ನೀವು ವೆಚ್ಚವನ್ನು ಲೆಕ್ಕಮಾಡಿ ನೋಡುತ್ತೀರೊ?

ಯೇಸು ಕ್ರಿಸ್ತನು ತನ್ನ ಶಿಷ್ಯರಿಗೆ ನಿತ್ಯ ಜೀವದ ನಿರೀಕ್ಷೆಯನ್ನು ಕೊಟ್ಟನು. ಆದರೆ ಅದೇ ಸಮಯದಲ್ಲಿ ಒಬ್ಬ ಕ್ರೈಸ್ತನಾಗುವುದರ ವೆಚ್ಚವನ್ನು ಲೆಕ್ಕಿಸುವಂತೆಯೂ ಅವರನ್ನು ಪ್ರೇರೇಪಿಸಿದನು. ಈ ವಿಷಯವನ್ನು ಅವನು ಹೀಗೆ ಕೇಳುವ ಮೂಲಕ ದೃಷ್ಟಾಂತಿಸಿದನು: “ನಿಮ್ಮಲ್ಲಿ ಯಾವನಾದರೂ ಒಂದು ಬುರುಜನ್ನು ಕಟ್ಟಿಸಬೇಕೆಂದು ಯೋಚಿಸಿದರೆ ಅವನು ಮೊದಲು ಕೂತುಕೊಂಡು​—ಅದಕ್ಕೆ ಎಷ್ಟು ಖರ್ಚು ಹಿಡಿದೀತು, ಅದನ್ನು ತೀರಿಸುವದಕ್ಕೆ ಸಾಕಾಗುವಷ್ಟು ಹಣ ನನ್ನಲ್ಲಿ ಉಂಟೋ ಎಂದು ಲೆಕ್ಕಮಾಡುವದಿಲ್ಲವೇ [ಇಲ್ಲವೆ, ವೆಚ್ಚವನ್ನು ಲೆಕ್ಕಹಾಕಿ ನೋಡುವುದಿಲ್ಲವೇ]?” (ಲೂಕ 14:28) ಯೇಸುವಿನ ಮನಸ್ಸಿನಲ್ಲಿ ಯಾವ ವೆಚ್ಚ ಇತ್ತು?

ಎಲ್ಲ ಕ್ರೈಸ್ತರು ಸಂಕಷ್ಟಗಳನ್ನು ಖಂಡಿತವಾಗಿಯೂ ಎದುರಿಸುತ್ತಾರೆ, ಅದರಲ್ಲೂ ಕೆಲವು ಗಂಭೀರವಾದದ್ದಾಗಿರುತ್ತವೆ. (ಕೀರ್ತನೆ 34:19; ಮತ್ತಾಯ 10:36) ಆದುದರಿಂದ ವಿರೋಧ ಇಲ್ಲವೆ ಬೇರಾವುದೇ ಸಮಸ್ಯೆಗಳು ನಮ್ಮ ಮುಂದೆ ಬರುವಾಗ, ನಾವು ಆಶ್ಚರ್ಯಪಡದಂತೆ ಯಾವಾಗಲೂ ಮಾನಸಿಕವಾಗಿಯೂ ಆತ್ಮಿಕವಾಗಿಯೂ ಸಿದ್ಧರಾಗಿರಬೇಕು. ಕ್ರಿಸ್ತನ ಶಿಷ್ಯನಾಗುವುದರ ವೆಚ್ಚದಲ್ಲಿ ಅಂಥ ಪಂಥಾಹ್ವಾನಗಳು ಸೇರಿವೆ ಎಂಬುದನ್ನು ನಾವು ಈಗಾಗಲೇ ಲೆಕ್ಕಮಾಡಿರಬಹುದು. ಆದರೆ ಈ ಸದ್ಯದ ವ್ಯವಸ್ಥೆಯು ನಮಗೆ ನೀಡಬಹುದಾದ ಯಾವುದೇ ಸಂಗತಿಗಿಂತಲೂ ಎಷ್ಟೋ ಅಮೂಲ್ಯವಾದ ಬಹುಮಾನ, ಅಂದರೆ ಪಾಪಮರಣಗಳಿಂದ ರಕ್ಷಣೆಯೆಂಬ ಪ್ರತಿಫಲದ ಬಗ್ಗೆ ನಮಗೆ ತಿಳಿದಿತ್ತು. ಹೌದು, ನಾವು ದೇವರ ಸೇವೆಯನ್ನು ಮಾಡುತ್ತಾ ಇರುವುದಾದರೆ, ದೇವರು ಅನುಮತಿಸುವ ಯಾವುದೇ ಸಂಗತಿಯು​—ಅದು ಮರಣವೇ ಆಗಿರಲಿ​—ನಮಗೆ ಶಾಶ್ವತ ಹಾನಿಯನ್ನು ಮಾಡಲಾರದು.​—2 ಕೊರಿಂಥ 4:​16-18; ಫಿಲಿಪ್ಪಿ 3:8.

ನಮ್ಮ ನಂಬಿಕೆಯು ಹೇಗೆ ಅಷ್ಟು ಬಲವಾಗಿರಬಲ್ಲದು? ನಾವು ಒಂದು ಸರಿಯಾದ ನಿರ್ಣಯವನ್ನು ಮಾಡಿದಾಗ, ಕ್ರೈಸ್ತ ಮೂಲತತ್ತ್ವಗಳ ಪರವಾಗಿ ದೃಢವಾದ ನಿಲುವನ್ನು ತೆಗೆದುಕೊಳ್ಳುವಾಗ, ಇಲ್ಲವೆ ದೇವರ ಚಿತ್ತಕ್ಕೆ ಹೊಂದಿಕೆಯಲ್ಲಿ ಯಾವುದಾದರೂ ಕ್ರಿಯೆಗೈಯುವಾಗ​—ಮತ್ತು ವಿಶೇಷವಾಗಿ ಇದಕ್ಕೆ ವಿರುದ್ಧವಾದುದನ್ನು ಮಾಡುವ ಒತ್ತಡದ ಕೆಳಗಿರುವಾಗಲೂ ನಾವಿದನ್ನು ಮಾಡುವಾಗ, ನಮ್ಮ ನಂಬಿಕೆಯು ಬಲವಾಗುತ್ತಾ ಹೋಗುತ್ತದೆ. ನಮ್ಮ ನಂಬಿಗಸ್ತ ಮಾರ್ಗಕ್ರಮದ ಫಲವಾಗಿ ನಾವು ವೈಯಕ್ತಿಕವಾಗಿ ಯೆಹೋವನ ಆಶೀರ್ವಾದವನ್ನು ಅನುಭವಿಸುವಾಗ, ನಮ್ಮ ನಂಬಿಕೆಯು ಬಲಗೊಳಿಸಲ್ಪಟ್ಟು, ಗಾಢಗೊಳಿಸಲ್ಪಡುತ್ತದೆ. ಈ ವಿಧದಲ್ಲಿ, ದೇವರನ್ನು ಸೇವಿಸುವುದರ ‘ವೆಚ್ಚವನ್ನು ಲೆಕ್ಕಮಾಡಿನೋಡಿರುವ’ ಯೇಸು, ಅವನ ಮೊದಲ ಶಿಷ್ಯರ ಮತ್ತು ಇತಿಹಾಸದಾದ್ಯಂತ ಇದ್ದ ಎಲ್ಲ ನಂಬಿಗಸ್ತ ಸ್ತ್ರೀಪುರುಷರ ಮಾದರಿಯನ್ನು ನಾವು ಅನುಕರಿಸುತ್ತೇವೆ.​—ಮಾರ್ಕ 1:​16-20; ಇಬ್ರಿಯ 11:​4, 7, 17, 24, 25, 32-38.