Karên Şandiya 8:1-40
8 Şawûl kuştina Steyfan qebûl dikir.
Wê rojê zêrandineke mezin miqabilî civata Orşelîmê destpêbû û gişk, xêncî şandiya, herêmên Cihûstanê û Sameryayêda hev bela bûn.
2 Merivên xwedêxof Steyfan defin kirin û ser wî şîneke giran kirin.
3 Lê Şawûl destpêkir hicûmî ser civatê ke. Ew ji malekê dikete maleke din, bi destê zorê jin û mêr derdixistin û davîtine kelê.
4 Şagirtên ku hev bela bibûn mizgîniya Xwedê hemû dera gilî dikirin.
5 Fîlîpo kete bajarê Sameryayê,* û destpêkir wanra derheqa Mesîh gilî ke.
6 Hemû meriva rind guh didane Fîlîpo çaxê giliyên wî dibihîstin û didîtin keremetên ku ewî dikirin.
7 Ji gelek kesên cinaketî cin bi qîrîn derdiketin. Xêncî wê yekê, gelek şilûşet û seqet jî dihatine qenckirinê.
8 Û şabûneke mezin kete wî bajarî.
9 Sameryayêda merivek hebû, navê wî Şimhûn bû, yê ku sêrbazî dikir. Ewî xwe ça yekî mezin hesab dikir, û merivên Sameryayê ser kirên wî ecêbmayî diman.
10 Her kesî, ji biçûka heta mezina, dîna xwe dida wî û digot: “Qewata Xwedêye mezin nav wî merivîda ye”.
11 Wana rind guh didane wî, çimkî ewî zûdava pê sêrbaziya xwe cimet ecêbmayî dikir.
12 Lê gava wana Fîlîpo bawer kir, yê ku mizgîniya derheqa Padşatiya Xwedê û derheqa navê Îsa Mesîh bela dikir, him jin him jî mêr dihatine nixumandinê.*
13 Şimhûn jî bawer kir, û çaxê ew hate nixumandinê, berdewam dikir xwe li Fîlîpo digirt û ser nîşan û keremetên wî ecêbmayî dima.
14 Gava şandiyên Orşelîmêda bihîstin ku merivên Sameryayê xebera Xwedê qebûl kirine, wana Petrûs û Yûhenna şandine cem wan.
15 Ewana jî hatin û bona wan dua kirin, wekî ewana ruhê pîroz bistînin,
16 çimkî hê ruhê pîroz nehatibû ser tu kesî ji wan, lê tenê bi navê Xudan Îsa ewana hatibûn nixumandinê.
17 Hingê Petrûs û Yûhenna destên xwe danîn ser wan, û wana ruhê pîroz stand.
18 Gava Şimhûn dît ku meriva ruhê pîroz bi vê yekê distandin ku şandiya destên xwe datanîn ser wan, ewî wanra pere soz da
19 û got: “Ewî hukumî bidine min jî, seva ku ez destên xwe daynim ser kê, ew ruhê pîroz bistîne”.
20 Lê Petrûs jêra got: “Bira zîvê te tevî te biqele, çimkî te tirê tu dikarî pêşkêşa Xwedê pê pera bikirî!
21 Heqê te vê yekêda tune, çimkî Xwedê dilê teyî xirab divîne.
22 Lema vê xirabiya xwe tobe ke, û ber Yehowa lava ke, wekî hergê bibe, ew nêta dilê teye xirab, bibaxşîne te.
23 Çimkî ez divînim ku tu jereke tel î, û xulamê neheqiyê yî”.
24 Şimhûn jî got: “Bona min ber Yehowa lava kin, wekî tiştên ku we minra got, neyêne serê min”.
25 Çaxê wana bi temamî şedetî da û derheqa xebera Yehowa xeber dan, ewana vegeriyane Orşelîmê û rêda gelek gundên Sameryada mizgînî bela dikirin.
26 Lê Fîlîpora melekê Yehowa got: “Rabe û aliyê başûrêva wê rêra here, ya ku ji Orşelîmê diçe Gazayê”. (Ev rê beriyêda ye.)
27 Ew jî rabû û rê ket. Wêderê wezîrekî* ji Etyopyayê hebû. Ew wezîrê padşaya* Etyopya bû li Kendakyayê, û ew bona hemû xizna wê cabdar bû. Ew bona hebandinê çûbû Orşelîmê,
28 û îda vedigeriya malê. Ew ereba xweda rûniştî bû û bi dengekî bilind nivîsara Îşaya pêxember dixwend.
29 Hingê Xwedê bi ruhê xwe Fîlîpora got: “Here, bigihîje wê erebê”.
30 Fîlîpo jî revî, nêzîkî erebê bû û bihîst ku ew bi dengekî bilind nivîsara Îşaya pêxember dixûne, û ji wî pirsî: “Çi ku tu dixûnî fem dikî?”
31 Ewî got: “Heta kesek minra şiroveneke, ezê çawa fem bikim?” Û ewî ji Fîlîpo hîvî kir, wekî ew hilkişe û tevî wî rûnê.
32 Para Nivîsarê ku ewî dixwend, ew bû: “Mîna peza bona serjêkirinê ew hate birinê, û çawa berxa ku wedê birîna hiriyê nake kalîn, ew devê xwe venake.
33 Ew nimiz kirin û bi neheqiyê sûcdar kirin. Kî wê hûr bi hûr derheqa kal-bavên wî gilî ke? Çimkî jîyîna wî ser erdê hate hildanê”.
34 Wezîr jî Fîlîpora got: “Ez hîvî te dikim, minra bêje, pêxember van tişta ser kê dibêje? Ser xwe, yan ser kesekî din?”
35 Fîlîpo destpêkir ji vê nivîsarê xeber de û mizgîniya derheqa Îsa Mesîh gilî ke.
36 Gava ewana hê rêda bûn û gihîştine çemekî, wezîr got: “Va binihêre! Vira av heye. Çi riya min digire ku ez bême nixumandinê?”
37 * ——
38 Û wezîr ferman da ku erebê bidine sekinandinê, ew û Fîlîpo çûn ketine avê, û Fîlîpo ew nixumand.
39 Gava ewana ji avê derketin, ruhê Yehowa derbêra Fîlîpo ji wêderê bir. Wezîr bi şabûneke mezin riya xwe berdewam kir û îda Fîlîpo nedît.
40 Fîlîpo gihîşte Aşdodê, ew wan dera digeriya û berdewam dikir hemû bajarada mizgînî bela dikir heta ku gihîşte Qeyseryayê.
Спартьн
^ Yan dibeke “yek ji bajarên Sameryayê”.
^ Nixumandin edeteke rêlîgî ye, ku meriva pêda dikine bin avê û derdixin.
^ Raste-rast “nemêr”.
^ Ew xebera “padşa” vira jinanî ye.
^ Rêza 37 hine destnivîsarên herî kevine Yûnanîda tune. Lê hine destnivîsarada ev rêz heye.
