Bafwaafwanyikij diivit dya Harmakedon ni diivit diikal mwa kulongek hakacy a mbul-matady ya baan ba baat ni mbul-matady a Mawej. Mbul-matady eey ni biyiloolombol balwiilwiish Mawej halelekobw bulombody bwindiy. (Misambw 2:2) Diivit dya Harmakedon diiyiiy kubutul makaleng ma baan ba baat.​—Danyel 2:44.

Mwaak “Harmakedon” udy teng cyaab cyaakaabumw mu Bibl, mu mukand a Myand yisokolweel Jah 16:16. Mu kumvw kwa mu cimfwany, mwaak Harmakedon udy mu mukand a Myand yisokolweel Jah, bamuleeleej neey: i “cyaab cidyobw babikan mu ciin Ebreh neey: Harmakedon,” “bakaleng ba ha bulab butuutul” biiyiiy kwiibakongakany “haakaabumw bwa kul diivit dya diifuk dya Cidy cya Mawej mwiin Bukash boos.”​—Myand yisokolweel Jah 16:14.

I bangany biikal mwa kul diivit ku Harmakedon? Yeez Krist wiiyiiy kulombol cilwiil cya mu diiwul bwa kucimunobw balwiish ba Mawej. (Myand yisokolweel Jah 19:11-16, 19-21) Mu balwiishomw mudy baat boos baleelek bufumw bwa Mawej ni batotobolol Mawej.​—Ezekiyeel 39:7.

Harmakedon i cyaab cimweemweek citudy mwa kusangan ku Est eeny? Waakweeh. Hamut a babw kwiitumbil mikenj ha cyaab citudy, diivit dya Harmakedon diiyiiy kubutul baat boos babiih ha bulab.​—Jeremih 25:32-34; Ezekiyeel 39:17-20.

Mwaak oow Harmakedon, misang yikwaabw bamubiibiikan neey “Har–Magedon” (Mu ciin Ebreh Har Meghiddohnʹ), umvumvwiij “Mulund a Mekwiidoh.” Mekwiidoh waakady tawuny wa mu cibunj cya Izaleel wa kal. Myand ya kal yituleeleej mavit makasakan malongekel cyaab eecy, ni makwaabw madyobw baleeb mu Bibl. (Baamazuj 5:19, 20; 2 Bakaleng 9:27; 23:29) Nook, Harmakedon kiin umvwiijoh bend cyaab cimweemweek cidy habwiih ni Mekwiidoh a kal. Kakwiinoh bend mulund mutam cyaab aacy, ni ning cibat-bat cyaakadyobw basakidilok ku Jezerel kacyaakady cikumban kwiikal ni boos biikal mwa kulwiish Mawej. Hamut ha kulong nook, Harmakedon i bwaal bwiikal mwa kulongek ha bulab butuutul bwiikal mwa kusangish aakaabumw bis bya baat ha cyaab cya bulekel bwa kulwiish bukookesh bwa Mawej.

Shikacil wiiyiiy kwiikal bicy mu diivit dya Harmakedon? Katwiin bamanyik mwiikal Yehow mwa kukal mudimw ni bukash bwindiy, wiiyiiy kukal mudimw ni byaamw bya mavit bilongolol bu mulongeley ha kal—mabw, cikumin, kumwangalak kwa mwanz a musul, mudil ni sufreh, mikeny, ni mabenj. (Yoobw 38:22, 23; Ezekiyeel 38:19, 22; Habakuk 3:10, 11; Zakarih 14:12) Balwiish ba Mawej, biiyiiy kukuvumukilangan ni kuzuhangan babw kayaabw, ni ku bulekekel kwa byoos biiyiiy kumanyik neey: Mawej ki wiibalwiilwiil diivit.​—Ezekiyeel 38:21, 23; Zakarih 14:13.

Diivit dya Harmakedon diiyiiy kubutul bulab eeny? Kadyaakwiiyoh bend kubutul dibulung dya bulab eedy, bwaal, bulab i cyaab cidyobw balongel muut bwa kushikat buyiil. (Misambw 37:29; 96:10; Muleej 1:4) Hamut ha kubutul baat, Harmakedon wiibakuukuuloh kaabaak, bwaal “baat bavul beeh” biin mudimw ba Mawej biiyiiy kushaal ni buumy.—Myand yisokolweel Jah 7:9, 14; Misambw 37:34.

Hadyobw baleeb bwa bulab, mu Bibl, mwaak “bulab” uleeleej misang yikwaabw bulongolody bwa baat babiih bady balek Mawej. (1 Jah 2:15-17) Mu mushind oow, Harmakedon wiikaakal “bulekel bwa bulongolody bwa myand oobw.”​—Matewus 24:3, King James Version.

I ciisang kaay cyaakiiy Harmakedon? Hatuleeleeb bwa “mal miimiin,” i dikeng diikal mwa kufikij baat teng ni ku diivit dya Harmakedon, Yeez uleebel neey: “kakwiishoh bend muut ning waakaabumw udy mumanyik diifuk eecy diib dyaakalongek yiin myand eey, ning baawaakutum mwiiwul, ning Mwaan. Teng Taat kaayend ki udy mumanyik.” (Matewus 24:21, 36) Nook, Bibl kiin muleejoh bend ciisang ciikal Harmakedon mwa kwiiy mu ciisang cya kwiikalok kwa Yeez kukiish kumweek, citwaadijil mu 1914.​—Matewus 24:37-39.