Bibl kayend utwaatwaal mishind yivul bwa kumumvw. Cyaab cyoos ciwudy, may ma Mawej “kamiishoh bend mahit kukasakan eecy miikal kuleeh neeb.”—May Mumbulul 30:11.

Cya kulong mwa kumvw Bibl

1. Iikal ni meej malengel. Iitab neey Bibl i diiy dya Mawej. Iikal ni kwiihweekesh, bwaal Mawej kiish mukat biin kwiiyumb mwiiwul. (1 Biin Tesalonik 2:13; Jak 4:6) Cikwaabw, lek kwiitabij kufw—Mawej i mukat bwa ‘ushiitulul meej miibuh moos miikal mahyaamahy.’—Biin Rom 12:1, 2.

2. Lomb meej. Bibl uleeleeb mu Tusumw 3:5 neey: “Kwiimanyin bend teng a meej miibuh.” Hamut a kulong nook, “lomb Mawej” bwa hakwaakish meej bwiibuh kumvw Bibl.—Jak 1:5.

3. Iikal ni ciibidil cya kubal Bibl. Wiiyiiy kuhet musangal muvul waalalukil mu Bibl hawumuloolong ha ciibidil kuy umubal hacibal.—Jozuweh 1:8.

4. Long ciin bwaal ku ciin bwaal. Mukulong ku ciin bwaal, i mushind uwudy mwa kumanyik myand yileeleeb Bibl habitaatal ciin bwaal kaayaacy, i mushind mulengel wa kumanyik ciloolongweesh mifund. Twaadij ni “may ma butambwiil,” bu mudyeb biikaam, ki “tukaamaay mwa kufik ku bulongweesh bulengel bwa baat bashimat.” (Biin Ebreh 6:1, 2, Easy-to-Read Version) Fwanyikij mufund ni mufund. Wiiyiiy kutal bilengel kuhetangan kudy naak verseh yishil-shilangan ni biikaam umvw mudy Bibl umvwiij verseh woos, ning myand yidy “yikasakan bwa kwiiyumvw.”—2 Pyeel 3:16.

5. Kaam dyambulwiish kudy bakwaabw. Bibl wiitukakashish bwa kwiitab dyambulwiish dya kudy bakwaabw bumvumvw Bibl. (Myand yilongel Bapostol 8:30, 31) Batemw ba Yehow bady ni program a kulong Bibl ni baat kabay balomb fwalang. Teng bu biin Krist ba kuuhal, bakaakal mudimw ni Bibl bwa kwambulwiish bakaabw bwa bamanyik cidy Bibl ulongweesh menmen.—Myand yilongel Bapostol 17:2, 3.

Myand yiwudy kuy mukat

1. Tulaas tutam twa bikadil eeny iniversiteh. Bapostol ba Yeez 12 baakady bumvw mifund ni kwiiyilongweeshobw bakwaabw, ning mwa kady baat bakwaabw biibamanyik neey: i baat ba bituh bakiish bamanyik mukand.”—Myand yilongel Bapostol 4:13.

2. Fwalang. Udy mwa kulong cidy Bibl ulongweesh kuy utwaal fwalang. Yeez wambil biiyij bindiy neey: “Nubaahet bituh kanuy baland, kaakishanganaay bituh.”—Matewus 10:8.