Karên Şandiya 25:1-27
25 Fêsto gihîşte herêma Cihûstanê û destpêkir qulixa xwe bîne sêrî. Pey sê rojara, ew ji Qeyseryayê çû Orşelîmê.
2 Serokên kahîna û giregirên Cihûya ber Fêsto şikiyatê Pawlos kirin. Û wana ji Fêsto hîvî kir,
3 wekî ew wanra qenciyê bike ku Pawlos bîne Orşelîmê. Lê nêta wan ev bû, ku telikê çêkin û rêda Pawlos bikujin.
4 Lê Fêsto wanra got ku gerekê Pawlos Qeyseryayêda girtî bimîne, û ew jî wê wexteke nêzîkda vegere wêderê.
5 Ewî usa jî got: “Bira nav weda yên xweyîhukum tevî min bên, û şikiyatê wî bikin, hergê vî merivî bi rastî jî xirabî kiriye”.
6 Fêsto heyşt yan deh roja wêderê ma, paşê çû Qeyseryayê. Roja din, ew ser textê hakim rûnişt û ferman da, wekî Pawlos bînin ber wî.
7 Gava ew hat, Cihûyên ku ji Orşelîmê hatibûn, der-dorê wî girtin û gelek buxdanên giran davîtine wî, lê nikaribûn îzbat kirina.
8 Lê Pawlos bona parastina xwe usa got: “Min hindava Qanûna Cihûya tu gune nekiriye, ne hindava paristgehê, û ne jî hindava Qeyser”.
9 Lê Fêsto dixwest dilê Cihûya bikire, û Pawlosra got: “Dixwazî herî Orşelîmê û wêderê ber min bêyî dîwankirinê?”
10 Lê Pawlos got: “Ez ber textê hakimê Qeyser sekinî me, û gerekê dîwana min vira bê kirinê. Çawa ku tu xwexa zanî, min tu neheqî Cihûya nekiriye.
11 Hergê ez bi rastî neheq im û min tiştekî ku hêjayî mirinê ye, kiriye, ez hazir im bimirim. Lê hergê bona şikiyatên van meriva îzbatî tune ne, îzina tu kesî tune wekî min bide destê wan, seva dilê wan bikire. Ez dewa dîwana Qeyser dikim!”
12 Paşê gava Fêsto tevî şîretkarên xwe xeber da, ewî got: “Tu dewa Qeyser dikî, tê herî cem Qeyser”.
13 Paşî çend roja, Egrîpa Padşa û Bernîk hatine Qeyseryayê ku teseliya Fêsto bikin, û wîra qedir bidine kifşê.
14 Û çimkî ewana çend roja wêderê bûn, Fêsto padşara derheqa şixulê Pawlos gilî kir û got:
“Merivek heye ku Felîks ew girtî hîştiye.
15 Gava ez Orşelîmêda bûm, serokên kahîna û rûspiyên Cihûya şikiyatê wî kirin û dixwestin ew bê dîwankirinê.
16 Lê min wanra got ku li gora edetê Romaya, îzin tune pê xwestina şikiyatçiya merivekî bidine destê wan. Merivê ku tê sûcdarkirinê gerekê rû bi rû tevî kesên ku şikiyatê wî dikin xeber de, wekî mecala wî hebe ku xwe biparêze.
17 Gava ewana hatine vira, min derengî nexist, roja din ez ser textê hakim rûniştim, û min ferman da ku vî merivî bînin.
18 Çaxê şikiyatçî rabûn wekî xeber din, wana tu tiştên xirabda çida jî şikên min hebûn, wî neheq nekirin.
19 Ewana tenê ketine dewê bona pirsên hebandina wanva girêdayî û bona merivekî bi navê Îsa, yê ku miriye, lê Pawlos digot ku ew sax e.
20 Û çimkî min nizanibû ku çawa vê dewê safî kim, min jê pirsî hela ew dixwaze here Orşelîmê, wekî wêderê bona wan tişta bê dîwankirinê.
21 Lê çaxê Pawlos xwest hê girtî bimîne heta Awgûsto* derheqa pirsa wî safîkirinekê bike, min ferman da, wekî ew girtî bimîne, heta ez wî bişînim bal Qeyser”.
22 Hingê Egrîpa gote Fêsto: “Ez dixwazim guh bidime vî merivî”. Fêsto jî gotê: “Tuyê sibê guh bidî wî”.
23 Roja din Egrîpa û Bernîk bi babaxî ketine dîwanê, serokên eskera û giregirên bajêr jî tevî wan bûn. Gava Fêsto ferman da, Pawlos anîn.
24 Fêsto got: “Ya Egrîpa Padşa û hemû kesên ku vira ne, hela wî merivî binihêrin! Hemû Cihûyên Orşelîmê û Cihûyên ku vira ne, bi gazina hatine bal min û bi dengekî bilind dibêjin, wekî ew gerekê bê kuştinê.
25 Lê min fem kir, wekî ewî tiştekî hêjayî mirinê nekiriye. Gava ewî xwest şixulê xwe bive bal Awgûsto, min safî kir ku wî bişînim bal wî.
26 Lê tiştek tune wekî ez derheqa wî Qeyserra binivîsim. Lema jî min ew anî ber we hemûya, û îlahî ber te, ya Egrîpa Padşa, wekî paşî lêkolîna şixulê wîyî dîwanê, ez bikaribim tiştekî binivîsim.
27 Çimkî tiştekî bêaqilayî ye, wekî ez girtîkî bişînim û bona sûcê wî tiştekî nenivîsim”.
Спартьн
^ Sernavê Împêratorê Romê.
