Чь те һʹьше тә чахе тӧ хәбәра «апокалипсис» дьбьһейи? Дьбә кӧ тӧ дьфькьри дәрһәԛа ԝеранбуна тʹәмамийа дьнйайе. Һьнә мәрьва тʹьре дьнйа ԝе зутьрәке ԝеран бә, илаһи чахе әԝана дәнг-бәʹсед ви щурʹәйи дьхуньн, мәсәлә:

•   «Ӧса те кʹьфше ԝәки шәрʹе бь атоме ԝе дәстпебә. Дьбә кӧ мәрьв бь һʹәмде хԝә, ньшкева йан жи жь бо нәфәʹмкьрьне дәстпекьн».—Bulletin of the Atomic Scientists.

•   «Ԝан дәһ салед пашьнда һәжмара тʹәшԛәлед тʹәбийәте гәләк зедә буйә, мәсәлә фьртонед мәзьн рʹадьбьн, мешә дьшәԝьтьн, әʹрд һʹьшк дьбә, шинкайед бьне бәʹре рʹәнге хԝә ӧнда дькьн, гәрмайа һәԝе зәʹф бьльнд дьбә у ӧса жи лейи рʹадьбьн».—National Geographic.

•   «Африкайеда ԝан салед пашьнда һʹӧщӧмкьрьна кӧлийайә ӧса мәзьн тʹӧ щар тʹӧнә буйә».—The Associated Press.

 Гәло дьнйа ԝәʹде апокалипсисе ԝе бе кʹӧтакьрьне? Кʹьтеба Пироз чь дьбежә?

 На. Хәбәра Хԝәде, демәк Кʹьтеба Пироз мә дьдә баԝәркьрьне, ԝәки әʹрд ԝе тʹӧ щар кʹӧта нәбә (Ԝаиз 1:4). Хԝәде ԝе әʹрде, демәк чекьрьна дәсте хԝә кʹӧта нәкә, ле дәԝсе әԝ ԝе ԛьрʹа ԝан бинә, «йед кӧ дьне хьраб дькьн» (Әʹйанти 11:18).

 Ль гора Кʹьтеба Пироз хәбәра «дьне», кʹижан кӧ незики хьлазийе дьбә, те һʹәсабе әԝ һʹәму мәрьв, йед кӧ рʹебәрийа Хԝәде инкʹар дькьн у хԝәсәрихԝә дьжин. Ле Хԝәде ԝе «нәпʹака» кʹӧта кә, чаԝа кӧ әԝи ԝәʹде Нӧһда кьрьбу (2 Пәтрус 2:5; 3:7).

 1 Йуһʹәнна 2:17-да те готьне, ԝәки «дьнйайе жи дәрбаз бә, һавьжийа ԝе жи». Әв рʹез дьдә кʹьфше, ԝәки Хԝәде ԝе нә кӧ әʹрде кʹӧта кә, ле ԝан мәрийа, йед кӧ жь бо хԝәһʹьзийе дькʹәвьнә һʹәйра һавьжийед хԝә.

 Кʹьтеба Пироз конкрет набежә, кӧ хьлази ԝе кʹәнге бе (Мәтта 24:36). Ле әԝ дьдә кʹьфше, ԝәки хьлази бәр шемике йә. Дина хԝә бьдьне, кӧ Кʹьтеба Пироз чь пʹехәмбәрти кьрийә:

•   Шәрʹ, хәлайи-щәлайе, нәхԝәшийед һʹал у әʹрдһәжед мәзьн «щи-щийа» ԝе бьԛәԝьмьн (Мәтта 24:3, 7, 14; Луԛа 21:10, 11; Әʹйанти 6:1-8).

•   Бь тʹәмами мәрьв ԝе хԝәһʹьзийе бьдьнә кʹьфше. Мәсәлә, ԝе бьбьнә «пʹәрәһʹьз», «бешекьр», у «тәмсьст» (2 Тимотʹейо 3:1-5).

 Гәләк мәрьв ԛайил дьбьн, ԝәки жь сала 1914 һʹале дьнйайе гәләк хьраб буйә, чь кӧ избат дькә, кӧ пʹехәмбәрти тенә сери у хьлази незик ә. Бона һе зедә әʹламәти бьньһерʹьн готар, «Хроноложийа Кʹьтеба Пироз Чь Әʹйан Дькә Дәрһәԛа Сала 1914?», у «Гәло Чь йә ‹Нишана Рʹожед Ахьрийе›?»

 Хәбәра Йунанийә орижинал, кʹижан кӧ Кʹьтеба Пирозда һатийә ԝәлгәрʹандьне ча «апокалипсис», те һʹәсабе «әʹйанкьрьн», йан «әшкәрәкьрьн». Гәләк щар әве хәбәре һьнге дьдьнә хәбате, гава шьровәдькьн дәрһәԛа әшкәрәкьрьна тьштәки вәшарти. Кʹьтеба Пирозда ӧса жи те готьне дәрһәԛа хӧйабуна [йан жи, апокалипсиса] «Хӧдан Иса», кʹижан кӧ ԝе һьнге бьбә, чахе Иса әʹйан бә ча йе хԝәйиһʹӧкӧм, йе кӧ ԝе әʹрде жь зӧлмийе аза кә у хьзмәткʹаред Хԝәде хәлат кә (2 Тʹесалоники 1:6, 7; 1 Пәтрус 1:7, 13).

 Кʹьтеба пашьнә Кʹьтеба Пироз те навкьрьне Апокалипсис, йан Әʹйанти, чьмки әԝ ԛәԝьмандьнед ахьрийе әʹйан дькә (Әʹйанти 1:1). Әв кʹьтеб мьзгинийе дьдә дәрһәԛа һевийа баш (Әʹйанти 1:3). Әԝ дьдә кʹьфше, ԝәки Хԝәде ԝе нәһәԛийе бьдә һьлдане у әʹрде бькә щьнәт. Ль сәр әʹрде ԝе еш-ешук, кӧл-дәрд у һәла һе мьрьн жи ида тʹӧнә бә (Әʹйанти 21:3, 4).

 Һун дьхԝазьн һе зедә жь Кʹьтеба Пироз дәрһәԛа ԝан созед хԝәш пебьһʹәсьн? Шәʹдед Йаһоԝа тʹәви мәрийа һинбуна Кʹьтеба Пирозә бепʹәрә дәрбаз дькьн у ве йәкеда дькарьн али ԝә жи бькьн. Һун дькарьн ирода тʹәви ԝан текли бьн