ಇದು ಇಷ್ಟಕ್ಕೆ ನಿಂತಿದ್ದರೆ ಪರವಾಗಿಲ್ಲ. ಆದರೆ ಮುಂದಿನ ಸಲ ಹೋದಾಗಲೂ ಅವಳದು ಅದೇ ಗೋಳು. ಪುನಃ ಆ್ಯಂಟೋನಿಯ ಮೇಲೆ ರೇಗಾಡಿದಳು. ಆ್ಯಂಟೋನಿಯಗೆ ಹೇಗಾಗಿರಬಹುದು? ಅವಳೇ ಹೇಳುತ್ತಾಳೆ ಕೇಳಿ: “ನಂದೇನ್‌ ತಪ್ಪಿರಲಿಲ್ಲ. ಸುಮ್ನೆ ಇರಕ್ಕೆ ತುಂಬ ಕಷ್ಟ ಆಯ್ತು.” ಆದರೂ ಆ್ಯಂಟೋನಿಯ ಈ ಸಾರಿನೂ ಕ್ಷಮೆ ಕೇಳಿ, ‘ನಿಮ್ಮ ನೋವೇನು ಅಂತ ನನಗೆ ಅರ್ಥ ಆಗುತ್ತೆ’ ಅಂತ ಅವಳಿಗೆ ಹೇಳಿದಳು.

ಆ್ಯಂಟೋನಿಯಳ ಜಾಗದಲ್ಲಿ ನೀವು ಇದ್ದಿದ್ದರೆ ಏನು ಮಾಡುತ್ತಿದ್ದಿರಿ? ಅವಳ ಹಾಗೆ ಶಾಂತವಾಗಿರುತ್ತಿದ್ದಿರಾ? ಅಥವಾ ಕೋಪದಿಂದ ಕೂಗಾಡುತ್ತಿದ್ದಿರಾ? ಇಂಥ ಸನ್ನಿವೇಶದಲ್ಲಿ ಶಾಂತವಾಗಿರುವುದು ಹೇಳಿದಷ್ಟು ಸುಲಭ ಅಲ್ಲ. ಅದರಲ್ಲೂ ಯಾರಾದರೂ ಕಿರಿಕಿರಿ ಮಾಡಿದಾಗ, ಒತ್ತಡ ಇದ್ದಾಗಂತೂ ಶಾಂತವಾಗಿರುವುದು ಇನ್ನೂ ಕಷ್ಟ.

ಕ್ರೈಸ್ತರು ಯಾವುದೇ ಸನ್ನಿವೇಶದಲ್ಲಿ ತಾಳ್ಮೆ ಕಳಕೊಳ್ಳಬಾರದು ಅಂತ ದೇವರ ವಾಕ್ಯ ಉತ್ತೇಜಿಸುತ್ತದೆ. ಶಾಂತಗುಣಕ್ಕೂ ವಿವೇಕಕ್ಕೂ ಸಂಬಂಧ ಇದೆ ಎಂದೂ ಅದು ಹೇಳುತ್ತದೆ. “ನಿಮ್ಮಲ್ಲಿ ವಿವೇಕಿಯೂ ತಿಳಿವಳಿಕೆಯುಳ್ಳವನೂ ಯಾರು? ಅಂಥವನು ಉತ್ತಮ ನಡತೆಯಿಂದ ವಿವೇಕಕ್ಕೆ ಸೇರಿದ್ದಾಗಿರುವ ಸೌಮ್ಯಭಾವ [ಶಾಂತಗುಣ]ದೊಂದಿಗೆ ತನ್ನ ಕ್ರಿಯೆಗಳನ್ನು ತೋರಿಸಲಿ” ಎನ್ನುತ್ತದೆ ಬೈಬಲ್‌. (ಯಾಕೋ. 3:13) ಶಾಂತಗುಣ ವಿವೇಕದ  ಲಕ್ಷಣ ಹೇಗೆ? ಈ ದೈವಿಕ ಗುಣವನ್ನು ಬೆಳೆಸಿಕೊಳ್ಳಲು ನಮಗೆ ಯಾವುದು ಸಹಾಯಮಾಡುತ್ತದೆ?

ಸಿಟ್ಟನ್ನಾರಿಸುತ್ತದೆ. “ಮೃದುವಾದ ಪ್ರತ್ಯುತ್ತರವು ಸಿಟ್ಟನ್ನಾರಿಸುವದು; ಬಿರುನುಡಿಯು ಸಿಟ್ಟನ್ನೇರಿಸುವದು.”—ಜ್ಞಾನೋ. 15:1.

ಒಬ್ಬರಿಗೆ ಕೋಪ ಬಂದಿರುವಾಗ ಇನ್ನೊಬ್ಬರೂ ಕೋಪದಿಂದ ಮಾತಾಡುವುದು ‘ಉರಿಯೋ ಬೆಂಕಿಗೆ ತುಪ್ಪ ಸುರಿದ ಹಾಗೆ.’ (ಜ್ಞಾನೋ. 26:21) ಆದರೆ ಶಾಂತಗುಣ ‘ಉರಿಯೋ ಬೆಂಕಿಗೆ ನೀರು ಸುರಿದ ಹಾಗೆ.’ ಕೋಪದಿಂದ ಕುದಿಯುತ್ತಿರುವ ವ್ಯಕ್ತಿಯನ್ನು ಕೂಡ ತಣ್ಣಗಾಗಿಸುತ್ತದೆ.

ಆ್ಯಂಟೋನಿಯಗೆ ಇದರ ಅನುಭವ ಆಯಿತು. ಅವಳು ಎದುರು ಮಾತಾಡದೆ ನಿಂತಿರುವುದನ್ನು ನೋಡಿ ಆ ಸ್ತ್ರೀಯ ಕೋಪ ಕರಗಿ ಕಣ್ಣೀರಾಯಿತು. ‘ಏನೋ ಟೆನ್ಷನಲ್ಲಿ ಮಾತಾಡಿಬಿಟ್ಟೆ. ಕುಟುಂಬದಲ್ಲೂ ಕೆಲವು ಸಮಸ್ಯೆಗಳಿವೆ’ ಅಂತ ಹೇಳಿಕೊಂಡಳು. ಆ್ಯಂಟೋನಿಯ ಆಕೆಗೆ ಸಾಕ್ಷಿ ಕೊಟ್ಟಳು. ಬೈಬಲ್‌ ಅಧ್ಯಯನನೂ ಶುರು ಆಯಿತು. ಇಷ್ಟೆಲ್ಲಾ ಆಗಿದ್ದು ಹೇಗೆ? ಆ್ಯಂಟೋನಿಯ ಶಾಂತವಾಗಿ ಇದ್ದದ್ದರಿಂದಲೇ.

ನಾವು ಸಂತೋಷವಾಗಿರುತ್ತೇವೆ. “ಸೌಮ್ಯಭಾವ [ಶಾಂತಗುಣ]ದವರು ಸಂತೋಷಿತರು; ಅವರು ಭೂಮಿಗೆ ಬಾಧ್ಯರಾಗುವರು.”—ಮತ್ತಾ. 5:5.

ಮೊದಲೆಲ್ಲಾ ಮುಟ್ಟಿದರೆ ಮುನಿ ಅಂತಿದ್ದವರು ಶಾಂತಗುಣ ಬೆಳೆಸಿಕೊಂಡು ಸಂತೋಷವಾಗಿದ್ದಾರೆ. ಯಾಕೆಂದರೆ ಈಗ ಅವರ ಬದುಕಿಗೊಂದು ಅರ್ಥ ಇದೆ ಮತ್ತು ತಮಗಾಗಿ ಸುಂದರ ಭವಿಷ್ಯ ಕಾದಿದೆ ಅಂತ ಅವರಿಗೆ ಗೊತ್ತಿದೆ. (ಕೊಲೊ. 3:12) ಸ್ಪೇನ್‌ ದೇಶದ ಒಬ್ಬ ಸಂಚರಣ ಮೇಲ್ವಿಚಾರಕರಾದ ಸಹೋದರ ಅಡೊಲ್ಫೋ ಸತ್ಯ ಸಿಗುವ ಮುಂಚೆ ತಮ್ಮ ಬದುಕು ಹೇಗಿತ್ತು ಅಂತ ಹೇಳುತ್ತಾರೆ ಕೇಳಿ.

“ನನ್ನ ಜೀವನಕ್ಕೆ ಗೊತ್ತುಗುರಿ ಏನು ಇರಲಿಲ್ಲ. ಆದ್ರೆ ಇದ್ದದ್ದು ಒಂದೇ, ಮೂಗಿನ ತುದಿಯಲ್ಲಿ ಕೋಪ. ಸಿಟ್ಟು ಬಂದಾಗ ನಾನು ಹೇಗಾಡ್ತಿದ್ದೆ ಅಂದ್ರೆ ನನ್ನ ಭಯಂಕರ ಅವತಾರನಾ ನೋಡಿ ನನ್ನ ಸ್ನೇಹಿತರೇ ನಡುಗಿಹೋಗುತ್ತಿದ್ರು. ‘ಪೆಟ್ಟು ತಿಂದ ಮೇಲೆ ಬುದ್ಧಿಬಂತು’ ಅನ್ನುವ ಹಾಗೆ ಕೊನೆಗೂ ಬುದ್ಧಿ ಕಲ್ತೆ. ಒಂದು ಗಲಾಟೆಯಲ್ಲಿ ನನಗೆ ಆರು ಸಲ ಕತ್ತಿಯಿಂದ ತಿವಿಯಲಾಯಿತು. ಸಿಕ್ಕಾಪಟ್ಟೆ ರಕ್ತಹೋಗಿ ಸಾವಿನಂಚಿಗೆ ಬಂದು ಬಿಟ್ಟಿದ್ದೆ.”

ಆದರೆ ಈಗ ಸಹೋದರ ಅಡೊಲ್ಫೋ ಶಾಂತಗುಣ ತೋರಿಸುವುದರಲ್ಲಿ ಒಳ್ಳೇ ಮಾದರಿ ಇಟ್ಟಿದ್ದಾರೆ ಮತ್ತು ಶಾಂತರಾಗಿ ಇರಲು ಬೇರೆಯವರಿಗೂ ಕಲಿಸುತ್ತಿದ್ದಾರೆ. ಅವರ ಒಳ್ಳೇ ಗುಣವನ್ನು ನೋಡಿ ಎಷ್ಟೋ ಜನ ಅವರನ್ನು ತುಂಬ ಇಷ್ಟಪಡುತ್ತಾರೆ. ತಾನು ಬದಲಾಗಿರುವುದಕ್ಕೆ ಅಡೊಲ್ಫೋ ತುಂಬ ಖುಷಿಪಡುತ್ತಾರೆ. ಶಾಂತಗುಣ ಬೆಳೆಸಿಕೊಳ್ಳಲು ಸಹಾಯ ಮಾಡಿದ್ದಕ್ಕಾಗಿ ಯೆಹೋವನಿಗೆ ಸದಾ ಋಣಿ ಆಗಿದ್ದಾರೆ.

ಯೆಹೋವನಿಗೂ ಸಂತೋಷವಾಗುತ್ತದೆ. “ಮಗನೇ, ಜ್ಞಾನವನ್ನು ಪಡೆದುಕೊಂಡು ನನ್ನ ಮನಸ್ಸನ್ನು ಸಂತೋಷಪಡಿಸು; ಹಾಗಾದರೆ, ನನ್ನನ್ನು ದೂರುವವನಿಗೆ ನಾನು ಉತ್ತರಕೊಡಲಾಗುವದು.”—ಜ್ಞಾನೋ. 27:11.

ಯೆಹೋವನ ದೊಡ್ಡ ಶತ್ರು ಆಗಿರುವ ಸೈತಾನನಿಗೆ ದೇವರನ್ನು ನಿಂದಿಸುತ್ತಾ ಇರುವುದೇ ಕೆಲಸ. ಅವನು ಬೇಕುಬೇಕಂತ ಯೆಹೋವನ ಮನಸ್ಸಿಗೆ ನೋವು ಮಾಡುತ್ತಿರುವುದರಿಂದ ಯೆಹೋವನು ಸಿಟ್ಟುಗೊಂಡರೂ ತಪ್ಪಾಗಲ್ಲ. ಆದರೂ ಆತನು ಸಿಟ್ಟುಗೊಳ್ಳುವುದಿಲ್ಲ. ಆದ್ದರಿಂದ ಆತನು ‘ದೀರ್ಘಶಾಂತನು’ ಅಂತ ಬೈಬಲ್‌ ಹೇಳುತ್ತದೆ. (ವಿಮೋ. 34:6) ಯೆಹೋವನ ತರ ನಾವು ಕೋಪಮಾಡಿಕೊಳ್ಳದೆ ಶಾಂತರಾಗಿದ್ದರೆ ನಾವು ವಿವೇಕಿಗಳೆಂದು ತೋರಿಸುತ್ತೇವೆ ಮತ್ತು ಇದು ಯೆಹೋವನಿಗೆ ಸಂತೋಷ ತರುತ್ತದೆ.—ಎಫೆ. 5:1.

ಈ ಲೋಕದಲ್ಲಿ ಎಲ್ಲಾ ಕಡೆ ಕೋಪ, ದ್ವೇಷ ತುಂಬಿದೆ. ನಮ್ಮ ಸುತ್ತಮುತ್ತ ಇರುವ ಜನರು “ಸ್ವಪ್ರತಿಷ್ಠೆಯುಳ್ಳವರೂ ಅಹಂಕಾರಿಗಳೂ . . . ಮಿಥ್ಯಾಪವಾದಿಗಳೂ ಸ್ವನಿಯಂತ್ರಣವಿಲ್ಲದವರೂ ಉಗ್ರರೂ” ಆಗಿದ್ದಾರೆ. (2 ತಿಮೊ. 3:2, 3) ಹಾಗಂತ ನಾವು ಅವರಂತೆ ಆಗಬಾರದು. ಶಾಂತಗುಣವನ್ನು ಬೆಳೆಸಿಕೊಳ್ಳಬೇಕು. “ಮೇಲಣಿಂದ ಬರುವ ವಿವೇಕವು . . . ಶಾಂತಿಶೀಲವಾದದ್ದು, ನ್ಯಾಯಸಮ್ಮತವಾದದ್ದು” ಅಂತ ದೇವರ ವಾಕ್ಯ ಹೇಳುತ್ತದೆ. (ಯಾಕೋ. 3:17) ನಾವು ಶಾಂತಿಶೀಲರು, ನ್ಯಾಯಸಮ್ಮತರೂ ಆಗಿದ್ದರೆ ನಮ್ಮಲ್ಲಿ ದೈವಿಕ ವಿವೇಕ ಇದೆ ಅಂತ ಅರ್ಥ. ಇಂಥ ವಿವೇಕ ಬೇರೆಯವರು ಕಿರಿಕಿರಿ ಮಾಡಿದರೂ ಶಾಂತರಾಗಿರಲು ಸಹಾಯಮಾಡುತ್ತೆ ಮತ್ತು ವಿವೇಕದ ಮೂಲನಾಗಿರುವ ನಮ್ಮ ತಂದೆ ಯೆಹೋವನಿಗೆ ನಮ್ಮನ್ನು ಇನ್ನಷ್ಟು ಹತ್ತಿರ ತರುತ್ತೆ.