На, планета Әʹрд ԝе тʹӧ щар кʹӧта нәбә, ԝе агьрда нәйе шәԝьтандьне, у дәԝсе әʹрдәки тʹәзә ԝе нәйе чекьрьне. Кʹьтеба Пироз һин дькә, ԝәки Хԝәде әʹрд әʹфьрандийә, сәва кӧ мәрьв һʹәта-һʹәтайе сәр бьжин.

• «Рʹасте ль әʹрде ԝар бьн у һәр-һәйе ԝе сәр бьжин» (Зәбур 37:29).

• «[Хԝәде] әʹрд дани ль сәр бьнгәһ, кӧ тʹӧ щар жь щи нәһʹәжә» (Зәбур 104:5).

• «Дьнйа абадин дьсәкьнә» (Ԝаиз 1:4).

• «Хԝәдайе кӧ шькьл дайә дьне у ԝе афьрандийә ... ԝе ль валаһийе нәафьрандийә, бона кӧ ль сә ԝе бетә руньштьн» (Ишайа 45:18).

Хԝәде ԝе тʹӧ щар нәһелә, ԝәки мәрьв бь хьрабкьрьна тʹәбийәте, шәрʹа йан жи бь тьштәки майин бь тʹәмами әʹрде кʹӧта кьн. Дәԝсе, Хԝәде ԝе ԛьрʹа ԝан бинә, «йед кӧ дьне хьраб дькьн» (Әʹйанти 11:18). Гәло чь щурʹәйи?

Хԝәде ԝе сәрԝертийа мәрьва бьдә һьлдане, йед кӧ нькарьн әʹрде хԝәй кьн, у дәԝсе ԝе Пʹадшатийа әʹзмана кʹьфш кә (Данийел 2:44; Мәтта 6:9, 10). Кӧрʹе Хԝәде Иса Мәсиһ ԝе бьбә Пʹадше ве Пʹадшатийе (Ишайа 9:6, 7). Чахе Иса сәр әʹрде бу, әԝи да кʹьфше, ԝәки ԛәԝата ԝи һәйә тʹәбийәте контрол бькә (Марԛос 4:35-41). Ча Пʹадше Пʹадшатийа Хԝәде, Иса ԝе бь тʹәмами әʹрде у тʹәбийәте контрол бькә. Әԝ ԝе диса әʹрде, бькә мина бахче Едене (Мәтта 19:28; Луԛа 23:43).

На. Гәләк щар ньһерʹандьна ӧса жь бо ве йәке пешда те, кӧ мәрьв 2 Пәтрус 3:7 рʹаст фәʹм накьн, кʹидәреда те готьне: «Әʹрд у әʹзманед ньһа ... бь агьр ӧнда бьн». Ԝәрен әм дина хԝә бьдьнә дӧ избатийа, йед кӧ ван гьлийа шьровәдькьн:

1. Кʹьтеба Пирозда хәбәред «әʹзман», «әʹрд» у «агьр» щурʹә-щурʹә тенә шьровәкьрьне. Мәсәлә Зәбур 33:8-да те готьне: «Тʹәмамийа әʹрде бьра жь Хӧдан бьтьрсә», вьра хәбәра «әʹрд» те һʹәсабе инсанәт.

2. Контекста 2 Пәтрус 3:7 шьровәдькә кӧ чь те һʹәсабе әʹзман, әʹрд у агьр. Рʹезед 5 у 6 дина мә дьдьнә сәр һена Нӧһ ԝәʹде Селаве. Һьнге дьнйа бәре кʹӧта бу, ле Әʹрд, демәк планета мә кʹӧта нәбу. Селав нә кӧ Әʹрд кʹӧта кьр, ле ԛьрʹа мәрьвед зьнекʹар ани (Дәстпебун 6:11). Һьнге аԝа готи әʹзман жи һатә кʹӧтакьрьне, демәк мәрьвед кӧ ԝи чахи сәрԝертийе дькьрьн. Чаԝа мә дит, нә кӧ планета мә һатә кʹӧта кьрьне, ле мәрьвед зӧлм. Нӧһ у малбәта ԝи жи хьлаз бун у паше Селаве ль һәв зедә бун (Дәстпебун 8:15-18).

Мина Селаве, әв агьре дәрһәԛа кʹижани 2 Пәтрус 3:7-да те готьне, ԝе ԛьрʹа мәрьвед хьраб бинә, нә кӧ әʹрде кʹӧта кә. Хԝәде соз дьдә «ә′рдәки ну у әʹзманед ну, ... кʹижанада рʹастийе бьминә» (2 Пәтрус 3:13). Ль сәр «әʹрдәки ну», демәк мәрьвед ну, ԝе сәрԝертийе бькә «әʹзманед ну», демәк сәрԝертийа ну, Пʹадшатийа Хԝәде. Бьн сәрԝертийа ве Пʹадшатийе, тʹәмамийа әʹрде ԝе бьбә щьнәт, ль кʹидәре кӧ әʹдьлайе һәбә (Әʹйанти 21:1-4).