MIROVAN BIKE ŞAGIRT
DERS 10
Biqerar Be ku Tu Mirovan Bikî Şagirt
Prensîp: “Me dixwest em ne bi tenê Mizgîniya Xwedê bidin we, lê jiyana xwe jî bi we re leva bikin, çimkî hûn bûbûn hezkiriyên me” (1. Selanîkî 2:8).
Îsa Mesîh Çi Kir?
1. Li VÎDEOYÊ temaşe bike yan Yûhena 3:1, 2 bixwîne. Paşê li ser van pirsan bifikire:
-
Gelo Nîkodêmos çima nîvê şevê hat cem Îsa? (Li Yûhena 12:42, 43 binêre.)
-
Îsa nîvê şevê Nîkodêmos qebûl kir ku bi wî re sohbet bike. Vê yekê çawa nîşan da ku ew biqerar bû ku mirovan bike şagirt?
Em Dikarin ji Îsa Mesîh Çi Bielimin?
2. Em ji dil dixwazin alî mirovan bikin ku ew bibin şagirt, çimkî em ji wan hez dikin.
Wek Îsa Mesîh Bike
3. Kursê li cih û wexta ku ji bo xwendekarê te minasib e, derbas bike. Belkî, ew bixwaze kursê her hefte tim di eynî wextê de derbas bike. Belkî, ji bo kursê cihê karê wî, mala wî yan cihekî din hê rihettir be. Eger mumkin be, bernameya xwe li gor wî eyar bike.
4. Kursê her hefte derbas bike. Gava tu herî derekê, kursê betal neke. Li şûna vê:
-
Gelo tu dikarî kursê di wê heftiyê de rojeke din derbas bikî?
-
Gelo tu dikarî kursê bi destê telefonê yan vîdeokonferansê derbas bikî?
-
Gelo tu dikarî ji xwişk an birayekî din bixwazî ku ew kursê li şûna te derbas bike?
5. Ji bo nêrîneke rast dua bike. Dibe ku xwendekarê te nikare her hefte li kursê hazir be. Belkî ew nikare tiştên ku hîn dibe di jiyana xwe de zû bîne cih. Îcar ji Yehowa alîkariyê bixwaze ku tu dev ji xwendekarê xwe bernedî (Flp. 2:13). Bê guman, gelek sifetên wî yên baş hene. Ji bo ku tu wan bibînî, dua bike.
LI VAN AYETAN JÎ BINÊRE
Mtl. 3:27; Kar. 20:35; 2. Kor. 12:15
