«Чәнд сал пешда әз ӧса ԛайим хәмгин дьбум, кӧ мьн тʹьре нав мьнда агьрәк дьшьхӧлә, кӧ әз нькарьм бьтәмьриньм. Һьнге әз дьфькьрим хԝә бькӧжьм. Бь рʹасти мьн нәдьхԝәст бьмьрама, ле мьн дьхԝәст ӧса дәрде хԝә кʹӧта кьм».—Щонатʹан, 17 сали.

 Ԝәʹде шеԝьркьрьна тʹәви 14 000 шагьртед мәкʹтәбейә мәзьн, һатә кʹьфше ԝәки нава 12 мәһед пашԝәхтийеда, жь пенщ шагьрта йәк хԝәстийә хԝә бькӧжә. a Һәрге тӧ жи дьфькьри кӧ нета жийине тʹӧнә, чь дькари бьки?

•   Ләз нәкʹәвә. Хԝәрʹа ԛьрар кә, ԝәки тӧйе бьн һʹӧкӧме емосийада тʹӧ гавәке нәвежи. Рʹаст ә дьбәкә проблемед тә ӧса тенә кʹьфше, кӧ те нькарьби бәр ԝан тәйах ки, ле һәнә тьштед ӧса кӧ ԝе али тә бькьн һин би, проблема алт ки.

 Дьбәкә тӧ хԝә ӧса тʹәхмин ки, тебежи кʹәти лабиринте. Ле бь рʹасти һәстед мә тʹьме рʹастийе надьнә кʹьфше. Рʹе һәнә ԝәки тӧ жь дәрәща хԝә дәрейи у һәрге тӧ аликʹарийе бьстини, әв рʹе дькарьн дьһа незик бьн, нә кӧ чаԝа тӧ дьфькьри.

•  Принсипа Кʹьтеба Пироз: «Әм һәр алийава тәʹли-тәнгийада нә, ле нав дәст-пʹийе тәнгасийада начьн, дәрәще бегӧманда нә, ле бегӧман ниньн» (2 Корьнтʹи 4:8).

   Ширәт: Һәрге фькьред хԝәкуштьне жь сәре тә дәрнайен, пебьһʹәсә кӧ тӧ жь кʹидәре дькари аликʹарийе бьхԝази. Мәсәлә, тӧ дькари аликʹарийа бь ләзрʹа тʹеле хи йан жи щийед дьнрʹа. Ԝедәре мәрьвед щерʹьбанди дьхәбьтьн, йед кӧ бь рʹасти дькарьн у дьхԝазьн али тә бькьн.

•   Кәсәкирʹа гьли кә. Һәнә мәрьв, йед кӧ бона тә хәм дькьн у дьхԝазьн али тә бькьн, мәсәлә һәвал у нәфәред мала тә. Һәрге тӧ ԝанарʹа дәрһәԛа дәрде хԝә гьли нәки, әԝана ԝе тʹӧ щар пенәһʹәсьн тӧ чь һʹалида ни.

 Һьнә мәрьв сәва кӧ дьһа рʹьнд бьвиньн, бәрчʹәʹвка дьдьнә бәр чʹәʹве хԝә. Анәгори ве йәке һәвале баш дькарә али тә бькә, сәва кӧ дьһа зәлал сәр проблема хԝә бьньһерʹи у дәрһәԛа хԝәкӧштьне нәфькьри.

•  Принсипа Кʹьтеба Пироз: «Һәвал . . . буйә бона рʹожа охьрме гьран» (Мәтʹәлок 17:17).

   Ширәт: Сәва кӧ хәбәрдане дәстпеки, дькари ӧса бежи: «Ԝан пашԝәхтийа фькьред хьраб дькʹәвьнә сәре мьн. Әз дьхԝазьм тәрʹа хәбәр дьм.» Йан жи ӧса: «Һьнә проблемед мьн һәнә у әз нькарьм хԝәха сафи кьм. Тӧйе али мьн бьки?»

•   Аликʹарийе жь дохдьра бьхԝазә. Щарна жь бо проблемед сьһʹәт-ԛәԝатева гьредайи йан жи жь бо хәмгинийе у депресийайе, мәрьв ида нахԝазьн бьжин. Ле бона мәрьвед ӧса мьзгини һәйә. Әԝана дькарьн ԛәнщ бьн.

 Мәсәлә, чахе тӧ грипе дькʹәви, мәʹде тә начә хԝарьне. Мина ве йәке дьбәкә жь бо депресийайе тӧ нахԝази бьжийи. Ле һәр дӧ нәхԝәши жи ԛәнщ дьбьн.

•  Принсипа Кʹьтеба Пироз: «Сахләм нә һʹәԝще һʹәким ьн, ле нәхԝәш» (Мәтта 9:12).

   Ширәт: Хәԝа хԝә бьстинә, спортева мьжул бә у хԝарьна керһати бьхԝә. Бир нәкә ԝәки сьһʹәт-ԛәԝата тә дькарә сәр емосийед тә һʹӧкӧм бә, кӧ тӧ ча сәр жийине бьньһерʹи.

•   Дӧа бькә. Кʹьтеба Пироз дьбежә, кӧ Әʹфьрандаре мә «жь дьле мә мәстьр ә у һәр тьшти занә» (1 Йуһʹәнна 3:20). Ләма жи ԝе баш бә ида ньһада дәстпеки дӧа бьки. Дӧакьрьнеда наве Йаһоԝа һьлдә у дьле хԝә ԝирʹа ԝәкә.

 Һьнә проблем мина барәки гьран ьн, у ԝе тәрʹа чәтьн бә тʹәне бьви. Әʹфьрандаре тә Йаһоԝа, һазьр ә али тә бькә.

•  Принсипа Кʹьтеба Пироз: «Хԝәстьна ԝә бьра бь дӧа-дьрозга, рʹазибунева тʹәвайи, Хԝәдева әʹйан бә. У әʹдьлайийа Хԝәде кӧ жь һәр һʹьш-аԛьли дәрбазтьр ә, ԝе дьл у фькьред ԝә йәктийа Мәсиһ Исада хԝәй кә» (Филипи 4:6, 7).

   Ширәт: Йаһоԝарʹа нә кӧ тʹәне проблемед хԝә гьли кә, ле ӧса жи рʹазибуна хԝә әʹйан кә һәма бона тьштәки баш, чь кӧ тә нава рʹожеда дит (Колоси 3:15). Рʹазибун ԝе али тә бькә, ԝәки бь позитив у рʹаст сәр жийина хԝә бьньһерʹи.

 Һәрге тӧ дьфькьри кӧ нәһежа йә бьжийи, аликʹарийе бьхԝазә. Һәма ӧса Щонатʹан жи кьр, дәрһәԛа кʹижани дәстпека готареда һатьбу ньвисаре. Әԝ дьбежә: «Мьн гәләк щар тʹәви де-баве хԝә хәбәр дьда у аликʹарийа дохдьра дьхԝәст. Ньһа әз дьһа баш хԝә тʹәхмин дькьм. Рʹаст ә щарна әз дьлтәнг дьбьм, ле фькьред хԝәкӧштьне ида нәкʹәвьнә сәре мьн».