Мәрьвед пешьн йед кӧ гӧнә кьрьн, Адәм у Һеԝа бун. Чахе әԝана мьԛабьли Хԝәде дәркʹәтьн, у «жь дара ԛәнщи у хьраби наскьрьне» хԝарьн, ԝана гӧне пешьн кьрьн (Дәстпебун 2:16, 17; 3:6; Рʹомайи 5:19). a Йаһоԝа готә Адәм у Һеԝайе, ԝәки жь ԝе даре нәхԝьн, чьмки ӧса Әԝи дьда кʹьфше, ԝәки һʹӧкӧмәти йа ԝи йә у тʹәне әԝ дькарә сафи кә, чь йә ԛәнщи у чь йә хьраби. Ле чахе Адәм у Һеԝайе жь ве даре хԝарьн, ԝана ча бежи һʹӧкӧмәти һьлданә дәсте хԝә, у дәстпекьрьн хԝәха сафи кьн, чь йә ԛәнщи у чь йә хьраби. Бь ве йәке ԝана да кʹьфше, кӧ һʹӧкӧмәтийа Йаһоԝа инкʹар дькьн.

•  Чь щурʹәйи гӧне пешьн сәр Адәм у Һеԝайе һʹӧкӧм бу?

•  Чь щурʹәйи гӧне пешьн сәр мә һʹӧкӧм бу?

•  Гәло әм дькарьн жь гӧне пешьн аза бьн?

•  Ньһерʹандьна нәрʹаст дәрһәԛа гӧне пешьн

Адәм у Һеԝа жь бо гӧне хԝә кал-пир бун у мьрьн. Ԝана һәләԛәтийа хԝә тʹәви Хԝәде, сьһʹәт-ԛәԝата хԝәйә баш, у ӧса жи жийина һʹәта-һʹәтайе сәр әʹрде, ӧнда кьрьн (Дәстпебун 3:19).

Гӧне Адәм у Һеԝайе дәрбази сәр зӧрʹәта ԝан бу. Әԝ ча бежи мина нәхԝәшийа генетики дәрбази сәр зарʹе ԝан бу (Рʹомайи 5:12). Ләма жи тʹәмамийа инсанәте «гӧнәкʹар» b ьн, демәк нәԛәданди нә, жь бо чь жи кьред нәрʹаст дькьн (Зәбур 51:5; Әфәси 2:3).

Жь бо гӧне кӧ дәрбази сәр мә буйә, әм нәхԝәш дькʹәвьн, кал-пир дьбьн у дьмьрьн (Рʹомайи 6:23). Хенщи ве йәке, рʹуйе шашийед хԝә йан жи шашийед мәрьвед дьн әм дьчәрчьрьн (Ԝаиз 8:9; Аԛуб 3:2).

Бәле. Кʹьтеба Пироз дәрһәԛа Иса дьбежә, ԝәки ԛӧрбанбуна ԝи бу «мәщала бахшандьна гӧнед мә» (1 Йуһʹәнна 4:10). Ԛӧрбанбуна Иса мәщале дьдә мә, кӧ жь гӧна аза бьн, әʹмьре һʹәта-һʹәтайе у сьһʹәт-ԛәԝата баш бьстиньн, йа кӧ Адәм у Һеԝайе ӧнда кьрьн (Йуһʹәнна 3:16). c

Ньһерʹандьна нәрʹаст: Әм рʹуйе гӧне пешьнда, тʹӧ щар нькарьн һәләԛәтийа незик тʹәви Хԝәде саз кьн.

Избатийа рʹаст: Хԝәде рʹуйе кьред Адәм у Һеԝайеда, мә нәһәԛ накә. Әԝ занә әм гӧнәкʹар ьн, ләма жи әԝ жь мә дәʹԝа накә ве йәке бькьн, чь кӧ әм нькарьн (Зәбур 103:14). Рʹаст ә, әм жь бо гӧна дьчәрчьрьн, ле диса жи мәщала мә һәйә һәләԛәтийа незик тʹәви Хԝәде саз кьн (Мәтʹәлок 3:32).

Ньһерʹандьна нәрʹаст: Ньхӧмандьн жь гӧне пешьн аза дькә, ләма жи дәргуш гәрәке бенә ньхӧмандьне.

Избатийа рʹаст: Рʹаст ә бона кӧ әм хьлаз бьн ньхӧмандьн гавәкә фәрз ә, ле бе баԝәрийа һьндава ԛӧрбанбуна Иса, мәрьв нькарә жь гӧна аза бә (1 Пәтрус 3:21; 1 Йуһʹәнна 1:7). Баԝәрийа рʹаст сәр һʹиме занәбуна Кʹьтеба Пироз ә. Әм заньн, ԝәки щәм дәргуша баԝәри тʹӧнә йә. Ләма жи Кʹьтеба Пироз ньхӧмандьна дәргуша ԛәбул накә. Мәсиһийед бәре жи, нә кӧ зарʹотийеда дьһатьнә ньхӧмандьне, ле чахе ида мәзьн бун, у баԝәрийа ԝан һьндава Хәбәра Хԝәде һәбу (Кʹаред Шандийа 2:41; 8:12).

Ньһерʹандьна нәрʹаст: Рʹуйе ве йәкеда кӧ Һеԝайе жь дара ԛәдәхәкьри хԝар, Хԝәде ньфьрʹ ль кʹӧлфәта кьр.

Избатийа рʹаст: Хԝәде ньфьрʹ нә кӧ кʹӧлфәта кьр, ле ньфьрʹ ԝи кьр, кʹе кӧ Һеԝайе хапанд, ԝәки гӧнә бькә, демәк «әԝ мәʹре бәре бу, кӧ жерʹа Мирещьн у Шәйтʹан дьбежьн» (Әʹйанти 12:9; Дәстпебун 3:14). У Хԝәде бона гӧне пешьн, һе зедә Адәм нәһәԛ кьр, нә кӧ Һеԝайе (Рʹомайи 5:12).

Чьма Хԝәде готә Адәм, кӧ әԝ сәрԝертийе сәр жьна хԝә бькә? (Дәстпебун 3:16). Чахе Хԝәде әԝ гьли гот, әԝи нәдьхԝәст бьгота, ԝәки изьна Адәм һәйә жьна хԝә ньмьз кә. Ле әԝи дьхԝәст бьгота, ԝәки әв гӧнә, ԝе хьраб сәр һәләԛәтийа мер у жьна һʹӧкӧм бә. Хԝәде жь мера дәʹԝа дькә, кӧ әԝана жьна хԝә һʹьз бькьн у ԛимәт кьн, у ӧса жи ԛәдьре һʹәму кʹӧлфәта бьгьрьн (Әфәси 5:25; 1 Пәтрус 3:7).

Ньһерʹандьна нәрʹаст: Гӧне пешьн әԝ бу, кӧ мәрьвед пешьн кʹәтьнә һәләԛәтийа сексуали.

Избатийа рʹаст: Һәләԛәтийа сексуал нькарьбу бьһата һʹәсабе гӧне пешьн, чьмки:

• Чахе Хԝәде готә Адәм жь дара ԛәнщи у хьраби наскьрьне нәхԝьн, ԝи чахи һе жьна Адәм тʹӧнә бу (Дәстпебун 2:17, 18).

• Хԝәде Адәм у Һеԝайерʹа гот: «Шин бьн у ль һәв зедә бьн», демәк зарʹа биньн (Дәстпебун 1:28). Ԝе нәрʹаст буйа, һәрге Хԝәде әԝана ве йәкеда нәһәԛ кьрана, чь кӧ әԝи хԝәха готьбу ԝан.

• Адәм у Һеԝайе башԛә-башԛә гӧнә кьрьн; пешийе Һеԝайе гӧнә кьр, паше жи мере ԝе (Дәстпебун 3:6).

• Кʹьтеба Пирозда те готьне, ԝәки һәләԛәтийа сексуали ортʹа жьн у мере кӧ бь ԛануни һәврʹа зәԝьщи нә, тьштәки нормал ә (Мәтʹәлок 5:18, 19; 1 Корьнтʹи 7:3)