԝәде бьм, чь кӧ мьн тʹәмамийа әʹмьре хԝәда дьхԝәст».