ಬೈಬಲ್‌ ಏನು ಹೇಳುತ್ತದೆ?

ವಿಶ್ವವನ್ನು ಮತ್ತು ಮೊದಲ ಮಾನವರನ್ನು ಸೃಷ್ಟಿಸುವ ಮೊದಲೇ ದೇವರು ಬುದ್ಧಿಶಾಲಿ ಆತ್ಮಜೀವಿಗಳನ್ನು ಸೃಷ್ಟಿಸಿದ್ದನು. ಅವರು ಮಾನವರಿಗಿಂತ ಉನ್ನತರೂ ಎಷ್ಟೋ ಶಕ್ತಿಶಾಲಿಗಳೂ ಆಗಿದ್ದಾರೆ. ದೇವದೂತರು ಕೂಡ ದೇವರು ಇರುವ ಸ್ಥಳದಲ್ಲಿಯೇ ಇದ್ದಾರೆ. ಮನುಷ್ಯರು ಆ ಸ್ಥಳಕ್ಕೆ ಹೋಗಲು ಅಥವಾ ಅದನ್ನು ನೋಡಲು ಸಾಧ್ಯವಿಲ್ಲ. (ಯೋಬ 38:4, 7) ಈ ಉನ್ನತ ಜೀವಿಗಳನ್ನು ಬೈಬಲ್‌ ಆತ್ಮಜೀವಿಗಳು ಮತ್ತು ‘ದೇವದೂತರು’ ಎಂದು ಕರೆಯಲಾಗಿದೆ.—ಕೀರ್ತನೆ 104:4; 103:20. *

ಇಷ್ಟಕ್ಕೂ ಎಷ್ಟು ಮಂದಿ ದೇವದೂತರಿದ್ದಾರೆ? ಅಪಾರ ಸಂಖ್ಯೆಯ ದೂತರಿದ್ದಾರೆ. ದೇವರ ಸಿಂಹಾಸನದ ಸುತ್ತಲೂ ‘ಕೋಟ್ಯಾನುಕೋಟಿ ಲಕ್ಷೋಪಲಕ್ಷ’ ದೇವದೂತರಿದ್ದಾರೆ. (ಪ್ರಕಟನೆ 5:11) ಈ ಸಂಖ್ಯೆಯನ್ನು ಅಕ್ಷರಾರ್ಥವಾಗಿ ಪರಿಗಣಿಸುವುದಾದರೆ ದೇವದೂತರ ಸಂಖ್ಯೆ ಕೋಟಿಗಟ್ಟಲೆ ಇದೆ!

‘ಇದಲ್ಲದೆ ನಾನು ನೋಡಿದಾಗ ಸಿಂಹಾಸನದ ಸುತ್ತಲೂ ಅನೇಕ ದೇವದೂತರಿದ್ದರು. ಅವರ ಸಂಖ್ಯೆಯು ಕೋಟ್ಯಾನುಕೋಟಿಯಾಗಿಯೂ ಲಕ್ಷೋಪಲಕ್ಷವಾಗಿಯೂ ಇತ್ತು.’—ಪ್ರಕಟನೆ 5:11.

ಬೈಬಲ್‌ ಏನು ಹೇಳುತ್ತದೆ?

ದೇವದೂತರು ದೇವರ ಸಂದೇಶವಾಹಕರಾಗಿ ಕೆಲಸ ಮಾಡಿದರು. * ದೇವರ ಸಹಾಯದಿಂದ ಅದ್ಭುತಕಾರ್ಯಗಳನ್ನು ಮಾಡುವವರು ಎಂದು ಬೈಬಲ್‍ನಲ್ಲಿ ಅವರನ್ನು ವರ್ಣಿಸಲಾಗಿದೆ. ಅಬ್ರಹಾಮನು ತನ್ನ ಮಗನಾದ ಇಸಾಕನನ್ನು ಯಜ್ಞವಾಗಿ ಅರ್ಪಿಸುವಾಗ ಅವನನ್ನು ತಡೆದು ಆಶೀರ್ವದಿಸಲು ದೇವರು ತನ್ನ ದೂತನನ್ನು ಕಳುಹಿಸಿದನು. (ಆದಿಕಾಂಡ 22:11-18) ಜೀವನವೇ ಬದಲಾಯಿಸುವ ಸಂದೇಶವನ್ನು ಮೋಶೆಗೆ ಹೇಳಲು ಒಬ್ಬ ದೇವದೂತನು ಉರಿಯುವ ಪೊದೆಯೊಳಗೆ ಕಾಣಿಸಿಕೊಂಡನು. (ವಿಮೋಚನಕಾಂಡ 3:1, 2) ಪ್ರವಾದಿ ದಾನಿಯೇಲನನ್ನು ಸಿಂಹದ ಗವಿಯಲ್ಲಿ ಹಾಕಿದಾಗ, ‘ದೇವರು ತನ್ನ ದೂತನನ್ನು ಕಳುಹಿಸಿ ಸಿಂಹಗಳ ಬಾಯಿಗಳನ್ನು ಬಂಧಿಸಿದನು.’—ದಾನಿಯೇಲ 6:22.

‘ಅಲ್ಲಿ ಮುಳ್ಳಿನ ಪೊದೆಯೊಳಗೆ ಉರಿಯುವ ಬೆಂಕಿಯಲ್ಲಿ ಯೆಹೋವನ ದೂತನು ಮೋಶೆಗೆ ಕಾಣಿಸಿಕೊಂಡನು.’—ವಿಮೋಚನಕಾಂಡ 3:2.

ಬೈಬಲ್‌ ಏನು ಹೇಳುತ್ತದೆ?

ದೇವದೂತರು ಈಗ ಮಾಡುತ್ತಿರುವ ಪ್ರತಿಯೊಂದು ಕೆಲಸವನ್ನು ನಾವು ತಿಳಿದುಕೊಳ್ಳಲು ಸಾಧ್ಯ ಇಲ್ಲ. ಆದರೆ, ಅವರು ಯಥಾರ್ಥ ಜನರಿಗೆ ದೇವರ ಬಗ್ಗೆ ತಿಳಿದುಕೊಳ್ಳಲು ಸಹಾಯ ಮಾಡುವ ಕೆಲಸದಲ್ಲಿ ಒಳಗೂಡಿದ್ದಾರೆ ಎಂದು ಬೈಬಲ್‌ ಹೇಳುತ್ತದೆ.—ಅಪೊಸ್ತಲರ ಕಾರ್ಯಗಳು 8:26-35; 10:1-22; ಪ್ರಕಟನೆ 14:6, 7.

ಪೂರ್ವಜನಾದ ಯಾಕೋಬನಿಗೆ ಕನಸು ಬೀಳುವಂತೆ ಯೆಹೋವನು ಮಾಡಿದನು. ಆ ಕನಸಿನಲ್ಲಿ ದೇವದೂತರು ‘ನಿಚ್ಚಣಿಗೆಯ’ (ಏಣಿ) ಮೂಲಕ ಭೂಮಿಯಿಂದ ಸ್ವರ್ಗಕ್ಕೆ, ಸ್ವರ್ಗದಿಂದ ಭೂಮಿಗೆ ಹತ್ತುತ್ತಾ ಇಳಿಯುತ್ತಾ ಇದ್ದದ್ದನ್ನು ಕಂಡನು. (ಆದಿಕಾಂಡ 28:10-12) ಯಾಕೋಬನು ಕಂಡ ಆ ಕನಸಿನಿಂದ, ಅವನು ಯಾವ ನಿರ್ಣಯಕ್ಕೆ ಬಂದನೋ ನಾವು ಕೂಡ ಆ ನಿರ್ಣಯಕ್ಕೆ ಬರಬಹುದು. ಯಾರಿಗೆ ನೆರವಿನ ಅಗತ್ಯವಿದೆಯೋ ಅಂಥ ನಿಷ್ಠಾವಂತ ಜನರಿಗೆ ಸಹಾಯ ಮಾಡುವಂತೆ ಯೆಹೋವನು ದೇವದೂತರನ್ನು ಭೂಮಿಗೆ ಕಳುಹಿಸುತ್ತಾನೆ.—ಆದಿಕಾಂಡ 24:40; ವಿಮೋಚನಕಾಂಡ 14:19; ಕೀರ್ತನೆ 34:7. ▪

“ಆ ಕನಸಿನಲ್ಲಿ ಒಂದು ನಿಚ್ಚಣಿಗೆ ನೆಲದ ಮೇಲೆ ನಿಂತಿತ್ತು; ಅದರ ತುದಿ ಆಕಾಶವನ್ನು ಮುಟ್ಟಿತ್ತು; ಅದರ ಮೇಲೆ ದೇವದೂತರು ಹತ್ತುತ್ತಾ ಇಳಿಯುತ್ತಾ ಇದ್ದರು.”—ಆದಿಕಾಂಡ 28:12.