Дьбә кӧ тӧ йәк жь ԝан милйона мәрьва йи, кӧ жь тʹәшԛәлед тʹәбйәте зийан стандьнә. Тʹәшԛәлед тʹәбйәте щурʹә-щурʹә нә у әԝ зийана мәзьн дьдьн. Байе мәзьн у селав, жь бо фьртонә, тайфуне у торнадойе рʹадьбьн. Жь бо барана ԛайим, чʹийа жорда тен, жь бо бобәлиске жи бьруск ледьхә, чь кӧ дьбә сәбәбе шәԝьтандьна мешә. Зьһайи, һәԝа зәʹф гәрм у багәра бәрфе жи гәләк зийане дьдьн.

 Гәләк щийада тʹәшԛәлед тʹәбйәте зәʹф зедә бунә у зийана мәзьн дьдьн. Федерасийа Һʹәмдьнйайейә Хачʹа Сор у Тʹәшкиләта Һива Нивийә Сор ӧса дьбежә: «Һәжмара мәрьвед кӧ жь тʹәшԛәлед тʹәбйәте зьрар стандьнә, чьԛас дьчә зедә дьбә, чьмки лейи у фьртонә рʹадьбьн, ӧса жи температура гәрмайа һәԝе жи зәʹф бьльнд дьбә. Жь бо ве йәке һәр сал гәләк мәрьв дьмьрьн, йед дьн нькарьн әʹбура хԝә бькьн, ле бь милйона мәрьв мал-һәбука хԝә ӧнда дькьн».

 Жь бо ԝан ԛәԝьмандьна мәрьв нә кӧ тʹәне зийана физики дьстиньн, ле ӧса жи зийана емосийали. Әԝана дьчәрчьрьн, чьмки мал-һʹале хԝә у һәла һе мәрьвед хԝәйи незик жи ӧнда дькьн.

 Һәрге тә жи зийан стандийә жь бо тʹәшԛәлед тʹәбйәте, Кʹьтеба Пироз дькарә али тә бькә тәйах ки. Әԝ бәрдьлийе, һевийе, у ширәтед керһати дьдә, кʹижан кӧ али беһʹәсаб мәрьвед зийанкʹәти кьрийә (Рʹомайи 15:4). Әԝ ӧса жи щаба пьрсед фәрз дьдә, йед кӧ гәләк мәрийа дьчәрчьриньн: «Чьма Хԝәде дьһелә кӧ әԝ тьшт бьԛәԝьмьн? Гәло әԝ мә щәза дькә?»

 Кʹьтеба Пироз һин дькә, ԝәки сәбәбе ԝан ԛәзийа, кӧ тенә сәре мәрийа, Хԝәде нинә. Әԝ мә дьдә баԝәркьрьне, ԝәки «Хԝәде хьрабийада найе щерʹьбандьне у нә жи йәки дьщерʹьбинә» (Аԛуб 1:13). Әв те һʹәсабе ԝәки Әԝ сәбәбе тʹәшԛәлед тʹәбйәте нинә, кʹижан кӧ иро дьԛәԝьмьн.

 Кʹьтеба Пирозда һәнә ԛәԝьмандьн, кӧ бәре Хԝәде бь сайа ԛәԝата тʹәбйәте мәрьвед зӧлм щәза дькьр. Ле әԝ ԛәԝьмандьн гәләк щӧдә дьбьн жь тʹәшԛәлед тʹәбйәтейә иройин, кʹижан кӧ ньшкева дьԛәԝьмьн у зийане дьдьнә һьм мәрьвед баш, һьм жи йед хьраб. Жь ԛәԝьмандьнед кӧ Кʹьтеба Пирозда һатьнә ньвисаре, те кʹьфше ԝәки Хԝәде мәрьвед дьлсах тʹьме дьпараст у пешда мәрьварʹа әʹлам дькьр кӧ ԝе чь бе сәре ԝан у мәʹнийа кьред хԝә жи шьровәдькьр. Мәсәлә, ԝәʹде Нӧһда, Хԝәде ԝирʹа шьровәкьр, кӧ чьма дьхԝазә сәр тʹәмамийа дьнйайе Селаве рʹакә, у һьм жи Әԝи Нӧһ у малбәта ԝи жь Селаве хьлаз кьрьн (Дәстпебун 6:13; 2 Пәтрус 2:5).

 Сәва кӧ һе зедә пебьһʹәси, кӧ чьма әм дькарьн бежьн, ԝәки тʹәшԛәлед тʹәбйәтейә иройин щәзакьрьна жь Хԝәде ниньн, бьньһерʹә готар, «Кʹьтеба Пироз Чь Дьбежә Дәрһәԛа Тʹәшԛәлед Тʹәбйәте?»

 Кʹьтеба Пироз әʹйан дькә, ԝәки Йаһоԝа a Хԝәде бь һʹьзкьрьн у дьлрʹәʹмийе тʹьжә йә. Дина хԝә бьдә ван дӧ рʹезед Кʹьтеба Пироз, йед кӧ бәрдьлийе дьдьн.

•   Ишайа 63:9, ИМ: «Тʹәвайа тәнгасийа ԝанда әԝ [Хԝәде] әʹщьз бу».

   Әв чь те һʹәсабе: Дьле Йаһоԝа дьшәԝьтә, гава чәрчьрандьна мәрийа дьвинә.

•   1 Пәтрус 5:7: «Әԝ бона ԝә хәм дькә».

   Әв чь те һʹәсабе: Йаһоԝа бона һʹалхԝәшийа ԝә хәм дькә.

 Һʹьзкьрьн у дьлрʹәʹмийа Йаһоԝа ԝи һелан дькьн, кӧ тьштәки бона мә бькә. Әԝ бь сайа Кʹьтеба Пироз бәрдьлийе у ширәтед керһати дьдә мә, у мә дьдә баԝәркьрьне, кӧ тʹәшԛәлед тʹәбийәте зутьрәке ԝе ида тʹӧнә бьн (2 Корьнтʹи 1:3, 4).

 Кʹьтеба Пироз нишан дькә, ԝәки Йаһоԝа соз дьдә, кӧ ԝе «һевийе у ахьрийа баш» бьдә мәрийа (Йерәмйа 29:11, ДТʹ). Әԝ нә кӧ дьхԝазә кӧ мәрьв жь тʹәшԛәлед тʹәбйәте бьтьрсьн, ле щьнәтеда сәр әʹрде бьжин у жь жийине ләзәте бьстиньн (Дәстпебун 1:28; 2:15; Ишайа 32:18).

 Хԝәде ԝе бь сайа Пʹадшатийа хԝәйә әʹзмани, сәрԝере кʹижани кӧ Иса йә, созе хԝә бинә сери (Мәтта 6:10). Билани у ԛәԝата Иса һәйә, сәва кӧ тʹәшԛәлед тʹәбйәте бьдә һьлдане. Чахе әԝ сәр әʹрде бу, әԝи да кʹьфше, кӧ дькарә ԛәԝата тʹәбйәте контрол кә (Марԛос 4:37-41). Иса ԝе бь сәрԝахтийе у биланийе пʹадшатийе бькә. Әԝ ԝе мәрийа һин кә, кӧ хԝәйитийе әʹрде бькьн у зийане нәдьне (Ишайа 11:2). Бьн сәрԝертийа Иса, мәрьв тʹӧ щар ԝе жь бо тʹәшԛәлед тʹәбйәте нәчәрчьрьн.

 Дьбә кӧ тӧ бьхԝази пебьһʹәси: «Иса ԝе чь чах ԛәԝата тʹәбйәте бькә бьн контрола хԝә?» Щаба ве пьрсе тӧ дькари бьвини ве готареда, «Пʹадшатийа Хԝәде ԝе Чь Чах ль сәр Әʹрдерʹа Сәрԝертийе Бькә?»

 Ширәтед Кʹьтеба Пироз дькарьн пешийа, ԝәʹде у паши тʹәшԛәлед тʹәбийәте али ԝә бькьн.

•   Пешийа тʹәшԛәла: Һазьр бьн кӧ дәрберʹа тьштәки бькьн.

   Кʹьтеба Пироз чь дьбежә: «Йе аԛьл хьрабийе кӧ дьбинә һʹәвза хԝә дькә,ле йе дьлсах пешда дьчьн у зьраре дьбинә» (Мәтʹәлок 22:3).

   Әв чь те һʹәсабе: Пебьһʹәсә кӧ мьһала ԝәда чь ԛәзи дькарә бьԛәԝьмә, сәва кӧ дәрберʹа тьштәки бьки у малбәта хԝә бьпарези.

   Сәрһати: «Ԝе рʹоже гава жь бо шәԝьтандьна мешә әм гәрәке жь мал бьрʹәвийана, әм ида һазьр бун. Мә пешда чәнтʹед хԝәйә рʹәве һазьр кьрьбу. Мә дәрман у кʹьнщ кьрьбу чәнтʹе хԝә. Мәрьвед дәр-доре мә әʹщебмайи у тьрседа бун, ԝанарʹа чәтьн бу фәʹм бькьн чь бькьн у чь тʹәви хԝә һьлдьн. Ле щәм мә һʹәму тьштед лазьм ида һәбун. Әз ша мә кӧ мә хԝә пешда һазьр кьрьбу».—Тамара, Калифорнйа, Дәԝләтед Йәкбуйи.

•   Ԝәʹде тʹәшԛәла: Дина хԝә бьдә тьштед фәрз.

   Кʹьтеба Пироз чь дьбежә: «Әʹмьре инсен һәбука ԝива гьредайи нинә» (Луԛа 12:15).

   Әв чь те һʹәсабе: Әʹмьр жь һәбуке фәрзтьр ә.

   Сәрһати: «Чахе Тайфуна Лаԝин b мала мә һурдәхԝәши кьр, мьн дәрберʹа фәʹм нәкьр чь бькьм. Ле һәбу тьштәк, чь кӧ мьн бир нәкьрьбу. Мьн Йаһоԝа Хԝәдерʹа бь дьл дӧа кьр. Һьнге мьн фәʹм кьр, ԝәки мә тʹәне тьштед материйали ӧнда кьр. Йа лапә фәрз әԝ бу, кӧ әм сах ман».—Лесли, Филипин.

•   Паши тʹәшԛәла: Хәмед хԝәйә сьбе, сьбәһерʹа бьһелә.

   Кʹьтеба Пироз чь дьбежә: «Иди бона рʹожа сьбе хәма нәкьн, чьмки рʹожа сьбе ԝе бона хԝә хәма бькә. Хәмед рʹоже бәси ԝе нә» (Мәтта 6:34).

   Әв чь те һʹәсабе: Зәʹф бәрхԝә нәкʹәвә дәрһәԛа проблемед кӧ дькарьн ахьрийеда бьԛәԝьмьн.

   Сәрһати: «Паши Фьртона Ирма, мала мә бь аве тʹьжә бу. Гәләк тьшт һәбун, кӧ мьн гәрәке сафи кьра у бо ве йәке әз кʹәтьмә стресе. Һьнге мьн ширәта Кʹьтеба Пироз ани сери ԝәки хәмед хԝәйә сьбе, сьберʹа бьһельм. У мьн фәʹм кьр ԝәки бь аликʹарийа Йаһоԝа әз һе зедә тьшт дькарьм бькьм».—Сели, Флорида, Дәԝләтед Йәкбуйи.

 Сәва кӧ һе зедә ширәтед керһати бьвини, бьньһерʹә готар, «Ԝәʹде Тʹәшԛәлед Тʹәбйәте—Гавед кӧ Дькарьн Әʹмьре Ԝә Хьлаз кьн».