Ing, Batemw ba Yehow badyaakal teng bambulwiish baat bady cihuh cikwaat. Twambambulwiish baat boos bady cihuh cikwaat ning babw Batemw eecy kabay Batemw, mu kuhetangan ni diiy dya kulond didy mu Bibl mu mukand a Biin Kalatih 6:10: dileeleeb neey: “Naak, hacidyok diib aah, tulongelaay baat boos myand yilengel, ni aamanaaman tuhit kulongel biin kwiitabij neet bilengel.” Twiiditeeteek ha cyaab cya bakwaabw ni twambambulwiish baat bady bahanduk ni biit bya mu spirit bikaakaamobw mu ciisang cikumban.—2 Biin Korent 1:3, 4.

Haanyim a cihuh ciman ni kulongek, bakuluuh ba bisumbw bidy cyaab cidy cihuh cilongekel baloolong bukash bwa kukumbul muut woos wa mu cisumbw bwa kumanyikobw baat bady kabay bahet buhund ni bwa kwiibambulwiish ni bikaakaamobw. Bakuluuh batwaatwaal bihet bya dikumbul dyaababw ni musang aakaabumw batwaatwaal lwaapool ku biro biloolombol mudimw a Batemw ba Yehow mu cibunj cyaababw.

IHikalobw bakaam dyambulwiish kufulok didy cisumbw cya hacyaab cidyobw batwaal, kasumbw kaludik ka Batemw ba Yehow kiiyiiy kiibakish bikaakaamobw. Eeby bihehetangan ni byaakady biin Krist ba kuuhal bambulwiishangan mu ciisang cya nzal. (1 Biin Korent 16:1-4) Biin mu komiteh bataatal myand ya bihuh bady ku biro bya cyaab aacy biiyiiy kulong bukash bwa kulongolol myand. Batemw ba byaab bikwaabw batwaatwaal diib dyaababw ni biit bya ku nyeet bwa kwambulwiish.—Tusumw 17:17.

Umw wa ku mishind ya kutwaal mah madyobw bakal naam mudimw ku biro bya Batemw ba Yehow i wa kwambulwiish baat bady bahet makab bwa bikumin. (Myand yilongel Bapostol 11:27-30; 2 Biin Korent 8:13-15) Mudimw bamuloolong kudy baat bitwaatwaal babw kayaabw, Fwalang yidyobw batwaal yambambulwiish bakaakab, kayiin fwalang yalalukil ku bisumbw bya baat bambambulwiishangan. Twangangat ni buseeb mah moos.—2 Biin Korent 8:20.