1. Qudreta Peyva Xwedê çawa tê dîtin? (Li resmê ewilî binêre.)

XIZMETKARÊN Yehowa li sedî sed bawer in ku “Peyva Xwedê jîndar û bi bandûr e” (Îbr. 4:12). Em rind dizanin ku Kitêba Pîroz dikare jiyana me biguherîne. Hin xwişk û birayên me berê dizî dikir, narkotîk bi kar dianî an bêexlaqî dikir. Hinek jî di vê dinyayê de serkeftî û dewlemend bûn, lê dîsa jî ne dilşad bûn (Waiz 2:3-11). Bi saya qudreta Kitêba Pîroz, gelek kesên ku di vê dinyayê de winda bûn hatine riya jiyanê. Li weşanên Şahidên Yehowa gelek serpêhatiyên wisa hene. Wekî din, te bêguman dîtiye ku piştî ku ew rastiyê qebûl dikin jî, şagirtên Îsa bi alîkariya Nivîsarên Pîroz ji aliyê ruhî ve bi pêş ve diçin.

2. Qudreta Peyva Xwedê li sedsala yekemîn çawa dihat dîtin?

² Em ecêbmayî namînin ku bi saya xwendina Kitêba Pîroz, gelek kes jiyana xwe bi temamî diguherînin. Rewşa gelek xwişk û birayên me yên ku li sedsala yekemîn dijiyan û li benda jiyana li ezmên bûn jî wisa bû (1. Korîntî 6:9-11 bixwîne). Li van ayetan, Pawlos behsa kesên ku Padîşahiya Xwedê mîras nastînen dike, lê paşê wisa dibêje: “Hin ji we weha bûn.” Lê belê wan hal û hereketên xwe  bi alîkariya Nivîsarên Pîroz û ruhê pîroz guherandin. Piştî ku wan rastî qebûl kir, hinekan dîsa jî ji aliyê ruhî ve li hemberî problemên mezin micadele dikirin. Mesela, Kitêba Pîroz behsa şagirtekî Îsa yên hilbijartî dike, yê ku ji civatê hat derxistin û paşê vegeriya civatê (1. Kor. 5:1-5; 2. Kor. 2:5-8). Belê, bi saya alîkariya Peyva Xwedê, gelek xwişk û birayên me serî bi problemên xwe re derxistiye. Ma ev yek cesaret nade me?

3. Li vê meqaleyê emê li ser çi şêwir bikin?

³ Madem ku Peyva Xwedê ew qas biqudret e û di destê me de heye, gerek em wê rind bixebitînin (2. Tîm. 2:15). Li vê meqaleyê, emê bibînin ku em çawa dikarin qudreta Peyva Xwedê (1) li jiyana xwe, (2) li xizmetê û (3) gava em gotaran pêşkêş dikin zêdetir bixebitînin. Ev yek wê alî me bike ku em ji Bavê xweyî ezmanî zêdetir hez bikin û jê re şikur bikin, çimkî gotinên wî bi rastî jî ji bo xêra me ne (Îşa. 48:17).

4. (a) Eger em dixwazin ku Peyva Xwedê li ser me tesîr bike, gerek em çi bikin? (b) Ji bo xwendina Kitêba Pîroz, tu kengê ji bo xwe wext çêdikî?

⁴ Eger em dixwazin ku Peyva Xwedê li ser me tesîr bike, gerek em wê her tim bixwînin. Belê, heta ku ji destê me tê, gerek em Kitêba Pîroz her roj bixwînin (Yêşû 1:8). Em çi qas mijûl bin jî û mesûliyetên me çi qas pir bin jî, gerek em îzin nedin ku tiştek programa me ya ji bo xwendina Kitêba Pîroz xera bike (Efesî 5:15, 16 bixwîne). Ji bo xwendina Kitêba Pîroz, gelek xizmetkarên Yehowa li saetên cuda ji xwe re wext çêdikin, mesela serê sibehê, nîvro an êvarê. Wek zebûrbêj, ew jî wisa difikirin: “Ez çiqas hez dikim ji şerîeta te! Tevahiya rojê li ser wê difikirim” (Zeb. 119:97).

5, 6. (a) Fikirîna kûr çima muhîm e? (b) Gerek em ji xwe çi bipirsin? (c) Te ji xwendina Peyva Xwedê û ji fikirîna kûr çawa feyde dîtiye?

⁵ Ji xeynî xwendina Kitêba Pîroz, lazim e ku em li ser wê kûr bifikirin (Zeb. 1:1-3). Eger em wisa bikin, aqilmendiya Peyva Xwedê wê li ser jiyana me tesîr bike. Gava em Kitêba Pîroz li ser kaxizê an bi formata elektronîk dixwînin, lazim e ku armanca me ev be ku gotinên wê bigihîjin dilê me.

⁶ Em çawa dikarin kûr bifikirin û jê feyde bistînin? Mesela, piştî ku me qismekî Nivîsarên Pîroz xwendiye, em dikarin hebekî bisekinin û ji xwe wisa bipirsin: “Ev qisim der heqê Yehowa de çi dielimîne? Ez prensîpa vî qismî li jiyana xwe çawa dixebitînim? Gerek ez ji kîjan aliyê ve zêdetir bi pêş ve  herim?” Eger em li ser Peyva Xwedê kûr bifikirin û dua bikin, emê bixwazin şîretên wê zêdetir bînin cih. Belê, emê qudreta wê li jiyana xwe zêdetir bixebitînin (2. Kor. 10:4, 5).

7. Gava em diçin xizmetê, gerek em Peyva Xwedê çawa bişixulînin?

⁷ Gerek em Peyva Xwedê li xizmetê çawa bişixulînin? A yekê, gava em mizgînê didin an dielimînin, gerek em vê yekê her tim bi alîkariya Kitêba Pîroz bikin. Birayekî me wisa got: “Eger tu tevî Yehowa mal bi mal biçûyayî xizmetê, gelo teyê her tim xwe bi xwe xeber bidaya? Ma teyê îzin nedaya ku Yehowa xeber bide?” Mesele ev e: Gava em rasterast ji Peyva Xwedê dixwînin, em bi vî awayî îzin didin ku Yehowa bi xwediyê malê re bipeyive. Tesîra ayeteke munasîb ji tesira gotinên me mezintir e (1. Sel. 2:13). Ji xwe wisa bipirse: “Gava ez mizgînê didim însanan, gelo ez her tim xîret didim ku ez qismekî Kitêba Pîroz nîşanî wan bidim?”

8. Gava em mizgînê didin însanan, çima ne bes e ku em ayetan tenê bixwînin?

⁸ Helbet ne bes e ku em di sohbetê de ayetan tenê bixwînin. Çima? Çimkî gelek însan gotinên Kitêba Pîroz qet nizanin an jî hindik dizanin. Însanên li sedsala yekemîn wisa bûn, û îro jî piraniya însanan wisa ne (Rom. 10:2). Loma gerek em texmîn nekin ku gava em ayetekê dixwînin, xwediyê malê wê jixwe fehm bike ku em dixwazin çi bibêjin. Gerek em bala wî bikişînin li ser hin qismên ayetê û maneya wan îzah bikin. Ji bo vê, belkî lazim e ku em hin peyvan dîsa bixwînin. Bi vî awayî, em dikarin alîkariya guhdarên xwe bikin ku xebera Peyva Xwedê bigihîje hiş û dilê wan (Lûqa 24:32 bixwîne).

9. Berî ku em ayetekê bixwînin, em dikarin çi bibêjin ku xwediyê malê qîmeta Kitêba Pîroz bêtir fehm bike?

 ⁹ Wekî din, wê baş be ku berî ku em ayetekê bixwînin, em tiştekî bibêjin ku xwediyê malê qîmeta Kitêba Pîroz bêtir fehm bike. Mesela, em dikarin wisa bibêjin: “Bila em bibînin ku Xwedê li ser vê çi dibêje.” Eger xwediyê malê Kitêba Pîroz nas nake, belkî em dikarin wisa bibêjin: “Kitêba Pîroz – yanî Tewrat, Zebûr û Încîl – li ser vê mijarê wisa dibêje.” An jî, wexta ku em bi kesekî ateîst an agnostîk re dipeyivin, em dikarin wisa bibêjin: “Bi hezaran sal berê, kitêbeke kevnar wisa gotibû.” Belê, gerek em gotinên xwe her tim li gor xwediyê malê hilbijêrin (1. Kor. 9:22, 23).

10. (a) Behsa serpêhatiya birayekî me bike. (b) Gelo te jî li xizmeta xwe dît ku tesîra Peyva Xwedê çi qas mezin e?

¹⁰ Li xizmetê, tesîra xwendina Peyva Xwedê carinan mezin dibe. Mesela, birayekî me çû ziyareta camêrekî extiyar, ê ku çend salan kovarên me xwendibû. Lê îcar, birayê me ne tenê hijmara Birca Çavdêriyê ya herî nû pêşkêşî wî kir, lê jê re yek ji ayetên ku di vê kovarê de derbas dibin, xwend. Wî 2. Korîntî 1:3, 4 xwend: “Bavê dilovaniyê û Xwedayê hemû handanê ... di her tengahiya me de hanê dide me.” Dilê xwediyê malê ew qas tesîr girt ku wî ji birayê me xwest ku ew ayetê dîsa bixwîne. Camêr got ku ew û pîreka wî hesreta dilrihetiyê ne, û gotinên Kitêba Pîroz êdî bala wî dikişand. Bi dîtina te, gava em diçin xizmetê, ma tesîra Peyva Xwedê ne mezin e? (Kar. 19:20).

11. Mesûliyeta gotarvanan çi ye?

¹¹ Em hem ji civînên heftanî hem jî ji civînên mezin pir kêf distînin. Armanca me ya herî mezin ev e ku em ji Yehowa re îbadetê bikin. Wekî din, em ji melûmatên ruhî jî pir feyde dibînin. Birayên ku li civînan gotaran pêşkêş dikin dibin xwediyê îmtiyazeke mezin. Gerek ew ji bîr nekin ku ev yek mesûliyeteke mezin e (Aqûb 3:1). Lazim e ku ew tim û tim emîn bin ku gotinên wan bi Peyva Xwedê re ahengdar in. Wexta ku tu gotarekê pêşkêş dikî, tu çawa dikarî qudreta Kitêba Pîroz bixebitînî?

12. Gotarvan çawa dikare Kitêba Pîroz bike merkeza gotara xwe?

¹² Kitêba Pîroz bike merkeza gotara xwe (Yûh. 7:16). Maneya vê çi ye? A yekê, hay ji xwe hebe ku serpêhatî û mîsalên ku di gotara te de derbas dibin an jî uslûba te ji tesîra ayetên ku tu dixwînî girantir nebin. Ji xeynî vê, ji bîr neke ku eger tu çend ayetan bixwînî jî, ev bi otomatîk nayê maneya ku tu bi rastî ji Kitêba Pîroz dielimînî. Bi ser de, eger tu bi zêdeyî ayetan bixwînî, guhdarên te wê nikaribin fehm bikin ku kîjan ayet bi rastî jî muhîm in. Loma ayetên sereke rind hilbijêre, û wan bi awayekî baş bixwîne, îzah bike, mîsalan bide ku ew rind bên fehm kirin û nîşan bide ku em ji van ayetan çi dielimin (Nhy. 8:8). Eger lazim be ku gotar li gor planeke ku ji aliyê teşkîlatê ve hatiye hazir kirin bê pêşkêş kirin, planê û ayetên ku tê de hene rind bixwîne. Bala xwe bide ku gotinên planê çawa bi ayetên behskirî ve girêdayî ne. Paşê, nuqteyên planê bi alîkariya ayetên hilbijartî bielimîne (ji bo tewsiyeyên bifeyde, li beşên 21 heta 23an a kitêba Benefit From  Theocratic Ministry School Education (Ji Perwerdeya Îbadeta Waîztiyê Feyde Bistîne) binêre). Ji her tiştî zêdetir, ji Yehowa re dua bike û alîkariya wî bixwaze ku tu karibî fikrên biqîmet ên Peyva wî pêşkêş bikî (Esra 7:10; Methelokên Silêman 3:13, 14 bixwîne).

13. (a) Dilê xwişkeke me ji ayeteke ku li civîneke me hat xwendin çawa tesîr girt? (b) Te ji melûmatên Kitêba Pîroz ku li civînan tên pêşkêş kirin çawa feyde dîtiye?

¹³ Dilê xwişkeke me ya li Awistralyayê ji ayeteke ku li civîneke me hat xwendin pir tesîr girt. Di zaroktiya wê de, tiştên pir xerab hatibûn serê wê, lê wê paşê mizgîna Kitêba Pîroz qebûl kiribû û xwe dabû Yehowa. Dîsa jî, jê re zor dihat ku ew bawer bike ku Yehowa bi rastî jê hez dike. Lê bi zeman re, wê fehm kir ku Xwedê jê hez dike. Çi alî wê kiribû ku ew vê fehm bike? Xwişka me li ser ayeteke ku li civîneke me hat xwendin kûr fikirî û ayetên girêdayî anîn bîra xwe. Bi vî awayî, ew êdî îqna bû. * Gelo dilê te jî tesîr digire gava Peyva Xwedê li civînên heftanî û civînên mezin tê xebitandin? (Nhy. 8:12).

14. Em çawa dikarin nîşan bidin ku em qîmet didin Peyva Yehowa?

¹⁴ Em ji Yehowa re ji dil şikur dikin ku wî Kitêba Pîroz daye me û ew heta niha parastiye (1. Ptr. 1:24, 25). Loma gerek em Peyva Xwedê her tim bixwînin, gotinên wê li jiyana xwe bînin cih û wê bixebitînin gava em alî kesên din dikin. Bi vî awayî, em dikarin nîşan bidin ku em qîmet didin vî hediyeyî û ji Nivîskarê Kitêba Pîroz Yehowa Xwedê hez dikin.