Бәле! Кʹьтеба Пироз жь Хԝәде йә «кӧ бәр дьле шкәстийада те» (2 Корьнтʹи 7:6). Һәмьки Кʹьтеба Пироз кʹьтеба сьһʹәт-ԛәԝате нинә, ле әԝе али гәләка кьрийә, кӧ фькьред хԝәкӧштьне жь хԝә дур хьн. Ширәтед ве кʹьтебе дькарьн али тә жи бькьн.

•  Гәло Кʹьтеба Пироз чь ширәтед керһати дьдә?

•  Гәло Кʹьтеба Пирозда те готьне, дәрһәԛа мәрийа, кʹижан кӧ нәдьхԝастьн бьжин?

•  Кʹижан рʹезед жь Кʹьтеба Пироз дькарьн али тә бькьн фькьред хԝәкӧштьне жь хԝә дур хи?

•  Тӧ чь дькари бьки, һәрге һәвале тә дьбежә, «Әз дьхԝазьм бьмьрьм»?

•  Чь бькьм, һәрге бәре әз дьфькьрим хԝә бькӧжьм?

• ● Дьле хԝә мәрийарʹа вәкә.

  Кʹьтеба Пироз чь дьбежә: «Һәвал һәр гав һʹьз дькә, бьра буйә бона рʹожа охьрме гьран» (Мәтʹәлок 17:17).

  Әв чь те һʹәсабе: Чахе фькьред нәрʹаст дькʹәвнә һʹьше мә, әм гәрәке аликʹарийе жь мәрьвед дьн бьхԝазьн.

  Һәрге тӧ дьле хԝә мәрийарʹа вәнәки, фькьред хьраб дькарьн тә зәфт кьн. Ле чахе тӧ һʹале хԝә гьли дьки, тӧ дьһа баш хԝә тʹәхмин дьки у сәр дәрәща хԝә щурʹәки майин дьньһерʹи.

  Ширәт: Һәрге фькьред нәрʹаст дькʹәвнә һʹьше тә, һәма иро жи кәсәкирʹа дәрһәԛа ве йәке бежә; мәсәлә нәфәрәкә хԝәрʹа йан жи һәваләкирʹа a. Тӧ ӧса жи дькари һәстед хԝә, сәр кʹахазе бьньвиси.

• ● Аликʹари жь дохдьра бьхԝазә.

  Кʹьтеба Пироз чь дьбежә: «Сахләм нә һ′әԝще һ′әким ьн, ле нәхԝәш» (Мәтта 9:12).

  Әв чь те һʹәсабе: Чахе әм нәхԝаш ьн, әм гәрәке һәрʹьн сәр дохдьр.

  Фькьред хԝәкӧштьне, нишана нәхԝашийа пʹсихики у емосийали йә. Тӧ гәрәке жь ве йәке шәрм нәки, чьмки әв мина нәхԝашийед дьн ә. Нәхԝашийед пʹсихики у емосийали тенә ԛәнщкьрьне.

  Ширәт: Паш нәхә у дәрбера, жь дохдьра аликʹарийе бьхԝазә.

• ● Бир нәкә, Хԝәде бона тә хәм дькә.

  Кʹьтеба Пироз чь дьбежә: «Нә пенщ ч′ьвик бь дӧ дьравед чарԛӧр′уше тенә фьротане? Ле Хԝәде жь ԝан йәки жи бир накә. . . . Нәтьрсьн, һун жь гәләк ч′ьвика ԛимәттьр ьн» (Луԛа 12:6, 7).

  Әв чь те һʹәсабе: Тӧ сәва Хԝәде ԛимәт и.

  Дьбә кӧ тӧ дьфькьри, ԝәки кәсәк тә һʹьз накә у бона тә нафькьрә, ле Хԝәде һʹале тә дьвинә у бона тә хәм дькә һьнге жи, гава тӧ нахԝази бьжийи. Зәбура 51:17-да те готьне: «Хԝәде, тӧ дьле шьканди у тобәкʹар бьчʹук набини». Хԝәде дьхԝазә ԝәки тӧ бьжийи, чьмки әԝ тә һʹьз дькә.

  Ширәт: Кʹьтеба Пироз леколин кә, кӧ избат би ԝәки Хԝәде тә һʹьз дькә. Мәсәлә, бьньһерʹә сәре 24 жь кʹьтеба «Незики Йаһоԝа бьн».

• ● Дӧа бькә.

  Кʹьтеба Пироз чь дьбежә: «Һ′әму хәмед хԝә бавежьнә сәр ԝи [Хԝәде], чьмки әԝ бона ԝә хәм дькә» (1 Пәтрус 5:7).

  Әв чь те һʹәсабе: Хԝәде дьхԝазә ԝәки тӧ дьле хԝә ԝирʹа вәки у һʹәму дәрд-кӧле хԝә ԝирʹа гьли ки.

  Хԝәде дькарә әʹдьлайа дьл бьдә тә у ӧса жи тә ԛәԝи кә, кӧ бькарьби дәрәща хԝәда тәйах ки (Филипи 4:6, 7, 13). Хԝәде те һәԝара ԝан, кʹи кӧ бь лавайа бәрбь ԝи дьчьн (Зәбур 55:22).

  Ширәт: Ирода дәстпекә Хԝәдерʹа дӧа бькә. Наве ԝи һьлдә, демәк Йаһоԝа, у дәрде дьле хԝә ԝирʹа бьрʹежә (Зәбур 83:18). Жь ԝи бьхԝазә, кӧ али тә бькә һәр тьшти сәбьр ки.

• ● Бьфькьрә дәрһәԛа созед Хԝәде.

  Кʹьтеба Пироз чь дьбежә: «Әв һевийа мә ԝәк ләнгәре щан е сахләм у әԝләдар ә» (Ибрани 6:19).

  Әв чь те һʹәсабе: Емосийед мә дькарьн бенә гӧһастьне, анәгори ве йәке кӧ әм ԝәʹде фьртоне гәмийеда ньн, йа кӧ вьрда-веда давежә. Ле һевийа Кʹьтеба Пироз, али мә дькә ԛәԝи сәр ньга бьсәкьньн.

  Әв һеви, мәрәма пʹучʹ нинә, ле сәр һʹиме созе Хԝәде йә, кӧ дьбежә, ԝәки ԝе һәр мәʹнийе еша дьле мә, бьдә һьлдане (Әʹйанти 21:4).

  Ширәт: Бьхуньн брошура «Мьзгинийа Хԝәде сәва Мәрийа» дәрса 5, у һе зедә дәрһәԛа созед Хԝәде пебьһʹәсьн.

• ● Тьштед башва мьжул бә

  Кʹьтеба Пироз чь дьбежә: «Дьле ша мина дәрмане керһати йә» (Мәтʹәлок 17:22).

  Әв чь те һʹәсабе: Чахе әм тьштед ӧсава мьжул ьн кӧ мә ша дькьн, ӧса әм сьһʹәт-ԛәԝата хԝә баш дькьн.

  Ширәт: Ԝан тьшта бькә, чь кӧ тәрʹа һʹәԝас ә. Мәсәлә, гӧһ бьдә мьԛамед рʹьһʹәт, бьхунә тьштед һʹәԝас, йан жи тьштәкә дьн бькә. Һьм жи тӧйе дьһа бәхтәԝар би, һәрге сәва мәрьвед дьн тьштәки бьки, һәла һе тьштед бьчʹук жи (Кʹаред Шандийа 20:35).

• ● Мьԛати сьһʹәт-ԛәԝата хԝә бә.

  Кʹьтеба Пироз чь дьбежә: «Һиндарийа ԛальб кери һьндьк тьшти те» (1 Тимотʹейо 4:8).

  Әв чь те һʹәсабе: Әм һьнге кʹаре дьстиньн, гава әм спортева мьжул дьбьн, епʹещә хәԝа хԝә дьстиньн, у хԝарьна керһати дьхԝьн.

  Ширәт: Мәсәлә, ԝе баш бә ԝәки бь ләз 15 дәԛа рʹе һәрʹи.

• ● Бир нәкә, ԝәки жийина мәда, һʹәст у тьштед дьн тенә гӧһастьне.

  Кʹьтеба Пироз чь дьбежә: «Һун ньзаньн ԝе сьбе чь бе сәре ԝә» (Аԛуб 4:14).

  Әв чь те һʹәсабе: Һәрге те кʹьфше кӧ шьхӧле ԝә хьраб ә у сафикьрьна ве тʹӧнә, бир нәкьн ԝәки әв ԝәʹдәлу йә.

  Һәрге иро дәрәща тә хьраб ә, сьбе дькарә алийе башда бе гӧһастьне. Ләма жи бьхәбьтә кӧ сьст нәби (2 Корьнтʹи 4:8). Ԝәʹдә шунда әв дәрәща кӧ тә дьлтәнг дькә, ԝе бе гӧһастьне, ле һәрге бо ԝан проблема тӧ хԝә бькӧжи, ӧса проблемед тә ԝе сафи нәбьн.

  Ширәт: Бьхунә сәрһатийед Кʹьтеба Пироз дәрһәԛа ԝан мәрийа, йед кӧ дьлтәнг дьбун у нәдьхԝәстьн бьжин. Рʹаст ә ԝана пешда ньзаньбу кӧ һʹале ԝан ԝе чаԝа бә, ле ахьрийе жийина ԝан алийе башда һатә гӧһастьне. Ԝәрен әм чәнд мәсәла шеԝьр кьн.

Бәле. Бь рʹасти Кʹьтеба Пироз гьли дькә дәрһәԛа һьнә мәрийа, йед кӧ нәдьхԝәстьн бьжин. Хԝәде сәва ве йәке ԝана рʹәзил нәдькьр, ле али ԝан дькьр. Хԝәде дькарә али тә жи бькә.

Елйас

• ● Әԝ кʹе бу? Елйас пʹехәмбәрәки мерхас бу. Ле һәбу ԝәʹдә, кӧ әԝ жи дьлтәнг дьбу. Аԛуб 5:17 дьбежә, кӧ «Елйас хут мәрьвәки мина мә бу».

• ● Елйас чьма мьрьне дьхԝәст? Щарәке Елйас ӧса дьлтәнг бу, кӧ хԝә тʹәне тʹәхмин кьр, әԝ кʹәтә бәр байе тьрсе у дьфькьри кӧ әԝ неһежайи тьштәки йә. Әԝи лавайа Йаһоԝа кьр: «Бәс ә, йа Хӧдан, ньһа щане мьн бьстинә» (1 Пʹадшати 19:4).

• ● Чь али Елйас кьр? Елйас дьле хԝә Хԝәдерʹа вәкьр. Гәло Хԝәде чаԝа әԝ ԛәԝи кьр? Хԝәде хәмгини у ԛәԝата хԝә һьндава ԝида да кʹьфше. Әԝи ӧса жи Елйас да баԝәркьрьне, ԝәки әԝ хьзмәткʹарәки һежайи йә кӧ дькарә диса гәләк тьшта бькә. Йаһоԝа ӧса жи аликʹарчийе бь итʹбар да Елйас.

• ▸ Бьхунә дәрһәԛа Елйас: 1 Пʹадшати 19:2-8.

Ибо

• ● Әԝ кʹе бу? Ибо мәрьвәки дәԝләмәнд бу, әԝ хԝәйе малбәта мәзьн бу, һьм жи әԝ бь амьни Хԝәде дьһʹәбанд.

• ● Ибо чьма мьрьне дьхԝәст? Жийина ԝида ньшкева һʹәму тьшт һатә гӧһастьне. Әԝи һәбука хԝә ӧнда кьр. Һʹәму зарʹед ԝи хәзәбеда мьрьн. Әԝ бь нәхԝәшийа гьран, нәхԝәш кʹәт. Хенщи ԝе йәке, ԝи нәһәԛ дькьрьн, ԝәки йан чь әԝ хԝәха нәһәԛ ә һʹәму проблемед хԝәда. Паши ԝан һʹәму тьшта Ибо гот: «Әз жь жийана хԝә вә дькәрьһьм: Һʹәта һʹәтайийе жийане нахԝазьм» (Ибо 7:16).

• ● Чь али Ибо кьр? Ибо Хԝәдерʹа дӧа дькьр у тʹәви мәрийа хәбәр дьда (Ибо 10:1-3). Һәвале ԝийи амьн, Әлиһу пьштгьрийа ԝи дькьр, у али ԝи кьр бь щурʹәки майин сәр дәрәще хԝә бьньһерʹә. Ле һе фәрз әԝ бу, ԝәки Ибо ширәт у аликʹарийа Хԝәде ԛәбул кьр.

• ▸ Бьхунә дәрһәԛа Ибо: Ибо 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Муса

• ● Әԝ кʹе бу? Муса рʹебәре щьмәʹта Исраеле бу у пʹехәмбәрәки амьн бу.

• ● Муса чьма мьрьне дьхԝәст? Шьхӧләки гьран сәр стийе Муса бу, у мәрьва жь бо шьхӧле ԝи, тʹьме ԝи рʹәзил дькьрьн. Жь бо ве йәке Муса гәләк дьлтәнг бу у ԛӧдум кʹәт. Ләма жи әԝи лавайа Хԝәде кьр у гот: «Дьһа р′ьнд ә мьн бькӧжә» (Жьмар 11:11, 15).

• ● Чь али Муса кьр? Муса дьле хԝә Хԝәдерʹа вәкьр. Хԝәде али ԝи кьр у баре ԝи сьвьк кьр, бь сайа чь жи Муса хԝә дьһа баш тʹәхмин кьр.

• ▸ Бьхунә дәрһәԛа Муса: Жьмар 11:4-6, 10-17.