ನೀವು ತಪ್ಪಿಸಿಕೊಳ್ಳಬಾರದಂಥ ಒಂದು ವಿಶೇಷ ಘಟನೆ

“ಎಲ್ಲಾ ಒಳ್ಳೇ ದಾನಗಳೂ ಕುಂದಿಲ್ಲದ ಎಲ್ಲಾ ವರಗಳೂ” ನಮ್ಮ ಸ್ವರ್ಗೀಯ ತಂದೆಯಾಗಿರುವ ದೇವರಿಂದ ಬರುತ್ತವೆ.​—ಯಾಕೋಬ 1:17.

ಪಾಪದಲ್ಲಿ ಬಿದ್ದಿರುವ ಮಾನವಜಾತಿಗೆ ದೇವರು ಅತ್ಯಂತ ಶ್ರೇಷ್ಠವಾದೊಂದು ಕೊಡುಗೆಯನ್ನು ಕೊಟ್ಟಿದ್ದಾನೆ. ಅದು, ಅವರು ತಮ್ಮ ಪಾಪಪೂರ್ಣ ಸ್ಥಿತಿಯಿಂದ ಹೊರಬರುವಂತೆ ಆತನು ಮಾಡಿರುವ ಒದಗಿಸುವಿಕೆಯೇ ಆಗಿದೆ. ಅದನ್ನು, ಆತನು ತನ್ನ ಒಬ್ಬನೇ ಮಗನಾಗಿರುವ ಯೇಸು ಕ್ರಿಸ್ತನ ಮೂಲಕ ಮಾಡಿದ್ದಾನೆ. ನಮ್ಮ ವಿಮೋಚಕನೋಪಾದಿ ಯೇಸು ತನ್ನ ಜೀವವನ್ನು ಕೊಟ್ಟಿರುವುದು, ಭೂಪರದೈಸದಲ್ಲಿ ನಿತ್ಯಜೀವವನ್ನು ಪಡೆದುಕೊಳ್ಳುವಂತೆ ಸಾಧ್ಯಮಾಡುತ್ತದೆ. ಲೂಕ 22:19ರಲ್ಲಿ, ಯೇಸುವಿನ ಮರಣವನ್ನು ಸ್ಮರಿಸಿಕೊಳ್ಳುವಂತೆ ನಮಗೆ ಆಜ್ಞಾಪಿಸಲಾಗಿದೆ.

ಯೇಸುವಿನ ಈ ಆಜ್ಞೆಯನ್ನು ಪಾಲಿಸಲಿಕ್ಕಾಗಿ ತಮ್ಮೊಂದಿಗೆ ಜೊತೆಗೂಡುವಂತೆ, ಯೆಹೋವನ ಸಾಕ್ಷಿಗಳು ನಿಮ್ಮನ್ನು ಹೃತ್ಪೂರ್ವಕವಾಗಿ ಆಮಂತ್ರಿಸುತ್ತಾರೆ. ಈ ವಾರ್ಷಿಕ ಘಟನೆಯು, ಇಸವಿ 2001ರ ಏಪ್ರಿಲ್‌ 8, ಭಾನುವಾರದಂದು ಸೂರ್ಯಾಸ್ತಮಾನದ ನಂತರ ನಡೆಯಲಿರುವುದು. ಈ ತಾರೀಖು ಬೈಬಲಿನ ಚಾಂದ್ರಮಾನ ಕ್ಯಾಲೆಂಡರಿನ ನೈಸಾನ್‌ 14ಕ್ಕೆ ಸರಿಹೊಂದುತ್ತದೆ. ಈ ತಾರೀಖನ್ನು ಮರೆಯದಿರುವಂತೆ ಅದನ್ನು ಎಲ್ಲಿಯಾದರೂ ಬರೆದಿಟ್ಟುಕೊಳ್ಳಿ. ನಿಮ್ಮ ಕ್ಷೇತ್ರದಲ್ಲಿರುವ ಯೆಹೋವನ ಸಾಕ್ಷಿಗಳು, ಕೂಟದ ಸರಿಯಾದ ಸ್ಥಳ ಮತ್ತು ಸಮಯವನ್ನು ನಿಮಗೆ ತಿಳಿಸುವರು.