Mucih i “kulay Mawej ni mucim aakaabumw bwa kulong bwaal kahand eecy kumulay bwa kukumbaj bwaal kaahand.” Udy mwa kwiikal May maleeb eecy may mafund.

Bakwaabw bady mwa kulang neey: i bibiih bwa kwiicih bwaal Yeez uleebel neey: ‘Kanwiicih bend . . . Leebaay bituh ney: ‘Ing’, biikaleby bikaam kwiitab; ecy, ‘Waakweeh’, biikaleby bikaam kulek. Bwaal may makwaabw mambikiloh maalaalukil kudy Mubiih.’ (Mat. 5:33-37) Biin-biin, Yeez waakady mumanyik neey: May ma Mawej makishiley Moyiz maakady malomb biin Izaleel bwa kulong micih mu shikacil kahand ni biin mudimw ba Mawej balulamat bakwaabw balongel byaabw micih. (Kbwa. 14:22, 23; Cim. 22:10, 11) Waakady mu manyik cikwaabw neey: Yehow byend ulongel micih. (Ebr. 6:13-17) Nook, Yeez kumvwiijiloh bend neey: katwiinoh bend mwa kulong mucih. Cikwaabw, ki ubelel baat bwa kulek kwiicih habitaatal myand yidy kayiy ni buseeb eecy mu mushind udy kay mwa kwambulwiish bwa kihacil kakumban. Bikaam tulong teng bwaal boos butulaalay bwa kulong, bwaal ki cidy Yehow mukat bwa tulong.

Nook, bikaam ulong biny iikaleby neey: i bakulomb bwiibuh kwiicih? Bwaal bwa kuuhal buwudy mwa kulong, iikal mutwiishibw neey: udy ni cya kukumbaj mulay iibuh. Uw kuy mutwiishibw, bidy ni buseeb bwa kulek kwiicih. Diiy dya Mawej dileeleeb neey: “I bilengel kulek kulay hamut a kulay kuk kulek kukumbaj.” (Mul. 5:5, NWT) Bwaal bukwaabw, kontonon May matam ma mu Bibl maleeleeb bwa mucih, ni long myand bilondeshel mudy mucim iibuh wa mund mulongweesh. I May kaay matam ma ku may aam?

Micih yikwaabw yihehetangan ni lukat lwa Mawej. Cileejel, Batemw ba Yehow badyaakal balong micih hakaakaamobw kutweelobw mu maluw. May madyobw bambilangan aam i mucih. Kuuhal kwa Mawej ni kwa baat, mulum ni mukaj balaalayangan neey: biyiiy kukatangan ni kunemekangan umw ni mukwaabw ni mukulong nook, “bwa mafuk maabab moos ma buumy.” (Biin maluw bakwaabw bady mwa kwiikal kabay baleeb may majaalal aam hadyobw bamonangan, ki i biicih cikwaabw kuuhal kwa Mawej.) Nook, i bashaal mulum ni mukaj, ni kubakangan kwaababw kumvumvwiij neey: kabakukabulukanganoh bend mu mafuk ma buumy bwaabab ha bulab. (Kbwa. 2:24; 1 Kor. 7:39) Mucih a maluw oow i mukumban, ni umvumvwangan ni lukat lwa Mawej.

Micih yikwabw kayiin yihetangan ni lukat lwa Mawej. Mwiin Krist a biin-biin kiin mwa kulong mucih wa nook, cileejel bwa kuleebeley cibunj kahand eecy bwa kulek kwiitabij Mawej. Kulong nook kakwiin kuhetangan ni may ma Mawej. Biin Krist kabiin “ba ha bulab,” Ki bwabiny katwiin mwa kutweelakan mu myand ya kukokangan ni mavit.​—Jah 15:19; Ye. 2:4; Jak 1:27.

Micih yikwaabw i bwaal butaatal mucim a mund. Misang yikwaabw tudy mwa kukontonon mucih ni meej ku dyambulwiish dya mubel utwaadil Yeez wa neey:  “lambulaay bya Kezaar kudy Kezaar, bya Mawej kudy Mawej.”​—Luuk 20:25.

Cileejel, lang neey: mwiin Krist ukookooyel ku mikenj yitaatal cibunj cyaabab eecy yitaatal mukand udyobw biitabil muut bwa kuyey cyaab kahand ni ulong bwa kumanyik neey: bamuloolomb bwindiy kulong mucih wa kuleej mudyey mulamat ku mikenj. Iikaleby neey: mu cibunj aacy, mucih wa nook umvumvwiij kulay bwa kulong bwaal mu mushind udy kay umvwangan ni mikenj ya Mawej, mucim a mund mulongweesh kudy Bibl wa mwiin Krist oow, kakumwiitabiloh bend bwa kulongey naak. Nook, mbul-matady udy mwa kumwiitabil bwa kushiitulul maay mindiy ma mucih bwa mumvwangan ni mucim indiy a mund.

Kushiitulul mucih wa kuleej nend lulamat ku mikenj kahand kudy mwa kwiikal kuhetangan ni diiy ditam didy mu mukand a Biin Rom 13:1, dya neey: “Muut woos akooyel kudy bakaleng ba mbul-matady.” Nook, mwiin Krist udy mwa kwangat dihangadik dya neey: kakwiin bwaal bubiih bwa kwiicih bwa kulong bwaal kahand budyey mulomb biin Krist bwa kulong.

Cikwaabw, i bya buseeb bwa kukooyel cidy mucim iibuh a mund ukwambil bwa kulong bab bakulomb bwa kukal mudimw ni ciit eecy bwa kulong bwaal kahand hawendend ni kulong mucih. Biin Rom ba kal ni biin Sekit biicihil ku dyambulwiish dya myeel yaabab ya diiy bu cimanyin cya kukaam bukash bwa mawej a diivit bu ciit cyaakady muut mwa kuteekel micim. Biin Krek baakady bajul cikam mwiiwul diib dyaakadyobw balong mucih. Bamanyikil nook neey: kudy bukash bwa Mawej udy mumanyik cidy baat baleeb ni myand yidyobw balong ni kudy baat bady ni majit ku muut kwa bakwaabw.

Biin-biin, mwiin mudimw a Yehow kiin mwa kwiicih kuuhal kwa cimanyin kaay cyoos cya cibunj cyumvumvwangan ni citendeleel cya makos. Ki uw mwiikal kuuhal kwa baazuj ni bakwambil bwiibuh kwiicih ha kuteek cikam ciibuh ha Bibl bwa kujaadik bwaal bwa biin-biin, i biny biwudy mwa kulong? Ha bwaal oobw, udy mwa kwangat dihangadik dya kulong nook, hakumvw cidy Diiy dya Mawej dileeb bwa cyaakady baat ba lulamat balong haakadyobw biicih. (Kbwa. 24:2, 3, 9; 47:29-31) I bya buseeb bwa kuvuluk neey: uw mulong mucih wa nook, udy mwiicih kuuhal kwa Mawej neey: wiiyiiy kuleeb teng myand ya biin-biin. Bikaam wiilongolol bwa kwaalabul biin-biin ku diijooj dyoos didyobw mwa kukwiihanguj.

Bu mudy bulund bwiitut ni Yehow bwiikal ni buseeb buvul kutudy, bikaam twiikal tusambil ni tulangil bwa mucih woos wiikalobw mwa kwiitwambil bwa kulong, iikal mutwiishibw neey: kakulongeloh bend mucim iitut a mund bibiih eecy kakuhetanaganoh bend ni cileeleeb may matam ma mu Bibl. Uw mwiiswiik bwa kwiicih, bikaam teng umukumbaj.​—1 Py. 2:12.