Әз һатьмә буйине Калгари Албертайеда (Канада). Әз вьрʹни бум чахе де-баве мьн жь һәв ԛәтийан у дийа мьн әз һьлдам чу мала баве хԝә. Кальк-пирьке мьн әз у дийа мьн гәләк һʹьз дькьрьн, у әз зарʹәкә бәхтәԝар бум. Һʹәта ньһа әз зарʹотийа хԝә бь шабун тиньм бира хԝә.

 Чахе әз бумә һʹәфт сали, жийина мьн бь тʹәмами һатә гӧһастьне, чьмки һьнге дийа мьн диса гьһиштә баве мьн у әм дәрбази Сент-Луйисе бун (Мисури, Дәԝләтед Йәкбуйи). Зутьрәке мьн дит ԝәки баве мьн зәʹф зӧлм ә. Мәсәлә, чахе рʹожа пешийе әз жь мәкʹтәбе вәгәрʹийамә мал у баве мьн пеһʹәсийа кӧ ԝедәре зарʹа зордари мьн кьрьбун, ле мьн щаба ԝан нәдабу, әԝ гәләк һерс кʹәт у жь ван ԛайимтьр мьн хьст. Әв дәрәщә мьнрʹа бу дәрс, у һʹәфт салийа хԝәда мьн дәстпекьр тʹәви зарʹа бькʹәвьмә нав шәрʹ-дәʹԝа.

 Жь бо хәйсәте баве мьни һерс, хәйсәте дийа мьн жи гьран бьбу, у һәр гав мала мәда шәрʹ-дәʹԝ бу. Йанздәһ салийа хԝәда мьн дәстпекьр зәʹф ичке вәхԝьм у наркотикайе бьдьмә хәбате. Чьԛас дьчу әз дьбумә мәрьвәки дьһа һерс у тʹьме дькʹәтьмә нав шәрʹ-дәʹԝе кʹуче. Чахе мьн мәкʹтәб хьлаз кьр, әз ида мәрьвәки гәләк зӧлм бум.

 Чахе әз бумә 18 сали, әз кʹәтьмә нава Әскәрийа Бәʹре йа Дәԝләтед Йәкбуйи. Ԝедәре әз һин бум мәрьва бькӧжьм. Паши пенщ сала әз жь ԝедәре дәркʹәтьм у кʹәтьмә заньнгәһәке, ԝәки психоложийайе һин бьм. Нета мьн әԝ бу кӧ Бийуройа Лепьрсинед Федералда бьхәбьтьм. Мьн һинбуна хԝә Дәԝләтед Йәкбуйида дәстпекьр, ле чахе әз дәрбази Канадайе бум, ԝедәре бәрдәԝам кьр.

 Ԝәʹде һинбуна мьнә заньнгәһеда әз бь тʹәмами һьндава мәрьвада дьлтәнг бум. Мәрьв хԝәһʹьз бун у тʹәне дәрһәԛа хԝә дьфькьрин, нета жийине тʹӧнә бу у проблемед инсанәте жи нәсафикьри дьман. Мьн ԛә баԝәр нәдькьр, ԝәки мәрьв бькарьбьн һʹале дьнйайе баш кьн.

 Нета жийина мьн тʹӧнә бу, ләма жи мьн дәстпекьр зәʹф ичке вәхԝьм, наркотикайе бьдьмә хәбате, пәй пʹәра кʹәвьм у бенамусийе жи бькьм. Жь ԝәʹдәдәрбазкьрьнәке әз дьчумә сәр йәкә дьн, у жь жьнәке дьчумә бал йәкә дьн. Бь сайа һинбуна мьнә әскәрийе, әз дьһа хԝәда баԝәр бум у гәләк щар дькʹәтьмә нав шәрʹ-дәʹԝа. Әз дьфькьрим кӧ әз хԝәха дькарьм сафи кьм, кӧ чь рʹаст ә у чь нәрʹаст ә. Һьм жи гава бь ньһерʹандьна мьн кәсәк һьндава йәки дьн нәһәԛ бу, мьн мьԛабьли ԝи шәрʹ дькьр. Ле бь рʹасти, әз бьбумә диле зордарийе.

 Щарәке әз у һәвале мьн бьн һʹӧкӧме наркотикайеда бун у мә кʹохе бьнәʹрдда марихуана бона фьротане һазьр дькьр. Һьнге һәвале мьн пьрс да мьн, һәла әз Хԝәде баԝәр дькьм йан на. Мьн готе: «Һәрге Хԝәде йә мәʹнийа һʹәму кӧл-дәрда, әз нахԝазьм дәрһәԛа ԝи бьзаньбьм жи!» Рʹожа дьн чахе әз һатьм сәр хәбата хԝәйә тʹәзә, һәвал-хәбатчики кӧ Шәʹде Йаһоԝа бу, жь мьн пьрси: «Ча тӧ дьфькьри, мәʹнийа һʹәму кӧл-дәрда Хԝәде йә?» Әз гәләк әʹщебмайи мам, чахе әԝи һәма әԝ пьрс да мьн, ләма жи мьн хԝәст хәбәрдане бәрдәԝам кьм. Нава шәш мәһада мә тʹәви һәв гәләк шеԝьр дькьр у әԝи щабед һʹәму пьрсед мьн бь Кʹьтеба Пироз дьда.

 Һьнге мьн тʹәви дәргистийа хԝә дьжит, ле әԝе нәдьхԝәст тʹӧ тьшти пебьһʹәсә дәрһәԛа ԝе йәке, чь кӧ әз жь Кʹьтеба Пироз педьһʹәсийам. Щарәке рʹожа Ләʹде мьн жерʹа гот, ԝәки мьн Шәʹдед Йаһоԝа тʹәглифи мале кьрийә, кӧ тʹәви мә һинбуна Кʹьтеба Пироз дәрбаз кьн. Рʹожа дьн чахе әз жь хәбате вәгәрʹийамә мал, мьн дит ԝәки әԝе һʹәму һур-мур һьлдайә у чуйә. Әз жь мал дәркʹәтьм у гьрийам. Мьн дәстпекьр Хԝәдерʹа дӧа бькьм у лавайа ԝи бькьм, кӧ али мьн бькә. Әԝ щара пешьн бу, чахе дӧайе хԝәда мьн наве Хԝәде, Йаһоԝа һьлда (Зәбур 83:18).

 Дӧ рʹож шунда жьн-мерәки кӧ Шәʹдед Йаһоԝа бун, тʹәви мьн һинбуна Кʹьтеба Пироз щара пешьн дәрбаз кьрьн бь кʹьтеба Тӧ Дькари Һʹәта-Һʹәтайе Щьнәтеда сәр Әʹрде Бьжи. Паши чуйина ԝан, мьн бәрдәԝам кьр ве кʹьтебе бьхуньм, у һәма ве шәве мьн әв кʹьтеб хьлаз кьр. a Чь кӧ әз дәрһәԛа Йаһоԝа Хԝәде у кӧрʹе ԝи Иса Мәсиһ педьһʹәсийам, гәләк дьле мьн дьгьрт. Мьн фәʹм кьр ԝәки Йаһоԝа дьлрʹәʹм ә у дьле ԝи дьшәԝьтә гава әм дьчәрчьрьн (Ишайа 63:9). Илаһи чахе әз пеһʹәсийам кӧ Хԝәде мьн һʹьз дькә у ԝәки Кӧрʹе ԝи жийина хԝә бона мьн кьрийә ԛӧрбан, әв дьһа сәр мьн һʹӧкӧм бу (1 Йуһʹәнна 4:10). Әз баԝәр бум ԝәки Йаһоԝа һьндава мьнда сәбьр дайә кʹьфше, чьмки «нахԝазә тʹӧ кәс ӧнда бә, ле дьхԝазә ԝәки һʹәму жь гӧнәкьрьне вәгәрʹьн» (2 Пәтрус 3:9). Мьн тʹәхмин дькьр ԝәки Йаһоԝа мьн бәрбь хԝә дькʹьшинә (Йуһʹәнна 6:44).

 Һәма жь ԝе һʹәфтийе мьн дәстпекьр һәрʹьм сәр щьватед Шәʹдед Йаһоԝа. Пʹорʹе мьн дьреж бун, мьн гӧһар дькьрә гӧһе хԝә у әз әʹщеб дьһатьмә хане. Ле Шәʹдед Йаһоԝа әз ӧса ԛәбул кьрьм, те бежи әз мәрьве ԝан бум у ԝана гәләк ԝәʹдә әз нәдитьбум. Әԝана һьндава мьнда ӧса хԝә данә кʹьфше чаԝа Мәсиһийед рʹаст. Мьн хԝә ӧса тʹәхмин кьр, те бежи вәгәрʹийамә мала кальк-пирьке хԝә, һәла һе жь ве щики баштьр жи.

 Зутьрәке, бь сайа принсипед Кʹьтеба Пироз мьн дәстпекьр жийина хԝә алийе башда бьгӧһезьм. Мьн пʹорʹе хԝә кӧрʹ кьр, тʹәрка жийина бенамуси, ичкәвәхԝарьна зедә у наркотикайе да (1 Корьнтʹи 6:9, 10; 11:14). Мьн дьхԝәст дьле Йаһоԝа ша кьм. Ләма жи чахе әз педьһʹәсийам, кӧ һьнә кьред мьн Хԝәде хԝәш найен, мьн тʹӧ щар хԝә һәԛ дәрнәдьхьст. Ле әве йәке дьле мьн дешанд у мьн хԝәрʹа дьгот: «Әз гәрәке ида ӧса нәкьм». Мьн дәрберʹа дәстпедькьр фькьр у рʹабун-рʹуньштьна хԝә бьгӧһезьм. Зутьрәке мьн тʹәхмин кьр, кӧ чахе ԛьрара Йаһоԝа тиньм сери, кʹарәкә мәзьн дьстиньм. Шәш мәһ паши дәстпекьрьна һинбуна Кʹьтеба Пироз, сала 1989-да, 29 Тирмәһе, әз һатьмә ньхӧмандьне у бумә Шәʹде Йаһоԝа.

 Кʹьтеба Пироз әз педа гӧһастьм. Бәре, гава кәсәк һьндава мьнда һәвалһʹьз нибу, мьн нькарьбу һерса хԝә контрол кьра. Ле ньһа әз ԛәԝате дьдьмә хәбате, сәва кӧ «тʹәви һʹәму мәрьва әʹдьлайийеда» бьм (Рʹомайи 12:18). Әв һʹәму тьшт бь сайа Йаһоԝа һатә стандьн. Әз гәләк жь Ԝи рʹази мә, ԝәки ԛәԝата Хәбәра ԝи у рʹӧһʹе пироз әз гӧһастьм (Галати 5:22, 23; Ибрани 4:12).

 Әз ида диле наркотикайе, зӧлмийе у хԝәстьнед бенамуси ниньм. Ле дәԝсе әз хирәт дькьм кӧ дьле Йаһоԝа Хԝәде ша кьм у бь дьл ԝирʹа хьзмәт кьм. Мәсәлә, әз али мәрийа дькьм кӧ Йаһоԝа нас кьн. Чәнд сал паши ньхӧмандьна хԝә, әз дәрбази ԝәлатәки дьн бум, кʹидәре кӧ һʹәԝщәтийа мьзгинвана һәбу, сәва кӧ мьзгинийа хере бәла кьм. Ида гәләк сал ә әз али мәрийа дькьм, кӧ Хԝәде нас кьн у дьвиньм чаԝа Кʹьтеба Пироз жийина ԝан жи алийе башда дьгӧһезә. Әв йәк шабуна мәзьн дькә дьле мьн. Әз ӧса жи гәләк бәхтәԝар ьм, кӧ дийа мьн жи бу Шәʹде Йаһоԝа, бь сайа ԝе йәке кӧ дьдит ԝәки мьн чаԝа жийина хԝә гӧһаст.

 Сала 1999-да Ел Салвадореда мьн мәкʹтәб хьлаз кьр, кʹижан кӧ ньһа те навкьрьне «Мәкʹтәба бона Мьзгинванед Пʹадшатийе». Ве мәкʹтәбеда мьн занәбун станд, у әз һин бум шьхӧле бәлакьрьна мьзгинийеда щабдарийе һьлдьм сәр хԝә, у ӧса жи ԝәки щьватеда шьхӧле шьвантийе бькьм у һин кьм. Ве сале, мьн ӧса жи кʹӧлфәтәкә дәлал Евгенийа нас кьр, у мә һәв станд. Тʹәвайи әм Гӧатәмалайеда ча хьзмәткʹаред һәртʹьм хьзмәт дькьн.

 Дәԝса кӧ жь жийина хԝә әʹщьз бьм, әз гәләк бәхтәԝар ьм. Бь сайа ԝе йәке кӧ мьн принсипед Кʹьтеба Пироз дьда хәбате, әз хьлаз бум жь дилтийа бенамусийе у зӧлмийе. Ньһа әʹмьре мьн бь һʹьзкьрьне у әʹдьлайе тʹьжә йә.