ಅಪೊಸ್ತಲರ ಕಾರ್ಯ 2:1-47
2 ಐವತ್ತನೇ ದಿನದ ಹಬ್ಬ*+ ಬಂತು. ಶಿಷ್ಯರೆಲ್ಲ ಒಂದೇ ಮನೆಯಲ್ಲಿ ಸೇರಿಬಂದಿದ್ರು.
2 ಇದ್ದಕ್ಕಿದ್ದಂತೆ ಆಕಾಶದಿಂದ ಒಂದು ಶಬ್ದ, ಜೋರಾಗಿ ಗಾಳಿ ಬೀಸಿದ ಹಾಗೆ ಮನೆಲೆಲ್ಲಾ ಕೇಳಿಸ್ತಾ ಇತ್ತು.+
3 ಆಗ ಅಲ್ಲಿದ್ದವ್ರಿಗೆ ನಾಲಿಗೆ ಆಕಾರದ ಬೆಂಕಿ ಜ್ವಾಲೆ ಕಾಣಿಸ್ತು. ಆ ಬೆಂಕಿ ಬೇರೆಬೇರೆ ಆಗಿ ಎಲ್ರ ಮೇಲೆ ಒಂದೊಂದಾಗಿ ಕೂತಿತು.
4 ಅಲ್ಲಿದ್ದ ಎಲ್ರಿಗೆ ಪವಿತ್ರಶಕ್ತಿ+ ಸಿಕ್ತು. ಇದ್ರಿಂದ ಅವರು ಬೇರೆಬೇರೆ ಭಾಷೆ ಮಾತಾಡೋಕೆ ಶುರುಮಾಡಿದ್ರು.+
5 ಆ ಸಮಯದಲ್ಲಿ ಭೂಮಿ ಮೇಲಿದ್ದ ಎಲ್ಲ ದೇಶದಿಂದ ಬಂದ ದೇವಭಕ್ತ ಯೆಹೂದ್ಯರು ಯೆರೂಸಲೇಮಲ್ಲಿ ಇದ್ರು.+
6 ಆ ದೊಡ್ಡ ಶಬ್ದ ಕೇಳಿದಾಗ ಜನ್ರೆಲ್ಲ ಗುಂಪು ಕೂಡಿದ್ರು. ಶಿಷ್ಯರು ಅಲ್ಲಿದ್ದ ಪ್ರತಿಯೊಬ್ಬರ ಮಾತೃಭಾಷೆಯಲ್ಲಿ ಮಾತಾಡೋದನ್ನ ಕೇಳಿ ಜನ್ರಿಗೆ ಗಲಿಬಿಲಿ ಆಯ್ತು.
7 ಅವರು ಆಶ್ಚರ್ಯದಿಂದ ಹೀಗಂದ್ರು “ಇದು ಹೇಗೆ ಸಾಧ್ಯ! ಇವ್ರೆಲ್ಲ ಗಲಿಲಾಯದವರು+ ಅಲ್ವಾ?
8 ಇವರು ಹೇಗೆ ನಮ್ಮ ಭಾಷೆಯಲ್ಲಿ ಮಾತಾಡ್ತಾ ಇದ್ದಾರೆ?
9 ನಮ್ಮಲ್ಲಿ ಪಾರ್ಥ್ಯರು, ಮೇದ್ಯರು,+ ಏಲಾಮ್ಯರು+ ಇದ್ದಾರೆ. ಮೆಸಪಟೇಮ್ಯ, ಯೂದಾಯ, ಕಪದೋಷೀಯ, ಪೊಂತ, ಏಷ್ಯಾ ಪ್ರಾಂತ್ಯ,+
10 ಫ್ರುಗ್ಯ, ಪಂಫುಲ್ಯ, ಈಜಿಪ್ಟ್‌, ಕುರೇನೆಯ ಹತ್ರ ಇರೋ ಲಿಬ್ಯದ ಪ್ರದೇಶಗಳಿಂದ ಬಂದವರು ಇಲ್ಲಿದ್ದಾರೆ. ರೋಮ್‌ ಪಟ್ಟಣದಿಂದ ಯೆರೂಸಲೇಮಿಗೆ ತಾತ್ಕಾಲಿಕವಾಗಿ ಬಂದ ಯೆಹೂದ್ಯರು, ಯೆಹೂದ್ಯರಾಗಿ ಮತಾಂತರ ಆದವ್ರೂ ಇದ್ದಾರೆ.+
11 ಕ್ರೇತ್ಯರು, ಅರಬ್ಬಿ ಜನ್ರೂ ಇದ್ದಾರೆ. ದೇವರ ಅದ್ಭುತ ಕೆಲಸಗಳ ಬಗ್ಗೆ ನಮ್ಮನಮ್ಮ ಭಾಷೆಯಲ್ಲಿ ಕೇಳ್ತಾ ಇದ್ದೀವಿ. ಅದು ಹೇಗೆ ಸಾಧ್ಯ!”
12 ಎಲ್ರಿಗೂ ತುಂಬ ಆಶ್ಚರ್ಯ ಆಗಿ “ಇಲ್ಲಿ ಏನಾಗ್ತಾ ಇದೆ?” ಅಂತ ಒಬ್ಬರಿಗೊಬ್ರು ಕೇಳ್ಕೊಂಡ್ರು.
13 ಆದ್ರೆ ಕೆಲವರು ಗೇಲಿ ಮಾಡ್ತಾ “ಅವರು ಕಂಠಪೂರ್ತಿ ಕುಡಿದು ಏನೇನೋ ಮಾತಾಡ್ತಾ ಇದ್ದಾರೆ” ಅಂದ್ರು.
14 ಆಗ 12 ಅಪೊಸ್ತಲರು+ ಎದ್ದುನಿಂತ್ರು ಮತ್ತು ಪೇತ್ರ ಜೋರಾಗಿ ಹೀಗಂದ “ಯೂದಾಯ ಮತ್ತು ಯೆರೂಸಲೇಮಲ್ಲಿ ವಾಸ ಮಾಡ್ತಿರೋ ಜನ್ರೇ, ನಾನು ಹೇಳೋದನ್ನ ಚೆನ್ನಾಗಿ ಕೇಳಿಸ್ಕೊಳ್ಳಿ.
15 ನೀವು ಅಂದ್ಕೊಂಡ ಹಾಗೆ ಇವರು ಕುಡಿದು ಮಾತಾಡ್ತಾ ಇಲ್ಲ. ಯಾಕಂದ್ರೆ ಈಗ ಬೆಳಿಗ್ಗೆ 9 ಗಂಟೆ* ಅಷ್ಟೆ.
16 ಪ್ರವಾದಿ ಯೋವೇಲನ ಮಾತು ಇವ್ರ ವಿಷ್ಯದಲ್ಲಿ ನಿಜ ಆಗಿದೆ. ಅವನ ಮಾತು ಹೀಗಿತ್ತು,
17 ‘ದೇವರು ಹೀಗೆ ಹೇಳ್ತಿದ್ದಾನೆ “ಕೊನೇ ದಿನಗಳಲ್ಲಿ ನಾನು ಎಲ್ಲ ತರದ ಜನ್ರ ಮೇಲೆ ನನ್ನ ಪವಿತ್ರಶಕ್ತಿ ಸುರಿಸ್ತೀನಿ. ಆಗ ನಿಮ್ಮ ಗಂಡು-ಹೆಣ್ಣು ಮಕ್ಕಳು ಭವಿಷ್ಯವಾಣಿ ಹೇಳ್ತಾರೆ. ನಿಮ್ಮ ಯುವಕರು ದರ್ಶನಗಳನ್ನ ನೋಡ್ತಾರೆ. ನಿಮ್ಮ ವೃದ್ಧರಿಗೆ ಕನಸುಗಳು ಬೀಳ್ತವೆ.+
18 ಅಷ್ಟೇ ಅಲ್ಲ ಆ ದಿನ ನಾನು ನನ್ನ ದಾಸದಾಸಿಯರ ಮೇಲೆ ಸಹ ನನ್ನ ಪವಿತ್ರಶಕ್ತಿ ಸುರಿಸ್ತೀನಿ. ಆಗ ಅವರು ಭವಿಷ್ಯವಾಣಿಗಳನ್ನ+ ಹೇಳ್ತಾರೆ.
19 ನಾನು ಆಕಾಶ ಭೂಮಿಯಲ್ಲಿ ಅದ್ಭುತಗಳನ್ನ ಮಾಡ್ತೀನಿ. ರಕ್ತ, ಬೆಂಕಿ ಮತ್ತು ತುಂಬ ಹೊಗೆ ಇರುತ್ತೆ.
20 ಯೆಹೋವನ* ಮಹಾದಿನ, ಭಯವಿಸ್ಮಯವಾದ ದಿನ ಬರೋದಕ್ಕಿಂತ ಮುಂಚೆ ಸೂರ್ಯ ಕತ್ತಲಾಗ್ತಾನೆ, ಚಂದ್ರ ರಕ್ತದ ಹಾಗೆ ಕೆಂಪಾಗ್ತಾನೆ.
21 ಆದ್ರೆ ಯೆಹೋವನ* ಹೆಸ್ರು ಹೇಳಿ ಪ್ರಾರ್ಥಿಸೋ ಪ್ರತಿಯೊಬ್ಬನು ರಕ್ಷಣೆ ಪಡಿತಾನೆ.”’+
22 ಇಸ್ರಾಯೇಲ್ಯರೇ ಕೇಳಿ, ದೇವರು ನಜರೇತಿನ ಯೇಸು ಮೂಲಕ ನಿಮ್ಮ ಮುಂದೆ ಅದ್ಭುತಗಳನ್ನ, ಆಶ್ಚರ್ಯ ಹುಟ್ಟಿಸೋ ವಿಷ್ಯಗಳನ್ನ ಮಾಡಿ ಯೇಸುವನ್ನ ತಾನೇ ಕಳಿಸಿದ್ದು ಅಂತ ತೋರಿಸ್ಕೊಟ್ಟನು.+ ಈ ವಿಷ್ಯ ನಿಮಗೆ ಚೆನ್ನಾಗಿ ಗೊತ್ತು.
23 ಯೇಸುವನ್ನ ನೀವು ಕೆಟ್ಟವರ ಕೈಗೆ ಒಪ್ಪಿಸಿದ್ರಿ, ಅವರು ಆತನನ್ನ ಕಂಬಕ್ಕೆ ಜಡಿದು ಕೊಂದ್ರು. ಹೀಗಾಗುತ್ತೆ ಅಂತ ದೇವ್ರಿಗೆ ಮುಂಚೆನೇ ಗೊತ್ತಿತ್ತು.+ ಹಾಗಾಗಿ ದೇವರು ಇದೆಲ್ಲ ನಡಿಲಿ ಅಂತ ಬಿಟ್ಟುಕೊಟ್ಟನು.+
24 ಆದ್ರೆ ದೇವರು ಆತನನ್ನ ಸಾವಿನ ಬೇಡಿಯಿಂದ ಬಿಡಿಸಿ ಮತ್ತೆ ಜೀವ ಕೊಟ್ಟನು.+ ಯಾಕಂದ್ರೆ ಸಾವಿಗೆ ಆತನನ್ನ ಬಂಧಿಸಿ ಹಿಡಿದಿಡೋಕೆ ಆಗಲೇ ಇಲ್ಲ.+
25 ಆತನ ಬಗ್ಗೆ ದಾವೀದ ಹೀಗೆ ಹೇಳಿದ್ದ ‘ಯಾವಾಗ್ಲೂ ನಾನು ಯೆಹೋವನನ್ನ* ನನ್ನ ಮುಂದೆನೇ ಇಟ್ಕೊಂಡಿರ್ತಿನಿ. ಆತನು ನನ್ನ ಬಲಗಡೆನೇ ಇರೋದ್ರಿಂದ ನಾನು ಯಾವತ್ತೂ ಅಲುಗಾಡಲ್ಲ.
26 ಇದ್ರಿಂದಾಗಿ ನನ್ನ ಹೃದಯ ಕುಣಿದಾಡಿದೆ. ನನ್ನ ನಾಲಿಗೆಗೆ ಖುಷಿಯಾಗಿದೆ. ದೇವರ ಮೇಲೆ ಭರವಸೆ ಇಟ್ಟು ಬದುಕ್ತೀನಿ.
27 ಯಾಕಂದ್ರೆ ನೀನು ನನ್ನನ್ನ ಸಮಾಧಿಯಲ್ಲೇ ಬಿಟ್ಟುಬಿಡಲ್ಲ. ನಿನ್ನ ನಿಷ್ಠಾವಂತ ಭಕ್ತನನ್ನ ಕೊಳೆತು ಹೋಗೋಕೆ ಬಿಡಲ್ಲ.+
28 ನನಗೆ ಜೀವದ ದಾರಿ ತೋರಿಸಿದೆ. ನಿನ್ನ ಸನ್ನಿಧಿಯಲ್ಲಿ+ ನನ್ನನ್ನ ಆನಂದದಿಂದ ತುಂಬಿಸಿದೆ.’
29 ಸಹೋದರರೇ, ನಮ್ಮ ಪೂರ್ವಜ ದಾವೀದನ ಬಗ್ಗೆ ನಾನು ಈ ಮಾತನ್ನ ಯಾವುದೇ ಸಂಶಯ ಇಲ್ಲದೆ ಹೇಳ್ತೀನಿ. ಅವನು ಸತ್ತುಹೋಗಿದ್ದಾನೆ, ಅವನ ಸಮಾಧಿ ಇಲ್ಲಿ ತನಕ ನಮ್ಮಲ್ಲಿದೆ.+
30 ದಾವೀದ ಒಬ್ಬ ಪ್ರವಾದಿಯಾಗಿದ್ದ. ಅವನ ಸಿಂಹಾಸನದ ಮೇಲೆ ಅವನ ಸಂತತಿಯವನೊಬ್ಬ ಕೂರೋ ಹಾಗೆ ಮಾಡ್ತೀನಿ ಅಂತ ದೇವರು ಅವನಿಗೆ ಮಾತು ಕೊಟ್ಟಿದ್ದನು.+
31 ಹಾಗಾಗಿ ಕ್ರಿಸ್ತನು ಮತ್ತೆ ಬದುಕಿ ಬರ್ತಾನೆ ಅಂತ ದಾವೀದನಿಗೆ ಗೊತ್ತಿತ್ತು. ಅದಕ್ಕೇ ದಾವೀದ ಯೇಸು ಬಗ್ಗೆ, ‘ಆತನನ್ನ ಸಮಾಧಿಯಲ್ಲೇ* ಬಿಟ್ಟುಬಿಡಲ್ಲ. ಆತನ ದೇಹ ಕೊಳೆತು ಹೋಗೋಕೆ ಬಿಡಲ್ಲ’+ ಅಂದ.
32 ಆ ಯೇಸುವನ್ನ ದೇವರು ಮತ್ತೆ ಬದುಕಿಸಿದನು. ಅದಕ್ಕೆ ನಾವೆಲ್ಲ ಸಾಕ್ಷಿ.+
33 ಯೇಸು ಉನ್ನತ ಸ್ಥಾನಕ್ಕೆ ಏರಿ ಹೋಗಿ ದೇವ್ರ ಬಲಗಡೆಯಲ್ಲಿ ಕೂತಿದ್ದಾನೆ.+ ಆತನ ತಂದೆ ಹೇಳಿದ ತರಾನೇ ಆತನಿಗೆ ಪವಿತ್ರಶಕ್ತಿ ಸಿಕ್ಕಿದೆ.+ ಅದನ್ನ ಆತನು ನಮ್ಮ ಮೇಲೆ ಸುರಿಸಿದ್ದಾನೆ. ನೀವೀಗ ಅದನ್ನೇ ನೋಡ್ತಾ ಇದ್ದೀರ, ಕೇಳ್ತಾ ಇದ್ದೀರ.
34 ಆದ್ರೆ ದಾವೀದ ಸ್ವರ್ಗಕ್ಕೆ ಹೋಗಲಿಲ್ಲ. ಅವನೇ ಹೇಳಿದ ‘ಯೆಹೋವ* ನನ್ನ ಒಡೆಯನಿಗೆ,
35 “ನಿನ್ನ ಶತ್ರುಗಳನ್ನ ನಾನು ನಿನ್ನ ಪಾದಪೀಠವಾಗಿ ಮಾಡೋ ತನಕ, ನನ್ನ ಬಲಗಡೆ ಕೂತ್ಕೊ”+ ಅಂದನು.’
36 ನೀವು ಕಂಬಕ್ಕೆ ಜಡಿದ+ ಈ ಯೇಸುವನ್ನೇ ದೇವರು ಪ್ರಭುವಾಗಿ+ ಮತ್ತು ಕ್ರಿಸ್ತನಾಗಿ ಮಾಡಿದ್ದಾನೆ ಅಂತ ಇಸ್ರಾಯೇಲ್‌ ಜನ್ರಿಗೆಲ್ಲ ಚೆನ್ನಾಗಿ ಅರ್ಥ ಆಗಬೇಕು.”
37 ಇದನ್ನೆಲ್ಲ ಕೇಳಿ ಆ ಜನ್ರಿಗೆ ಮನಸ್ಸು ಚುಚ್ಚಿತು. ಹಾಗಾಗಿ ಅವರು “ಸಹೋದರರೇ, ನಾವೇನು ಮಾಡಬೇಕು?” ಅಂತ ಪೇತ್ರನನ್ನ, ಉಳಿದ ಅಪೊಸ್ತಲರನ್ನ ಕೇಳಿದ್ರು.
38 ಅದಕ್ಕೆ ಪೇತ್ರ “ಪಶ್ಚಾತ್ತಾಪಪಡಿ.+ ನಿಮ್ಮ ಪಾಪಗಳಿಗೆ ಕ್ಷಮೆ ಸಿಗಬೇಕಾದ್ರೆ ನಿಮ್ಮಲ್ಲಿ ಪ್ರತಿಯೊಬ್ರು ಯೇಸು ಕ್ರಿಸ್ತನ ಹೆಸ್ರಲ್ಲಿ ದೀಕ್ಷಾಸ್ನಾನ+ ತಗೊಳ್ಳಿ.+ ಆಗ ನಿಮಗೆ ದೇವರು ಉಚಿತವಾಗಿ ಕೊಡೋ ಪವಿತ್ರಶಕ್ತಿ ಸಿಗುತ್ತೆ.
39 ನಮ್ಮ ದೇವರಾದ ಯೆಹೋವ* ತನ್ನ ಹತ್ರ ಕರೆದಿರೋ ಎಲ್ರಿಗೆ ಇದನ್ನ ಹೇಳಿದ್ದಾನೆ. ಅಂದ್ರೆ ನಿಮಗೆ, ನಿಮ್ಮ ಮಕ್ಕಳಿಗೆ ಮತ್ತು ದೂರದೂರದಲ್ಲಿ ಇರೋ ಎಲ್ರಿಗೆ ಈ ಮಾತು+ ಕೊಟ್ಟಿದ್ದಾನೆ” ಅಂದ.+
40 ಪೇತ್ರ ಇನ್ನೂ ತುಂಬ ವಿಷ್ಯಗಳನ್ನ ಹೇಳಿ ಅವ್ರಿಗೆ ಚೆನ್ನಾಗಿ ಅರ್ಥ ಮಾಡಿಸಿದ. ಆಮೇಲೆ “ಈ ದುಷ್ಟ ಸಂತತಿಯಿಂದ ದೂರ ಇದ್ದು ನಾಶನದಿಂದ ಪಾರಾಗಿ”+ ಅಂತ ಬುದ್ಧಿ ಹೇಳ್ತಾ ಇದ್ದ.
41 ಅವನ ಮಾತನ್ನ ಮನಸಾರೆ ಒಪ್ಪಿದವರು ದೀಕ್ಷಾಸ್ನಾನ ತಗೊಂಡ್ರು.+ ಅದೇ ದಿನ ಸುಮಾರು 3,000 ಜನ ಶಿಷ್ಯರಾದ್ರು.+
42 ಅಪೊಸ್ತಲರು ಕಲಿಸ್ತಿದ್ದ ವಿಷ್ಯಗಳಿಗೆ ಅವರು ಯಾವಾಗ್ಲೂ ಚೆನ್ನಾಗಿ ಗಮನಕೊಟ್ರು. ತಮ್ಮ ಹತ್ರ ಇದ್ದದ್ದನ್ನ ಒಬ್ಬರಿಗೊಬ್ರು ಹಂಚ್ಕೊಳ್ತಾ ಇದ್ರು. ಒಟ್ಟಾಗಿ ಊಟ ಮಾಡ್ತಿದ್ರು.+ ಎಲ್ರೂ ಸೇರಿ ಪ್ರಾರ್ಥಿಸ್ತಾ+ ಇದ್ರು.
43 ಅಪೊಸ್ತಲರು ತುಂಬ ಅದ್ಭುತ ಮಾಡಿದ್ರು.+ ಇದ್ರಿಂದ ಎಲ್ರಿಗೆ ದೇವರ ಮೇಲೆ ಭಯಭಕ್ತಿ ಜಾಸ್ತಿ ಆಯ್ತು.
44 ಹೊಸ ಶಿಷ್ಯರೆಲ್ಲ ಒಟ್ಟಿಗೆ ಇರ್ತಿದ್ರು ಮತ್ತು ತಮ್ಮ ಹತ್ರ ಇದ್ದ ಎಲ್ಲವನ್ನ ಹಂಚ್ಕೊಳ್ತಿದ್ರು.
45 ತಮ್ಮ ಜಮೀನು, ಆಸ್ತಿಪಾಸ್ತಿ ಮಾರಿ+ ಬಂದ ಹಣವನ್ನ ಎಲ್ರಿಗೂ ಅವರವ್ರ ಅಗತ್ಯಕ್ಕೆ ತಕ್ಕಂತೆ ಹಂಚ್ಕೊಡ್ತಾ ಇದ್ರು.+
46 ಪ್ರತಿದಿನ ತಪ್ಪದೆ ಒಟ್ಟಾಗಿ ದೇವಾಲಯದಲ್ಲಿ ಸೇರಿಬರ್ತಾ ಇದ್ರು. ಬೇರೆಬೇರೆ ಜನ್ರ ಮನೆಗಳಿಗೆ ಹೋಗಿ ಊಟ ಮಾಡ್ತಾ ಇದ್ರು. ಊಟ ಹಂಚ್ಕೊಂಡು ಸಂತೋಷಪಡ್ತಾ ಇದ್ರು. ಇದನ್ನೆಲ್ಲ ಅವರು ಮನಸಾರೆ ಮಾಡ್ತಾ ಇದ್ರು.
47 ಅವರು ದೇವರನ್ನ ಹೊಗಳ್ತಾ ಇದ್ರು. ಜನ್ರೂ ಅವ್ರನ್ನ ಮೆಚ್ಚಿದ್ರು. ಅದೇ ಸಮಯದಲ್ಲಿ ಯೆಹೋವ* ತನ್ನಿಂದ ರಕ್ಷಣೆ ಪಡೆದ ಜನ್ರನ್ನ ಈ ಶಿಷ್ಯರ ಜೊತೆ ಪ್ರತಿದಿನ ಸೇರಿಸ್ತಾ ಇದ್ದನು.+
ಪಾದಟಿಪ್ಪಣಿ
^ ಅಥವಾ “ಪಂಚಾಶತ್ತಮ ಹಬ್ಬ.”
^ ಅಕ್ಷ. “ದಿನದ ಮೂರನೇ ಗಂಟೆ.”
^ ಪರಿಶಿಷ್ಟ ಎ5 ನೋಡಿ.
^ ಪರಿಶಿಷ್ಟ ಎ5 ನೋಡಿ.
^ ಪರಿಶಿಷ್ಟ ಎ5 ನೋಡಿ.
^ ಪರಿಶಿಷ್ಟ ಎ5 ನೋಡಿ.
^ ಪರಿಶಿಷ್ಟ ಎ5 ನೋಡಿ.
^ ಪರಿಶಿಷ್ಟ ಎ5 ನೋಡಿ.
