Мәрьв дькарә бьфькьрә кӧ изьна ԝи һәйә һʹәйфе һьлдә. Ле бона дәрәщед ӧса Кʹьтеба Пирозда ширәтәк һәйә: «Нәбежә: ‹Әви чь сәре мьн кьр, әзе жи ӧса сәре ԝи бькьм, ԝәкә кьред ԝи әзе ле вәгәрʹиньм›» (Мәтʹәлок 24:29). Ширәтед Кʹьтеба Пироз али гәләк мәрьва кьрьнә, ԝәки хԝәстьна һʹәйфһьлдане жь дьле хԝә дәрхьн.

Ве готареда

•  Чьрʹа нәрʹаст ә һʹәйфе һьлдьн?

•  Хԝәде чь щурʹәйи мәрьва щәза дькә?

•  Хԝәстьна һʹәйфһьлдане чаԝа нав хԝәда бьтәмьриньн?

•  Ньһерʹандьна нәрʹаст дәрһәԛа һʹәйфһьлдане

 Чахе кәсәк тә дьдә хәйдандьне йан жи зийане дьдә тә, тʹәбийәти йә кӧ һерс кʹәви йан жи бьхԝази ԝи кәси щәза ки. Чь жи һәбә, Кʹьтеба Пироз диса жи изьне надә, кӧ һʹәйфе һьлдьн. Гәло чьрʹа?

 Чахе мәрьв мәщале дьгәрʹьн кӧ һʹәйфе һьлдьн, әв йәк дьле Хԝәде дешинә. Кʹьтеба Пирозда, Йаһоԝа a Хԝәде дьбежә: «Һʹәйфһьлдан дәсте мьн ә, әзе һʹәйфе һьлиньм» (Рʹомайи 12:19). Кʹьтеба Пироз ԝи кәси, кӧ һьндава ԝида нәһәԛи кьрьнә, һелан дькә бь әʹдьлайе пьрсе сафи кә, дәԝса кӧ мәщале бьгәрʹә һʹәйфе һьлдә (Рʹомайи 12:18). Чь бькьн гава мәрьв һәр тьшти дькә, сәва кӧ пьрсе бь әʹдьлайе сафи кә, ле диса жи әв пьрс бь әʹдьлайе сафи набә? Ньвисаред Пироз мә һелан дькьн итʹбарийа хԝә Йаһоԝа биньн у һәр тьшти бьдьнә дәсте ԝи (Зәбур 42:10, 11).

 Ԝәʹде мәда Хԝәде изьн дайә дәсте һʹӧкӧмәта, ԝәки кәсед кӧ нәһәԛийе дькьн, щәза кьн (Рʹомайи 13:1-4). Ле ԝәʹдә шунда Хԝәде ԝе щәза кә ԝан һʹәму мәрийа кӧ зӧлмийе у нәһәԛийе дькьрьн, у ида тʹӧ кәс ԝе тʹӧ щар жь нәһәԛийе нәчәрчьрә (Ишайа 11:4).

•   Жь бо һерсе тьштәки нәкә (Мәтʹәлок 17:27). Мәрьвед кӧ һерс дькʹәвьн, тьштед ӧса дькьн бона чь жи паше пʹошман дьбьн. Ле әԝед кӧ ләз накʹәвьн у ԝәʹдә вәдьԛәтиньн сәва кӧ бьфькьрьн, сафикьрьнед дьһа баш дькьн (Мәтʹәлок 29:11).

•   Избатийа бьгәрʹә (Мәтʹәлок 18:13). Һәрге кәсәки һун данә хәйдандьне, ԝе баш бә ван пьрса бьдьнә хԝә: «Дьбәкә һәнә һьнә мәʹни, дәрһәԛа кʹижана кӧ әз ньзаньм, жь бо чь жи әԝ кәс хԝә ӧса дьдә кʹьфше? Дьбәкә әԝ стреседа бу у бе һʹәмде хԝә дьле мьн ешанд?» Щарна әм дьфькьрьн ԝәки фьлан кәсе ԛәста әм данә хәйдандьне у дьле мә ешанд, ле бь рʹасти әԝи бе һʹәмде хԝә әв йәк кьр.

 Ньһерʹандьна нәрʹаст: Жь бо ве йәке кӧ Кʹьтеба Пироз тʹӧ кәсирʹа изьне надә һʹәйфе һьлдьн, ләма жи изьна мә тʹӧнәйә хԝә бьпарезьн, чахе кәсәк һʹьщуми сәр мә дькә.

 Избати: Һәрге һʹьщуми сәр мәрьв дькьн, изьна ԝи һәйә хԝә бьпарезә йан жи жь һʹӧкӧмәта аликʹарийе бьхԝазә. Ле диса жи Кʹьтеба Пироз мәрʹа дьбежә, ԝәки чьԛас жь дәсте мә те, бь әʹдьлайи проблеме сафи кьн (Мәтʹәлок 17:14).