ನ್ಯಾಯಸ್ಥಾಪಕರು 1:1-36
1 ಯೆಹೋಶುವ+ ತೀರಿಹೋದ ಮೇಲೆ ಇಸ್ರಾಯೇಲ್ಯರು* ಯೆಹೋವನ ಹತ್ರ “ಕಾನಾನ್ಯರ ವಿರುದ್ಧ ಹೋರಾಡೋಕೆ ನಮ್ಮಲ್ಲಿ ಮೊದ್ಲು ಯಾರು ಹೋಗಬೇಕು?” ಅಂತ ವಿಚಾರಿಸಿದ್ರು.+
2 ಅದಕ್ಕೆ ಯೆಹೋವ “ಯೆಹೂದ ಕುಲದವರು ಹೋಗ್ಲಿ.+ ದೇಶವನ್ನ ಅವ್ರ ಕೈಗೆ ಕೊಡ್ತೀನಿ” ಅಂದನು.
3 ಆಮೇಲೆ ಯೆಹೂದ ಕುಲದವರು ತಮ್ಮ ಸಹೋದರರಾದ ಸಿಮೆಯೋನ್‌ ಕುಲದವ್ರಿಗೆ “ನಮಗೆ ಸಿಕ್ಕಿರೋ ಪ್ರದೇಶಕ್ಕೆ ಹೋಗಿ+ ಅಲ್ಲಿರೋ ಕಾನಾನ್ಯರ ವಿರುದ್ಧ ಹೋರಾಡೋಕೆ ನಮಗೆ ಸಹಾಯ ಮಾಡಿ. ಆಮೇಲೆ ನಿಮಗೆ ಸಿಕ್ಕಿರೋ ಪ್ರದೇಶಕ್ಕೆ ನಾವು ಬಂದು ಸಹಾಯ ಮಾಡ್ತೀವಿ” ಅಂದ್ರು. ಹಾಗಾಗಿ ಸಿಮೆಯೋನ್‌ ಕುಲದವರು ಅವ್ರ ಜೊತೆ ಹೋದ್ರು.
4 ಯೆಹೂದ ಕುಲದವರು ಯುದ್ಧ ಮಾಡಿದಾಗ ಕಾನಾನ್ಯರನ್ನ ಪೆರಿಜೀಯರನ್ನ ಯೆಹೋವ ಅವ್ರ ಕೈಗೆ ಒಪ್ಪಿಸಿದನು.+ ಅವರು ಬೆಜೆಕಿನಲ್ಲಿ 10,000 ಗಂಡಸ್ರನ್ನ ಸೋಲಿಸಿದ್ರು.
5 ಕಾನಾನ್ಯರನ್ನ+ ಪೆರಿಜೀಯರನ್ನ+ ಸೋಲಿಸುವಾಗ ಬೆಜೆಕಿನಲ್ಲಿ ಅದೋನೀಬೆಜೆಕನನ್ನ ನೋಡಿ ಅವನ ವಿರುದ್ಧ ಕೂಡ ಹೋರಾಡಿದ್ರು.
6 ಅದೋನೀಬೆಜೆಕ ಓಡಿಹೋದಾಗ ಅವನನ್ನ ಅಟ್ಟಿಸ್ಕೊಂಡು ಹೋಗಿ ಹಿಡಿದು ಕೈಕಾಲಿನ ಹೆಬ್ಬೆರಳುಗಳನ್ನ ಕತ್ತರಿಸಿಬಿಟ್ರು.
7 ಆಗ ಅದೋನೀಬೆಜೆಕ “70 ರಾಜರ ಕೈಕಾಲಿನ ಹೆಬ್ಬೆರಳುಗಳನ್ನ ನಾನು ಕತ್ತರಿಸಿದ್ದೆ. ಅವರು ನನ್ನ ಮೇಜಿಂದ ಕೆಳಗೆ ಬೀಳೋ ಆಹಾರ ಆಯ್ದುಕೊಂಡು ತಿಂತಿದ್ರು. ನಾನು ಬೇರೆಯವ್ರಿಗೆ ಏನು ಮಾಡಿದ್ನೋ ಅದನ್ನೇ ದೇವರು ಈಗ ನನಗೆ ಮಾಡಿದ್ದಾನೆ” ಅಂದ. ಆಮೇಲೆ ಅವನನ್ನ ಯೆರೂಸಲೇಮಿಗೆ+ ಕರ್ಕೊಂಡು ಬಂದ್ರು. ಅಲ್ಲಿ ಅವನು ಸತ್ತುಹೋದ.
8 ಅಷ್ಟೇ ಅಲ್ಲ ಯೆಹೂದದ ಗಂಡಸ್ರು ಯೆರೂಸಲೇಮಿನ+ ವಿರುದ್ಧ ಹೋರಾಡಿ ವಶ ಮಾಡ್ಕೊಂಡ್ರು. ಅವರು ಆ ಪಟ್ಟಣದವ್ರನ್ನ ಕತ್ತಿಯಿಂದ ಕೊಂದು ಪಟ್ಟಣಕ್ಕೆ ಬೆಂಕಿ ಇಟ್ರು.
9 ಆಮೇಲೆ ಬೆಟ್ಟ ಪ್ರದೇಶದಲ್ಲಿ, ನೆಗೆಬಿನಲ್ಲಿ, ಷೆಫೆಲಾದಲ್ಲಿ+ ವಾಸವಾಗಿದ್ದ ಕಾನಾನ್ಯರ ವಿರುದ್ಧ ಯುದ್ಧಕ್ಕೆ ಹೋದ್ರು.
10 ಆಮೇಲೆ ಯೆಹೂದ ಕುಲದವರು ಹೆಬ್ರೋನಲ್ಲಿ ವಾಸವಾಗಿದ್ದ ಕಾನಾನ್ಯರ ಮೇಲೆ ದಾಳಿ ಮಾಡಿದ್ರು. (ಈ ಮುಂಚೆ ಹೆಬ್ರೋನಿಗೆ ಕಿರ್ಯತ್‌-ಅರ್ಬ ಅಂತ ಹೆಸ್ರಿತ್ತು) ಅಲ್ಲಿ ಅವರು ಶೇಷೈ, ಅಹೀಮನ್‌, ತಲ್ಮೈಯನ್ನ ಕೊಂದ್ರು.+
11 ಆಮೇಲೆ ಅವರು ದೆಬೀರಿನ ಜನ್ರ ವಿರುದ್ಧ ಯುದ್ಧ ಮಾಡಿದ್ರು.+ (ದೆಬೀರಿಗೆ ಮುಂಚೆ ಕಿರ್ಯತ್‌-ಸೇಫೆರ್‌ ಅಂತ ಹೆಸ್ರಿತ್ತು.)+
12 ಕಾಲೇಬ+ “ಕಿರ್ಯತ್‌-ಸೇಫೆರ ಮೇಲೆ ದಾಳಿ ಮಾಡಿ ವಶ ಮಾಡ್ಕೊಳ್ಳೋನಿಗೆ ನನ್ನ ಮಗಳು ಅಕ್ಷಾಳನ್ನ ಮದುವೆ ಮಾಡ್ಕೊಡ್ತೀನಿ”+ ಅಂದ.
13 ಕಾಲೇಬನ ತಮ್ಮನಾದ ಕೆನಜನ+ ಮಗ ಒತ್ನೀಯೇಲ+ ಅದನ್ನ ವಶ ಮಾಡ್ಕೊಂಡ. ಆಗ ಕಾಲೇಬ ಅಕ್ಷಾಳನ್ನ ಒತ್ನೀಯೇಲನಿಗೆ ಕೊಟ್ಟು ಮದುವೆ ಮಾಡ್ದ.
14 ಅವಳು ತನ್ನ ಗಂಡನ ಮನೆಗೆ ಹೋಗುವಾಗ ತಂದೆ ಹತ್ರ ಹೊಲ ಕೇಳು ಅಂತ ಗಂಡನನ್ನ ಒತ್ತಾಯಿಸಿದಳು. ಅವಳು ಕತ್ತೆ ಮೇಲಿಂದ ಕೆಳಗೆ ಇಳಿದಾಗ* ಕಾಲೇಬ “ನಿನಗೇನು ಬೇಕು?” ಅಂತ ಕೇಳಿದ.
15 ಅದಕ್ಕೆ ಅವಳು “ದಯವಿಟ್ಟು ನನ್ನನ್ನ ಆಶೀರ್ವದಿಸು. ನನಗೆ ದಕ್ಷಿಣದಲ್ಲಿ ಇರೋ* ಹೊಲದ ಒಂದು ಭಾಗ ಕೊಟ್ಯಲ್ಲಾ, ಅದೇ ತರ ಗುಲ್ಲೊತ್‌-ಮಯಿಮ್‌* ಕೂಡ ಕೊಡು” ಅಂದಳು. ಆಗ ಕಾಲೇಬ ಅವಳಿಗೆ ಮೇಲಿನ ಮತ್ತೆ ಕೆಳಗಿನ ಬುಗ್ಗೆಗಳನ್ನ ಕೊಟ್ಟ.
16 ಮೋಶೆಯ ಮಾವ+ ಒಬ್ಬ ಕೇನ್ಯನಾಗಿದ್ದ.+ ಅವನ ವಂಶದವರು ಯೆಹೂದದ ಜನ್ರ ಜೊತೆ ಖರ್ಜೂರ ಮರಗಳ ಪಟ್ಟಣದಿಂದ+ ಅರಾದಿನ+ ದಕ್ಷಿಣದಲ್ಲಿದ್ದ ಯೆಹೂದದ ಕಾಡಿಗೆ ಬಂದು ಅಲ್ಲಿನ ಜನ್ರ ಜೊತೆ ವಾಸ ಮಾಡಿದ್ರು.+
17 ಯೆಹೂದ ಕುಲದವರು ತಮ್ಮ ಸಹೋದರರಾದ ಸಿಮೆಯೋನ್‌ ಕುಲದವ್ರ ಜೊತೆ ಬಂದು ಚೆಫತಿನಲ್ಲಿ ವಾಸ ಇದ್ದ ಕಾನಾನ್ಯರ ಮೇಲೆ ದಾಳಿ ಮಾಡಿ ಆ ಪಟ್ಟಣವನ್ನ ಪೂರ್ತಿ ನಾಶ ಮಾಡಿದ್ರು.+ ಹಾಗಾಗಿ ಅವರು ಆ ಪಟ್ಟಣಕ್ಕೆ ಹೊರ್ಮಾ*+ ಅಂತ ಹೆಸ್ರಿಟ್ರು.
18 ಆಮೇಲೆ ಯೆಹೂದ ಕುಲದವರು ಗಾಜಾ,+ ಅಷ್ಕೆಲೋನ್‌,+ ಎಕ್ರೋನ್‌ ಪಟ್ಟಣಗಳನ್ನ,+ ಅವುಗಳಿಗೆ ಸೇರಿದ ಪ್ರದೇಶಗಳನ್ನ ವಶ ಮಾಡ್ಕೊಂಡ್ರು.
19 ಯೆಹೋವ ಯೆಹೂದ ಕುಲದವ್ರ ಜೊತೆ ಇದ್ದದ್ರಿಂದ ಅವರು ಬೆಟ್ಟ ಪ್ರದೇಶವನ್ನ ಸೊತ್ತಾಗಿ ಪಡ್ಕೊಂಡ್ರು. ಆದ್ರೆ ಅಲ್ಲಿನ ತಗ್ಗು ಪ್ರದೇಶದಲ್ಲಿ ವಾಸ ಇದ್ದ ಜನ್ರನ್ನ ಓಡಿಸೋಕೆ ಆಗಲಿಲ್ಲ. ಯಾಕಂದ್ರೆ ಆ ಜನ್ರ ಹತ್ರ ಕಬ್ಬಿಣದ ಕುಡುಗೋಲಿನ ಚಕ್ರಗಳಿರೋ ಯುದ್ಧರಥಗಳು ಇದ್ವು.*+
20 ಮೋಶೆ ಮಾತು ಕೊಟ್ಟ ಹಾಗೇ ಯೆಹೂದ ಕುಲದವರು ಕಾಲೇಬನಿಗೆ ಹೆಬ್ರೋನನ್ನ ಕೊಟ್ರು.+ ಅವನು ಅನಾಕನ ಮೂರು ಗಂಡು ಮಕ್ಕಳನ್ನ+ ಅಲ್ಲಿಂದ ಓಡಿಸಿಬಿಟ್ಟ.
21 ಆದ್ರೆ ಬೆನ್ಯಾಮೀನ್ಯರು ಯೆರೂಸಲೇಮಲ್ಲಿ ವಾಸವಾಗಿದ್ದ ಯೆಬೂಸಿಯರನ್ನ ಅಲ್ಲಿಂದ ಓಡಿಸಲಿಲ್ಲ. ಹಾಗಾಗಿ ಯೆಬೂಸಿಯರು ಇವತ್ತಿಗೂ ಬೆನ್ಯಾಮೀನ್ಯರ ಜೊತೆ ಯೆರೂಸಲೇಮಲ್ಲೇ ಇದ್ದಾರೆ.+
22 ಅದೇ ಸಮಯದಲ್ಲಿ, ಯೋಸೇಫನ ವಂಶದವರು+ ಬೆತೆಲಿನ ವಿರುದ್ಧ ಯುದ್ಧ ಮಾಡಿದ್ರು. ಅವ್ರ ಜೊತೆ ಯೆಹೋವ ಇದ್ದನು.+
23 ಯೋಸೇಫನ ವಂಶದವರು ಬೆತೆಲನ್ನ ಗೂಢಚಾರಿಕೆ ಮಾಡ್ತಿದ್ರು. (ಈ ಮುಂಚೆ ಆ ಪಟ್ಟಣಕ್ಕೆ ಲೂಜ್‌ ಅನ್ನೋ ಹೆಸ್ರಿತ್ತು.)+
24 ಆ ಪಟ್ಟಣದಿಂದ ಒಬ್ಬ ವ್ಯಕ್ತಿ ಹೊರಗೆ ಬರೋದನ್ನ ಗೂಢಚಾರರು ನೋಡಿ ಅವನಿಗೆ “ದಯವಿಟ್ಟು, ಪಟ್ಟಣದ ಒಳಗೆ ಹೋಗೋಕೆ ನಮಗೆ ದಾರಿ ತೋರಿಸು. ನಿನ್ನನ್ನ ಬಿಟ್ಟುಬಿಡ್ತೀವಿ”* ಅಂದ್ರು.
25 ಆಗ ಆ ವ್ಯಕ್ತಿ ಪಟ್ಟಣದ ಒಳಗೆ ಹೋಗೋಕೆ ದಾರಿ ತೋರಿಸಿದ. ಅವರು ಆ ಪಟ್ಟಣದ ಎಲ್ಲ ಜನ್ರನ್ನ ಕತ್ತಿಯಿಂದ ಕೊಂದ್ರು. ಆದ್ರೆ ಆ ವ್ಯಕ್ತಿಯನ್ನ, ಅವನ ಕುಟುಂಬದವ್ರನ್ನ ಬಿಟ್ಟುಬಿಟ್ರು.+
26 ಆ ವ್ಯಕ್ತಿ ಹಿತ್ತಿಯರ ಪ್ರದೇಶಕ್ಕೆ ಹೋಗಿ ಅಲ್ಲಿ ಒಂದು ಪಟ್ಟಣ ಕಟ್ಟಿ ಅದಕ್ಕೆ ಲೂಜ್‌ ಅಂತ ಹೆಸ್ರಿಟ್ಟ. ಆ ಪಟ್ಟಣಕ್ಕೆ ಇವತ್ತಿಗೂ ಅದೇ ಹೆಸ್ರಿದೆ.
27 ಮನಸ್ಸೆ ಕುಲದವರು ಬೇತ್‌-ಷೆಯಾನ್‌, ತಾನಕ್‌,+ ದೋರ್‌, ಇಬ್ಲೆಯಾಮ್‌, ಮೆಗಿದ್ದೋ ಪಟ್ಣಣಗಳನ್ನ, ಅದ್ರ ಸುತ್ತಮುತ್ತ ಇದ್ದ ಊರುಗಳನ್ನ ವಶ ಮಾಡ್ಕೊಳ್ಳಲಿಲ್ಲ.+ ಹಾಗಾಗಿ ಈ ಪ್ರದೇಶಗಳಲ್ಲಿ ಕಾನಾನ್ಯರು ಇನ್ನೂ ವಾಸ ಮಾಡ್ತಾ ಇದ್ರು.
28 ಇಸ್ರಾಯೇಲ್ಯರ ಬಲ ಹೆಚ್ಚಾದಾಗ ಅವರು ಕಾನಾನ್ಯರನ್ನ ತಮ್ಮ ಗುಲಾಮರಾಗಿ ಮಾಡ್ಕೊಂಡ್ರು.+ ಆದ್ರೆ ಅವ್ರನ್ನ ಅಲ್ಲಿಂದ ಪೂರ್ತಿಯಾಗಿ ಓಡಿಸಿಬಿಡಲಿಲ್ಲ.+
29 ಎಫ್ರಾಯೀಮ್ಯರು ಕೂಡ ಗೆಜೆರಿನಲ್ಲಿದ್ದ ಕಾನಾನ್ಯರನ್ನ ಓಡಿಸಿಬಿಡಲಿಲ್ಲ. ಹಾಗಾಗಿ ಕಾನಾನ್ಯರು ಅವ್ರ ಜೊತೆ ಅಲ್ಲೇ ವಾಸ ಮಾಡ್ತಾ ಇದ್ರು.+
30 ಜೆಬುಲೂನ್ಯರು ಸಹ ಕಿಟ್ರೋನ್‌ ಮತ್ತು ನಹಲೋಲಿನ+ ಜನ್ರಾದ ಕಾನಾನ್ಯರನ್ನ ಓಡಿಸಿಬಿಡಲಿಲ್ಲ. ಹಾಗಾಗಿ ಕಾನಾನ್ಯರು ಅವ್ರ ಗುಲಾಮರಾಗಿ ಅಲ್ಲೇ ವಾಸ ಮಾಡ್ತಾ ಇದ್ರು.+
31 ಅಶೇರ್‌ ಕುಲದವರು ಅಕ್ಕೋ, ಸೀದೋನ್‌,+ ಅಹ್ಲಾಬ್‌, ಅಕ್ಜೀಬ್‌,+ ಹೆಲ್ಬಾ, ಅಫೀಕ್‌+ ಮತ್ತು ರೆಹೋಬಿನ+ ಜನ್ರ ಜೊತೆನೇ ವಾಸ ಮಾಡಿದ್ರು.
32 ಯಾಕಂದ್ರೆ ಅಶೇರಿನ ಜನರು ಆ ಪ್ರದೇಶಗಳಲ್ಲಿದ್ದ ಕಾನಾನ್ಯರನ್ನ ಅಲ್ಲಿಂದ ಓಡಿಸಿಬಿಡಲಿಲ್ಲ.
33 ನಫ್ತಾಲಿ ಕುಲದವರು ಬೇತ್‌-ಷೆಮೆಷ್‌ ಮತ್ತು ಬೇತನಾತಿನಲ್ಲಿ+ ವಾಸವಾಗಿದ್ದ ಜನ್ರನ್ನ ಓಡಿಸಿಬಿಡಲಿಲ್ಲ. ಆ ಪ್ರದೇಶಗಳಲ್ಲಿದ್ದ ಕಾನಾನ್ಯರ ಜೊತೆನೇ ಅವರು ವಾಸ ಮಾಡಿದ್ರು.+ ಬೇತ್‌-ಷೆಮೆಷ್‌ ಮತ್ತು ಬೇತನಾತಿನ ಜನ್ರನ್ನ ಗುಲಾಮರಾಗಿ ಮಾಡ್ಕೊಂಡ್ರು.
34 ಅಮೋರಿಯರು ದಾನ್‌ ಕುಲದವ್ರನ್ನ ಬೆಟ್ಟ ಪ್ರದೇಶದಲ್ಲೇ ಇರೋ ಹಾಗೆ ಮಾಡಿ, ತಗ್ಗು ಪ್ರದೇಶಕ್ಕೆ ಹೋಗೋಕೆ ಬಿಡಲಿಲ್ಲ.+
35 ಹೀಗೆ ಅಮೋರಿಯರು ಹರ್‌ಹೆರೆಸ್‌ ಬೆಟ್ಟದಲ್ಲಿ, ಅಯ್ಯಾಲೋನ್‌+ ಮತ್ತು ಶಾಲ್ಬೀಮ್‌+ ಅನ್ನೋ ಪಟ್ಟಣಗಳಲ್ಲೇ ವಾಸ ಮಾಡ್ತಾ ಇದ್ರು. ಆದ್ರೆ ಯೋಸೇಫನ ವಂಶದವ್ರ ಬಲ ಹೆಚ್ಚಾದಾಗ* ಅವರು ಅಮೋರಿಯರನ್ನ ತಮ್ಮ ಗುಲಾಮರಾಗಿ ಮಾಡ್ಕೊಂಡ್ರು.
36 ಅಮೋರಿಯರ ಪ್ರದೇಶಗಳು ಅಕ್ರಬ್ಬೀಮಿಗೆ+ ಹತ್ತಿ ಹೋಗೋ ದಾರಿಯಿಂದ ಹಿಡಿದು ಮೇಲೆ ಸೆಲದ ತನಕ ಇತ್ತು.
ಪಾದಟಿಪ್ಪಣಿ
^ ಅಕ್ಷ. “ಇಸ್ರಾಯೇಲನ ಗಂಡು ಮಕ್ಕಳು.”
^ ಬಹುಶಃ, “ಅವಳು ಕತ್ತೆ ಮೇಲೆ ಕೂತಿದ್ದಾಗ ಗಮನ ಸೆಳೆಯೋಕೆ ಚಪ್ಪಾಳೆ ಹೊಡೆದಳು.”
^ ಅಥವಾ “ನೆಗೆಬಿನಲ್ಲಿರೋ.”
^ ಅರ್ಥ “ನೀರಿನ ಬುಗ್ಗೆಗಳು.”
^ ಅರ್ಥ “ಪೂರ್ತಿ ನಾಶಮಾಡಬೇಕಾದ ಜಾಗ.”
^ ಅಕ್ಷ. “ಕಬ್ಬಿಣದ ರಥಗಳು.”
^ ಅಕ್ಷ. “ಶಾಶ್ವತ ಪ್ರೀತಿ ತೋರಿಸ್ತೀವಿ.”
^ ಅಕ್ಷ. “ಕೈ ಭಾರ ಆದಾಗ.”
