ಇದೇ ತರ ತುಂಬಾ ಜನರಿಗೆ ಪ್ರಾರ್ಥನೆ ಒಂದು ಅದ್ಭುತ ವರ ಅಂತ ಅನ್ಸುತ್ತೆ. ಪ್ರಾರ್ಥನೆ ಮೂಲಕ ದೇವರ ಹತ್ರ ಮಾತಾಡಬಹುದು, ಥ್ಯಾಂಕ್ಸ್‌ ಹೇಳಬಹುದು ಮತ್ತು ಸಹಾಯ ಕೇಳಬಹುದು ಅಂತ ಅವರು ಹೇಳ್ತಾರೆ. “ದೇವರ ಚಿತ್ತಕ್ಕನುಸಾರ ಯಾವುದನ್ನೇ ಕೇಳಿಕೊಂಡರೂ ಆತನು ನಮಗೆ ಕಿವಿಗೊಡುತ್ತಾನೆಂಬ ಭರವಸೆಯು ಆತನ ವಿಷಯವಾಗಿ ನಮಗುಂಟು” ಅಂತ ದೇವರ ವಾಕ್ಯ ಹೇಳೋದನ್ನ ಅವರು ನಂಬ್ತಾರೆ.—1 ಯೋಹಾನ 5:14.

ಆದರೆ ಇನ್ನು ಕೆಲವರಿಗೆ ಪ್ರಾರ್ಥನೆ ಮಾಡೋದ್ರಿಂದ ಯಾವ ಪ್ರಯೋಜನನೂ ಇಲ್ಲ ಅನ್ಸುತ್ತೆ. ಇದೇ ಅಭಿಪ್ರಾಯ ಸ್ಟೀವ್‌ ಅನ್ನೋ ಯುವಕನಿಗೆ ಸಹ ಇತ್ತು. ಅವನು ಹೀಗೆ ಹೇಳ್ತಾನೆ, “ನನಗೆ 17 ವರ್ಷ ಇದ್ದಾಗ ನನ್ನ ಮೂರು ಸ್ನೇಹಿತರು ತೀರಿಕೊಂಡ್ರು. ಒಬ್ಬ ಕಾರ್‌ ಆಕ್ಸಿಡೆಂಟಲ್ಲಿ ಸತ್ತುಹೋದ. ಇನ್ನಿಬ್ರು ಸಮುದ್ರದಲ್ಲಿ ಮುಳುಗಿ ಸತ್ತುಹೋದರು. ಆ ಸಮಯದಲ್ಲಿ ನಾನು  ಪ್ರಾರ್ಥನೇಲಿ ದೇವರ ಹತ್ರ ಇದೆಲ್ಲಾ ಯಾಕೆ ಆಗಬೇಕಿತ್ತು ಅಂತ ಕೇಳ್ದೆ. ಆದರೆ ನನ್ನ ಪ್ರಾರ್ಥನೆಗೆ ಯಾವುದೇ ಉತ್ರ ಸಿಗಲಿಲ್ಲ, ಆಗ ನಂಗೆ ಪ್ರಾರ್ಥನೆ ಮಾಡಿ ಏನ್‌ ಪ್ರಯೋಜನ ಅಂತ ಅನಿಸ್ತು.” ಸ್ಟೀವ್‌ ತರ ಪ್ರಾರ್ಥನೆ ಮಾಡಿದಾಗ ಉತ್ರ ಸಿಗದಿದ್ರೆ ಪ್ರಾರ್ಥನೆ ಮಾಡಿ ಏನ್‌ ಪ್ರಯೋಜನ ಅಂತ ಅನಿಸೋದು ಸಹಜ.

ಇನ್ನೂ ಕೆಲವರಿಗೆ ‘ನಮ್ಮ ಜೀವನದಲ್ಲಿ ಏನೆಲ್ಲಾ ನಡೀತಿದೆ, ನಮಗೆ ಏನೇನು ಬೇಕು ಅಂತ ದೇವರಿಗೆ ಗೊತ್ತು, ಹಾಗಾಗಿ ಪ್ರಾರ್ಥನೆ ಮಾಡೋ ಅವಶ್ಯಕತೆ ಏನಿದೆ’ ಅಂತ ಅನ್ಸುತ್ತೆ.

ಇನ್ನು ಸ್ವಲ್ಪ ಜನ ‘ಹಿಂದೆ ನಾವೇನೋ ತಪ್ಪು ಮಾಡಿದ್ರಿಂದ ದೇವರು ನಮ್ಮ ಪ್ರಾರ್ಥನೆ ಕೇಳ್ತಿಲ್ಲ’ ಅಂತ ಅಂದುಕೊಳ್ತಾರೆ. ಜೆನ್ನಿ ಅನ್ನೋ ಸ್ತ್ರೀ ಹೀಗೆ ಹೇಳ್ತಾಳೆ, “ದೇವರಿಗೆ ಪ್ರಾರ್ಥನೆ ಮಾಡುವಷ್ಟು ಯೋಗ್ಯತೆ ನಂಗಿಲ್ಲ ಅನ್ಸುತ್ತೆ, ಯಾಕೆಂದ್ರೆ ನಾನು ತುಂಬಾ ತಪ್ಪು ಮಾಡಿದ್ದೀನಿ. ಅದಕ್ಕೆ ದೇವರು ನನ್ನ ಪ್ರಾರ್ಥನೆನ ಕೇಳಲ್ಲ.”

ಪ್ರಾರ್ಥನೆ ಬಗ್ಗೆ ನಿಮ್ಮ ಅಭಿಪ್ರಾಯ ಏನು? ಪ್ರಾರ್ಥನೆ ಮಾಡೋದ್ರಿಂದ ಏನೂ ಪ್ರಯೋಜನ ಇಲ್ಲ ಅಂತ ನಿಮಗೆ ಅನ್ಸುತ್ತಾ? ನಿಮ್ಮ ಮನಸ್ಸಿಗೆ ಈ ಕೆಳಗಿನ ಪ್ರಶ್ನೆಗಳು ಸಹ ಬಂದಿರಬಹುದು:

• ದೇವರು ನಿಜವಾಗಲೂ ನಮ್ಮ ಪ್ರಾರ್ಥನೆಗಳನ್ನ ಕೇಳ್ತಾನಾ?

• ಕೆಲವು ಪ್ರಾರ್ಥನೆಗಳಿಗೆ ದೇವರು ಯಾಕೆ ಉತ್ರ ಕೊಡಲ್ಲ?

• ಹೇಗೆ ಪ್ರಾರ್ಥಿಸಿದ್ರೆ ದೇವರು ಉತ್ರ ಕೊಡ್ತಾನೆ?

• ಪ್ರಾರ್ಥನೆ ಮಾಡೋದ್ರಿಂದ ಯಾವ ಪ್ರಯೋಜನಗಳು ಸಿಗುತ್ತೆ?

ಪವಿತ್ರ ಗ್ರಂಥವಾದ ಬೈಬಲಿನಲ್ಲಿ ಈ ಎಲ್ಲ ಪ್ರಶ್ನೆಗಳಿಗೆ ಉತ್ರ ಇದೆ ಮತ್ತು ಅದನ್ನ ನಾವು ನಂಬಬಹುದು. *