Рʹаст ә Ԛануна Муса борщдар накә Мәсиһийа, ле әв дӧ тʹәмийед фәрз, кӧ Хԝәде у һәвале хԝә һʹьз бькьн, һәта ньһа әʹйан дькә әԝ, чь кӧ Йаһоԝа жь мә дәʹԝа дькә (Мт. 22:37-39). Һʹьзкьрьна ви щурʹәйи хԝәха пешда найе, әм гәрәке әԝ нав хԝәда пешда биньн. Ле чь щурʹәйи? Йа әԝльн, әв һәйә хԝәндьна Кʹьтеба Пирозә һәррʹожи. Чахе әм һе зедә дәрһәԛа Хԝәде педьһʹәсьн, чаԝа кӧ Ньвисаред Пирозда әʹйан кьрийә, ӧса әм зәлал дьвиньн «хԝәшькийа Йаһоԝа» (Зб. 27:4, ДО). Бь сайа ве йәке, һʹьзкьрьна мә һьндава Йаһоԝа һе мәзьн дьбә у ньһерʹандьна мә жи, мина йе Ԝи дьбә. Әв мә һелан дькә тʹәмийед Хԝәде пек биньн, нава кʹижани кӧ дькʹәвә тʹәми, ԝәки һьндава мәрийада һʹьзкьрьна дьлсах бьдьнә кʹьфше (Йн. 13:34, 35; 1 Йн. 5:3). Ль вьр се ширәт тенә дайине, кӧ чаԝа хԝәндьна Кʹьтеба Пироз даһа һʹәԝас кьн:

• Зәлал бьдә бәр чʹәʹве хԝә. Бьдә һʹәсабе хԝә, кӧ тӧ ԝедәре йи. Тӧ чь дьбини, дьбьһей, у бина чь те? Чь дькари бежи дәрһәԛа һәстен ԝан мәрийа, дәрһәԛа кʹижана кӧ дьхуни?

• Хԝәндьна хԝә һʹәԝас кә. Ль вьр чәнд рʹебәри тенә дайине. Бь дәнге бьльнд бьхунә, йан аудио-ньвисандьне вехә у бьра чʹәʹве тә жи ль Кʹьтеба Пирозда бә. Дәԝса кӧ сәри пәй сәрийарʹа бьхуни, дькари бьхуни сәрһатийа мәрьвәки жь Кʹьтеба Пироз, йан дәрһәԛа тʹемәки. Мәсәлә, дькари бьди хәбате брошура «Рʹебәри Бона Һинбуна Кʹьтеба Пироз» сәре 4 у 16 у бьхуни дәрһәԛа Иса. Ӧса жи тӧ дькари бь тʹәмами бьхуни әԝ сәри жь Кʹьтеба Пироз, жь кʹижани кӧ рʹеза рʹоже һатьбу һьлдане. Бьхунә кʹьтебед жь Кʹьтеба Пироз бь ԝе сьрийе, чаԝа кӧ әԝана һатьнә ньвисаре.

• Бьхунә кӧ фәʹм бьки. Дәԝса кӧ тʹәне гәләк сәрийа бьхуни, бь ԝе мәʹнийе кӧ зу хьлаз ки, ԝе баш бә һәр рʹож сәрик жь Кʹьтеба Пироз бьхуни у сәр бьфькьри. Һе зедә леколин кә дәрһәԛа тьштед хԝәнди у кʹур бьфькьрә. Бьдә хәбате хәрита у әʹламәтийа зедә, кӧ те дайине ортʹеда, сәр һәр рʹупʹеләкә Кʹьтеба Пироз. Дькари леколин бьки тьштәки, чь кӧ тәрʹа фәʹмдари нинә. Һәрге дьбә, һаԛас ԝәʹдә бьфькьрә, чьԛас ԝәʹдә тәйе сәр хԝәндьне хәрщ кьра.