Batemw ba Yehow bady ni program a kulong Bibl ni baat mu majooj ni maalabul, mudy majooj ma neey:

• Mawej i ngany?

• Mawej wiitaatacishok bwa mim eeny?

• Nady mwa kulongolol maluw bicy?

• I mushind kaay unady mwa kuhet musangal mu shikacil?

Wiiyiiy kuhet maalabul madyaakal baat biijooj habitaatal program wa dilong dya Bibl

I mushind kaay utudyaakal tulong Bibl ni baat? Tuloolong biin bwaal bu mudy citaatal “Mawej” eecy “maluw” ni tukontonon verseh yishiil-shilangan ya mu Bibl yileeleebel ha ciin bwaal kahand. Ha twiiyifwaafwanyikij ni yikwaabw, Tutaatal cileeleeb Bibl bwa ciin bwaal kahand, ni mu mushind oow tuleelek Bibl kaayend waalabul.

Bwa kwiitwambulwiish bwa kulong Bibl, tukaakal mudimw ni mukand a Bibl wiituloolongweesh biny? Mukand oow uleeleej hatook, bimw biin bwaal bikwaabw biloolond eeby: Bibl uloolongweesh biny habitaatal Mawej, Yeez, ni bwa mafuk maciiyiiy kuuhal.

● Baloolomb fwalang yang bwa kulong Bibl? Dilong dya Bibl diloolongek kakuy kutwaal fwalang ni kabishow bikasakan bwa kuhet myand ya kulong.

Tuloolong Bibl ni baat meeb mang? Baat bavul baloolong diib dimw eecy luming loos bwa kulong neet Bibl. I bihehel habitaatal kuneeng kwa dilong dya Bibl. Bwa diib, tuloolond program iibuh.

I biny biloolongek hanaloolombol dilong dya Bibl? Hawukaakaam kulong Bibl, Temw a Yehow wiiyiiy kukutal ha diib ni ha cyaab ciwudy. Temw wiiyiiy ku kuleej mu minit yikeeh mushind utudyaakal tulong Bibl ni baat. Uw mukat, ututungunuk bwa kulong.

Mim mwiitab bwa kulong Bibl, nady teng mwa kushaal Temw a Yehow eeny? Waakweeh! Batemw ba Yehow i bakat kulongweesh baat myand ya mu Bibl, katwiin tusak muut ku makand bwa kulondey citendeleel ciitut. Nook, tuneeneemek cidy Bibl uleeb, ni tudy bamanyik neey: muut woos udy ni bukenj bwa kwiitabey eecy kulek.—1 Pyeel 3:15.