Yehow i mukat bwa baat batweetweel mu maluw biikal ni dyakatook ni musangal buyiil ni biikal mu kaacyumw. (Mat. 19:4-6) Uw mukat kutweel mu maluw, i mushind kaay uwudy mwa kuhet mwiin maluw mulengel? Bu mudy Yehow mwiikal Cyakahang iitut, i mumanyik cidy mwa kwiitwaakish musangal hatuseeseeselangan ni hatwiikal mwa kutweel mu maluw. Ki bwabiny, uw mukooyel ku may matam ma mu Bibl madyey mwiitwaakish, wiiyiiy kwiikal ni musangal. Tukontononaay mamw ma ku may matam aam.

Cya kuuhal, bikaam twanj tumanyik bwaal oobw: “Kakwiish ciit cidiidinganganomw bu mucim a mund mwa muut. Kabiish mwa kumubuk, kabiish mwa kumumvw.” (Jer. 17:9) Hady baat babidy bakaam wa kutweel nend batwaadij kuseeselangan, kwaalakan kukasakan kudy mwa kwiibasak lwang-lwang ni kudy mwa kulong bwa bakaakal kwangat dihangadik dya meej. Hady baat bangat dihangadik dya kumonangan bwa kwaalakan kwaababw, bady mwa kuhet bihet bibiih. (Tus. 28:26) Ki bwabiny, kabiin bya meej bwa baat babidy kwambilangan mudyobw bakatangan menmen, hacidyobw batang kuseeselangan eecy kwambilangan myand yiikalobw mwa kulongelangan kuuhal kwa kumanyikangan biikadil.

Mukand a Tusumw 22:3 uleeleeb nook: “Muut mudimuk utaatal mwiiyiiy mal umb usokot, ki babul meej bahiihit bituh naak bumb bamon makab ni mal.” I buhund kaay budyok hakukaam muut wa kutweel nend mu maluw ku Enternet? Bya kaakunying, bamw baat i bibasak kudy bakwaabw bwa kukaamobw udyobw mwa kutweel nend mu maluw ku Enternet, ni kutwaadijobw kuseeselangan. Haanyim a byoos batadil neey: baat baakadyobw baseesel biiyiil kwiibumb mwanz ku makas. Cikwaabw, baat aab kabiish baleeb myand ya biin-biin, i balong koont ya fwalang ya makos ku Enternet bwa kudingomw boos biitaatab bituh byoos bidyobw biibambil. Haanyim a mafuk, biiyil kutal neey: baat aab baakady bileej neey: i Batemw ba Yehow.

Tal buhund bukwaabw. Yimw sit ya ku Enternet yikaakal mudimw ni myand ya siyans bwa kumanyik myand ni kuyikumbaj, ni bakaakal naay mudimw bwa kumanyik baat badyobw mwa kuseesel. Ki kakwiin cijaadik cileeleej neey: mishind eey yendend menmen. Bidy mwa kwiikalok bya meej bwa kuteek micim mu mayel kahand malong kudy muut ni kihacil ka kuhet musangal mu bwaal kahand bu mushind mulengel wa kuhet mwiin maluw neeb eeny? Tudyok mwa kutang kufwanyikij myand ya siyans ni may matam ma mu Bibl eeny?​—Tus. 1:7; 3:5-7.

 Diiy ditam ditusasangan mu mukand a Tusumw 14:15 dileeleeb neey: “Muut wiitaatabakan bituh, wiitaatab biit byoos bimwaamwambilobw. Ki muut mudimuk kiish mwa kwend diikas kay mulangoh meej.” Kuuhal kwiibuh kutal neey: muut kahand i mukukumbanyin bwa kwiikal mwiin maluw neeb, bikaam wanj umumanyik bilengel. Kudy mwa kumweek lutat bwa kukumbaj bwaal oobw. Ning nun nutuminangan fotoh, nuleejangan myand ni nufundilangan mesaaj bikasakan ku Enternet, udy mwa kuleeb biin-biin neey: udy mumanyik muut aaw eeny? Baat bakwaabw baakady baseeselangan, baakady balang neey: baakady bahet wa kutweel nend mu maluw mulengel ku Enternet, ki haakadyobw biiy katalangan taz ni taz ni kumanyikobw cidy muut aaw, biiyil kumvw bibiih.

Mumb a misambw uleeleeb neey: “Ciishoh bend nashikat aakaabumw ni biin makos, ciishoh bend nendakan ni baat basoosokok cidyobw.” (Mis. 26:4, NWT) Bavul bataatal neey: i bilengel bwa kudinganganomw ha profil ya myand yaababw ya kuseeselangan ku Enternet. Bwa kuleejobw mudyobw bakat bakwaabw menmen, bady mwa kusokok biin-biin biikadil byaababw eecy balek kuleej myand yaababw ya biin-biin ku Enternet. Bakwaabw biileeleej mudyobw Batemw ba Yehow, ki tudy mwa kuleeb neey: i biin Krist ba biin-biin batambul eeny? I baat bashimat mu myand ya mu spirit eeny? Bulund bwaabab ni Yehow, i bukasakan eeny? I baat badyobw baneemek mu cisumbw cyaababw eeny? Eecy bady mwa kwiikal bileejel bibiih eecy baat ba mu “cikong cibiih” eeny? (1 Kor. 15:33; 2 Tim. 2:20, 21) Ni, i bakumban bwa kubakangan bilondeshel may matam ma mu Bibl eeny? Nook, ukaakaam kuhet maalabul ku majooj aam; ki bidy mwa kwiikal bikasakan bwa kujingunun cidy muut aaw, uw kuy mujooj Batemw bakwaabw bady bamumanyik. (Tus. 15:22) Biin-biin, mwiin mudimw a Yehow kiin mwa ‘kumon’ muut ukiish mwiin kwiitabij nend.​—2 Kor. 6:14; 1 Kor. 7:39.

Bu mudyok buhund bwa kuseeselangan ku Enternet, kudy mishind yilengel yidy mwa kwiitwambulwiish bwa kuhet utudy mwa kutweel nend mu maluw ni kudy nend bulund budy mwa kwiitufikij teng ni ku maluw malengel. I kweeh kuwudy mwa kuhetel uwudy mwa kutweel nend mu maluw mukumban? Haakadyobw kabay banj kwiimanyik bisangil bya hatook, Batemw ba Yehow baakady mwa kumanyikangan mu bisangil bya cisumbw, mu hwiil, mu cihwiil, ni mu ciisang cituhihitij diib ni balund neet.

Bu mudy kukongakeen kwa hatook kakuciyok, bu mu ciisang cya cihuh cya KOVID-19, tukaakal mudimw ni byaamw bwa kulong bisangil biitut bya cisumbw, mutudy mwa kuhet mushind a kumanyikangan ni Batemw bakwaabw. Umamanyik mushind udyobw balong miisamb eecy mazab mu bisangil ni mudyobw baleej diitabij dyaababw hadyobw baalabul. (1 Tim. 6:11, 12) Udy mwa kwiisamb ni biin Krist neeb haanyim ha bisangil binuloolong mu tusumbw. Kudyambulwiish dya bisangil bya tusumbw bidy Batemw balongel ku byaamw, udy mwa kutal mudy muut uwudy mukat wiisamb ni baat bakwaabw, mu mushind oow, wiiyiiy kumanyik cidyey bilengel. (1 Py. 3:4) Hady mafuk mahit, bu munwendend ni kumanyikangan bilengel, nudy mwa kumanyik ning nudy ni bihacil byaakaabumw, ni kutal ning myand ya buseeb yinukaakaam ni meej i byaakaabumw.

Hady bajik bakaam wa kutweel nend mu maluw mukumban mu mushind uhehetangan ni may matam ma mu Bibl, bady mwa kuhet musangal mu maluw bilondeshel cileeleeb mukand a tusumw: “Muut uhehet mukaj mulengel [eecy mulum] i muhet ciit cilengel ni uhehet bukish bwa Yehow.”​—Tus. 18:22, NWT.