Тʹәшкиләта Мьләтед Йәкбуйи әʹлам кьр:

•   Жь 7 һʹәта 23 Щотмәһе сала 2023 шәрʹе ортʹа Газа у Исраеледа 6 400 мәрьва зедәтьр һатьнә кӧштьне у 15 200 кәс бьриндар бунә, һʹәчʹи зәʹф жь ԝан бьнәлийед нәнәһәԛ ьн. Ӧса жи бь сәда һʹәзара мәщбур бунә жь малед хԝә бьрʹәвьн.

•   Ль гора һʹәсабе 24 Илоне, сала 2023, шәрʹе ортʹа Русйайе у Украинайеда 9 701 бьнәлийед Украинайе һатьнә кӧштьне у 17 748 бьриндар бунә.

 Кʹьтеба Пироз чь гӧмане дьдә ԝан мәрьва, йед кӧ жь бо шәрʹ дьчәрчьрьн?

 Кʹьтеба Пирозда һатийә пʹехәмбәртикьрьне, ԝәки Хԝәде ԝе ‹шәрʹа бьдә сәкьнандьне, һәр чар ԛӧлбед дьнйайе› (Зәбур 46:9). Әԝе пʹадшатийа әʹзмани бьдә хәбате, ԝәки һʹәму сәрԝеред мәрьвайи бьдә һьлдане у дәԝса ԝан сәрԝертийе бькә (Данийел 2:44). Пʹадшатийа Хԝәде ԝе инсанәтерʹа әʹдьлайе бинә.

 Дина хԝә бьдьне ԝәки Иса Мәсиһ, йе кӧ Пʹадше Пʹадшатийа Хԝәде йә, ахьрийеда ԝе чь бькә:

•   «Әԝ йе кʹәсиб хьлаз дькә, кӧ гази дьке у йе бәләнгаз кӧ кʹомәкдаре ԝи тʹӧнә йә. Дьле ԝи ль бетʹаԛәт у кʹәсиба дьшәԝьтә у нәфса бәләнгаза хьлаз дькә. Жь зерандьне у зордарийе ԝан хьлаз дькә» (Зәбур 72:12-14).

 Хԝәде ԝе бь сайа Пʹадшатийа Әʹзмани кӧл-дәрда у кʹәсибийе, кʹижан кӧ жь шәрʹ у зордарийе пешда тен, бьдә һьлдане.

•   «Әԝе жь чʹәʹвед ԝан һʹәму һесьред ԝан паԛьж кә у иди мьрьне тʹӧнәбә, нә шин, нә гьри, нә еш-ешук, чьмки тьштед бәре дәрбаз бун» (Әʹйанти 21:4).

 Зутьрәке Пʹадшатийа Хԝәде ԝе гӧһастьнед мәзьн сәр әʹрде бькә. Кʹьтеба Пирозда һатийә пʹехәмбәртикьрьне дәрһәԛа «дәнге шәрʹа у бәʹса шәрʹа», кʹижан кӧ рʹожед мәда дьԛәԝьмьн (Мәтта 24:6). Әв йәк у ԛәԝьмандьнед дьн нишан дькьн, ԝәки әм рʹожед хьлазийа сәрԝертийа мәрьвайида дьжин (2 Тимотʹейо 3:1).