Kwaalabul kwa Bulongolody Buhyaabuhy kwa mifund yijilang mu ciin Estony baakady bikusungul bu bwaal butam bwa Cileebel bwiikal cya bukish cya mu muvw a 2014 mu Estony. Bwa mifund yidyobw baalabul, ibiitab Bibl 18, ki i mwiiy ha cyaab ciisat mu kusungul kwa bulekel.

Kwaalabul kuhyaamuhy kwa Bibl oow, i bikuteek ku biit bihyaabihy mu dya 8/8/2014, bikusungwiil bu cya diifut kudy mulong a bileebel Kristiina Ross wa kalaas ka Cileebel cya Estony. Uleebel bwa Kwaalabul kwa Bulongolody Buhyaabuhy bu “kuhehel ni kutwaal musangal bwa kwiikubal,” uleebel cikwaabw neey: “ Mudimw udyobw balong oow i mulengej menmen mu Estony cyaab cidyobw baalabwiil cileebel eecy.” Rein Veidemann, mulongesh wa mu Estony wa tulaas tubandil twa myand ya mikand ni mamany, uleebel bwa kwaalabul kuhyaakuhy ook neey i “kukumban kwa bwaal butam.”

Bibl mutuutul a kuuhal wa mu ciin Estony bamuhatwiil mu 1739, ni kacy ciisang aacy, baalabwiil mikand yikwaabw. Bwabiny, Kwaalabul kwa Bulongolody buhyaabuhy i “Kukumban kwa bwaal butam” eeny?

Kujaalal. Bibl udy nend baat mu Estony bamuhatwiil mu 1988 ha kwaalabul ni meej moos diijin dya Mawej dya lutumb “Jehoova” (Yehow) misang mikahit ha 6 800 mu mifund ya ciin Ebreh (Kuhwaan Kukul). a Kwaalabul kwa Bulongolody Buhyaabuhy kwa mu ciin Estony kuloolong nook ni kuhit ni hiin aah. Hadyok mushind mushimat mutook a kulong nook, Kwaalabul kwa Bulongolody Buhyaabuhy kukaakal byaak mudimw ni diijin dya Mawej mu mifund ya ciin Krek ya Biin Krist (Kuhwaan Kuhyaakuhy).

Butook. Kwaalabul kwa Bulongolody Buhyaabuhy i kuhet lutat hakwiikalok eeny i kujaalal ni kwa kubal? Mwaalabul a Bibl waakadyobw baneemek Toomas Paul ufundil mu ciin Eesti Kirik (Citendeleel cya mu Estony) diibij dya myand yihyaahihy dya Kwaalabul kwa Bulongolody Buhyaabuhy “i bukumbaj biin-biin kihacil ka kwaalabulobw mu ciin Estony cihehel.” Uleebel cikwaabw neey: “Ninujaajaadikil neey wiinow i musang a kuuhal udy kihacil aak kakumban.”

Dyaalabul dya Biin Estony bwa Kwaalabul kwa Bulongolody Buhyaabuhy kwaakady kwa habwaah. Cisanj cya baat cyaakady cyangat program wa minit 40 bwa kuleeb bwa Bibl muhyaamuhy. Bafumw ba bitendeleel ni basasambiloomw i batalangan ni Batemw ba Yehow bwa bahetoh byaabw Bibl. Kalaas kahand ka kulongesh kuhiluk mu Tallinn kalombeel Bibl 20 ya Kwaalabul kwa Bulongolody Buhyaabuhy bwa kukal naay mudimw mu kalaas kamw ka tulaas twaababw. Biin-Estony i bakat mikand, ni Batemw ba Yehow bady ni musangal bwa kwaakish baat mukand a Kwaalabul kujaalal ni kutook kwa mukand muhit kulengel ufundilobw.