Кʹьтеба Пирозда, гәләк щар сәр Иса те готьне «Кӧрʹе Хԝәде» (Йуһʹәнна 1:49). Әв йәк избат дькә, ԝәки Хԝәде жийин дайә Иса, чьмки әԝ Әʹфьрандар у Жийиндаре һәр тьшти йә (Зәбур 36:9; Әʹйанти 4:11). Кʹьтеба Пироз һин накә, ԝәки Иса бь ви щурʹәйи кӧрʹе Хԝәде бу, чаԝа кӧ зарʹ жь бав дийа хԝәра дьбә.

 Кʹьтеба Пирозда сәр мәләка жи те готьне «лаԝед Хԝәде» (Ибо 1:6). Кʹьтеба Пироз ӧса жи сәр мәрьве пешьн Адәм дьбежә «кӧрʹе Хԝәде» (Луԛа 3:38). Иса әʹфрине Хԝәдейи пешьн бу, кʹижан кӧ Хԝәде бь дәсте хԝә әʹфьрандьбу. Ләма жи сәр ԝи те готьне Кӧрʹе Хԝәдейи тайе-тʹәне.

•  Гәло Иса пешийа кӧ сәр әʹрде бьһата буйине, сәр әʹзмен дьжит?

•  Гәло пешийа кӧ Иса бьһата сәр әʹрде, әԝи чь дькьр?

 Бәле. Пешийа кӧ Иса сәр әʹрде бьһата буйине, әԝ сәр әʹзмен ча кәсе рʹӧһʹани бу. Иса гот: «Әз жь әʹзмен һатьмә хԝаре» (Йуһʹәнна 6:38; 8:23).

 Хԝәде пешийа һәр тьшти Иса әʹфьранд. Кʹьтеба Пирозда дәрһәԛа Иса те готьне:

•   «Әԝ . . . Ньхӧрийе Хԝәде йә, сәр һʹәму әʹфринарʹа» (Колоси 1:15).

•   Әԝ ә «чʹәʹвканийа [дәстпека, ДТʹ] әʹфьрин у хӧльԛийед Хԝәде» (Әʹйанти 3:14).

 Кʹьтеба Пирозда дәрһәԛа Иса һатийә пʹехәмбәртикьрьне, кӧ «дәркʹәтьна ԝи жь дәмед кәвьн, жь рʹожед бәре йә» (Миха 5:2; Мәтта 2:4-6).

 Иса сәр әʹзмен щийе бьльнд дьгьрт. Дӧайе хԝәда Иса дәрһәԛа щийе хԝә ӧса гот: «Баво, бь ԝе рʹумәта мьнә кӧ һе бәри әʹфьрандьна дьнйайе ль щәм тә һәбу ньһа мьн рʹумәт кә ль бәр хԝә» (Йуһʹәнна 17:5).

 Иса әʹфьрандьнеда али Баве хԝә дькьр. Иса тʹәви Хԝәде, ча һостә шьхӧлкʹари дькьр (Мәтʹәлок 8:30). Ӧса жи Кʹьтеба Пирозда дәрһәԛа Иса те готьне: «Бь дәсте ԝи һәр тьштед ль әʹрд у әʹзмана әʹфьринә» (Колоси 1:16).

 Хԝәде бь аликʹарийа Иса, һәр тьшт әʹфьранд, чаԝа мәләк ӧса жи тʹәмамийа гәрдуне (Әʹйанти 5:11). Шьхӧлкʹарийа Хԝәде тʹәви Иса, мина ве йәке бу, чаԝа архитектор тʹәви авакʹар шьхӧлкʹарийе дькә. Архитектор авайе нәԛьш дькә, ле авакʹар ава дькә.

 Әԝ һәбу Хәбәр. Кʹьтеба Пирозда те готьне, ԝәки пешийа кӧ Иса бьһата сәр әʹрде, сәр ԝи дьһатә готьне «Хәбәр» (Йуһʹәнна 1:1). Әв йәк дьдә кʹьфше, ԝәки Хԝәде бь Иса рʹебәри дьда мәләка.

 Иса сәр әʹрде Хәбәрване Хԝәде бу, демәк Хԝәде бь Иса тʹәви мәрьва хәбәр дьда. Дьбә кӧ Хԝәде бь сайа Иса бахче Еденеда Адәм у Һеԝайерʹа рʹебәри дьда (Дәстпебун 2:16, 17). Һьм жи дьԛәԝьмә бәрʹийеда жи Хԝәде бь сайа Иса рʹебәрийа щьмәʹта хԝәйә Исраел дькьр, у әԝ дәнге кӧ щьмәʹте дьбьһист, дьбәкә дәнге Иса бу (Дәркʹәтьн 23:20-23). a