Bukaleng bwa Mawej Budy mu Micim eeny?
Bibl utwaatwaal dyaalabul
Kabiin naak, Bukaleng bwa Mawej kabwiinoh bend mu mucim mwa biin Krist. * Bibl ububibikan neey: “bukaleng bwa mwiiwul.” (Matewus 4:17, King James Version) Tutalaay mudy Bibl uleej neey: I mbul-matady a biin-biin ukookookesh ha kwiikal mu diiwul.
Bukaleng bwa Mawej budy ni bibukookokesh, biin dya Bukaleng, mikenj, ni bwiiyiiy kulong bwa lukat lwa Mawej lulongek mu diiwul ni ha bulab.—Matewus 6:10; Myand yisokolweel Jah 5:10.
Mbul-matady a Mawej, eecy Bukaleng, wiiyiiy kukookesh “baat ba mangand moos, ba bis byoos ni ba bileebel byoos” ba ha bulab. (Danyel 7:13, 14) Bukookesh oobw kabwiin bwaalukil kudy baat biikalobw mwa kwiiy kulombol, ki bwaalalukil teng kudy Mawej.—Misambw 2:4-6; Yeshaay 9:7.
Yeez wambiil bapostol bindiy ba lulamat neey: biiyiiy kumulond mu Bukaleng bwa mu diiwul bwa “kushikat mu maakwaas ma bukaleng.”—Luuk 22:28, 30.
Bukaleng budy ni balwiish, biikal mwa kubutuk.—Misambw 2:1, 2, 8, 9; 110:1, 2; 1 Biin Korent 15:25, 26.
Bibl kiin ulongweeshoh bend neey: Bukaleng bwa mu diiwul budy mu micim yiibuh eecy bwiiyiiy kukookesh ku dyambulwiish dya baat. Nook, bileeleej neey: ‘diiy dya Bukaleng’ eecy “musah mulengel a Bukaleng” didyok bwa kuteng micim iitut.—Matewus 13:19; 24:14.
“Bukaleng bwa Mawej budy mukacy mwiinun” byumvumvwiij biny?
Baat bakwaabw i bikondakaj habitaatal cyaab cidy Bukaleng bwa Mawej hakumvwiij mukand a Luuk 17:21 mu kwaalabul kushil-shilangan kwa Bibl. Cileejel, Bibl wa King James Version uleeleeb neey: “bukaleng bwa Mawej budy mukacy mwiinun.” Bwa kumvw verseh oow bilengel, bikaam kumvw lungeny ludy mu cyambil cidyobw bafund naacy mwaak oow.
Bukaleng bwa Mawej kabwaakadyoh bend mu micim mwa balwiish ba cikis ba Yeez ba mut mukasakan
Yeez waakady wambil bafarizey, cisumbw cya bakalombol ba bitendelel baakady bamulek ni baakady bahangadij bwa kumuzuw. (Matewus 12:14; Luuk 17:20) Bikaam kwiitab neey Bukaleng bwa Mawej bwaakady mu micim yababw yikasakan eeny? Yeez wibambiil neey: “Ki mund mwiinun naabw, i mwiiwul myand ya muush-muush ni myand yibiih.”—Matewus 23:27, 28.
Kwaalabul kukwaabw kutootokesh mu mushind mujaalal kuleeb kwa Yeez kudy mu Luuk 17:21 neey: “Bukaleng bwa Mawej bukaady mukacy mwiinun.” (Italics ours; Contemporary English Version) “Bukaleng bwa Mawej budy mukacy mwiinun.” (New World Translation, dimanyish dya kuush kwa diibij) Bukaleng bwa mwiiwul bwaakady “ni” eecy “mukacy” mwa bafarizey, Yeez waakady cyaab aacy, usungwiilobw kudy Mawej bwa kukookesh bu Mukaleng, waakady kuuhal kwaababw.—Luuk 1:32, 33.
^ mus. 1 Bitendelel bivul biloolongweesh neey: Bukaleng bwa Mawej budy mund mwa muut, eecy mu micim yindiy. Cileejel, mu Etats-Unis, Biin kwiitabij ba Cihwiil cya biin Baptist wa ku Sud baleebel neey: Bukaleng bwa Mawej budy mu cituh cya “bukookesh bwa Mawej cidy mu micim ni mu buumy bwa muut.”Bya mushind aakaabumw,mu mukand indiy Jesus of Nazareth, Pope Benedict XVI uleebel neey “bukaleng bwa Mawej bwaalalukil ha kukun micim mat.”