1. I biihacil kaay bya mu spirit bitudy mwa kwiifundil?

 BU MUTUDY biin Krist ba biin-biin, tudy bakat Yehow menmen. Tudy bakat bwa mudimw utumukaakadil iikal mulengel menmen ku mees kwindiy. Ki bwiitut kukal mudimw woos utudy bakumban bwa kulongel Yehow, bikaam twiifundil biihacil bya mu spirit, bu mudy: kulong bwa kwiikal ni biikadil bya bwiin Krist, long bwa kumanyik myand ya buseeb yiwudy mwa kulong, ni kukaam mishind yiwudy mwa kwambulwiish bakwaabw. *

2. Bwabiny bikaam twiifundil biihacil bya mu spirit ni kulong bukash bwa kwiibikumbaj?

² Bwabiny i bya buseeb bwiitut kuy kuuhal mu myand ya mu spirit? Cya kuuhal, tudy bakat kusangeej Taat iitut a mu diiwul udy ni lukat. Yehow udy ni musangal hadyey wiitutal tukal mudimw menmen ni biheel biitut mu mudimw indiy. Cikwaabw, tudy bakat kuy kuuhal mu myand ya mu spirit bwa kwambulwiish baan beet biin Krist. (1 Tes. 4:9, 10) Ning tut biikal ni mivw yivul mu bulongolody, tut boos tudy mwa kuy kuuhal mu myand ya mu spirit. Tutalaayaak mutudy mwa kulong naak.

3. Bilondeshel may mady mu 1 Timoteh 4:12-16, mupostol Pool waakady mukashish Timoteh bwa kulong biny?

³ Haakady mupostol Pool mufundil Timoteh mukand indiy a kuuhal, sangiilum waakady ki ukaady mukul mushimat mu diitabij. Cikwaabw, Pool umukashishil bwa kutunungunukey ni kuy kuuhal mu myand ya mu spirit. (Bal 1 Timoteh 4:12-16.) Uw mulangil ha may ma Pool aam, wiiyiiy kutal neey: waakady mukat bwa Timoteh ay kuuhal mu myand yibidy eey: Hakwiikal ni  biikadil bya bwiin Krist bu mudy lukat, diitabij, ni mu kulengel kwa micim ni mu kwiiyij kubal mukand a Mawej kuuhal kwa baat, mwa kwiibakashish, ni mwa kwiibalongweesh. Ni cileejel cya Timoteh eecy mu meej, tutalaay mudy biihacil bya meej mwa kwiitwambulwiish bwa kushaal biin mudimw ba Mawej balengel. Twiiyiiy kukontonon cikwaabw mishind yitudy mwa kuvudij mudimw iitut a bukajaady.

4. Bilondeshel Filipw 2:19-22, i biny bilongel bwa Timoteh iikal ni buseeb buvul ku mees kwa Yehow?

⁴ I biny bilongel bwa Timoteh ashaal mwiin mudimw a buseeb ku mees kwa Yehow? Bwaal waakady uleej biikadil bya bwiin Krist mu shikacil indiy. (Bal Filipw 2:19-22.) Teng mudy Pool mumvwiij bwa cyaakady Timoteh, tutal neey: waakady ni kwiihweekesh, lulamat, waakady ukal mudimw a Mawej ni cisumy ni wa kuteekel micim. Waakady mukat baan baabw, ni wiibatacil bikasakan. Bu cihet, Pool waakady mukat Timoteh bikasakan ni kaakadyoh bend weelakan bwa kumuteekel micim bwa kumwaakish midimw yikasakan. (1 Kor. 4:17) Bya mushind aakaabumw, Yehow wiiyiiy kwiitukat ni tudy ni buseeb buvul kudy biin-kweet mu cisumbw hatuleeleej mu bilong biikadil bidy Yehow mukat.​—Mis. 25:9; 138:6.

5. a) I biny biwudy mwa kulong bwa kwiikal ni ciikadil cya bwiin Krist ciwukakaam kwiikal naacy? b) Teng mudyobw bibileej ha cifwaatul, i mushind kaay udy mwiin-kweet sangiikaj ukal mudimw ni kiihacil ka kwiiteek ha cyaab cya bakwaabw?

⁵ Ifundil kiihacil ka kwiikal ni ciikadil kahand. Sambil ni langil ha myand kahand ya buumuut bwiibuh yiwukaakaam bwa kulongolol. Tal ciikadil cisunguluk ciwukakaam kulongolol. Cileejel, ukaakaam kwiikalok ni micim yikwiit mund bikasakan bwa biin Krist neeb ni ukaam bwa kwiikal kwiibambulwiish eeny? Ukaakaam kwiikal cikwaabw mushikik a bakwaabw talal ni kwiikal muut udy mukat kufwiilangan lus bikasakan eeny? Udy mwa kuhet dyambulwiish uw mwiihanguj mulund neeb uwudy muteekel micim bwa kukwambiley myand yiwudy mwa kulongolol.​—Tus. 27:6.

6. I mushind kaay uwudy mwa kulong bwa kukumbaj kiihacil kiibuh ka kwiikal ni ciikadil kahand?

⁶ Long bwa kukumbaj kiihacil kiibuh. I mushind kaay uwudy mwa kulong naak? Mushind a kulong i kulong ni meej ciikadil ciwukakaam kulengej. Lang ket neey: wangangat dihangadik bwiibuh kwiikashishomw bwa kwiikal kufwiil baat bakwaabw lus bikasakan. Udy mwa kutwaadij hakubal ni hakulangil ha bileejel bya baat badyobw bateel mu bibl baakady bafwiilangan lus ni mucim aakaabumw ni bya bakwaabw baakady kabay bafwiilangan lus. Langil ha cileejel cya Yeez. Waakady ufwiil bakwaabw lus ni mucim aakaabumw. (Luuk 7:47, 48) Cikwaabw, kaakadyoh bend wiimanyin teng ha bibiih byaabab ki  waakady wiimanyin ha myand yaakadyobw mwa kukumbaj. Ki, Bafarizey ba mu ciisang cya Yeez baakady “batobolol bakwaabw.” (Luuk 18:9) Kuunyim kwa uw muman kulangil ha bileejel eeby, iyihanguj neey: ‘I myand kaay yinatatal kudy bakwaabw? I biikadil kaay byaabab binanyanyishok?’ Biby biikal neey: kabiin bikooyel bwiibuh kufwiil muut lus, teet bwa kufundok biikadil byoos bilengel bidy naaby muut aaw. Kuunyim wiiyihanguj neey: ‘I mushind kaay udy Yeez utal muut oow? Waakady mwa kumufwiil lus eeny?’ Kulong nook kudy mwa kwiitwambulwiish bwiitut kulongolol mushind iitut a kulang. Cya kuuhal, tudy mwa kulong mwiitut moos bwa kufwiil muut udy mwiitulongel bibiih lus. Ki tut biikashishomw bwa kulong nook, twiiyiiy kwiikal ni micim ya kufwiil bakwaabw lus ni mucim aakaabumw.

7. Bilondeshel mukand a Tusumw 22:29, i mushind kaay udy Yehow ukal mudimw leeloow ni bakal ba mudimw bashimat?

⁷ Ciihacil cikwaabw ciwudy mwa kwiifundil i kumanyik muwudy mwa kukal mudimw bilengel ni ciheel cya buseeb ciwudy naacy. Langil ha buny bwa baat badyobw bakaam ku lwiibak lwa Nzubw ya Betel, Nzubw ya Bihwiil, ni Nzubw ya Bukaleng. Bavul ba ku bakal ba mudimw aab, bamamanyik bwa kukal mudimw aabab bilengel hakukal mudimw haakaabumw ni biin-kweet bakaady ni dimany divul. Teng mudyeby bileej ha cifwaatul, biin-kweet baan balum ni baan bakaj baloolong bwa kumanyik midimw yidy mwa kwiibambulwiish mu mudimw a kulam Nzubw ya Bihwiil ni Nzubw ya Bukaleng. Mu mishind eey ni yikwaabw, Yehow Mawej, “Mukaleng a mivw ni mivw,” ni Yeez Krist, “Mukaleng a bakaleng,” bakukumbaj midimw yilengel yitam yikeekeemesh eey ku dyambulwiish dya bakal ba mudimw bakumban bakaakal mudimw bilengel. (1 Tim. 1:17; 6:15; bal Tusumw 22:29.) Tudy bakat kulong mwiitut moos bwa kukal mudimw ni biheel biitut bwa kutumbish naaby Yehow, ni kabiy bwiitut kwiitumbish.​—Jah 8:54.

8. I biny biwudy mwa kulong bwa kwiifundil kiihacil kawukaakaam kwiikal naak?

⁸ Ifundil kiihacil ka kwiikal ni ciikadil kahand. I kiihacil kaay kawudy mwa kwiikal naak? Ihanguj bakul ba mu cisumbw ciinun eecy misang yikwaabw mulombol a cijeng bwa ciihacil cidyobw balang ciwudy mwa kwiikal naacy. Cileejel, bab bakuleej ciwudy mwa kulong bwa kulengej mushind iibuh a kwiisamb ni wa kulongweesh, ibalomb bwa bakwambulwiish bwiibuh kumanyik ciikadil cya kulong naacy mwiisamb ciwudy mwa kwiidibidij naacy. Kuunyim, iikashishomw bwa kulengej ciikadil aacy. I mushind kaay uwudy mwa kulong nook?

9. I mushind kaay uwudy mwa kukumbaj kiihacil kiibuh ka kulengej ciheel kahand ciwudy mulong?

⁹ Long bwa kukumbaj kiihacil kiibuh. Lang ket neey: ukaakaam kushaal mulongweesh mulengel. Udy mwa kulong broshir: Difila ku dibala ne ku dilongesha. Hadyobw Bakwaakish mudimw a kulong mu cisangil cya mukacy mwa luming, udy mwa kulomb mwiin-kweet mushimat bwa kukukuney mat ku mushind uwudy mulongolol mudimw iibuh ni kumulombok mibel bwa mushind uwudy mwa kumulengej. Longolol midimw yiibuh kuuhal kwa diib bwa baat biiy batal muwudy mukal a mudimw ni muut a kuteekel micim.​—Tus. 21:5; 2 Kor. 8:22.

10. Twaal cileejel cya mushind a kuy kuuhal mu myand ya mu spirit.

¹⁰ Iikaleby neey: ciheel ciwukakaam kwiikal naacy i ciit cidy cikukasakeen, i biny biwudy mwa kulong? Kukooyeloh bend mu mabok! Mwiin-kweet mwaan-mulum Garry waakady ul diivit bwa kubal bilengel. Uvuuvuluk mwaakadyey mwiiyumvw kay ni buseeb haakadyey mutwaadij kubal mu bisangil bya cisumbw. Ki utungunukil ni kwiikashishomw bwa kulengej mushind indiy a kubal. Uleeleeb kaabaak neey: bwa diimany didyey muhet, i mukumban bwa kulong miisamb mu Nzubw a Bukaleng, ku bihwiil bya cijeng, ni mubihwiil bya rejon!

11. Teng bu Timoteh, i biny biikal mwa kwiitwambulwiish bwa kulong bivul mu mudimw a Yehow?

 ¹¹ Timoteh ushaadilok mulong a mwiisamb ni mulongweesh mulengel eeny? Bibl kiin muleeboh bend. Ki kakuy kulandul Timoteh ukadil mudimw bilengel ni majit maheteley haakadyey mukooyel mubel a Pool. (2 Tim. 3:10) Bya mushind aakaabumw, tut balong bwa kwiikal ni biheel kahand, twiiyiiy kwiikal bakumban bwa kulong bivul mu mudimw a Yehow.

12. I musangal kaay uwudy muhet hakwambulwiish bakwaabw?

¹² Tut boos tuheehet musangal hatukaakadil bakwaabw mudimw. Tut biikal mu lupitaady, tumvumvw bilengel hatutaatal bakul ba mu Komiteh Utaatalangan ni Bamingang biiy kwiitukumbul eecy hatutaatal Tusumbw twa baat Bakuukumbul Babeebeel. Hatutwiitwiilangan ni makab mu shikacil iitut, tudy ni musangal hady mukul udy ni lukat wangat diib divul bwa kwiitukuney mat ni kwiitukashish. Hatukaakaam dyambulwiish bwa kulombol dilong dya Bibl, tudy ni musangal hady seb’aa njil udy ni dimany divul wiitab bwa kwiitutwaalok mu dilong eedy ni utwaalok ngeny yindiy. Biin-kweet baan-balum ni baan-bakaj boos bady ni musangal a kwiitwambulwiish. Tudy mwa kuhet musangal tut tuleej mutudy ni diib bwa kwambulwiish biin-kweet. “Waakaakishangan biit udy ni musangal muvul muhitok waakaakishobw!” Ki muleebel Yeez. (Yil. 20:35) Uw mukat kuvudij mudimw iibuh a bukajaady mu mishind eey eecy mu mishind yaakaabumw eey, i biny biikal mwa kukwambulwiish bwa kukumbaj biihacil biibuh?

13. Bikaam tulam biny mu meej, hatwiifuufundil kiihacil?

¹³ Waamanyik bwa kaay wiifundil kiihacil kakiish kasunguluk. Cileejel, udy mwa kulang neey: ‘nakaakaam kulong bivul mu cisumbw.’ Ki bidy mwa kumweek bikasakan bwiibuh kukumbaj kiihacil aak, ni bidy mwa kukukasakeen bwiibuh kumanyik diib diwudy mwa kwiikakumbaj. Nook, kaam kiihacil kasunguluk ni kaheehel bwiibuh. Udy mwa kufund cikwaabw kiihacil kiibuh cyaab kahand ni muwudy mwa kulong bwa kwiikakumbaj.

14. Bwabiny tukaakaam kwiikal habwiih bwa kukal mudimw hatwiifuufundil biihacil?

¹⁴ Tukaakaam cikwaabw bwa kwiikal habwiih bwa kukal mudimw hatwiifuufundil biihacil. Bwabiny tuleeleeb nook? Bwaal katwiinoh bend mwa kumanyik myand yoos yidy mwa kwiitufikil mu shikacil iitut. Twangat cileejel: Mupostol Pool  wambulwiishil bwa kulong cisumbw cihyaacihy mu Tesalonik. Ni waakady biin-biin ni kiihacil ka kushaal kwiin aak bwa kwambulwiish biin Krist bahyaabahy. Ki balwiish biiyil kulongesh Pool ku makand bwa kwaalukey cyaab aacy. (Yil. 17:1-5, 10) Bu Pool yiy mwiikal mushaalomw, waakady mwa kukaamin baan-baabw buuhund. Ki Pool kakooyeloh bend mu mabok bwa kwiibambulwiish. Hamut a kulong naak, waakady mwiibidilangan ni shikacil woos waakadyey utwiilangan nend. Hahicil mafuk, utumin Timoteh bwa kwambulwiish biin Krist bahyaabahy baakady bashikacil mu Tesalonik ni byaakadyobw bakaam. (1 Tes. 3:1-3) I musangal kaay waakady biin Tesalonik mwa kwiikal nend hatadilobw mwaakady Timoteh mwiitwaal bwa kakadil mudimw ha cyaab cyoos cyaakadyobw bakaam dyambulwiish!

15. I mushind kaay udy biihacil biitut bishiituluk hady shikacil iitut ushiituluk? Twaal cileejel.

¹⁵ Tudy mwa kulongel ku myand yaakady Pool mulong haakadyey mu Tesalonik. Tudy mwa kwiifundil kiihacil, ki shikacil iitut udy mwa kushiituluk ni wiitukaakeesh bwiitut kukumbaj kiihacil aak. (Mul. 9:11) Bwaal oobw bub bwiikal bwa biin-biin mu shikacil iibuh, katok bwa kukaam kiihacil kakwaabw kawudy mwa kukumbaj. Ki mulongel biin maluw aab: Ted ni Hiedi. Bwa mabenj, baakady mwa kwaaluk ku Betel. Ki lukat lwaabab bwa Yehow lwaakady lwiibasak bwa kukaam mishind yikwaabw ya kulongobw bivul mu mudimw aabab a bukajaady. Cya kuuhal, bangacil mudimw a buuseb’aa njil bwa ku diib ni ku diib. Hahicil mafuk, biiyil kushaal baaseb’aa njil ba habwaah, ni balongweeshel Ted bwa kwiikaley mwambulwiish a mulombol a cijeng ciisang cidyey kayok. Haanyim shikacil a balombol ba bijeng ushiitulukil hakumbajilobw mivw kaahand. Ted ni Hiedi batadil neey: kabacyaakadyoh bend bakumban bwa kukadil Yehow mudimw mu mishind eey bwa mivw yikavobw naay. Ning naak, kaabakadyoh bend bakooyel mu mabok, bamanyikil neey: baakady mwa kukadil Yehow mudimw mu mishind yikwaabw. Ted uleeleeb neey: “Tulongel neey: tudy mwa kukadil Yehow mudimw mu mishind yikwaabw.”

16. I dilongweesh kaay ditudy mwa kulongel ku mukand a Kalatih 6:4?

¹⁶ Katwiin mwa kumanyik myand yoos yidy mwa kwiitufikil mu shikacil iitut. Nook, i bya buseeb bwiitut kulek kulang neey: katuciin cikwaabw ni buseeb ku mees kwa Yehow bwa midimw yitudy naay, katwiin mwa kwiifwanyikij ni bakwaabw bwa midimw yidyobw naay yitudy tut katuy naay. Hiedi umvumvwiij neey, “Kwa kwiikaloh bend ni diitalal uw ufwanyikij shikacil iibuh ni myand yihihitakan mu shikacil a bakwaabw.” (Bal Kalatih 6:4.) I bya buseeb bwa kukal mudimw ni mishind yikwaabw bwa kukadil naay Yehow mudimw ni bwa kwambulwiish bakwaabw. *

17. I biny biwudy mwa kulong bwiibuh kwiikal mukumban bwa kwiikal ni dyaakatook dya kuhet midimw kahand mu bulongolody bwa Mawej?

¹⁷ Long bwiibuh kwiikal habwiih bwa  kukal midimw yikwaabw mu bulongolody bwa Mawej hakwiikal ni diis diheehel ni kulek kwiikal ni ciibidil cya kwangat mabanz. I fundilok biihacil biheehel menmen biikal mwa kukwambulwiish bwa kukumbaj biihacil bitam menmen biwiikal naaby. Cileejel, iikaleby neey: kiihacil kiibuh i ka kushaal seb’aa njil wa ku diib ni ku diib, utuutungunukok ni kukal mudimw buuseb’aa njil mukwanjok leeloow eeny? Iikaleby neey: kiihacil kiibuh i kakushaal mukwanjok a mudimw, uhiihitijok diib divul mu mudimw a bukajaady ni ukumbulok biin-kweet babeebeel ni baat bakuluuh mu cisumbw eeny? Diimany diwudy muhet mu midimw yiwuloolong kaabaak didy mwa kukukangwiil njil ku midimw yikwaabw yilengel mu mafuk maciiyiiy. Iikal mwiiswiik bwa kukal mudimw kaay woos udyobw bakwaakish bwa kulong.​—Rom. 12:11.

18. Teng mudyeby bileej ha cifwaatul, i biny biwudy mwa kulongel ku cileejel cya Beverley?

¹⁸ Katwiinoh bend bakuluuh menmen bwa kwiifundil bihacil bya mu spirit ni kwiibikumbaj. Twanj twiisambay bwa cileejel cya mwiin-kweet mwaan-mukaj Beverley ukaady muut mukuluuh wa mivw 75. Waakady ni lubeel lukasakan ni lulongel bwa ahet lutat lwa kwendakan. Ki waakady mukat kulong mudimw muvul bwa kubiikan baat bwa kwiiyobw kutweel mu Civulukil. Nook, waakady mwiifundil bihacil bisunguluk. Hakumbajil Beverley biihacil bindiy bya kubiikan baat bwa kwiiyobw kutweel mu Civulukil, umvwiil musangal i mwiin weeh. Kwiikashishomw kwindiy kwaakady kusak bakwaabw bwa kwiitwaalobw bikasakan mu mudimw a bu kajaady. Yehow wangangat ni buseeb mudimw ukaakal biin-kweet baan-balum ni baan-bakaj bakaady bakuluuh menmen, ning mudyobw kabay ni mushind a kumulong bu kuuhal.​—Mis. 71:17, 18.

19. I bihacil kaay bikwaabw bya mu spirit bitudy mwa kwiifundil?

¹⁹ I fundil biihacil biwudy mwa kukumbaj. Long bwiibuh kwiikal ni bikadil bidy mwa kusangeej Yehow. Long bwa kukal mudimw ni biheel bidy mwa kukwambulwiish bwiibuh kwiikal ni buseeb buvul kudy Mawej iitut ni bulongolody bwindiy. Kaam mishind ya kwambulwiish menmen biin-kween baan-balum ni baan-bakaj. * Teng bu Timoteh, Yehow wiiyiiy kukufiil kis “bwa baat boos batal muwuyaay ni myand yiibuh kuuhal.”​—1 Tim. 4:15.