1. Yehowa dikare çi bike, seva qirara xwe bîne sêrî?

YEHOWA dikare bibe kesê lazim, seva ku qirara xwe bîne sêrî. Mesele, Yehowa dibe Dersdar, Bavê berdiliyê, û Mizgîndar. Ew tenê çend mesele ne, ku ça ew dikare bibe kesê lazim (Îşa. 48:17; 2 Korn. 7:6; Galt. 3:8). Lê ew gelek car meriva dide xebatê, seva qirara xwe bîne sêrî (Met. 24:14; 28:19, 20; 2 Korn. 1:3, 4). Yehowa usa jî dikare bîlaniyê û qewatê bide me her kesî, wekî em bibine kesên lazim, seva qirara wî bînin sêrî. Navê wî hema ew yek tê hesabê, ku ew hin xwe, hin jî efirînên xwe dikare bike kesê lazim, çawa ku gelek zandar vê nêta navê Yehowa şirovedikin.

2. a) Çira cara em dudilî dibin, ku em bona Yehowa kêrhatî ne yan na? b) Emê vê gotarêda derheqa çi şêwir kin?

² Her kes ji me dixwaze destê Yehowada kêrhatî be. Lê hinek dibeke dudilî ne, ku Yehowa wana dide xebatê yan na. Çira? Çimkî ewana ji bo emirê xweyî mezin, derecên xwe, yan jî feresetên xwe haqas nikarin bikin çiqas dixwazin. Lê hinek jî difikirin, wekî ewana êpêceyî dikin, û naxwazin hê zêde bikin û pêşda herin. Vê gotarêda, emê şêwir kin, wekî Yehowa dikare her tiştî bide me, çi ku lazim e seva qirara wî bînin sêrî. Paşê, emê şêwir kin hine serhatiyên ji Kitêba Pîroz, û pêbihesin ku Yehowa ça xwestin û qewat daye xizmetkarên xwe, hin mêra hin jî jina, seva  qirara wî bînin sêrî. Lê xilaziyêda emê şêwir kin, ku ça em dikarin bihêlin, wekî Yehowa me bide xebatê.

3. Li gora Fîlîpî 2:13, Yehowa ça dikare xwestinê bide me, seva filan şixulî bikin?

³ Bixûne Fîlîpî 2:13. * Yehowa dikare xwestinê bike dilê me, seva filan şixulî bikin. Lê ça ew vê yekê dike? Mesele, em pêhesiyane, wekî civatêda kesekîra yan jî şixulekîda alîkarî lazim e. Yan jî rûspiya civatêda nema ji fîlîalê xwendine, wekî cîkî hewcetî heye. Dibeke em pirsê didine xwe: “Ez çida dikarim alîkariyê bidim?” Yan jî dibeke mera şixulekî giran dane, lê em dudilî ne, emê bikaribin ewî şixulî rind bikin yan na. Yan jî paşî xwendina rêzên ji Xebera Xwedê, dibeke em xwera difikirin: “Çawa ez dikarim pê wan rêza alî meriva bikim?” Femdarî ye, Yehowa wê tu car zorê me neke tiştekî bikin. Lê çaxê Yehowa divîne ku em xwe dicêribînin, dêmek difikirin ku çi dikarin aliyê xweda bikin, ew dikare xwestinê û qewatê bide me, wekî em bikin vê yekê, derheqa çi ku fikirîn.

4. Çawa Yehowa dikare qewatê bide me, ku şixul bikin?

⁴ Yehowa dikare usa jî qewatê bide me, ku qirara wî bînin sêrî (Îşa. 40:29). Ew ruhê xweyî pîroz dide me, seva em feresetên xwe hê baş kin (Derk. 35:30-35). Yehowa bi saya teşkîleta xwe me hîn dike, ku çawa filan şixulîda hê pêşda herin û hê rind bikin. Hergê hûn şixulekî nizanin ça bikin, alîkariyê bixwazin. Usa jî hûn her gav dikarin ji Bavê meyî ezmana ku merd e, hîvî kin seva “zorayiya qewatê ji Xwedê” bistînin (2 Korn. 4:7; Lûqa 11:13). Kitêba Pîrozda hene gelek mesele, ku Yehowa ça xwestin û qewat daye mêra û jina, seva qirara wî bînin sêrî. Çaxê em wan serhatiya şêwir kin, bifikirin ku Yehowa ça dikare we jî bide xebatê mîna wan.

5. Em çi pêdihesin ji vê yekê, ku Yehowa çawa û kengê Mûsa da xebatê, seva ew cimeta Wî xilaz ke?

⁵ Yehowa Mûsa kire xilazkarê Îsraêliya. Lê kengê Yehowa wî da xebatê, çaxê Mûsa “temamiya serwaxtiya misiriya hîn bû”, hingê? (Kar. Şand. 7:22-25). Na, Yehowa Mûsa da xebatê tenê hingê, çaxê alî wî kir, ku bibe merivekî şkestî, nerm û bi sebir (Kar. Şand. 7:30, 34-36). Yehowa mêrxasî da Mûsa seva ber serwêrê Misirêyî qewî bisekine (Derk. 9:13-19). Em çi pêdihesin ji vê yekê, ku Yehowa çawa û kengê Mûsa da xebatê? Yehowa wan meriva dide xebatê, yên ku çev didine xeyset-hunurên wî û îtbariya xwe wî tînin ku qewatê ji wî dixwazin (Fîlî. 4:13).

6. Em çi pêdihesin ji vê yekê ku Yehowa ça Barzîllay da xebatê seva ew alî Dawid Padşa bike?

⁶ Gelek qirne şûnda, Yehowa Barzîllay da xebatê, seva alî Dawid Padşa bike. Çaxê Dawid û merivên ku tevî wî bûn, ji kurê wî Abşalom direviyan, ewana tî, birçî û westiyayî bûn. Mêrekî emirda mezin Barzîllay tevî merivên din, emirê xwe kire bin qeziyê, seva alîkariyê bide Dawid û yên ku tevî wî bûn. Barzîllay nefikirî ku ew emirda mezin e, bona Yehowa kêrhatî nîne û nikare tiştekî bike. Dewsê, çi ku destê wîda hebû, ewî bi merdanî da xebatê, seva alî xizmetkarên Xwedê bike,  çida ewana hewce bûn (2 Sam. 17:27-29). Em ji vê yekê çi dersê xwera hîn dibin? Firqî tune em çend salî ne, Yehowa dikare me bide xebatê, seva em hin mihala xweda usa jî welatên mayînda, alî xûşk-bira bikin çida ewana hewce ne (Metlk. 3:27, 28; 19:17). Hergê jî em raste-rast nikarin alî wan bikin, em dikarin bona şixulê hemdinyayê pera qurban kin, kîjan ku tê xerckirinê bona alîkariya wan xûşk-bira, yên ku wedê xezebê ziyanê distînin, û ciyê ku hewcetî heye (2 Korn. 8:14, 15; 9:11).

7. Çawa Yehowa Şimhûn da xebatê, û çira ew yek me dişidîne?

⁷ Yehowa soz da Şimhûnê kalemêr ji Orşelîmê, yê ku amin bû, wekî heta ew Mesîh pê çevê xwe nevîne, wê nemire. Ew soz wê gelek Şimhûn bişidanda, çimkî ew îda gelek sala hîviya Mesîh bû. Bawerî û sebira wî hate keremkirinê. Rojekê, “ew bi rêberiya ruh” hate paristgehê. Wêderê ewî Îsayê biçûk dît, û Yehowa Şimhûn da xebatê seva derheqa vê zarê pêxembertiyê bike, yê ku wê bibe Mesîh (Lûqa 2:25-35). Rast e dibeke Şimhûn pêra negihîşt ku xizmetiya Îsaye ser erdê bivîne, lê ew gelek razî bû seva wî qedirê mezin, ku Yehowa wî da xebatê. Lê dîsa hê zêde kerem hîviya Şimhûn in! Dinya tezeda, ew mêrê amin wê serwêrtiya Îsa bivîne, kîjan ku wê hemûyên ser erdêra kerema bîne (Destp. 22:18). Em jî dikarin bona her cûre şixul ji Yehowa razî bin, wekî ew me dide xebatê.

8. Çawa Yehowa dikare me mîna Barnabas bide xebatê?

⁸ Qirna yekêda D.M., merivekî merd Ûsiv, hîşt wekî Yehowa wî bide xebatê (Kar. Şand. 4:36, 37). Ça tê kifşê Ûsiv yekî gelek dilşewat bû, lema jî şandiya ew nav kirin Barnabas, ku tê hesabê “Yê Dildayînê”. Mesele, çaxê Şawûl bû Mesîhî, yeke gelek bira ditirsiyan nêzîkî wî bin, çimkî ewî berê Mesîhî dizêrandin. Lê Barnabasê dilovan çû alî Şawûl bike. Bêşik, Şawûl qenciya wî gelek şêkirand (Kar. Şand. 9:21, 26-28). Paşê, rûspiyên Orşelîmêda dîtin, wekî xûşk-birên ji Entakya Sûryayêra dildayîn lazim e. Lê wana kê şand bona vê yekê? Belê, Barnabas! Û wana rastî jî merivekî usa bijartin, kîjan ku lazim bû. Kitêba Pîroz dibêje, wekî Barnabas “dil dida wan hemûya ku bi temamiya dilê xweva Xudanra amin bimînin” (Kar. Şand. 11:22-24). Îro jî, Yehowa dikare alî me bike, wekî bona xûşk-bira bibine “yê dildayînê”. Mesele, Yehowa bi saya me dikare berdiliyê bide wan xûşk-bira, kîjana ku merivê xweyî nêzîk unda kirine. Yan jî ew dikare me hêlan ke, seva em teseliya wan xûşk-bira bikin, yan jî têlêxin, yên ku nexweş in yan jî dêprêsiyada nin, û wanra giliyên şîrin bêjin. Lê hûnê bihêlin, wekî Yehowa we jî bide xebatê çawa Barnabas da xebatê? (1 Têsln. 5:14).

9. Em çi pêhesiyan ji vê yekê, ku Yehowa alî Vasîlî kir seva ew bibe rûspiyê baş?

⁹ Yehowa alî birakî kir, navê kîjanî Vasîlî ye, ku bibe şivanê ruhanîyî baş. Çaxê ew 26 saliya xweda bû rûspî, ew ditirsiya ku wê ça ruhanîda alî xûşk-bira bike, îlahî alî wan, yên ku tengasiyada nin. Ew ji rûspiyên cêribandî gelek tişt hîn bû, û usa jî Mekteba Xizmetiyê derbaz bû. Vasîlî aliyê xweda her tişt dikir, seva pêşda here. Mesele, ewî xwera başqe nêtên xweye biçûk nivîsî. Gava ew digihîşte her nêtekê, hêdî-hêdî xweda bawer dibû û îda tirsa wî tune bû. Niha ew dibêje: “Çi ku berê ez didame tirsandinê,  îro minra şabûneke mezin tîne. Çaxê Yehowa alî min dike, ku rêzeke lazim bivînim, seva berdiliyê bidime xûşk yan birakî, ev yek dilê min gelek şa dike”. Birano, hergê hûn mîna Vasîlî hazir in, ku Yehowa we bide xebatê, ew dikare feresetê usa bide we, ku hûn bikaribin civatêda diha zef şixul bikin.

10. Abîgaîlê çi kir, û em ji wê çi dersê hîn dibin?

¹⁰ Çaxê Dawid û mêrên amin ku tevî wî bûn, ji Şawûl direviyan, wanra alîkarî lazim bû. Ew merivên tevî Dawid, çûn bal Nabal, yê ku dewletî bû, û hine xwarin ji wî xwestin. Wana aza ew alîkarî ji wî xwestin, çimkî beriyêda keriyên wî xwey dikirin. Lê Nabal merivekî xwehiz bû û qayîl nebû tiştekî bide wan. Seva vê yekê Dawid gelek hêrs ket û safî kir Nabal û hemû mêrên mala wîda, bikuje (1 Sam. 25:3-13, 22). Lê Abîgaîla jina Nabal, xêncî ku bedew bû, usa jî yeke serwaxt bû. Ewê mêrxasî da kifşê ku çû bal Dawid. Ew kete ser çoka û hîvî wî kir, wekî gunê xûna kesek neke stûyê xwe. Ewê bi merîfetî Dawid şîret kir, wekî evê derecê bide destê Yehowa. Ew giliyên wêye bi milûktî û kirên wêye bi bîlanî, dilê Dawid girtin. Ewî têderxist, wekî Yehowa ew şandiye bal wî (1 Sam. 25:23-28, 32-34). Abîgaîlê xeyset-hunurên usa nav xweda pêşda anîbû, ku alî wê kirin destê Yehowada kêrhatî be. Îro jî xûşkên ku ser xwe dixebitin, wekî merîfet û serwaxt bin, Yehowa dikare wana bide xebatê, seva ewana neferên xwe û xûşk-birên civatêda bişidînin (Metlk. 24:3; Tîto 2:3-5).

11. Qîzên Şallûm çi kirin, û îro kê çev dide wan?

¹¹ Gelek qirne şûnda, qîzên Şallûm nava wan merivada bûn, yên ku Yehowa ew dane xebatê, seva dîwarên Orşelîmê teze kin (Nehem. 2:20; 3:12). Rast e bavê wan serwêr bû, yeke qîzên Şallûm hazir bûn ew şixulê giran û xof bikin (Nehem. 4:15-18). Ewana ne mîna mêrên Tekoaya bûn, kîjan ku navdar bûn û xwe nimiz nekirin, wekî vê xebatêda komekê bidin (Nehem. 3:5). Bidine ber çevê xwe, qîzên Şallûm çiqas şa bûn, çaxê dîwar nava 52 rojada hate xilazkirinê! (Nehem. 6:15). Îro jî, xûşkên xîret şabûnê distînin çaxê xizmetiya mexsûsda şixul dikin, ew heye avakirin û tezekirina wan avaya, kîjan ku tesmîlî Yehowa kirine. Seva ew şixul pêşda here, mera xûşkên usa xîret, zên û amin lazim in.

12. Yehowa ça dikare me bide xebatê çawa Tabîta da xebatê?

¹² Yehowa Tabîta hêlan kir, wekî “qencî û xêrkirinada” merd be, îlahî hindava jinebiyada (Kar. Şand. 9:36). Ew meriveke gelek destvekirî û heyf bû, lema çaxê ew mir, geleka şîna vê dikirin. Lê gava Petrûs ew ji mirinê rakir, şabûna nigê wan erd nedigirt (Kar. Şand. 9:39-41). Em ji Tabîtayê çi hîn dibin? Firqî tune em cahil yan mezin in, mêr yan jin in, em gişk jî dikarin tiştekîda alîkariyê bidine xûşk-bira (Îbrn. 13:16).

13. Yehowa ça xûşkeke şermoke Rût da xebatê, û ewê derheqa vê yekê çi got?

¹³ Xûşkeke me navê kîjanê Rût e, ku yeke şermoke bû, dixwest bibe mîsyonêr. Çaxê ew biçûk bû, ewê mal bi mal zû-zû belavok bela dikirin. Ewê gilî kir: “Min xizmetî bi rastî hiz dikir”. Lê yeke jêra çetin bû ber deriya tevî meriva derheqa Padşatiya Xwedê xeber de. Rast e ew şermoke bû, lê 18 saliya xweda bû pêşeng. Sala 1946, ew Mekteba Gîled derbaz bû û  paşê Hawaîda û Japonyayêda xizmet dikir. Yehowa ew xûşk xizmetiyêda gelek da xebatê, seva ew wan welatada mizgîniyê bela ke. Paşî weke 80 salên xizmetiyêda, Rût got: “Yehowa berdilî dida min û bona min piştovan bû. Ewî alî min kir ku bal xwe şermê bidime hildanê. Ez qayîm bawer dikim, wekî Yehowa dikare her kesî bide xebatê, kê ku îtbariya xwe wî tîne”.

14. Li gora Kolosî 1:29, em gerekê çi bikin seva ku Yehowa me bide xebatê?

¹⁴ Nava terîxiyêda, Yehowa xizmetkarên xwe cûre-cûre rolada dide xebatê. Lê gelo ew wê te ça bide xebatê? Diha zef teva girêdayî ye, ku tu çiqas xîret î û çiqas ser xwe dixebitî. (Bixûne Kolosî 1:29.) Hergê tu bihêlî, Yehowa dikare te bike mizgînvanê xîret, dersdarê baş, merivê berdiliyê, xebatêda hoste, hevalê baş, û her kesê ku jêra lazim e seva qirara xwe bîne sêrî.

15. Li gora 1 Tîmotêyo 4:12, 15, birên cahil gerekê ji Yehowa hîvî kin, ku çida alî wan bike?

¹⁵ Gelî birên cahil, lê hûn çi dikarin bikin? Civatada hewcetiya birên cahil heye, yên ku dikarin hê zêde cabdariya hildine ser xwe, mesele bibine berdestiyên civatê. Gelek civatada rûspî hê zêde hene, ne ku berdestiyên civatê. Birano, hûn dikarin nav xweda xwestina usa pêşda bînin, ku civatêda hê zêde cabdariya hildine ser xwe? Cara hine bira dibêjin: “Ez şa me ku ez hema tenê ça mizgînvan xizmet dikim”. Hergê hûn usa difikirin, hîvî ji Yehowa bikin, wekî xwestina usa nav weda pêşda bîne, ku bibine berdestiyê civatê, û usa jî qewatê bide we, wekî çi ku dikarin xizmetiyêda bikin (Waîz 12:1). Birano, mera alîkariya we lazim e! (Bixûne 1 Tîmotêyo 4:12, 15.)

16. Em ji Yehowa gerekê çi hîvî kin, û çira?

¹⁶ Yehowa dikare we bike ew kes, kê dikare qirara wî bîne sêrî. Lema ji wî hîvî kin, wekî xwestinê bide we, ku şixulê wî bikin, û paşê ji wî hîvî kin, wekî qewatê bide we, çi ku wera lazim e. Firqî tune hûn cahil in yan emirda mezin in, wede, qewat û feresetên xwe bidine xebatê, bona pesindayîna Yehowa (Waîz 9:10). Ji bo tirsê yan jî dudilîbûnê, mecalê destê xwe bernedin, seva şixulê Yehowada hê zêde bikin. Rastî jî qedirekî çiqas mezin e bona me hemûşka, ku hela hê şixulên biçûkda jî em dikarin pesinê Bavê xweyî hizkirî bidin, ku hêjayî vê yekê ye!