Малбәта мә жь Тонгайе йә. Әԝ ԝәлат кӧ жь 170 гьрава йә, жь Окйануса Мәзьн алийе башура рʹоавайе йә. Тонгайеда мә кʹәсибийеда дьжит, нә тока мә һәбу, нә жи әʹрәбә. Ле ава мә һәбу у мә чәнд мьришк хԝәй дькьр. Ԝәʹде һесабуна жь мәкʹтәбе мьн тʹәви дӧ бьред хԝә аликʹари дьда баве хԝә, кӧ әʹбура малбәте бькьн. Демәк мә банан, батат у диса чәнд емишед дьн дьчанд у дьфрот. Мә бь сайа ве йәке әʹбура малбәта хԝә дькьр, чьмки хәбата баве мьнә һәртʹьм тʹӧнә бу. Мина мәрьвед Тонгайе, малбәта мә жи Кʹьтеба Пироз гәләк ԛимәт дькьр у тʹьме дьчунә дере. Әм дьфькьрин кӧ тʹәне һьнге ԝе жийина мә баш бә, һәрге әм дәрбази ԝәлатәки дәԝләти бьн.

 Чахе әз 16 сали бум, хале мьн али малбәта мә кьр, кӧ әм дәрбази Калифорнйайе бьн, (Дәԝләтед Йәкбуйи). Култура ԝан жь култура мә гәләк щӧдә дьбу, чь кӧ бона мә чәтьн бу! Рʹаст ә алийе аборийеда һʹале мә һʹәвәки пʹак бу, ле мә мьһаләкә кʹәсибда дьжит, кʹидәре кӧ зӧлми, наркотик у ԛачахти бәлабуйи бу. Мә евара тʹьме дәнге гӧләкьрьне дьбьһист, у щинаред мә ниве зәʹф бьн тьрседа дьжитьн. Гәләк мәрьвед мьһала мә пе чʹәка дьчун дьһатьн сәва кӧ хԝә бьпарезьн, илаһи ԝәʹде шәрʹ-дәʹԝа. Ԝәʹде шәрʹәки ӧса, әз һатьмә гӧләкьрьне у һʹәта ньһа патрон синге мьнда майә.

 Чахе әз мәкʹтәбеда һин дьбум, мьн дьхԝәст бьбума мина һәвалед хԝә. Әз һеди-һеди педа дькʹәтьмә нава ԝәʹдәдәрбазкьрьнед нәщайиз, ичкәвәхԝарьна зедә, зӧлмийе у наркотикайе. Ԝәʹдә шунда әз кокайинева һатьмә гьредане. Сәва кӧ наркотикайе бькʹьрʹьм, мьн дәстпекьр дьзийе бькьм. Рʹаст ә малбәта мьн тʹьме дьчу дере, ле тʹӧ кәси мьнрʹа нәдьгот, кӧ әз гәрәке нәкʹәвьмә бәр байе һәвалед хьраб. Гәләк щар жь бо кьред хԝәйә зӧлм әз дьһатьмә гьртьне. Әз педа кʹәтьбумә бәлайе! Ахьрийе әз кʹәтьмә кәле.

 Сала 1997, щарәке чахе әз һе кәледа бум, гьртики дәсте мьнда Кʹьтеба Пироз дит. Ԝе рʹоже Щәжьна Рʹожа Буйина Иса бу, у бона мәрьвед Тонгайе әв рʹож пироз бу. Әԝи жь мьн пьрси, һәла әз заньм кӧ бь рʹасти Кʹьтеба Пироз чь дьбежә дәрһәԛа буйина Мәсиһ. Ле мьн дәрһәԛа ве йәке тʹӧ тьшт ньзаньбу. Әԝи жь Кʹьтеба Пироз мьнрʹа дәрһәԛа буйина Мәсиһ хԝәнд, у мьн дит ԝәки гәләк тьштед кӧ Щәжьна Буйина Мәсиһва гьредайи нә, Кʹьтеба Пирозда найе готьне (Мәтта 2:1-12; Луԛа 2:5-14). Һʹьше мьн чу у мьн хԝәст һе зедә дәрһәԛа Кʹьтеба Пироз пебьһʹәсьм. Әв мәрьв һәр һʹәфтийе дьчу щьватед Шәʹдед Йаһоԝа, кʹижан кӧ кәледа дәрбаз дьбун, у мьн сафи кьр әз жи тʹәви ԝи һәрʹьм. Ԝедәре ԝана кʹьтеба Әʹйанти шеԝьр дькьр. Рʹаст ә мьн рʹьнд фәʹм нәдькьр чь кӧ ԝана дьгот, ле мьн тедәрхьст ԝәки һʹәму тьштед кӧ әԝана һин дькьн сәр һʹиме Кʹьтеба Пироз ьн.

 Чахе Шәʹдед Йаһоԝа мьнрʹа готьн, кӧ дькарьн һинбуна Кʹьтеба Пироз тʹәви мьн дәрбаз кьн, әз бь шабун ԛайил бум. Әз щара пешьн жь Кʹьтеба Пироз пеһʹәсийам, кӧ әʹрд ԝе бьбә щьнәт (Ишайа 35:5-8). Мьн фәʹм кьр кӧ һәрге әз дьхԝазьм ль Хԝәде хԝәш бем, әз гәрәке гӧһастьнед мәзьн жийина хԝәда бькьм. Һьм жи һәрге әз тʹәрка хәйсәте хԝәйә хьраб нәдьм, Йаһоԝа ԝе изьне нәдә мьн Щьнәтеда бьжим (1 Корьнтʹи 6:9, 10). Мьн сафи кьр һерса хԝә контрол кьм, ӧса жи щьхаре, ичкәвәхԝарьна зедә у наркотикайе бьтʹәрькиньм.

 Сала 1999, пешийа кӧ әз бьһатама азакьрьне, дәԝләте әз жь кәле дәрбази зома емигранта кьрьм. Саләке зедәтьр әз тʹәви Шәʹдед Йаһоԝа текли нәдьбум, ле диса жи мьн бәрдәԝам дькьр гӧһастьна нав хԝәда бькьм. Сала 2000-да һʹӧкӧмәта Дәԝләтед Йәкбуйи изьн нәда мьн дәԝләта ԝанда бьминьм, ләма жи әз шандьмә Тонгайе.

 Гава әз вәгәрʹийамә Тонгайе, мьн Шәʹдед Йаһоԝа гәрʹийа у диса һинбуна Кʹьтеба Пироз дәстпекьр. Чь кӧ әз педьһʹәсийам гәләк мьн хԝәш дьһат. Гәләк сәр мьн һʹӧкӧм бу чахе мьн дит, ԝәки һʹәму һинкьрьнед Шәʹдед Йаһоԝа ча Дәԝләтед Йәкбуйида ӧса жи дәԝләта мьнда, сәр һʹиме Кʹьтеба Пироз ьн.

 Һәрема мәда баве мьн йәки навдәнг бу, чьмки дереда щабдарийа ԝийә мәзьн һәбу. Ләма жи пешийе малбәта мьн хԝәш нәһат у әԝана әʹщьз бун, кӧ әз тʹәви Шәʹдед Йаһоԝа һәвалтийе дькьм. Ле ԝәʹдә шунда де-баве мьн ша дьбун, чахе дьдитьн, ԝәки принсипед Кʹьтеба Пироз али мьн дькьн, жийина хԝә алийе башда бьгӧһезьм.

 Ле гӧһастьна лапә чәтьн бона мьн әԝ бу, кӧ тʹәрка кавайе бьдьм, чь кӧ мьләте мә зәʹф вәдьхԝьн. Гәләк меред Тонгайе һәр һʹәфти бь сьһʹәта рʹудьньштьн у кава вәдьхԝарьн, кʹижан кӧ жь кʹока бибәре һазьр дькьрьн. Чахе әз диса вәгәрʹийамә ԝәлате хԝә, мьн дәстпекьр һәр евар һәрʹьмә клуба кавайе, у мьн һаԛас вәдьхԝар кӧ һʹьше хԝә ӧнда дькьр. Әв проблем ве йәкева гьредайи бу, кӧ мьн тʹәви ԝан мәрьва һәвалти дькьр, кʹижана нормед Кʹьтеба Пироз һьлнәдьдан һʹәсаб. Ԝәʹдә шунда али мьн кьрьн кӧ фәʹм бькьм, ԝәки әз пе ԝан хәйсәтед хԝәйә хьраб Хԝәде беһӧрмәт дькьм. Ләма жи мьн жийина хԝәда гӧһастьн кьрьн, сәва кӧ Хԝәде хԝәш бем у бемә кʹәрәмкьрьне.

 Мьн дәстпекьр һәрʹьм сәр һʹәму щьватед Шәʹдед Йаһоԝа. Бь сайа һәвалтийа тʹәви мәрьвед кӧ хирәт дькьрьн дьле Хԝәде ша кьн, әз щерʹьбандьнада сьст нәдьбум. Сала 2002-да әз һатьмә ньхӧмандьне у бумә Шәʹде Йаһоԝа.

 Әз гәләк рʹази мә бона сәбьра Хԝәде һьндава мьнда. Кʹьтеба Пироз дьбежә: «Хӧдан . . . Бь думька дьреж ль ԝә сәбьр дькә, нахԝазә тʹӧ кәс ӧнда бә, ле дьхԝазә ԝәки һʹәму жь гӧнәкьрьне вәгәрʹьн» (2 Пәтрус 3:9). Хԝәде зудава дькарьбу әв дьнйа хьраб кʹӧта кьра, ле әԝи ԝәʹдә да сәва кӧ мәрьвед мина мьн бькарьбьн бьбьнә достед ԝи. Дьле мьн бь шабуне тʹьжә дьбә гава әз дьфькьрьм, ԝәки Йаһоԝа пе мьн дькарә али мәрьвед дьн жи бькә, кӧ бьбьнә достед ԝи.

 Бь аликʹарийа Йаһоԝа әз ида хԝә накьмә бәлайе у һин бумә хԝә контрол кьм. Бәре мьн дьзи дькьр, ԝәки наркотикайе бькʹьрʹьм, чь кӧ әз бәрбь мьрьне дьбьрьм. Ле ньһа әз ида аликʹарийе дьдьмә мәрьва, ԝәки әԝана жи бьбьнә достед Йаһоԝа. Бь сайа Шәʹдед Йаһоԝа әз рʹасти Теайе һатьм, йа кӧ бу жьна мьнә һʹьзкьри. Ньһа кӧрʹе мәйи бьчʹук һәйә, у әм гәләк бәхтәԝар ьн. Әм тʹәвайи мәрийарʹа дәрһәԛа гӧмана жийина һʹәта-һʹәтайе гьли дькьн, кʹижан кӧ Кʹьтеба Пироз соз дьдә.