ಒಂದನೇ ಪೂರ್ವಕಾಲವೃತ್ತಾಂತ 19:1-19
19 ಅಮ್ಮೋನಿಯರ ರಾಜ ನಾಹಾಷ ಸತ್ತುಹೋದ. ಆಮೇಲೆ ಅವನ ಮಗ ಹಾನೂನ ರಾಜ ಆದ.+
2 ಆಗ ದಾವೀದ “ನಾನು ನಾಹಾಷನ ಮಗ ಹಾನೂನನಿಗೆ ಶಾಶ್ವತ ಪ್ರೀತಿ ತೋರಿಸ್ತೀನಿ.+ ಯಾಕಂದ್ರೆ ಅವನ ಅಪ್ಪ ನನಗೂ ಅಂಥ ಪ್ರೀತಿ ತೋರಿಸಿದ್ದ” ಅಂದ. ಹಾಗಾಗಿ ಅಪ್ಪನನ್ನ ಕಳ್ಕೊಂಡಿದ್ದ ಹಾನೂನನಿಗೆ ಸಮಾಧಾನ ಮಾಡೋಕೆ ದಾವೀದ ತನ್ನ ಸಂದೇಶವಾಹಕರನ್ನ ಕಳಿಸಿದ. ಆದ್ರೆ ದಾವೀದನ ಸೇವಕರು ಅಮ್ಮೋನಿಯರ+ ದೇಶಕ್ಕೆ ಬಂದಾಗ
3 ಅಮ್ಮೋನಿಯರ ಅಧಿಕಾರಿಗಳು ಹಾನೂನನಿಗೆ “ಸಮಾಧಾನ ಮಾಡೋಕೆ ಜನ್ರನ್ನ ಕಳಿಸಿ ದಾವೀದ ನಿನ್ನ ಅಪ್ಪನನ್ನ ಗೌರವಿಸ್ತಿದ್ದಾನೆ ಅಂತ ಅಂದ್ಕೊಂಡಿದ್ದೀಯಾ? ಇಡೀ ದೇಶವನ್ನ ಚೆನ್ನಾಗಿ ನೋಡಿ, ಗೂಢಚಾರಿಕೆ ಮಾಡಿ ವಶ ಮಾಡ್ಕೊಳ್ಳೋಕೆ ದಾವೀದ ತನ್ನ ಸೇವಕರನ್ನ ಕಳಿಸಿದ್ದಾನೆ” ಅಂದ್ರು.
4 ಹಾಗಾಗಿ ಹಾನೂನ ದಾವೀದನ ಸೇವಕರನ್ನ ಕರ್ಕೊಂಡು ಹೋಗಿ ಅವ್ರ ಗಡ್ಡ ಬೋಳಿಸಿ+ ಅವ್ರ ಸೊಂಟದ ಕೆಳಭಾಗ ಕಾಣೋ ತರ ಬಟ್ಟೆ ಕತ್ತರಿಸಿ ಕಳಿಸಿಬಿಟ್ಟ.
5 ತನ್ನ ಸೇವಕರಿಗೆ ತುಂಬ ಅವಮಾನ ಮಾಡಿದ್ದು ದಾವೀದನಿಗೆ ಗೊತ್ತಾದಾಗ ಕೂಡ್ಲೇ ಅವ್ರನ್ನ ಭೇಟಿ ಮಾಡೋಕೆ ಬೇರೆ ಗಂಡಸ್ರನ್ನ ಕಳಿಸಿ “ನಿಮ್ಮ ಗಡ್ಡ ಮತ್ತೆ ಬೆಳೆಯೋ ತನಕ ಯೆರಿಕೋನಲ್ಲೇ+ ಇರಿ. ಆಮೇಲೆ ವಾಪಸ್‌ ಬನ್ನಿ” ಅಂದ.
6 ಅದೇ ಸಮಯಕ್ಕೆ ದಾವೀದನಿಗೆ ತಮ್ಮ ಮೇಲೆ ತುಂಬ ದ್ವೇಷ ಇದೆ ಅಂತ ಅಮ್ಮೋನಿಯರಿಗೆ ಗೊತ್ತಾಯ್ತು. ಹಾಗಾಗಿ ಹಾನೂನ ಮತ್ತು ಅಮ್ಮೋನಿಯರು ಮೆಸಪಟೇಮ್ಯದಿಂದ,* ಅರಾಮ್‌-ಮಾಕದಿಂದ, ಚೋಬದಿಂದ ರಥಗಳನ್ನ, ಕುದುರೆಸವಾರರನ್ನ ಬಾಡಿಗೆ ತಗೊಳ್ಳೋಕೆ 1,000 ಬೆಳ್ಳಿಯ ತಲಾಂತುಗಳನ್ನ* ಕಳಿಸ್ಕೊಟ್ರು.+
7 ಹೀಗೆ ಅವರು 32,000 ರಥಗಳನ್ನ, ಮಾಕಾದ ರಾಜನನ್ನ, ಅವನ ಜನ್ರನ್ನ ಬಾಡಿಗೆಗೆ ತಗೊಂಡು ಬಂದ್ರು. ಅವ್ರೆಲ್ಲ ಮೇದೆಬದ+ ಮುಂದೆ ಪಾಳೆಯ ಹೂಡಿದ್ರು. ಅಮ್ಮೋನಿಯರು ತಮ್ಮತಮ್ಮ ಪಟ್ಟಣಗಳಿಂದ ಯುದ್ಧಕ್ಕಾಗಿ ಬಂದ್ರು.
8 ಈ ಸುದ್ದಿ ಕೇಳಿಸ್ಕೊಂಡಾಗ ದಾವೀದ ಯೋವಾಬನನ್ನ,+ ತುಂಬ ಬಲಿಷ್ಠ ವೀರ ಸೈನಿಕರಿದ್ದ ತನ್ನ ಇಡೀ ಸೈನ್ಯ ಕಳಿಸಿದ.+
9 ಅಮ್ಮೋನಿಯರು ಪಟ್ಟಣದ ಬಾಗಿಲ ಹತ್ರ ಸೈನ್ಯ ಕಟ್ಟಿದ್ರು. ಆ ಸಮಯದಲ್ಲಿ ಯುದ್ಧಕ್ಕಾಗಿ ಬಂದಿದ್ದ ಬೇರೆ ರಾಜರು ಪ್ರತ್ಯೇಕವಾಗಿ ಬಯಲಲ್ಲಿ ನಿಂತಿದ್ರು.
10 ಯೋವಾಬ ತನ್ನ ಹಿಂದೆ ಮುಂದೆ ವೇಗವಾಗಿ ಬರ್ತಿದ್ದ ಸೈನ್ಯವನ್ನ ನೋಡಿ ಇಸ್ರಾಯೇಲಿನಲ್ಲಿ ಇದ್ದ ಉತ್ತಮ ಸೈನಿಕರನ್ನ ಆರಿಸ್ಕೊಂಡು ಅರಾಮ್ಯರ ವಿರುದ್ಧ ಹೋಗೋಕೆ ಸೈನ್ಯ ಕಟ್ಟಿದ.+
11 ಉಳಿದ ಗಂಡಸ್ರನ್ನ ಅಣ್ಣನಾದ ಅಬೀಷೈ+ ಕೈಗೆ ಕೊಟ್ಟು ಸೈನ್ಯ ಕಟ್ಕೊಂಡು ಅಮ್ಮೋನಿಯರ ವಿರುದ್ಧ ಹೋಗೋಕೆ ಹೇಳಿದ.
12 ಆಮೇಲೆ ಯೋವಾಬ “ಅರಾಮ್ಯರು+ ನನ್ನನ್ನ ಸೋಲಿಸೋ ತರ ಕಂಡ್ರೆ ನೀನು ಸಹಾಯಕ್ಕೆ ಬರಬೇಕು, ಅಮ್ಮೋನಿಯರು ನಿನ್ನನ್ನ ಸೋಲಿಸೋ ತರ ಕಂಡ್ರೆ ನಾನು ನಿನ್ನನ್ನ ಕಾಪಾಡ್ತೀನಿ.
13 ನಾವು ದೃಢವಾಗಿರಬೇಕು. ಧೈರ್ಯದಿಂದ+ ನಮ್ಮ ಜನ್ರಿಗಾಗಿ, ನಮ್ಮ ದೇವರ ಪಟ್ಟಣಗಳಿಗಾಗಿ ಹೋರಾಡಬೇಕು. ತನಗೆ ಯಾವುದು ಒಳ್ಳೇದಂತ ಯೆಹೋವನಿಗೆ ಅನಿಸುತ್ತೋ ಅದನ್ನೇ ಆತನು ಮಾಡ್ತಾನೆ” ಅಂದ.
14 ಆಮೇಲೆ ಯೋವಾಬ, ಅವನ ಸೈನಿಕರು ಅರಾಮ್ಯರ ವಿರುದ್ಧ ಯುದ್ಧಕ್ಕೆ ಹೋದ್ರು. ಅರಾಮ್ಯರು ಅವನಿಗೆ ಹೆದರಿ ಓಡಿಹೋದ್ರು.+
15 ಅರಾಮ್ಯರು ಓಡಿಹೋಗಿರೋದನ್ನ ನೋಡಿದಾಗ ಅಮ್ಮೋನಿಯರು ಸಹ ಯೋವಾಬನ ಸಹೋದರ ಅಬೀಷೈಗೆ ಹೆದರಿ ಪಟ್ಟಣಕ್ಕೆ ಓಡಿಹೋದ್ರು. ಆಮೇಲೆ ಯೋವಾಬ ಯೆರೂಸಲೇಮಿಗೆ ಬಂದ.
16 ಇಸ್ರಾಯೇಲ್ಯರಿಂದ ಸೋತು ಹೋಗಿದ್ದೀವಿ ಅಂತ ಅರಾಮ್ಯರಿಗೆ ಗೊತ್ತಾದಾಗ ನದಿಯ*+ ಪ್ರದೇಶದಲ್ಲಿದ್ದ ಅರಾಮ್ಯರನ್ನ ಸೇರಿಸೋಕೆ ಸಂದೇಶವಾಹಕರನ್ನ ಕಳಿಸಿದ್ರು. ಅವ್ರನ್ನ ಹದದೆಜೆರನ ಸೇನಾಪತಿಯಾಗಿದ್ದ ಶೋಫಕ ಮುನ್ನಡೆಸಿದ.+
17 ಈ ಸುದ್ದಿ ದಾವೀದನಿಗೆ ಮುಟ್ಟಿದ ತಕ್ಷಣ ಅವನು ಎಲ್ಲ ಇಸ್ರಾಯೇಲ್ಯರನ್ನ ಒಟ್ಟುಸೇರಿಸಿ ಯೋರ್ದನ್‌ ದಾಟಿ ಅವ್ರ ಹತ್ರ ಬಂದ. ಅವನು ಅರಾಮ್ಯರ ವಿರುದ್ಧ ಯುದ್ಧ ಮಾಡೋಕೆ ಸೈನ್ಯ ಕಟ್ಟಿದ. ಅರಾಮ್ಯರು ಅವನ ವಿರುದ್ಧ ಯುದ್ಧ ಮಾಡಿದ್ರು.+
18 ಆದ್ರೆ ಅರಾಮ್ಯರು ಇಸ್ರಾಯೇಲ್ಯರ ಮುಂದಿಂದ ಓಡಿಹೋದ್ರು. ದಾವೀದ ಅರಾಮ್ಯರ 7,000 ಸಾರಥಿಗಳನ್ನ, 40,000 ಕಾಲಾಳುಗಳನ್ನ ಕೊಂದ. ಅವ್ರ ಸೇನಾಪತಿಯಾಗಿದ್ದ ಶೋಫಕನನ್ನ ಕೊಂದ.
19 ತಾವು ಇಸ್ರಾಯೇಲ್ಯರ ಕೈಯಲ್ಲಿ ಸೋತು ಹೋಗ್ತೀವಿ+ ಅಂತ ಹದದೆಜೆರನ ಸೇವಕರು ನೋಡಿದಾಗ ತಕ್ಷಣ ದಾವೀದನ ಜೊತೆ ಸಮಾಧಾನ ಮಾಡ್ಕೊಂಡು ಅವನಿಗೆ ಅಧೀನರಾದ್ರು.+ ಅವತ್ತಿಂದ ಅಮ್ಮೋನಿಯರಿಗೆ ಸಹಾಯ ಮಾಡೋಕೆ ಅರಾಮ್ಯರಿಗೆ ಭಯ ಆಯ್ತು.
ಪಾದಟಿಪ್ಪಣಿ
^ ಅಕ್ಷ. “ಅರಾಮ್‌-ನಹರೈಮ್‌.”
^ ಒಂದು ತಲಾಂತು=34.2 ಕೆಜಿ. ಪರಿಶಿಷ್ಟ ಬಿ14 ನೋಡಿ.
^ ಅದು, ಯೂಫ್ರೆಟಿಸ್‌ ನದಿ.
