Әм Шәʹдед Йаһоԝа һәр тьшти дькьн кӧ малбәта хԝә у малбәтед мәрьве хԝә ԛәԝи кьн. Әм һʹәсаб дькьн кӧ Хԝәде һәйә Сазкʹаре малбәте (Дәстпебун 2:21-24; Әфәси 3:14, 15). Бь сайа Принсипед Кʹьтеба Пироз, Хԝәде али гәләк мәрьва дькә кӧ әԝана малбәтед ԛәԝи, у бәхтәԝар саз кьн.

 Әм һәр тьшти дькьн кӧ ширәтед Кʹьтеба Пироз малбәта хԝәда бьдьнә хәбате, әԝ йәк али мә дькә чаԝа мер, жьн у де-бав, ча лазьмә щабдарийа хԝә малбәтеда биньн сери (Мәтʹәлок 31:10-31; Әфәси 5:22–6:4; 1 Тимотʹейо 5:8). Ширәтед Кʹьтеба Пироз, алийе малбәтед ӧса жи дькьн, нәфәред кʹижана щурʹә-щурʹә религийада ньн (1 Пәтрус 3:1, 2). Ԝәрен әм дина хԝә бьдьн, чь дьбежьн һьнә мәрьв жьн йан мере кʹижана бунә Шәʹде Йаһоԝа:

•   «Шәш салед пешьн, малбәта мәда тʹьме шәрʹ у дәʹԝ бун. Ле чахе Ивети бу Шәʹда Йаһоԝа, әԝе дәстпекьр дьһа һʹьзкьрьне у сәбьре бьдә кʹьфше. Бь сайа ԝе йәке малбәта мә һатә хԝәйкьрьне» (Клауер, Бразилйа).

•   «Чахе мере мьн Чанса дәстпекьр тʹәви Шәʹдед Йаһоԝа Кʹьтеба Пироз һин бә, әз мьԛабьли ԝе йәке бум, чьмки әз дьфькьрим кӧ әԝана малбәте һьлдьшиньн. Ле паше мьн фәʹм кьр кӧ Кʹьтеба Пироз али мә кьр, зәԝаща хԝә ԛәԝи кьн» (Агнес, Замбийа).

 Хьзмәтийеда әм нишани мәрьва дькьн кӧ чаԝа ширәтед Кʹьтеба Пироз дькарьн али ԝан бькьн

•   Чаԝа хԝәрʹа һәвалзәԝащ бьжберьн

•   Чаԝа сала пешьн дь зәԝащеда һәвдӧ фәʹм бькьн

•   Чаԝа хаси, хәзуре хԝәрʹа зьман бьвиньн

•   Чаԝа пʹәра рʹаст хәрщ кьн

•   Чаԝа нәкʹәвьнә шәрʹ-дәʹԝа

•   Чь щурʹәйи һин бьн, һәвдӧ бьбахшиньн

•   Чаԝа зарʹа мәзьн кьн

 Сәд һʹәйф ле щара ӧса дьԛәԝьмә. Мәсәлә, сала 1998 сәр һʹиме леколина кампанийа сосйали Софрәс, жь 20 зәԝаща 1, рʹасти проблема дьһат, чьмки мер йан жьн дьбу Шәʹде Йаһоԝа.

 Иса пешда гот кӧ шагьртед ԝи ԝе малбәтеда рʹасти шәрʹ-дәʹԝа бен (Мәтта 10:32-36). Тʹәрихзан, Ԝил Дьурант дьбежә «ԝәки дь империйа Рʹомеда, Мәсиһити дьһатә һʹәсабе сәбәбе һьлшандьна малбәте» a, у иро жи Шәʹдед Йаһоԝа ԝе йәкеда нәһәԛ дькьн. Ле бь рʹасти Шәʹдед Йаһоԝа ԝе йәкеда нәһәԛ ьн?

 Чахе Диԝана Мафед Мәрьва йа Әԝропайе пьрса Шәʹдед Йаһоԝа кӧ йан чь әԝана малбәта һьлдьшиньн, шеԝьр дькьр, гот «ԝәки гәләк щар мәʹнийа шәрʹ-дәʹԝед малбәте әԝ ә, кӧ нәфәред ԝи нахԝазьн кӧ әԝ религийа хԝә ԛәбул бькә у сәр һʹиме баԝәрийа хԝә бьжи». Диԝан бәрдәԝам кьр гот кӧ: «Әԝ проблема һʹәму малбәта нә, ль кʹижанада нәфәред мале щурʹә-щурʹә религийа ԛәбул дькьн». b Ле һәла һе дәрәщед ӧсада жи Шәʹдед Йаһоԝа һәр тьшти дькьн кӧ ль гора ԝе тʹәмийа Кʹьтеба Пироз бьжин: «Жь бәр хьрабийева хьрабийе ль тʹӧ кәси нәкьн. . . . Чьԛас жь дәст ԝә те, тʹәви һʹәму мәрьва әʹдьлайийеда бьн.» (Рʹомайи 12:17, 18)

 Шәʹдед Йаһоԝа ԝе тʹәмийа Кʹьтеба Пироз һьлдьдьн һʹәсаб ль кʹидәре те готьне ԝәки һәвалзәԝащ гәрәке «баԝәрмәнде Хӧдан бә», демәк әндәме жь религийа ԝи бә (1 Корьнтʹи 7:39). Әԝ ширәта Кʹьтеба Пироз бь билани йә. Мәсәла дь Журнала дәрһәԛа Малбәт у Зәԝаще йа сала 2010 дьһатә готьне, ԝәки «мер у жьнед, религийа әʹдәт у баԝәрийа кʹижани йәкә», дьһа баш һәвдӧ фәʹм дькьн. c

 Ле Шәʹдед Йаһоԝа, әндәмед тʹәшкиләта хԝә һелан накьн кӧ жь жьн йан мере хԝә бьԛәтьн йед кӧ нә Шәʹдед Йаһоԝа нә. Кʹьтеба Пирозда те готьне: «Һәгәр жьна бьраки нәбаԝәр бә у бьхԝазә тʹәви ԝи бьминә, бьра ԝе бәрнәдә. У жьнәкә кӧ мере ԝе нәбаԝәр бә у әԝ бьхԝазә тʹәви ԝе бьминә, бьра жь ԝи нәԛәтә» (1 Корьнтʹи 7:12, 13). Шәʹдед Йаһоԝа пәй рʹебәрийа ԝе ширәте дьчьн.