ಅಶ್ಲೀಲ ಚಿತ್ರದ ಉದ್ದೇಶ ಏನು ಅಂತ ಅರ್ಥ ಮಾಡ್ಕೊಳ್ಳಿ. ದೇವರು ಯಾವುದನ್ನ ಗೌರವಿಸಬೇಕು ಅಂತ ಹೇಳಿದ್ದಾನೋ ಅದನ್ನ ಅವಮಾನಿಸೋ ತರ ಈ ಅಶ್ಲೀಲ ಚಿತ್ರ ನಮಗೆ ಕುಮ್ಮಕ್ಕು ಕೊಡುತ್ತೆ. ಇದನ್ನ ನಾವು ತಿಳ್ಕೊಂಡ್ರೆ “ಕೆಟ್ಟದ್ದನ್ನ ದ್ವೇಷಿಸೋಕೆ” ಸಹಾಯ ಆಗುತ್ತೆ.—ಕೀರ್ತನೆ 97:10.

 ಇದರಿಂದ ಆಗೋ ಪರಿಣಾಮಗಳ ಬಗ್ಗೆ ಯೋಚನೆ ಮಾಡಿ. ಅಶ್ಲೀಲ ಚಿತ್ರಗಳಿಂದ ಅದ್ರಲ್ಲಿರೋ ವ್ಯಕ್ತಿಗಳ ಮರ್ಯಾದೆ ಹಾಳಾಗುತ್ತೆ. ಅಷ್ಟೇ ಅಲ್ಲ, ಇದನ್ನ ನೋಡೋ ವ್ಯಕ್ತಿಗಳನ್ನೂ ಜನ ಕೀಳಾಗಿ ನೋಡ್ತಾರೆ. ಅದಕ್ಕೆ ಬೈಬಲ್‌ ಹೀಗೆ ಸಲಹೆ ಕೊಡುತ್ತೆ: “ಜಾಣ ಅಪಾಯ ನೋಡಿ ಅಡಗಿಕೊಳ್ತಾನೆ, ಅನುಭವ ಇಲ್ಲದವನು ಮುಂದೆ ಹೋಗಿ ನಷ್ಟ ಅನುಭವಿಸ್ತಾನೆ.”—ಜ್ಞಾನೋಕ್ತಿ 22:3.

 ದೃಢ ತೀರ್ಮಾನ ಮಾಡಿ. ದೇವರ ನಂಬಿಗಸ್ತ ಸೇವಕನಾದ ಯೋಬ “ನಾನು ಯಾವ ಹೆಣ್ಣನ್ನೂ ಕೆಟ್ಟ ದೃಷ್ಟಿಯಿಂದ ನೋಡಲ್ಲ ಅಂತ ದೃಢನಿರ್ಧಾರ ಮಾಡಿದ್ದೀನಿ” ಅಂತ ಹೇಳಿದ. (ಯೋಬ 31:1) ನೀವು ಕೂಡ ಈ ಮುಂದೆ ಕೊಟ್ಟಿರೋ ಕೆಲವು ವಿಷಯಗಳ ಬಗ್ಗೆ ದೃಢ ತೀರ್ಮಾನ ಮಾಡಿ:

•  ನಾನು ಒಬ್ಬನೇ ಇರುವಾಗ ಇಂಟರ್‌ನೆಟ್‌ನ ಬಳಸಲ್ಲ.

•  ನನ್ನ ಕಂಪ್ಯೂಟರ್‌ನಲ್ಲಿ ಇದ್ದಕ್ಕಿದ್ದಂತೆ ಏನಾದ್ರೂ ಅಶ್ಲೀಲ ವಿಷ್ಯ ಕಾಣಿಸಿಕೊಂಡ್ರೆ ತಕ್ಷಣ ಅದನ್ನ ಆಫ್‌ ಮಾಡ್ತೀನಿ.

•  ಒಂದುವೇಳೆ ಅಶ್ಲೀಲ ಚಿತ್ರ ನೋಡೋ ಚಟ ಇದ್ರೆ ದೊಡ್ಡವರ ಹತ್ರ ಇದ್ರ ಬಗ್ಗೆ ಮಾತಾಡ್ತೀನಿ.

 ಪ್ರಾರ್ಥನೆ ಮಾಡಿ. ಒಬ್ಬ ಬೈಬಲ್‌ ಬರಹಗಾರ ಕೂಡ ಸಹಾಯಕ್ಕಾಗಿ ಹೀಗೆ ಬೇಡಿಕೊಂಡ: “ಅಯೋಗ್ಯ ವಿಷ್ಯಗಳನ್ನ ನೋಡದ ಹಾಗೆ ನನ್ನ ದೃಷ್ಟಿಯನ್ನ ಪಕ್ಕಕ್ಕೆ ತಿರುಗಿಸು.” (ಕೀರ್ತನೆ 119:37) ಈ ವಿಚಾರದಲ್ಲಿ ನೀವು ಯಶಸ್ವಿಯಾಗಬೇಕು ಅನ್ನೋದು ದೇವರ ಇಷ್ಟ. ಅದಕ್ಕೆ ಇದರ ಬಗ್ಗೆ ನೀವು ಪ್ರಾರ್ಥನೆ ಮಾಡಿದ್ರೆ ಸರಿಯಾಗಿರೋದನ್ನ ಮಾಡೋಕೆ ಬೇಕಾದ ಬಲವನ್ನ ಆತನು ಖಂಡಿತ ಕೊಡ್ತಾನೆ.—ಫಿಲಿಪ್ಪಿ 4:13.

 ಯಾರ ಹತ್ರನಾದ್ರೂ ಮಾತಾಡಿ. ಈ ಚಟದಿಂದ ಹೊರಗೆ ಬರೋಕೆ ನೀವು ನಂಬೋ ಒಬ್ಬ ಕ್ಲೋಸ್‌ ಫ್ರೆಂಡ್‌ ಹತ್ರ ಮಾತಾಡಿ.—ಜ್ಞಾನೋಕ್ತಿ 17:17.

 ಒಂದು ವಿಷ್ಯ ನೆನಪಿಟ್ಟುಕೊಳ್ಳಿ: ನೀವು ಪ್ರತಿ ಸಲ ಅಶ್ಲೀಲ ಚಿತ್ರನ ನೋಡದೇ ಇದ್ದಾಗ ಒಂದು ದೊಡ್ಡ ಯುದ್ಧನ ಗೆದ್ದಂತೆ. ಈ ಗೆಲುವಿನ ಬಗ್ಗೆ ಯೆಹೋವನ ಹತ್ರ ಮಾತಾಡಿ. ಇದಕ್ಕೆ ಸಹಾಯ ಮಾಡಿದಕ್ಕೆ ಆತನಿಗೆ ಥ್ಯಾಂಕ್‌ ಹೇಳಿ. ಈ ರೀತಿ ನೀವು ಅಶ್ಲೀಲ ಚಿತ್ರ ನೋಡದೇ ಇದ್ರೆ ಯೆಹೋವನ ಮನಸ್ಸಿಗೆ ಸಂತೋಷ ಆಗುತ್ತೆ.—ಜ್ಞಾನೋಕ್ತಿ 27:11.