Mu shikacil wa nook, biin mu cisumbw biiyiiy kutal maluw ma kuuhal bu kamaciinok hady muut wiiy umonangan ni mukwaabw ni biiy batal neey; maluw mahyaamahy aam i ma buseeb. Bwa kumvw tubingil twa may ma bulekel aam, tukontononaay cyaakady Yeez muleeb habitaatal kuzuh maluw ni kutweelulul kwa mu maluw.

Mu mukand a Matewus 19:9, Yeez uleeleej kabingil kashimatil mu Bibl kady mwa kulong bwa maluw mafw. Uleebel neey: “Waakiihat mukaj indiy, biikaley kay mwend masandy, yiy waamonoh mukaj mukwaabw, i mwend masandy.” Ku may ma Yeez aam, tuloolongelok neey: 1) kwend masandy i bwaal bushimat budy Bibl muleej budy mwa kulong bwa maluw mafw ni 2) hady mwaan-mulum uzuh maluw ha kulek mukaj indiy kakuy kabingil kashimatil mu bibl ni umonoh mukaj mukwaabw i mwend masandy. *

May ma Yeez aam mumvumvwiijok neey: mwaan-mulum wendend masandy ni uzuh maluw ha kulek mukaj indiy, udy ni bwiiyikadil bilondeshel Diiy dya Mawej bwa kutweel cikwaabw mu maluw ni mukaj mukwaabw eeny? Kabiishoh bend naak. Hady mwaan-mulum wend masandy, mukaj indiy udy kay ni bwaal udy mwa kwangat nook dihangadik dya kufwiil mbaayend lus eecy kulek. Yiy mumulek diib aady maluw mafwaafw bilondeshel cileeleeb Bibl, boos bwaabw bady ni bwiiyikadil bwa kutweel cikwaabw mu maluw ni muut mukwaabw.

Mu mushind mukwaabw, mwiin maluw udy kay ni bwaal udy mwa kukat ni mucim aakaabumw bwa kushaaley teng mu maluw ni mbaayend hakumwambil neey: i mukat bwa kumufwiil lus. Ki i biny bidy mwa kulongek, iikaleby neey: mwaan-mulum udy mwend masandy uleelek kwiitab dihangadik didy mukaj indiy mwangat bwa kumufwiil lus. Ki i biny bidy mwa kulongek, hady mwaan mulum udy mwend masandy ulek kwiitab dihandik dya mukaj indiy dya kumufwiil lus ni ukaam bwa maluw mafw? Bu mudy mukaj mukat kumufwiil lus bwa batungunuk ni kwiikal mu maluw, mbaayend kiinoh bend ni bwiiyikadil bilondeshel Diiy dya Mawej dya kutweel cikwaabw mu maluw ni mukaj mukwabw. Iikaleby neey: mwaan mulum oow utuutungunuk ni myand yidy kayiy yihetangan ni cileeleeb Bibl ni ubak mwaan mukaj mukwaabw hadyey kay ni bwiiyikadil bwa kulong nook bilondeshel Diiy dya Mawej, i mwend cikwaabw masandy, bwaal oobw bwiiyiy kulong bwa bamulumbulwiish kudy bakul mu cisumbw.​—1 Kor. 5:1, 2; 6:9, 10.

Hady muut udy kay ni bwiiyikadil bilondeshel cileeleeb Bibl utweel cikwaabw mu maluw ni muut mukwaabw, i mushind kaay udy cisumbw cital maluw aam ni ma kuuhal? Bilondeshel Bibl, maluw ma kuuhal macidyok ni buseeb eeny? Mwiin maluw mwaan mukaj udy kay ni bwaal udy mwa kwangatok dihandik dya kufwiil mbaayend lus eecy kumulek eeny? Maluw mahyaamahy aam miiyiiy kwiikal ma masandy ku mees kwa cisumbw eeny?

Ha kal, cisumbw cyaakady cital maluw mahyaamahy bu ma masandy hady mwiin maluw waakady kay ni bwaal muciikalok ni buumy, ni hadyey ushaal naak kayutweel mu diibak dikwaabw, cisumbw kacyaakadyoh bend mwa kumulumbulwiish neey: i mwend masand. Nook, Yeez kaleebeloh bend bwa mwiin maluw udy kay ni bwaal haleebel ha cilumbw cya kuzuh kwa maluw ni kutweelulul kwa mu maluw. Ki, umvwiijil bwa muut waakady uzuh maluw kakuy kabingil kashimatil mu Diiy dya Mawej ni utweelulul mu maluw makwaabw, i mwend masandy. Diib aady, kuzuh maluw ni kutweelulul mu makwaabw, kuleebel Yeez i bwaal bwa biin-biin bu mudyey mwend masandy, ni biiyiiy kulong bwa maluw ma kuuhal mafw.

 Hady mwaan mulum ulek mukaj indiy ni ubak mukaj mukwaabw, kabiin bikumban bwa mukaj indiy a kuuhal, udy kay ni bwaal oow, amufwiil lus eecy amulek. Nook, mukaj kiin mwa kwangat dihangadik dikasakan bwa kufwiil mbaayend wa kuuhal lus eecy kumulek. Cikwaabw, ning iikaleby neey: mwiin maluw nend i mufw, udy mwa kwiikal muman kutweel cikwaabw mu maluw ni mukaj mukwaabw, eecy i mwend masandy, kabiin mwa kushiitulul mushind udy cisumbw cital maluw mahyaamahy aam. *

Mu cileejel citubaman kukontonon mu bikos bishaal, tudy batal neey: hady mwaan-mulum wend masandy, bidy mwa kulong bwa maluw mafw. I biny bidy mwa kulongek iikaleby neey: mwaan-mulum kaakadyobw bend mwend masandy ki i muzuh maluw ni mumon mukaj mukwaabw? Eecy i biny bidy mwa kulongek iikaleby neey: mwaan mulum kaakadyoh bend mwend masandy kuuhal kwa kuzuhey maluw ki ulongelok nook kuunyim kwa kuzuh maluw ni kumoney mukaj mukwaabw ning mwaakady mukaj indiy mukat kumufwiil lus eeny? Mu bileejel byoos eeby, kuzuh maluw ni kutweel cikwaabw mu maluw ni muut mukwaabw, i masandy, kulong nook i kuk kwiiyiiy kuzuh maluw ma kuuhal. Ni kuswiikaakaan kwa maluw mahyaamahy kwiiyiiy kwiikal kwa biin-biin bilondeshel mikenj ya maluw. Cibumb cya Muteetekel cya 15/11/1979 diibij 32 cya mu angleh, cileeleeb neey: “Kaabaak i mutweelulul mu maluw ni muut mukwaabw ni cikwaabw kiin mwa kwiimazuh bituh ni kuhingomwey kudy mukaj indiy wa kuuhal; maluw ma kuuhal mafwiil, bwa masandy ni haakadyey mutweel cikwaabw mu maluw ni mukaj mukwaabw.”

Kumvw kwiitut kuhyaakuhy ook, kakwiin kumvwiij bwa biin Krist balang neey: maluw kamiishoh bend majilang eecy kutal neey: kwend masandy kakwiishoh bend bu mpekaat mutam. Muut uleeleek mukaj indiy kakuy kabingil kashimatil mu Bibl ni kuunyim uyaay kabak mwaan mukaj mukwaabw kay ni bwiiyikadil bwa kulong nook bilondeshel cileeleeb Bibl, bakul biiyiiy kumulumbulwiish bwa mudyey mwend masandy. (Iikaleby neey: mwaan mukaj udyey mumon i mwiin Krist, biiy kumulumbulwiish byend kudy bakul bwa cilumbw cya masandy.) Ning iikal maluw mahyaamahy aam bimatal miikal bu kamay ma masandy, mwaan-mulum oow kakwiikaloh bend mukumban bwa kuhet majit mu cisumbw mukacy mwa mivw yivul eecy hacidy baat bakwaabw batungunuk ni kumvw bibiih bwa bwaal bubiih bulongeley ha kal eecy hacidy bakwaabw batungunuk ni kuvuluk bubiih bulongeley ni batal neey: kiin mufwanyinoh bend kaneemw. Kuuhal kwa bakul kumwaakish mudimw kaay woos mu cisumbw, bakul biiyiiy kulangil habitaatal shikacil udy nend kaabaak mwiin maluw nend wa kuuhal waakadyey mulongel bibiih ni baan bindiy bamweemweek bu baan ba shiy kudy mwiin maluw udy mulong bibiih bacyaakady batofw menmen.​—Mal. 2:14-16.

Bwa kutal bihet bibiih byaalaalukil kukuzuh maluw ni kukutweel cikwaabw mu maluw ni muut mukwaabw, bikaam biin Krist biikal ni meej ni bidikij Yehow hakwangat maluw bu bwaal bujilang ku mees kwindiy.​—Mul. 5:4, 5; Ebr. 13:4.