«Кʹьлитед Пʹадшатийа Әʹзмана» бь симболик тенә һʹәсабе изьна кӧ кәсәкирʹа һатийә дайине, ԝәки мәрьварʹа рʹе вәкә, сәва әԝана «бькʹәвьнә Пʹадшатийа Хԝәде» (Мәтта 16:19; Кʹаред Шандийа 14:22). a Иса «кʹьлитед Пʹадшатийа Әʹзмана» да Пәтрус. Демәк Пәтрусрʹа изьн һатә дайине, кӧ мәрьварʹа гьли кә ԝәки чаԝа мәрьвед амьн дькарьн рʹӧһʹе пироз бьстиньн у бькʹәвьнә Пʹадшатийа Хԝәде.

Әв кʹьлит сәва кʹе бун?

Пәтрус бь һʹӧкӧмәтийа жь Хԝәде карьбу бона се кʹомед мәрийа рʹе вәкә, кӧ бькʹәвьнә Пʹадшатийа Хԝәде:

1. Бона Щьһуйа у йед кӧ религийа Щьһуйа ԛәбул кьрьн. Һьнә ԝәхт паши мьрьна Иса, Пәтрус мәрьвед кӧ хԝә ль религийа Щьһуйа дьгьртьн һелан кьр, ԝәки Иса ԛәбул кьн, чьмки Хԝәде әԝ бьжарт кӧ Пʹадшатийа әʹзменда сәрԝертийе бькә. Пәтрус ԝанарʹа шьровәкьр, ԝәки чь лазьм ә бькьн кӧ хьлаз бьн. Ӧса әԝи ԝанарʹа рʹе вәкьр, кӧ бькʹәвьнә Пʹадшатийа Хԝәде. Бь сайа ве йәке һʹәзара мәрьв «хәбәред ԝи ԛәбул кьрьн» (Кʹаред Шандийа 2:38-41).

2. Бона Самәрийа. Һьнә ԝәʹдә шунда Пәтрус һатьбу шандьне бал Самәрийа. b Әԝи диса жи кʹьлитәкә Пʹадшатийе да хәбате, чахе әԝ у Йуһʹәннайе шанди «бона ԝан дӧа кьрьн кӧ Рʹӧһʹе Пироз бьстиньн» (Кʹаред Шандийа 8:14-17). Ӧса Самәрийарʹа мәщал вәбу, кӧ бькʹәвьнә Пʹадшатийе.

3. Бона Пʹутпʹарьста. Се сал нив паши мьрьна Иса, Хԝәде Пәтрусрʹа әʹйан кьр, ԝәки пʹутпʹарьст (Нәщьһу) жи дькарьн бькʹәвьнә Пʹадшатийа Хԝәде. Һьнге Пәтрус диса кʹьлитәк да хәбате. Демәк әԝи дәстпекьр ԝанарʹа мьзгинийе бәла кә у ӧса ча бежи дәри бәр ԝан вәкьр, кӧ рʹӧһʹе пироз бьстиньн, бьбьнә Мәсиһи, у ахьрийеда жи Пʹадшатийа әʹзманида сәрԝертийе бькьн (Кʹаред Шандийа 10:30-35, 44, 45).

Чь те һʹәсабе «бькʹәвьнә Пʹадшатийа Хԝәде»?

Әԝед кӧ «бькʹәвьнә Пʹадшатийа Хԝәде», ԝе тʹәви Иса сәрԝертийе бькьн. Кʹьтеба Пирозда һатийә пʹехәмбәртикьрьне, кӧ әԝана ԝе «сәр кʹӧрсийа рʹунен» у «ль сәр дьнйайе пʹадшатийе бькьн» (Луԛа 22:29, 30; Әʹйанти 5:9, 10).

Ньһерʹандьна нәрʹаст дәрһәԛа кʹьлитед Пʹадшатийе

Ньһерʹандьна нәрʹаст: Пәтрус хԝәха сафи дькьр, кӧ кʹьлитед Пʹадшатийе чьчах бьдә хәбате. Ль әʹзмед жи һивийа сафикьрьнед ԝи бун.

Избати: Чахе Иса дәрһәԛа кʹьлитед Пʹадшатийе хәбәр дьда, әԝи готә Пәтрус: «Чь кӧ тӧ ль сәр әʹрде гьреди, әʹзманада жи ԝе гьредайи бә у чь кӧ тӧ ль сәр әʹрде вәки, әʹзманада жи ԝе вәкьри бә» (Мәтта 16:19). Һьнәк мәрьв ԝан гьлийа ӧса фәʹм дькьн, кӧ йан чь Пәтрус рʹебәри дькьр кӧ ль әʹзмана чь бькьн. Ле хәбәред Йунани текста орижиналеда дьдьнә кʹьфше, ԝәки пешийе ль сәр әʹзмед тьштәк сафи дьбу, паше жи Пәтрус әԝ сафикьрьн дьани сери. c

Рʹезед Кʹьтеба Пирозә дьн жи дьдьнә кʹьфше, ԝәки Пәтрус гӧһ дьда рʹебәрийед жь әʹзмед чахе кʹьлитед Пʹадшатийе дьда хәбате. Мәсәлә, кʹьлита сьсийа әԝи һьнге да хәбате, гава рʹебәри жь Хԝәде станд (Кʹаред Шандийа 10:19, 20).