«Фькьр дәрһәԛа сексе ньшкева щәм мьн пешда тен у әз нькарьм хԝә контрол кьм. Те бежи һʹьше мәрьвәки дьн сәре мьнда нә» (Вера).

«Ӧса те кʹьфше, кӧ мәрьв нькарә тʹәрка фькьред дәрһәԛа сексе бьдә. Тʹәхмина мьн ԝе дьһа һеса буйа мәрьв һин бә бьфьрә» (Щон).

Дьбә кӧ тӧ жи мина Верайе у Щон дьфькьри? Һәрге бәле, әв готар дькарә аликʹарийе бьдә тә.

•  Чьма әв пьрс фәрз ә?

•  Чьма чәтьн ә фькьред хԝә контрол бьки?

•  Чь дькари бьки

•  Һьнә щаһьл чь дьбежьн

«Хале мьн готә мьн, ԝәки һәрге Хԝәде бь хԝәстьна сексуали әм әʹфьрандьнә, демәк әм гәрәке әве хԝәстьна хԝә рʹази кьн» (Алекс, хортәки щаһьл).

Тьштәкида хале Алекс рʹаст ә: Бәле, Хԝәде жь бо мәʹнийа баш пе хԝәстьна сексуал әм әʹфьрандьн. Бь рʹасти һәрге әв һәләԛәти тʹӧнә буйа, әме жи иро тʹӧнә буна. Гәло чьма әм гәрәке фькьред хԝә контрол бькьн, кӧ дәрһәԛа сексе нәфькьрьн? Ԝәрен әм дӧ мәʹнийа шеԝьр кьн:

• Ль гора Кʹьтеба Пироз ԛьрара Хԝәде әԝ ә, ԝәки һәләԛәтийа сексуал гәрәке тʹәне ортʹа мер у жьнда бә, йед кӧ тʹәви һәв зәԝащеда ньн (Дәстпебун 1:28; 2:24).

  Һәрге тӧ әв нормед Хԝәде ԛәбул дьки у һе зәԝащеда нини, фькьрандьна дәрһәԛа сексе ԝе тә әʹщьз кә. Әԝ йәк дькарә хԝәстьна тә ӧса ԛәԝи кә, кӧ тә һелан кә сексева мьжул би. Һʹәчʹи зәʹф жь ԝан мәрийа, йед кӧ әв гав кьрьнә, паше пʹошман бунә.

• Чахе тӧ ль сәр хԝә дьхәбьти, кӧ фькьред дәрһәԛа сексе контрол бьки, әв йәк али тә дькә хԝәгьртьне нав хԝәда пешда бини (1 Корьнтʹи 9:25).

Хԝәгьртьн гәләк фәрз ә, кӧ чаԝа ньһа ӧса жи ахьрийеда бь жийинәкә бәхтәԝар бьжийи. Ль гора леколинәки, әԝ мәрьвед кӧ жь бьчʹуктайе һин дьбун хԝәгьртьне бьдьнә кʹьфше, ахьрийеда кʹарәкә мәзьн стандьн. Мәсәлә проблемед сьһʹәт-ԛәԝатева гьредайи, стреса жь бо пʹәрә у проблемед ԛанунева гьредайи, щәм ԝана һьндьк бун. a

Жь бо һормона чәтьн дьбә хԝә контрол кьн у дәрһәԛа сексе нәфькьрьн. Хенщи ԝе йәке әм дьнйакә ӧсада дьжин, йа кӧ тʹәне дәрһәԛа сексе дьфькьрә.

«Ӧса те кʹьфше, кӧ һәр бәрнамәкә телевизийоне секса пешийа зәԝаще ча тьштәки баш дьдьнә кʹьфше у вәдьшерьн кӧ әԝ чь зийане тинә. Һеса йә бькʹәви бәр байе фькьред нәщайиз, чахе тә дьдьнә баԝәркьрьне йан чь секс ахьрийа хьраб пәй хԝә найнә» (Рʹутʹ).

«Сәр хәбате әз тʹьме хәбәрдана дәрһәԛа сексе дьбьһем у әв йәк һʹәԝаса мьн дькʹьшинә. Бенамусийе ча тьштәки нормал әʹйан дькьн, ләма жи чәтьн дьбә әве йәке нәрʹаст һʹәсаб ки» (Никол).

«Чахе онлайнеда шьклед нәщайиз дьньһерʹи, чәтьн дьбә хԝә бьгьри. Мәсәлә, шькләки сексуал дькарә кʹур һʹьше тәда рʹуне у гәләк чәтьн бә жь сәре хԝә дәрхи!» (Марийа).

Жь бо ԝан һʹәму тьшта дьбәкә тӧ жи мина Паԝлосе шанди бьфькьри: «Гава дьхԝазьм кӧ ԛәнщийе бькьм, бе һʹәмде мьн дьбә хьраби» (Рʹомайи 7:21).

Дәрһәԛа тьштәки дьн бьфькьрә. Ԛәԝате бьдә хәбате, кӧ һʹьше хԝә бьди сәр тьштед ӧса, чь кӧ сексева гьредайи ниньн. Мәсәлә, хоби, спорт у гәләк тьштед дьн. Кәчʹькәкә бь наве Валерийа дьбежә: «Хԝәндьна Кʹьтеба Пироз гәләк аликʹарийе дьдә. Ве кʹьтебеда фькьред гәләк ԛимәт һәнә. Чахе тӧ ԝан фькьра дьки һʹьше хԝә, иди бона тьштед майин щи наминә».

Рʹаст ә, фькьред дәрһәԛа сексе тʹьме жи дькарьн бькʹәвьнә сәре тә, ле бь рʹасти тәвва гьредайи йә тӧйе чь бьки. Һәрге тӧ бьхԝази, те бькарьби ԝан фькьра жь сәре хԝә дәрхи.

«Чахе фькьред нәщайиз тенә һʹьше мьн, әз хԝә дьдьмә зоре, ԝәки дина хԝә бьдьмә тьштәки майин. Әз ӧса жи сәр ве йәке дьфькьрьм, кӧ тедәрхьм һәла чь бу мәʹни кӧ әв фькьр кʹәтьнә сәре мьн. Мәсәлә, әв дькарә кʹьлам бә, йан шькьл кʹижан кӧ әз гәрәке тʹәмьз кьм» (Һелена).

Принсипа Кʹьтеба Пироз: «Чь кӧ бь рʹастийе йә, чь кӧ бь маԛултийе йә, ... сәр ван тьшта бьфькьрьн» (Филипи 4:8).

Һәвалед баш бьжберә. Һәрге һәвалед тә тʹьме дәрһәԛа сексе хәбәр дьдьн, ԝе тәрʹа чәтьн бә нет-фькьред хԝә тʹәмьз хԝәй ки.

«Жь бо һәвалед мьн мьнрʹа дьһа чәтьн дьбу дәрһәԛа тьштед нәрʹаст нәфькьрьм. Чахе мәрьвед дәр-дор бәрбь хԝәстьнед нәрʹаст тә һелан дькьн, тӧ дәстпедьки дина хԝә бьди һәстед хԝә. Бь ве йәке тӧ ньфте бәри сәр агьр дьди» (Сара).

Принсипа Кʹьтеба Пироз: «Кʹи кӧ тʹәви билана рʹе дьчә, ԝе бьбә билан, ле кʹаре кʹе тʹәви беаԛьла йә, ԝе зьраре кʹәвә» (Мәтʹәлок 13:20, ДТʹ).

Жь ԝәʹдәдәрбазкьрьна нәщайиз хԝә дур бьгьрә. Дькарьн бежьн, ԝәки иро һʹәму щурʹә ԝәʹдәдәрбазкьрьнда тьштәки сексева гьредайи һәйә. Никол дьбежә: «Чәтьнайа мьнә лапә мәзьн кʹьлам ьн, жь бо чь жи хԝәстьнед мьн ӧса гӧр дьбьн, кӧ мьнрʹа чәтьн дьбә хԝә контрол кьм».

«Мьн дәстпекьр бьньһерʹьм синәм у бәрнамед ӧса, кӧ дәрһәԛа сексе бун. Мьн нә жи тедәрхьст ча фькьред дәрһәԛа сексе мьн зәфти хԝә кьрьн. Чәтьн нибу фәʹм бькьм, кӧ әԝ фькьр чьма щәм мьн пешда тен. Чахе мьн тʹәрка ԝан синәм у бәрнама да, әз ида зәʹф дәрһәԛа сексе нәдьфькьрим. Һәрге әм фәсал ԝәʹдәдәрбазкьрьна дьжберьн, һьнге мәрʹа ԝе һеса бә фькьред нәщайиз алт кьн» (Щоан).

Принсипа Кʹьтеба Пироз: «Наве ԛавийе у һәр һʹәрамийе, йан тьмайе жи гәрәке нава ԝәда нәйе һьлдане» (Әфәси 5:3).

Фькьра сәрәкә: Һьнә мәрьв дьфькьрьн, ԝәки хԝәстьнед ԝанә сексуали ӧса фәрз ьн, кӧ нәлазьм ә әԝ контрол кьн у нә жи ԝе бькарьбьн. Ле әв йәк ӧса нинә, чьмки Кʹьтеба Пироз дьбежә, кӧ әм дькарьн хԝәстьнед хԝә контрол бькьн.

Принсипа Кʹьтеба Пироз: «Бь рʹӧһʹ у фькьред хԝәда нуйәжийин бьн» (Әфәси 4:23).