Әз Угандайеда һәрема Гомбайеда һатьмә буйине. Мәрьвед ԝедәре һʹәчʹи зәʹф кʹәсиб бун. Бажаре мәда лус тʹӧнә бу, ләма жи евара мә ләмпʹ ведьхьстьн.

 Де-баве мьн әʹрд бещәр дькьрьн. Әԝана жь Рԝандайе дәрбази Угандайе бьбун. Ԝана ԛаԝә у банан дьчандьн у жь банана ичкә йа ԝараги чедькьрьн, кʹижан кӧ ԝи щийи гәләк бәлабуйи бу. Де-баве мьн ӧса жи мьришк, бьзьн, хьнзир у чʹеләк хԝәй дькьрьн. Жь бо култура мә у щурʹе ширәткьрьна мә, мьн тʹьре гәрәке жьн һʹәму пьрсада гӧрʹа мере хԝәда бә у тʹӧ щар фькьред хԝә нәбежә.

 Чахе әз 23 сали бум дәрбази Рԝандайе бум. Ԝедәре әз тʹәви һәвалед хԝә дьчумә клубед рʹәԛасе. Әз гәләк щар дьчумә клубе, ләма жи хԝәйе ве клубе картәк да мьн, ԝәки бепʹәрә бькʹәвьме. Гәләк мьн хԝәш дьһат синәмед кӧ бь зӧлми у шәрʹа тʹьжә бун. Жь бо мәрьвед дәр-доре мьн у ԝәʹдәдәрбазкьрьна мьн, әз бумә йәки зӧлм, бенамус у ичкәһʹьз.

 Сала 2000-да мьн дәстпекьр тʹәви жьнәке бьжим, наве кʹижане бу Коластик Кабагԝира. Мәрʹа се зарʹ һатьнә буйине. Жь бьчʹуктайе әз ӧса һатьмә һинкьрьне, кӧ жь жьна хԝә дәʹԝа кьм, ԝәки һәрге әԝ тьштәки жь мьн һиви кә йан сьлав кә, гәрәке бькʹәвә сәр чока. Мьн ӧса жи дьгот ԝәки һʹәму һәбука мә, йа мьн ә у ча бьхԝазьм әзе ӧса жи бькьм. Гәләк щар әз шәв жь мал дәрдькʹәтьм у бәрбанге сьһʹәта сьсийа сәрхԝәш вәдьгәрʹийамә мал. Мьн дәри дьхьст у һәрге жьна мьн дәрәнг дәри вәкьра, мьн ле дькʹӧта.

 Һьнге әз мәзьне фирмәкә нобәдарийе бум у мьн пʹәред ԛальм дьстанд. Коластике гәләк щар мьнрʹа дьгот, кӧ әз тʹәви ԝе һәрʹьмә дера религийа Пенщийә һʹәсабе, чьмки әԝ дьфькьри кӧ ӧса әзе бемә гӧһастьне. Ле мьн нәхԝәст һәрʹьм. Һәла һе жи мьн дәстпекьр тʹәви жьнәкә дьн бьгәрʹьм. Жь бо зӧлми у бенамусийа мьн, Коластике һәр се зарʹед мә һьлда у чу мала баве хԝә.

 Рʹожәке, һәваләки мьни әʹмьрда мәзьн тʹәви мьн дәрһәԛа щурʹе әʹмьре мьн хәбәр да. Әԝи әз һелан кьрьм ԝәки һәрʹьм Коластике пашда биньм. Әԝи ӧса жи мьнрʹа гот, ԝәки зарʹед мьнә хԝәш һежайи ԝе йәке ниньн, кӧ бе бав мәзьн бьн. Ләма жи сала 2005-да мьн тʹәрка ичке да, жь йара хԝә ԛәтийам у жьна хԝә пашда ани. Сала 2006-да әм кʹәтьнә зәԝаща ԛануни. Ле әз һәла һе һьндава жьна хԝәда йәки зӧлм у хьраб бум.

 Сала 2008-да Шәʹдәки Йаһоԝа наве кʹижани Щойел бу, һатә мала мьн у мьн гӧһ дайе. Паши ԝе йәке Щойел чәнд мәһа тʹәви Шәʹдәки дьн, наве кʹижани Бонавентур бу, дьһатә мала мә у мә сәр һʹиме Кʹьтеба Пироз шеԝьр дькьр. Гәләк пьрсед мьн һәбун у ниве зәʹф жь кʹьтеба Әʹйанти бун. Мьн дьхԝәст ԝанарʹа избат кьм, ԝәки әԝана нәрʹаст ьн. Мәсәлә, мьн пьрс дьда ԝан, кӧ чаԝа әԝана дькарьн шьровәкьн, ԝәки әʹлаләта мәзьн ԝе сәр әʹрде бьжи, һәрге Әʹйанти 7:9-да ньвисар ә ԝәки әԝана «ль бәр тʹәхт [Хԝәде] у ԝи Бәрхи» Иса Мәсиһ сәкьни бун. Щойел бь сәбьр щаба пьрсед мьн дьда. Мәсәлә, әԝи мьнрʹа Ишайа 66:1 нишан кьр, кʹидәре Хԝәде дьбежә, ԝәки әʹрд «пʹепәлука льнге» ԝи йә. Демәк әʹлаләта мәзьн сәр әʹрде бәр тʹәхте Хԝәде сәкьнийә. Паше мьн Зәбур 37:29 хԝәнд, кʹидәре те готьне, ԝәки мәрьвед рʹаст ԝе һʹәта-һʹәтайе сәр әʹрде бьжин.

 Ахьрийе әз ԛайил бум ԝәки Кʹьтеба Пироз һин бьм. Бонавентур тʹәви мьн у Коластике һинбуна Кʹьтеба Пироз дәрбаз дькьр. Ԝәʹде һинбуна Кʹьтеба Пироз хԝәстьн щәм мьн пешда дьһат, кӧ әʹмьре хԝәда гӧһастьна бькьм. Әз һин бум ԛәдьре жьна хԝә бьгьрьм. Мьн ида нәдьхԝәст кӧ әԝ бькʹәвә сәр чока, гава тьштәки жь мьн бьхԝазә йан жи сьлав кә. Ӧса жи мьн ида нәдьгот, ԝәки һʹәму һәбука мә йа мьн ә. Мьн ӧса жи тʹәрка ԝан синәма да, кʹижан кӧ бь зӧлмийе тʹьжи бун. Һеса нибу ԝан гӧһастьна бькьм. Сәва ве йәке хԝәгьртьн у мьлукти лазьм бу.

 Чәнд сал пешийа ԝе йәке, мьн кӧрʹе хԝә Кристийан шандьбу Угандайе, ԝәки бал мәрьвед мә бьжи. Ле чахе мьн Ԛануна Дӧщари 6:4-7 хԝәнд, мьн фәʹм кьр ԝәки әз у жьна мьн бәр Хԝәде борщдар ьн, бона зарʹед хԝә хәм бькьн. Ӧса жи кӧ принсипед Хԝәде ԝана һин кьн. Әм гьшк ша бун чахе мә кӧрʹе хԝә пашда ани мал!

 Әз пеһʹәсийам ԝәки Йаһоԝа Хԝәдайе дьлрʹәʹм ә у баԝәр дькьм, ԝәки әԝи гӧнед мьнә бәре бахшандә мьн. Әз гәләк ша мә ԝәки Коластика жи тʹәви мьн Кʹьтеба Пироз һин дьбә. Мә жийина хԝә тʹәсмили Йаһоԝа кьр у сала 2010-да, 4 Кануна Пешьн әм һатьнә ньхӧмандьне. Ньһа ида әм итʹбарийа хԝә һәв тиньн у гәләк мә хԝәш те кӧ принсипед Кʹьтеба Пироз малбәта хԝәда бьдьнә хәбате. Жьна мьн гәләк ша йә, кӧ пәй хәбатерʹа әз дәрберʹа темә мал. Әԝ ӧса жи гәләк ԛимәт дькә әԝе йәке, кӧ әз бь ԛәдьр у ԛәнщ ьм һьндава ԝеда, ӧса жи кӧ мьн сафи кьр тʹәрка ичке бьдьм у хәйсәте хԝәйә сәрт бьгӧһезьм. Сала 2015-да әз һатьмә кʹьфшкьрьне ча рʹуспийе щьвате. Жь пенщ зарʹед мә, сьсе ида ньхӧманди нә.

 Чахе мьн дәстпекьр тʹәви Шәʹдед Йаһоԝа Кʹьтеба Пироз һин бьм, мьн һинкьрьнед ԝана чʹәʹвгьрти баԝәр нәдькьр. Гәләк мьн хԝәш дьһат, кӧ әԝана щаба пьрсед мьн бь Кʹьтеба Пироз дьдан. Мьн у Коластике фәʹм кьр, ԝәки йед кӧ хԝә һʹәсаб дькьн хьзмәткʹаред Хԝәдайе рʹаст, гәрәке бь принсипед ԝи бьжин, нә кӧ тʹәне ԝан норма биньн сери, кʹижан кӧ ԝанарʹа дәст дьдә. Әз гәләк жь Йаһоԝа рʹази мә, ԝәки Әԝи әз бәрбь хԝә кʹьшандьмә. У әз ньһа пʹарәкә малбәта ԝийә рʹӧһʹани мә. Әз чахе дәрһәԛа әʹмьре хԝәйи бәре дьфькьрьм, баԝәр дькьм ԝәки һәр мәрьвәки дьлсах дькарә бь аликʹарийа Йаһоԝа бе гӧһастьне у Ԝи хԝәш бе.