1-2. (a) Yehowa ser kesên ku gunên giran dikin lê tobe nakin, çawa dinihêre? (b) Gumana Yehowa heye ku gunekar çi bikin?

 YEHOWA çevê xwe ser her tiştî danade, û ew gune nefret dike (Zebûr 5:4-6). Ew dixwaze ku em qedirê qanûnên wî bigirin, yên ku Kitêba Pîrozda nivîsar in. Hemikî Yehowa zane ku em qisûrdar in û em nikarin bêkêmasî bin (Zebûr 130:3, 4). Aliyê dinva jî, ew çevê xwe danade ser vê yekê, gava merivên xirab “bin navê kerema Xwedê” bênamûsiyê û tiştên mirdar dikin (Cihûda 4). Lema jî Kitêba Pîroz dibêje wekî kesên “nepak”, ku gura Xwedê nakin, wê şerê Harmegedonêda bêne qirkirinê (2 Petrûs 3:7; Eyantî 16:16).

² Lê Yehowa naxwaze ku kesek bimire. Çawa me gotarên dinda şêwir kiribû, Kitêba Pîroz eşkere dibêje ku Yehowa “dixwaze wekî hemû ji gunekirinê vegerin” (2 Petrûs 3:9). Mîna Yehowa, rûspiyên civatê jî bi sebir alî gunekara dikin, wekî ewana bêne guhastinê û tezeda nêzîkî Yehowa bin. Lê hine gunekar tobe nakin (Îşaya 6:9). Rûspî çiqas jî çi destê wan tê dikin, wekî alî wan bikin, lê yeke  hine kes terka gunekirinê nadin û tobe nakin. Wî çaxî gelo rûspî gerekê çi bikin?

“YÊ XIRAB JI NAVA XWE DERXIN”

 3. (a) Hergê kesek tobe nake, rûspî gerekê çi bikin? (b) Çira em dikarin bêjin wekî kesê gunekar xwexa dijbêre ku îda Şedê Yehowa nîbe?

³ Hergê kesek bona gunê xweyî giran tobe neke, lazim e ku rûspî li gora vê rêberiya ji 1 Korintî 5:13 bikin: “Yê xirab ji nava xwe derxin”. Alîkîva, kesê gunekar xwexa xwe dike vî halî û axiriya usa distîne. Bi rastî jî, ewî çi çandiye, ew wê jî didirû (Galatî 6:7). Em çira usa dibêjin? Çimkî rûspiya çiqas destê wan dihat alî wî dikirin, lê ewî alîkariya wan qebûl nekir û tobe nekir (2 Padşatî 17:12-15). Kirên wî nîşan dikin ku ew naxwaze li gora qanûnên Yehowa bijî (Qanûna Ducarî 30:19, 20).

 4. Gava kesek gunê xwe tobe nake, çira civatêda elametî tê kirinê, wekî ew îda Şedê Yehowa nîne?

⁴ Gava gunekarek tobe nake, elametî tê kirinê, wekî civat bizanibe ku ew îda Şedê Yehowa nîne. a Nêta vê elametiyê ev nîne ku kesê gunekar nimiz ke. Menî ev e, wekî xûşk-bira bizanibin ku ewana gerekê îda tevî wî hevaltiyê nekin û “heta nên jî nexwin” (1 Korintî 5:9-11). Çira gerekê civat usa bike? Pawlosê şandî nivîsî: “Hinek hevîrtirşk temamiya şkevê hiltîne” (1 Korintî 5:6). Hergê kesên ku tobe nakin, dîsa jî para civatê bin, yên din dikarin bifikirin, ku eseyî nîne wekî xwe li qanûnên Yehowa bigirin (Metelok 13:20; 1 Korintî 15:33).

 5. Em gerekê ser kesekî ku îda Şedê Yehowa nîne, çawa binihêrin, û çira?

⁵ Wekî usa ne, em gerekê ser kesekî ku îda Şedê Yehowa nîne çawa binihêrin? Rast e em tevî wî îda hevaltiyê nakin, lê em gerekê nefikirin ku halê wî îda bêçare ye. Dewsê em gerekê wî hesab kin ça peza undabûyî. Peza ku ji axlê pêz dûr ketiye û riya xwe unda kiriye, dikare vegere. Bîr nekin, ku peza undabûyî sond xwaribû ku ewê li gora xwestina Yehowa bijî. Niha ew li gora sonda xwe najî, û ev yek halekî xof e (Hezeqêl 18:31). Dîsa jî, hergê Yehowa hê hazir e remê hindava wîda bide kifşê, guman heye ku ewê vegere. Wekî usa ne, rûspî çawa dikarin alî wî kesî bikin, yê ku îda Şedê Yehowa nîne?

RÛSPÎ ÇAWA ALÎ WAN DIKIN, YÊN KU ÎDA ŞEDÊN YEHOWA NÎNIN?

 6. Rûspî ça alî wan dikin, yên ku îda Şedên Yehowa nînin?

⁶ Merivê ku îda para civatê nîne, gelo ew hatiye hîştinê û mecbûr e ku xwexa bê alîkarî vegere bal Yehowa? Hemikî na. Gava rûspî wî kesîra yê ku tobe nake, dibêjin wekî ew îda para civatê nîne, ewana usa jî jêra şirovedikin ku ew dikare çi bike, wekî dîsa vegere civatê. Lê tenê ew nîne. Gelek derecada rûspî wê wî kesîra bêjin, ku çend meh şûnda ewana dixwazin dîsa tevî wî xeber din, wekî têderxin hela ewî nihêrandina xwe guhastiye yan na. Hergê kesê gunekar qebûl ke ku dîsa tevî rûspiya xeber de, ewana wê wedê serlêdanê bi hezkirin lê hêlan kin, wekî ew gunê xwe bîne rûyê xwe û vegere. Hergê ew hê nihêrandina xwe neguhêze jî, rûspî wê xîret kin, wekî paşê jî car-cara dîsa rastî wî bên.

 7. Rûspî ça çev didine dilşewatiya Yehowa hindava wan, yên ku îda Şedên Yehowa nînin? (Yêremya 3:12)

⁷ Rûspî xîret dikin wekî çev bidine  dilşewatiya Yehowa hindava kesê ku îda para civatê nîne. Mesele, gava miletê Îsraêlê ji riya Xwedê derdiket, Yehowa hîviyê nîbû heta ewana xwexa gava pêşin bavêjin û vegerin cem wî. Heta ku wana tobe kira jî, Yehowa hazir bû alî wan bike. Gotara duda ya vê jûrnalêda me şêwir kiribû, ku Yehowa çawa Hoseya pêxemberra gotibû, wekî ew tevî jina xwe dîsa li hev bê. Hingê jina wî hê gunê giran dikir û tobe nekiribû. Bi saya vê meselê Yehowa nîşan kir, ku ew çiqas dilrem û dilşewat e (Hoseya 3:1; Malaxî 3:7). Mîna Yehowa, rûspiyên civatê jî ji dil dixwazin wekî kesê gunekar vegere, û ewana naxwazin riya wî çetin kin ku ew vegere cem Yehowa (Bixûne Yêremya 3:12).

 8. Meteloka derheqa kurê undabûyî çawa rem û dilşewatiya Yehowada eyan dike? (Lûqa 15:7)

⁸ Bînin bîra xwe meteloka kurê undabûyî, ya ku me gotara duda ya vê jûrnalêda şêwir kiribû. Gava bav kurê xwe dît, yê ku vedigeriya malê, ew “bi lez çû pêşiya wî, ew hemêz kir û paç kir” (Lûqa 15:20). Dîna xwe bidinê ku bav hîviyê nîbû heta kurê wî baxşandinê ji wî bixwaze. Ew bavekî bi hezkirin bû, lema jî ewî gava pêşin avît. Rûspî jî gerekê hindava kesên ku ji riya rast dûr ketine, usa bin. Ewana dixwazin ku pezên undabûyî “vegerin malê” (Lûqa 15:22-24, 32). Gava gunekarek vedigere, Yehowa, Îsa, melek û temamiya civatê gelek şa dibin! (Bixûne Lûqa 15:7)

 9. Yehowa dixwaze wekî kesên ku gune dikin, çi bikin?

⁹ Belê, em pêhesiyan ku Yehowa nahêle wekî kesên ku gunên xwe tobe nakin, civatêda bimînin. Lê ew nayê hesabê ku ew pişta xwe dide wan meriva. Ew dixwaze wekî ewana vegerin cem wî. Dîna xwe bidine hestên Yehowa hindava merivên ku tobe dikin: “Ezê neaminiya wan qenc kim. Ezê wana ji dil hez bikim, çimkî hêrsa min derbaz bûye” (Hoseya 14:4, DT). Ew yek ders e bona rûspiya ku çev bidine Yehowa, û hela hê nîşanên biçûk jî, ku ew dixwaze tobe ke, wîda bivînin. Û ev giliyên Yehowa usa jî kesê gunekarra îzbat dikin, ku Yehowa wî hez dike û dixwaze wekî ew zû vegere cem wî.

10-11. Rûspî ça dikarin alî wan bikin, yên ku îda gelek sal e para civatê nînin?

¹⁰ Lê gelo rûspî çawa dikarin alî wan bikin, yên ku îda gelek sal e para civatê nînin? Dibeke wana îda terka wî guneyî daye, ji bo çi jî îda para civatê nînin. Hela hê dibeke wana bîr kiriye jî, ku rûyê çida nayêne hesabê Şedên Yehowa. Firqî tune çiqas wext derbaz bûye, yeke rûspî wê her tiştî bikin, wekî wan meriva bivînin û teseliya wan bikin. Gava rûspî rastî kesekî usa bên, ewana wê jêra bêjin ku tevayî dua kin, û wê lê hêlan kin wekî vegere civatê. Lê hergê kesek îda gelek sal e ji civatê dûr ketiye, femdarî ye ku ew ruhanîda gelek sist bûye. Dibeke lazim e wekî ew Yehowa tezeda nas ke û Kitêba Pîroz tezeda lêkolîn ke. Lema jî hergê ew bêje ku dixwaze vegere civatê, rûspî dikarin organîze kin, wekî kesek tevî wî hînbûna Kitêba Pîroz destpêke, hergê jî ew hela hê nayê hesabê Şedê Yehowa. Van derecada rûspî gerekê organîze kin, wekî tevî kesên usa hînbûna Kitêba Pîroz bê derbazkirinê.

¹¹ Belê, rema Yehowa gelek mezin e, û rûspî dixwazin vê yekêda çev bidine wî, ku alî wan bikin, yên ku îda para civatê nînin. Bira ew kes bizanibin, wekî derî ber wan vekirî ye û ewana dikarin  vegerine civatê. Hergê kesek tobe dike û terka riya xirab dide, ew dikare civatêda zû bê qebûlkirinê (2 Korintî 2:6-8).

12. (a) Îlahî kengê lazim e ku rûspî fesal bin? (b) Çira gerekê em nefikirin ku hine gunekar nikarin aliyê Yehowada bêne baxşandinê? (Usa jî binihêre spartin.)

¹² Hine derecada rûspî gerekê fesal bin pêşiya ku kesekî dîsa civatêda qebûl kin. Mesele, hergê kesek hindava zarê zorbetî kiriye, yan raber bû, yan jî mixenetî kiriye, wekî ji zewaca xwe aza be, rûspî gerekê têderxin û îzbat bin, hela ewî bi rastî tobe kiriye yan na (Malaxî 2:14; 2 Tîmotêyo 3:6). Rûspî gerekê kerî, dêmek civatê biparêzin. Lê usa jî ewana gerekê fem bikin ku hergê kesek ji dil tobe bike û terka gunekirinê bide,  Yehowa hazir e wî dîsa qebûl ke. Rast e lazim e ku rûspî fesal bin hindava gunekarê ku xirabî yan mixenetî kesekî kiriye, lê dîsa jî ewana gerekê nefikirin ku gunekarên usa wê tu car rema Yehowa nestînin b (1 Petrûs 2:10).

CIVAT DIKARE ÇI BIKE?

13. Em xwe ça didine kifşê hindava kesê ku hatiye lêhilatinê û kesê ku îda para civatê nîne?

¹³ Çawa me gotara pêşiya wêda dît, hergê bê elamkirinê ku kesek hatiye lêhilatinê, em heleqetiya xwe tevî wî nabirin, çimkî em zanin ku ewî tobe kiriye û terka gunekirinê daye (1 Tîmotêyo 5:20). Ew hê para civatê ye, û hewcê hêlana xûşk-bira ye (Îbranî 10:24, 25). Lê halê kesekî ku îda para civatê nîne cûrekî mayîn e. Em gerekê îda tevî yê usa hevaltiyê nekin, “heta nên jî nexwin” (1 Korintî 5:11).

14. Mesîhî li gora îsafa xwe dikarin çi safî kin? (Binihêre usa jî şikil.)

¹⁴ Gelo ev yek tê hesabê ku hergê kesek îda para civatê nîne, gerekê em ji wî bi temamî birevin? Na. Hemikî em gerekê pêra hevaltiyê nekin. Lê Mesîhî dikarin li gora îsafa xwe, ya ku ser hîmê Kitêba Pîroz hatiye hînkirinê, safî kin wekî kesê ku îda Şedê Yehowa nîne, yê ku dibeke merivê wan e yan hevalê wan bû, teglîfî ser civatê kin. Hergê ew bê, gerekê em çi bikin? Berê me silav nedida kesên usa. Lê niha me îda fem kiriye, ku gerekê her Mesîhî li gora îsafa xwe, ya ku ser hîmê Kitêba Pîroz hatiye hînkirinê, xwexa safî ke çi bike. Çaxê merivê ku îda Şedê Yehowa nîne tê civatê, hine kes dibeke safî kin, ku silavê bidine wî yan hine giliyên dilgermî jêra bêjin. Lê gerekê em dirêj jêra xeber nedin û tevî wî wede derbaz nekin.

15. Gelo 2 Yûhenna 9-11-da derheqa kîjan gunekara tê gotinê? (Binihêre çargoşe “ Gelo Yûhenna û Pawlos Derheqa Gunekî Digotin?”)

¹⁵ Dibeke hine kes ji xwe bipirsin: “Gelo Kitêba Pîroz nabêje ku Mesîhî, yê ku silavê dide kesekî usa, ‘tevî kirên wiye xirab  dibin’?” (Bixûne 2 Yûhenna 9-11). Kontêksta 2 Yûhenna nîşan dike, ku ev rêberî derheqa rabera ye û derheqa wan, yên ku kesên din ji riya rast derdixin (Eyantî 2:20). Lema jî, hergê kesek hînkirinên qelp bela dike, yan kesên din berbi kirên xirab hêlan dike, rûspî wê teseliya wî nekin. Hemikî guman heye ku rojekê ewê bê ser hişê xwe. Lê heta hingê, emê silavê nedine wî û ne jî teglîfî civatê kin.

DILŞEWATÎ Û REMTIYÊDA ÇEV BIDINE YEHOWA

16-17. (a) Yehowa dixwaze wekî kesên gunekar çi bikin? (Hezeqêl 18:32) (b) Rûspî çawa dikarin bidine kifşê, wekî ewana tevî Yehowa hevkariyê dikin?

¹⁶ Em ji van pênc gotara çi hîn bûn? Yehowa naxwaze ku kesek qir be (Bixûne Hezeqêl 18:32). Ew dixwaze ku kesên gunekar dîsa heleqetiya xwe tevî wî baş kin (2 Korintî 5:20). Lema jî nava terîxiyêda Yehowa timê ji xizmetkarên xwe, yên ku ji wî dûr ketine, reca kiriye wekî ewana tobe kin û vegerin bal wî. Rûspiyara qedirekî mezin hatiye dayînê wekî tevî Yehowa hevkariyê bikin û alî wan meriva bikin, yên ku gune kirine, wekî tobe kin û vegerin civatê (Romayî 2:4; 1 Korintî 3:9).

¹⁷ De bidine ber çevê xwe, gava kesên gunekar tobe dikin, ser ezmên şabûneke çiqas mezin pêşda tê. Çaxê pezeke undabûyî vedigere civatê, Yehowa gelek şa dibe. Gava em difikirin derheqa remtî, dilşewatî û qenciya Yehowa, hezkirina me hindava wî hê mezin dibe! (Lûqa 1:78)