Пироз бьн те һʹәсабе, ԝәки хԝә жь һʹәрамийе дур бьгьрьн. Хәбәра Ибрани, кʹижан кӧ һатийә ԝәлгәрʹандьне ча «пироз», жь хәбәра «башԛәкьри» пешда һатийә. Демәк тьштәки пироз те башԛәкьрьне, ԝәки бона шьхӧлед һәррʹожи нәдьнә хәбате. Ча те кʹьфше, әв тьшт һʹәму алийава тʹәмьз ә.

Тʹӧ кәс нькарә мина Хԝәде пироз бә. Кʹьтеба Пироз дьбежә: «Тʹӧ кәс мина ХӦДАН [Йаһоԝа, ДТʹ] a нә пироз ә» (1 Самуйел 2:2). Ләма жи тʹәне изьна Хԝәде һәйә сафи кә, кӧ чь пироз ә.

Кʹьтеба Пирозда хәбәра «пирози» дькарә бе готьне сәр ԝан һʹәму тьшта, чь кӧ Хԝәдева гьредайи нә, илаһи сәр ԝан тьшта йед кӧ бона һʹәбандьна Хԝәдерʹа башԛәкьри нә. Ԝәрен чәнд мәсәла шеԝьр кьн:

• Щийед пироз: Хԝәде бәр тʹуме кӧ дьшьхӧли готә Муса: «Әԝ щийе кӧ тӧ ль сәр сәкьнийи әʹрде пироз ә» (Дәркʹәтьн 3:2-5).

• Щәжьнед пироз: Бәре, щьмәʹта Исраеле сәр щәжьнед кӧ нав дькьрьн «щьвинед пироз», Йаһоԝа дьһʹәбандьн (Ԛануна Кʹаһинтийе 23:37).

• Тьштед пироз: Тьштед кӧ бона һʹәбандьне пʹарьстгәһа Оршәлимеда дьһатьнә хәбьтандьне, нав дькьрьн «тʹахьмед пироз» (1 Пʹадшати 8:4). Әв тьшт бь ԛәдьр дьданә хәбате, ле изьн тʹӧнә бу ԝана бьһʹәбиньн. b

Бәле. Хԝәде тʹәмийе дьдә Мәсиһийа: «Пироз бьн, чьмки әзи пироз ьм» (1 Пәтрус 1:16). Һәмьки мәрьвед гӧнәкʹар тʹӧ щар ԝе нькарьбьн бь тʹәмами лайиԛи нормед Хԝәдейи пироз бьн. Ле диса жи, әԝ мәрьве кӧ ԛанунед Хԝәдейи рʹаст тинә сери, дькарә бәр чʹәʹве Хԝәде «ԛәбул» у пироз бе һʹәсабе (Рʹомайи 12:1). Чахе мәрьв ԛәԝате дьдә хәбате кӧ пироз бә, әв йәк жь хәбәрдан у рʹабун-рʹуньштьна ԝи те кʹьфше. Мәсәлә, әԝ ль гора 1 Тʹесалоники 4:3 дьжи, кʹидәре кӧ ньвисар ә: «Хԝәстьна Хԝәде әԝ ә, кӧ һун [пироз бьн, ДТʹ], жь ԛавийе дур бьн». Әԝ мәрьв ӧса жи һьлдьдә һʹәсаб ԝан гьлийа: «Пироз бьн нава һʹәму рʹабун-рʹуньштьна хԝәда» (1 Пәтрус 1:15).

Бәле. Һәрге бәндә нормед Хԝәде пьшт гӧһе хԝәва бавежә, Хԝәде ԝе ԝи ида пироз һʹәсаб нәкә. Бәʹса хәбәре, нәʹма Ибрани бона «бьрайед пироз» һатьбу ньвисаре, ле диса жи теда ширәтәкә ӧса һатьбу дайине: «Нәбә кӧ нава ԝә йәкида дьләки хьраб у нәбаԝәр һәбә, кӧ пьшта хԝә бьдә Хԝәдейе сах» (Ибрани 3:1, 12).

Ньһерʹандьн: Селибати демәк азәпбун, мәрьва дьһа пироз дькә.

Избати: Рʹаст ә, һьнә Мәсиһи сафи дькьн нәзәԝьщьн, ле азәпи мәрьва накә пироз. Һәмьки әԝед кӧ назәԝьщьн, дькарьн педа дина хԝә бьдьнә хьзмәта хԝәйә Хԝәдерʹа (1 Корьнтʹи 7:32-34). Ле Кʹьтеба Пироз нишан дькә, ԝәки әԝед кӧ зәԝащеда ньн жи дькарьн пироз бьн. Мәсәлә, йәк жь шандийед Иса, Пәтрус зәԝьщи бу (Мәтта 8:14; 1 Корьнтʹи 9:5).