Шәʹдед Йаһоԝа рʹожа буйине дәрбаз накьн, чьмки заньн ԝәки әв щәжьн Хԝәде хԝәш найе. Рʹаст ә Кʹьтеба Пирозда рʹастә-рʹаст найе готьне, кӧ рʹожа буйине дәрбаз нәкьн, ле әԝ али мә дькә, ԝәки пебьһʹәсьн кӧ ньһерʹандьна Хԝәде сәр ве йәке чь щурʹәйи йә. Ԝәрен әм чар тьшта у ӧса жи принсипед Кʹьтеба Пироз шеԝьр кьн, кʹижан кӧ ве пьрсева гьредайи нә.

1.   Щәжьна рʹожа буйине пʹутпʹарьстийева гьредайи йә. Ль гора леколинәке, һьнә кәс баԝәр дькьн, ԝәки ԝәʹде рʹожа буйина мерьв «рʹӧһʹед хьраб дькарьн һʹьщуми сәр ԝи бькьн», ле һәрге «һәвалед ԝи кʹеләка ԝи нә у ԝи бьмбарәк дькьн, бь ве йәке әԝана ԝи дьпарезьн», «Funk & Wagnalls Standard Dictionary of Folklore, Mythology, and Legend». Кʹьтебәкеда «The Lore of Birthdays» те готьне, ԝәки бәре «ньвисандьна рʹожа буйине гәләк фәрз бу, чьмки сәр һʹиме ве йәке һороскоп дьһатә сазкьрьне», кʹижан кӧ пʹарәкә «стәйрнасийе бу». Ԝедәре ӧса жи дьһатә готьне, кӧ ль гора баԝәрийа щьмәʹте, мумед кӧ ԝәʹде рʹожа буйине ведьхьн, ԛәԝата сербазийе ԝанда һәйә, кӧ дькарьн хԝәстьнед мәрийа биньн сери.

    Кʹьтеба Пироз сущдар дькә сербазийе, кʹочʹәктийе у тьштед дьн, чь кӧ ве йәкева гьредайи нә (Ԛануна Дӧщари 18:14; Галати 5:19-21). Мәʹник кӧ чьрʹа Хԝәде Бабилона бәре кʹӧта кьр әԝ бу, кӧ бьнәлийед ԝи шәһәри стәйрнасийева мьжул дьбун, чь кӧ пʹарәкә сербазийе бу (Ишайа 47:11-15). Шәʹдед Йаһоԝа һʹиме һʹәму әʹйд-ԛәйда һур бь һур леколин накьн, ле чахе Хәбәра Хԝәде дәрһәԛа ве йәке рʹебәрийа зәлал дьдә, әм пьшт гӧһе хԝәва навежьн.

2.   Мәсиһийед ԛьрʹна йәке рʹожа буйине дәрбаз нәдькьрьн. Енсиклопедийәкеда «The World Book Encyclopedia» те готьне, кӧ Мәсиһийед ԛьрʹна йәке, дәрбазкьрьна рʹожа буйине һʹәсаб дькьрьн ча әʹдәте пʹутпʹарьста. Жь Кʹьтеба Пироз те кʹьфше, кӧ шагьртед Иса у мәрьвед дьн кʹижана кӧ әԝи һин дькьр, бона һʹәму Мәсиһийа мәсәлә һиштьн (2 Тʹесалоники 3:6).

3.   Мәсиһи гәрәке тʹәне щәжьнәке дәрбаз кьн, әв һәйә нә кӧ рʹожа буйине, ле рʹожа мьрьна Иса Мәсиһ (Луԛа 22:17-20). Әв йәк әʹщебмайи нинә, чьмки Кʹьтеба Пирозда те готьне, кӧ «рʹожа мьрьне жь рʹожа буйине четьр ә» (Ԝаиз 7:1). Хьлазийа әʹмьре хԝәйи сәр әʹрде, Иса бәр чʹәʹве Хԝәде навәки баш һишт, ләма жи рʹожа мьрьна ԝи, жь рʹожа буйина ԝи четьр ә (Ибрани 1:4).

4.   Кʹьтеба Пирозда тʹӧ щики найе готьне, кӧ кәсәк жь хьзмәткʹаред Хԝәде рʹожа буйине дәрбаз кә. Ле әм нькарьн бежьн, ԝәки ньвискʹаред Кʹьтеба Пироз дьбәкә бир кьрьн дәрһәԛа ве йәке бьньвисьн, чьмки Кʹьтеба Пирозда дәрһәԛа дӧ дәрәщед рʹожа буйине те готьне, кʹижан кӧ әԝан мәрьва дәрбаз дькьр, йед кӧ Хԝәде нәдьһʹәбандьн. У һәр дӧ дәрәщада жи әв щәжьн алийе нәбашда әʹйанкьри нә (Дәстпебун 40:20-22; Марԛос 6:21-29).

 Шәʹдед Йаһоԝа мина һʹәму де-бавед баш, тʹьме һʹьзкьрьне зарʹед хԝәрʹа дьдьнә кʹьфше. Мәсәлә, әԝана пʹешкʹеша дьдьнә зарʹа у ԝана тʹәвайи тʹоп дькьн, ԝәки әԝана ԝәʹде хԝә баш дәрбаз кьн у шабуне бьстиньн. Әԝана чʹәʹв дьдьнә Хԝәде, кʹижан кӧ тьштед ԛәнщ дьдә зарʹед хԝә (Мәтта 7:11). Чаԝа жь гьлийе зарʹед Шәʹдед Йаһоԝа те кʹьфше, әԝана тʹӧ тьштида кемасийе тʹәхмин накьн.

•   «Чахе тӧ пʹешкʹеше дьстини гава һивийе нини, һьнге тӧ дьһа ша дьби» (Теми, 12 сали).

•   «Рʹаст ә ԝәʹде рʹожа буйине әз пʹешкʹеша настиньм, ле де-баве мьн рʹожед дьнда пʹешкʹеша дьдьнә мьн у әв йәк шабунәкә гәләк мәзьн мьнрʹа тинә, чьмки гәләк мьн хԝәш те, чахе ньшкева пʹешкʹеша дьдьнә мьн» (Грегори, 11 сали).

•   «Һун дьфькьрьн, ԝәки дәһә дәԛед ԝәʹдәдәрбазкьрьне, чәнд тотьк у кʹьлам, әв һәйә щәжьн? Һәрге һун дьхԝазьн бьньһерʹьн, кӧ щәжьна баш чь йә, ԝәрен мала мьн» (Ерик, 6 сали).