Mutudy Batemw ba Yehow, twiikaakashishomw bwa kulong mudimw waakady Yeez mulong ni ulongel bapostol bindiy. Ciin bwaal eecy cileeleej mu may makeeh myand yitudy biitabij.

1. Mawej. Tuhahambidil Mawej aakaabumw a biin-biin ni wa Bukash boos, Cyakahang, diijin dindiy i Yehow. (Musambw 83:18 NWT; Myand yisokolweel Jah 4:11) I Mawej a Abraham, wa Moyiz, ni wa Yeez.—Cimwang 3:6; 32:11; Jah 20:17.

2. Bibl. Tudy bamanyik neey: Bibl i musah a Mawej mufundish ku spirit mujilang udyey mutumin baat. (Jah 17:17; 2 Timoteh 3:16) Diitabij diitut i dishimatil mu mikand yoos 66 yiloolong Bibl, mutusasangan “Kuhwaan Kukul-kul” ni ya mu “Kuhwaan Kuhyaakuhy.” Mulongweesh Jason David BeDuhn mulongweesh a myand ya bitendeleel mu Iniversiteh wa Arizona wa ku Nord, mu Flagstaff, mu Etats-Unis i muleej hafundiley neey: Batemw ba Yehow “ i biitabij myand ni bilel bitusasangan teng mu Bibl, baloolond teng cidy Bibl uleeb ni kabinin bahangadij myand yikal mwa kulongek mu mafuk miiyiiy, ni i bamanyik teng neey: Bibl ki udyok bwa kuleej biin-biin.” *

   Hatwiitaatab myand yoos yidy mu Bibl, tudy bamanyik neey bituh bya mu Bibl i bifundish mu cifwany, ni myand yidyomw, katwiin mwa kwiiyumvw teng ku mwaak ni ku mwaak.—Myand yisokolweel Jah 1:1.

3. Yeez. Tuloolond malongweesh ni cileejel cya Yeez Krist ni tumuneeneemek bu mudyey Cikuul iitut ni Mwaan a Mawej. (Matewus 20:28; Myand yilongel bapostol 5:31) Nook, tudy biin krist. (Myand yilongel bapostol 11:26) Nook, tudy balong mu Bibl neey Yeez kiin Mawej a Bukash boos ni kakwiishoh bend Mufund ujaajaadik neey kudy dilongweesh dya Busat Bunsant.—Jah 14:28.

4. Bukaleng bwa Mawej. I mbul matady a biin-biin udy mu diiwul, kabwiin mu micim ya biin Krist. Bwiiyiiy kuhing ha cyaab cya makaleng ma baan ba baat ni bwiiyiiy kukumbaj myand yidy Mawej mulongolol bwa bulab. (Danyel 2:44; Matewus 6:9, 10) Bwiiyiiy kulong myand eey kaabaak, ki bwabiny diiy dya ciprofet dileeleej neey: tukaady mu “mafuk ma bulekel.”—2 Timoteh 3:1-5; Matewus 24:3-14.

   Yeez i Mukaleng a Bukaleng bwa Mawej mu diiwul. Utwaadijil kukookesh mu muvw a 1914.—Myand yisokolweel Jah 11:15.

5. Luhand. Tuhehet luhand bwa mpekaat ni lufw teng ku dyambulwiish dya cya kukuul naacy baat cya mulambw a Yeez. (Matewus 20:28; Myand yilongel bapostol 4:12) Bwa kuhet musangal waalalukil ku mulambw oow, baat kabiin teng mwa kuleej diitabij kudy Yeez, ki bikaam baalabul cikwaabw shikacil aababw ni haanyim batambul batiisumw. (Matewus 28:19, 20; Jah 3:16; Myand yilongel bapostol 3:19, 20) Myand yidy muut ulong ki yileeleej neey udy ni diitabij didy ni buumy. (Jak 2:24, 26) Nook, muut kiin mwa kuhetoh bend luhand ku bukash bwindiy—ki udy mwa kwiiluhetel ku dyambulwiish dya “bukish bwa Mawej.”—Biin Kalatih 2:16, 21.

6. Diiwul. Mawej Yehow, Yeez Krist, ni Banjel ba lulamat i bashikacil mu byaab bya mu spirit. * (Musambw 103:19-21; Myand yilongel bapostol 7:55) Kasumbw ka baat bakeeh—144,000—biiyiiy kusanguk bwa kwiikal ni buumy mu diiwul bwa kukookesh aakaabumw ni Yeez mu Bukaleng.—Danyel 7:27; 2 Timoteh 2:12; Myand yisokolweel Jah 5:9, 10; 14:1, 3.

7. Bulab. Mawej uhangil bulab bwa baat bashikatoh buyiil. (Musambw 104:5; 115:16; Muleej 1:4) Mawej wiiyiiy kubenesh baat bamukokooyel bwa kushikatobw ha bulab biikal ni makand ma nyeet mawaakan ni bwa kwiikal ni buumy bwa mwendelel mu paradiiz.—Musambw 37:11, 34.

8. Myand yibiih ni makeng. Bitwaadijil ciisang cyaakady banjel ba Mawej bamutombokel. (Jah 8:44) Mwanjel oow, waakady mwiiy kutombok oow baakady bamubikan neey: “Sataan” “Dyabol,” waakady mwiitabijij biin maluw ba kuuhal bwa ku mulondobw, ni bihet byaakady bibiih bwa biikululwiil baababw. (Kutang kwa bwanjil 3:1-6; Biin Rom 5:12) Ni kihacil ka kulongolol bilumbw bijuudil Sataan, Mawej i mulek makeng ni myand yibiih, ki kiin wiitab bwa matungunuk ni kwiikalok buyiil.

9. Lufw. Baat boos baakady baman kufw, kabiinok cikwaabw. (Musambw 146:4; Muleej 9:5, 10) Kabiin bakengoh bend mu Ifernoh wa mudil.

   Mawej wiiyiiy kujuul miliyo ya baat bakaady bafw ku lufw ku dyambulwiish dya kusanguk. (Myand yilongel Bapostol 24:15) Nook, baat boos biikal baleek kulond may ma Mawej haanyim ha baman kwiibasangul ni buumy biiyiiy kwiibabutul buyiil ni kabay ni kutakamin bwa kusanguk.—Myand yisokolweel Jah 20:14, 15.

10. Cisak. Tuloolond may ma Mawej ma butambwiil bwa diibak bu kuswiikaakan kwaakaabumw hakacy ha mwaan-mulum ni mwaan-mukaj, ni bwaal bwaakaabumw budy mwa kwiibasak bwa kuzuh diibak i kwend kwa masandy (Matewus 19:4-9) Tudy bamanyik neey meej ma mu Bibl mambambulwiish bisak bwa kwiikaleby ni musangal.—Biin Efez 5:22–6:1.

11. Hamb yiitut. Katwiin tuhambidiloh bend nkurus eecy kish. (May Mumbulul 4:15-19; 1 Jah 5:21) Mu kuhambidil kwiitut mudy myand yiloolond eey:

    • Kusambil Mawej.—Biin Filipw 4:6.

    • Kubal ni kulong Bibl.—Musambw 1:1-3.

    • Kweelel meej ha myand yituloolong ya mu Bibl.—Musambw 77:12.

    • Twiikookong haakaabumw bwa kusambil, kulong Bibl, kumb misambw, ni kuleej diitabij diitut, ni kukashish bakwaabw ku micim.—Biin Kolos 3:16; Biin Ebreh 10:23-25.

    • Kudiil baat “musah mulengel a Bukaleng.”—Matewus 24:14.

    • Kwambulwiish boos bakaakaam dyambulwiish.—Jak 2:14-17.

    • Kwiibak ni kulam Nzubw ya Bukaleng ni myand yiikwaabw ya kuhehej naay mudimw iitut a kulongweesh Bibl ha bulab butuutul.—Musambw 127:1.

    • Kwambulwiish baat bady bikumin bikwaat.—Myand yilongel Bapostol 11:27-30.

12. Bulongolody bwiitut. Tudy balongolol mu bisumbw biitut, cisumbw cyoos biciloolombol kudy kasumbw ka bakul. Nook, bakul kabiinoh bend bafumw ba bitendeleel, kabiin bibafutoh bend. (Matewus 10:8; 23:8) Katwiin tulombomw cya diikumy, ni katwiin tusangish fwaalang mu bisangil biitut. (2Biin Korent 9:7) Midimw yitut yoos yiloolongek ku dyambulwiish dya mah mady baat batwaal kaayabw.

    Kasumbw kaludik, i kasumbw kakeeh ka biin Krist bashimat bakaakal mudimw ku biro bya bulab butuutul, baloolombol Batemw ba Yehow ba ha bulab butuutul.—Matewus 24:45.

13. Kaacyumw kiitut. Tut boos tudy biitabij myand yaakaabumw. (Biin 1 Korent 1:10) Tukaakal mudimw bikasakan ni baat boos, katuy tusunguluj ciseb, cis, eecy katwiin babulukangan. (Myand yilongel bapostol 10:34, 35; Jak 2:4) Tudy bakat kwiikal mu kaacyumw. Temw woos wangangat dihangadik dihehetangan ni mucim indiy a mund mulongweesh kudy Bibl.—Biin Rom 14:1-4; Biin Ebreh 5:14.

14. Bilong biitut. Tuloolong mwiitut moos bwa kulongel baat boos myand yilengel. (Jah 13:34, 35) Tuleelek bilong byaakakish Mawej kakunying, ni kukal mudimw bibiih ni mash ha kwiitab bwa kumbangan mash. (Myand yilongel bapostol 15:28, 29; Biin Kalatih 5:19-21) Tudy biin diitalal ni katwiin tutweelakan mu myand ya mavit. (Matewus 5:9; Yeshaay 2:4) Tuneeneemek mbul-matady ha cyaab cyoos citudy bashikacil ni tukokooyel ku mikenj indiy hadyey kayiiy yitusak bwa kulek kukooyel ku mikenj ya Mawej.—Matewus 22:21; Myand yilongel Bapostol 5:29.

15. Bulund bwiitut ni baat bakwaabw. Yeez uleejel neey: “Kat mukween bu muwudy mwiikat uw kaayeeb.” Uleebel cikwaabw neey: Biin Krist “kabiishow bend ba habulab.” (Matewus 22:39; Jah 17:16) Nook, ‘tuloolongel baat boos myand yilengel,’ ni katwiin tutweelakanoh bend mu myand ya cidiidy ni katwiin twiikong haakaabumw ni bitendeleel bikwaabw. (Biin Kalatih 6:10; 2 Biin Korent 6:14) Nook, tuneeneemek cidy muut usungul mu bwaal bwa nook.—Biin Rom 14:12.

Uw mwiikal ni majooj ha bitaatal miitabij mady naam Batemw ba Yehow, bikaam ubal myand yivul yitutaatal mu sit iitut, tal byumw bya ku biro biitut, kutweel mu bisangil ku Nzubw a Bukaleng udy habwiih neeb, eecy Iisamb ni Temw wa ha cyaab ciwudy.