Nivîskarên Kitêba Pîroz peyvên “rizgar kirin” û “rizgarî” yan jî “xelas kirin” û “xelasî” carinan ji bo kesekî ku ji xeterê yan ji mirinê hatiye filitandin, bi kar anîne (2. Mûsa 14:13, 14; Karên Şandiyan 27:20). Wekî din, ev peyv gelek caran ji bo xelaskirina ji guneh tên bikaranîn (Meta 1:21). Ji ber ku mirin ji ber guneh pêk hatiye, mirovên ku ji guneh hatine xelaskirin dibin xwediyê hêviya jiyana herheyî (Yûhena 3:16, 17). a

Rêya xelasiyê bi çi ve girêdayî ye?

 Mirovê ku dixwaze bê xelaskirin, divê baweriyê bi Îsa Mesîh bîne û nîşan bide ku ew guh dide emrên wî (Karên Şandiyan 4:10, 12; Romayî 10:9, 10; Îbranî 5:9).

 Kitêba Pîroz nîşan dide ku baweriya mirov bi kirinan rast derdikeve, yanî divê mirov îmana xwe bi emelên xwe îsbat bike (Aqûb 2:24, 26). Lê belê, ev nayê maneya ku tu dikarî xelasiya xwe qezenc bikî. Xelasî “diyariya Xwedê” ye û ji kerema wî tê (Efesî 2:8, 9).

Gelo mirov dikare hêviya xelasiyê winda bike?

 Belê. Mesela, mirovekî ku ji xeniqandinê hat xelaskirin dikare dîsa bikeve avê yan jî xwe bavêje nava avê. Bi heman awayî, mirovekî ku ji guneh hatiye xelaskirin, lê îmana xwe pêk nayne, dikare hêviya xelasiya xwe winda bike. Ji ber vê yekê, Kitêba Pîroz xizmetkarên Xwedê yên xelaskirî teşwîq dike ku ew “ji bo baweriya” xwe “tekoşînê bikin” (Cihûda 3). Wekî din, Peyva Xwedê kesên ku hatine xelaskirin bi van gotinan hişyar dike: “Bi tirs û lerizînê xelasiya xwe pêk bînin” (Filîpî 2:12).

Xelaskar kî ye – Xwedê yan Îsa Mesîh?

 Kitêba Pîroz diyar dike ku çavkaniya sereke ya xelasiyê Xwedê ye û wî gelek caran wek “Xelaskar” bi nav dike (1. Samûyêl 10:19; Îşaya 43:11; Tîtos 2:10; Cihûda 25). Ji xeynî vê, Xwedê bi destê zilamên cuda cuda miletê berê yê Îsraîl rizgar dikir, û Peyva Xwedê wan jî wek rizgarkar yan xelaskar bi nav dike (Nehemya 9:27; Serweran 3:9, 15; 2. Qiralan 13:5). b Îcar ji ber ku Xwedê xelasiya ji guneh bi navgîniya fîdyeya Îsa Mesîh peyda dike, Kitêba Pîroz Îsa Mesîh jî wek “Xelaskar” bi nav dike (Karên Şandiyan 5:31; Tîtos 1:4). c

Gelo wê her kes xelas bibe?

 Na, hin kes wê xelas nebin (2. Selanîkî 1:9). Gava ji Îsa Mesîh hat pirsîn: “Gelo kesên ku wê xelas bibin, hindik in?”, wî got: “Bi hemû qeweta xwe xîret bikin ku hûn di deriyê teng re derbas bibin. Ez ji we re dibêjim, gelek kes wê xîret bikin ku têkevin, lê ewê nikaribin” (Lûqa 13:23, 24, NWT).

Nêrînên şaş li ser xelasiya hemû mirovan

 Hinek dibêjin: Duyem Petrûs 3:9 bi gotina Xwedê “naxwaze ku kesek helak bibe” hîn dike ku her kes wê xelas bibe.

 Rastî: Xwedê dixwaze ku mirov bên xelaskirin, lê ew zorê li kesî nake ku ew vê rêya xelasiyê qebûl bikin. Peyva Xwedê dibêje ku di roja Hukim de, mirovên xerab wê bên tunekirin (2. Petrûs 3:7).