Yehow waakady mwambil biin Izaleel bwa biikal bajilang. Bwa kwiibambuIwiishey bwa kushaalobw bajilang, wiibambiil neey: “Kanwiish mwa kwend ni kudingidil baan been myand. Kanufundomw bend mwaaneen bwa myand yidy mwa kumufikij ku kumuzuhobw. Nady Mawej [Yehow].”​—Lev 19:2, 16.

Cyambil cya neey: “kanudingomw bend” i kwaalabul kulengel kwa cyambil cya mu ciin Ebreh cya kal, ki cyumvumvwiij biny? Mukand kahand uleeleeb bwa Biin Leevy nook: “Cituh cya verseh eecy i . . . Cikasakan, bwaal byaakady bikasakan bwa kumvw cyambil cya mu ciin Ebreh [citudy basangan iinaah], cifund ku mwaak ku mwaak, neey: ‘kanufundomw bend, ku dyambulwiish, habwiih ni.’”

Bamw baat bady bamanyik myand bumvumvwiij cyambil eecy mu mushind umvumvwangan ni verseh wa 15, uleeleeb neey: “Kanwiikal bend ni kabow mukulumbulwiish kwa bilumbw: kanulongel bend mulam-lam bilengel ni kanutal bend muut bwa kutam kwindiy, ki nulumbulwiish bilumbw bya baan ba ngand neen bilengel.” (Lev 19:15) Habitaatal bwaaI oobw, diiy didy mu verseh wa 16 dya neey: “kanufundomw bend” muut, didy mwa kumvwiij neey: baat ba Mawej kabaakady mwa kulongel mwaanaabw waakadyobw bakal nend mudimw haakaabumw bibiih, ha kumufikijobw ku tuumilaady bwa bamulumbulwiish, mu myand ya mushing, eecy mu myand ya mu cisak ni hakulek kuleeb bibiih bwa myand yimutaatal. Tumanyik neey: kabiin bikaam tulong myand ya mushind oow, ki kudy mushind mulengel weeh wa kumvw cyambil cidy mu verseh 16.

Tutalaay may ma butambwiil ma verseh oow. Mawej wambambil baat bindiy neey: kanwiish mwa kwend ni kudingidilanganomw myand. Manyik neey: kudingidilangan myand i kuhitok tubwaabw ni kumishik, cikwaabw, tubwaabw ni ku mishik kudy mwa kukaamish bilumbw. (Tus. 10:19; Mul. 10:12-14; 1 Tim. 5:11-15; Jak 3:6) Muut udiidingidilangan myand, udyaakal teng mukat kuleeb myand ya makos bwa kunyangil muut mukwaabw luumw. Cikwaabw, muut udiidingilangan myand udy mwa kuleeb myand ya makos habitaatal muut mukwaabw, ning yiy mwa kukaamish buhund budy mwa kufikij muut aaw ku lufw. Vuluk neey: kwaakady baat baakady badingidilomw Nabot myand ya makos, yilongel bwa bamuzuh ni mabw kay mulong bwaal. (1 Bak 21:8-13) Ing, muut udiidingidilangan myand udy mwa kukaamin muut mukwaabw lufw, teng mudyeby bileej mu cituh ciibiidy cya mukand a Biin Leevy 19:16.

Cikwaabw, muut udiidingidil mukwaabw myand i mumukin. Mukand a 1 Jah 3:15, uleeleeb neey: “Muut woos uleelek kutal mukwaabw mu diis i manj. Nudy bamanyikok ney manj woos kiishoh bend ni buumy bwa mwendeleel mund mwindiy.” Haanyim a Mawej muman kuleeb may ma kulond mady mu verseh wa 16, uleebel cikwaabw neey: “Kanumvwiil bend mwaaneen lukin mu mucim.”​—Lev 19:17.

Nook, cyambil cidy cifund mu mukand a Biin Leevy 19:16 cibeebel bikasakan biin Krist. Bikaam tulek kwiikal ni meej mabiih ni kudingidilanganomw myand. Tut ni ciibidil cya ‘kufundomw’ muut neet, katwiinoh bend bamukat eecy mukaw ni lukin bidy mwa kwiitusak bwa tumudingidilomw myand. Nook, kulong nook i cijaadik cya neey: tudy bamukin. Biin Krist kabiin mwa kwiikal ni ciikadil eecy.​—Mat. 12:36, 37.