1. I myand kaay yidy Yehow mukulongel?

I MUSHIND kaay uwushaadil Temw a Yehow? Cya kuuhal, umvwiil “musah mulengel” misang yikwaabw kudy Balel biibuh​—kudy mwiin mudimw neeb eecy kudy mulony iinun wa mu kalaas, eecy ku dyambulwiish dya mudimw udy Batemw ba Yehow bakal wa kudiil baat musah ku cibel ni ku cibel (Mark 13:10) Cikwaabw, muut waakady muhitij diib divul, ni waalong mwindiy moos bwa kwiiy kulong neeb Bibl. Mu kulong kwiibuh, waakady mwiiy kukat Yehow, uw kumanyik neey: i mukukat. Yehow waakady mukukok kudyey ku dyambulwiish dya myand ya biin-biin, ni kaabaak, bu muwukaady muyij a Yeez Krist, udy ni mushind a kushaal ni buumy buyiil. (Jah 6:44) Biin-biin, udy mwanyish cidy Yehow mukulongel bwa mudyey musak muut bwa ku kulongweeshey myand ya biin-biin ni mudyey mukwiitabil bwa kwiikal umw wa ku biin mudimw bindiy.

2. I biny bitwiiyiiy kwiisambil mu ciin bwaal eecy?

² Bu mutudy bamanyik myand ya biin-biin, tudy ni dyakatook bwa kwambulwiish baat bakwaabw bwa kutweelobw mu njil ufiifikij ku buumy. Tudy mwa kwiikal ni musangal hatudiidiil baat musah ku cibel ni ku cibel, ki tudy mwa kuhet makab mu mudimw oow ni hatuloolombol malong ma Bibl. Ki mushind uwiiyumvumvw eeny? Biby naak, udy mwa kuhet misang yikwaabw myand yidy mwa kukwambulwiish mu ciin bwaal eecy. Twiiyiiy kwiisambil ha myand yidy mwa kwiitusak bwa kwambulwiish baat bwa bashaal biiyij. Twiiyiiy kutal cikwaabw mushind utudy mwa kuhit bilengel ni makab mady mwa kulong bwa twiikal ni dyeelakan bwa kulombol malong ma Bibl. Cya kuuhal, tutalaay bwabiny katwiin teng badiil ba baat musah, ki tudy cikwaabw balongweesh ba musah mulengel.

3. Bwabiny Tudiidiil baat musah?

³ Haakady Yeez ha bulab, wambiil biiyij bindiy bwa kulong myand yibidy. Bwaal bwa kuuhal, waakady mwiibambil bwa kudiil baat musah mulengel a Bukaleng, ni waakady mwiibaleej ni mushind a kumulong. (Mat. 10:7; Luuk 8:1) Cikwaabw, Yeez waakady mulongolol biiyij bindiy hakwiibambil ciikalobw mwa kulong hikal baat mwa kukun musah a Bukaleng mat eecy kumulek. (Luuk 9:2-5) Waakady mwiibumvwiij cikwaabw neey: biiyiiy kudiil baat bavul musah mu byaab bivul, hakwiibambiley neey: “biiyiiy kumudiil baat ba ha bulab butuutul.” (Mat. 24:14; Yil. 1:8) Ning hikal baat mwa kwiitab eecy kulek musah, biiyij bindiy baakady mwa kutungunuk ni kwambil baat myand yitaatal Bukaleng bwa Mawej ni mwiikalebw mwa kukumbaj myand.

4. Bilondeshel mukand a Matewus 28:18-20, bikaam tulong biny bikwaabw hatwambambil baat musah a Bukaleng?

⁴ I bwaal kaay bwiibiidy bwaakady Yeez mwambil biiyij bindiy bwa kulong? Waakady mwambil biiyij bindiy bwa kulongweesh baat bakumban bwa kulondobw byoos byaakadyey mwiibambil. Ki mudimw a kudiil baat musah ni kwiibalongweesh, baakady mwa kumulong teng kudy biin Krist ba mu siyekel a kuuhal bu mudy bakwaabw balang eeny? Waa kweeh, Yeez waakady muleej neey: mudimw a buseeb oow waakady mwa kutungunuk teng ni leeloow, ni “ku bulekel kwa biit byoos [“bulekel bwa bulongolody bwa myand oobw”, NWT].” (Bal Matewus 28:18-20.) I bimweek neey: Yeez utwaadil mudimw oow haakadyey mumweekel biiyij bindiy bahit 500. (1 Kor. 15:6) Ni mu myand yaakadyey musokolweel Jah, Yeez waakady mu muleej hatook ciikal biiyij bindiy boos mwa kutakamin bwa kwambulwiish baat bakwaabw bwa balong bwa kumanyik Yehow.​—Yis. 22:17.

5. Bilondeshel mukand a 1 Biin Korent 3:6-9, i cileejel kaay cidy mupostol Pool mutwaal habitaatal mudimw a kudiil baat musah ni kulongweesh?

⁵ Mupostol Pool waakady mufwanyikij mudimw a kwaalabul baat bwa bashaal biiyij ni mudimw a cidim, kuleejey neey: tudy ni bivul bya kulong kabiin teng kukun kwa tet. Waakady muvulwiij biin Korent neey: “Mim nakunyin, Apolos naabw wiiy umbok mwanz . . . Nudy budimy budy Mawej mudim.” (Bal 1 Biin Korent 3:6-9.) Bu mutudy mu ‘budimy bwa Mawej,’ katwiin teng tukun tet, ki tumbumbok mwanz ni tutal mudyeby byend bikasakan. (Jah 4:35) Bya mushind aakaabumw, tudy bamanyik neey: i Mawej ukaakashish bitukuukun.

6. Hatuloolongweesh balony, bikaam tulong biny bwa kwiibambulwiish?

⁶ Tukaakaam baat bady “balongolol micim bwa kuhet buumy bwa mwendeleel.” (Yil. 13:48, NWT) Bwa kwambulwiish baat aab bwa bashaal biiyij, bikaam twiibambulwiish (1) bwa kumvw, (2) bwa biitab, ni (3) bwa bakooyel myand yoos yidyobw balong mu Bibl. (Jah 17:3; Kol. 2:6, 7; 1 Tes. 2:13) Baat boos mu cisumbw bady mwa kwambulwiish balony ba Bibl ha kwiibaleej lukat ni kwiibiimun ni musangal hadyobw batweel mu bisangil. (Jah 13:35) Muut uloolombol diilong dya Bibl, udy mwa kuhitij cikwaabw diib divul ni kukal mudimw ni bukash bwindiy bwa kwambulwiish mulony bwa iikal ni “bukash bwa kubutul” myand yaakadyey mwiitab eecy bilel byaakadyey naaby. (2 Kor. 10:4, 5) Bidy mwa kwangat suuny yivul bwa mulony a Bibl kwaalabuley shikacil indiy, bwindiy kwiikaley ni kihacil ka kufik teng ni ku baatiisumw. Ki biloolomb kwiikashishomw.

7. I biny bitusaasak bwa kwiidit mu mudimw a kudiil baat musah ni kwiibaalabul bwa bashaal biiyij?

⁷ Bwabiny tudy mwa kwiitwaal mu mudimw a kudiil baat musah ni kwiibalongweesh hakwiibaalabul bwa bashaal biiyij? Cya kuuhal, bwaal  tudy bakat Yehow. Hawiikaakashishomw bwa kukooyel diiy ditwaadil Yeez dya kudiil baat musah ni kwiibaalabul bwa bashaal biiyij, uleeleej muwudy mukat Mawej. (1 Jah 5:3) Langil ha bwaal oobw: Lukat lwiibuh bwa Yehow lukaady lukusak bwa kudiil baat musah ku nzubw ni ku nzubw. Hawutangil kudiil baat musah, byaakady bihehel eeny? Misang yikwaabw kabiin naak. Hawuyiil kadiil baat musah bwa musang iibuh a kuuhal, waakady mumvwok mooy eeny? Biin-biin, waakady mumvw naak! Ki hawaakady mumanyik neey: wiinoow ki mudimw udy Yeez mukat bwa ulong, ki bwabiny waakady mukooyel ku diiy eedy. Haanyim a mafuk, wiiyiiy kutal mudy mudimw oow muhehel. Ki umvumvw bicy hawuloolombol dilong dya Bibl? Udyaakal umvwok mooy bwa kulombol eeny? Bidy mwa kwiikal naak. Ki uw mulomb Yehow dyambulwiish bwa kulek kwiikal ni mooy ni bwa kukwaakishey mucim mukasakan bwa kulombol dilong dya Bibl, Yehow udy mwa kukwambulwiish bwa kukashish lukat lwiibuh lwa kwaalabul baat bwa bashaal biiyij.

8. Bilondeshel mukand a Mark 6:34, i biny bikwaabw bitusaasak bwa kulongweesh bakwaabw?

⁸ Bwaal bwiibiidy, kukat baat neet kwiitusaasak bwa kwiibalongweesh myand ya biin-biin. Cileejel: Yeez ni biiyij bindiy baakady biitwaal bikasakan mu mudimw a kudiil baat musah. Baakady bakaam cyaab cyaababw kwiiweejelobw, ki baat bavul biiyil kudyobw. Yeez waakady mumvw lus hatadiley baat, ni waakady mutang kwiibalongweesh “myand yivul.” (Bal Mark 6:34.) Waakady ukal mudimw muvul ning haakadyey mukooy. Bwabiny waakady ulong naak? Bwaal waakady wiiteek ha cyaab cya baat. Waakady mutal mwaakadyobw bakeng bikasakan​—biikal ni diitakamin​—ni waakady mukat bwa kwiibambulwiish. Leeloow baat bakeekeng byaabw ni bakaakaam dyambulwiish. Ning mudyobw baleej musangal ku mees, ki bakeekeng mu shikacil aababw. Bady bu mikook yilekelel kayiy ni wa kwiiyilombol. Mupostol Pool waakady muleeb bwa baat aab neey: kabiin bamanyik Mawej ni kabiin ni diitakamin. (Ef. 2:12) Bady mu ‘njil ufiifikij ku lufw!’ (Mat. 7:13) Hatutaatal mudy baat ba mu teritwaar iitut batat bwa kumanyik Mawej, lukat ni lus bitusaasak bwa kwiibambulwiish. Mushind mulengel wa kwiibambulwiish, i kulong naab Bibl.

9. Bilondeshel mukand a Biin Filipw 2:13, i mushind kaay udy Yehow mwa kukwambulwiish?

⁹ Misang yikwaabw uciiciin bwa kulombol dilong dya Bibl, bwaal ulaalang neey: biiyiiy kukwangat diib divul bwa kwiilongolol. Biby biikal naak, ambil Yehow muwiiyumvumvw. Lomb Yehow bwa hakwambulwiish bwa uhet muut uwudy mwa kulong nend Bibl. (Bal Biin Filipw 2:13.) Mupostol Jah wiitujaajadikil neey: Mawej waalaalabul masambil mumvumvwangan ni lukat Lwindiy. (1 Jah 5:14, 15) Nook, manyik neey: Yehow wiiyiiy ukwambulwiish bwa wiikal ni lukat bwa kulongweesh baat bwa bashaal biiyij.

10-11. I biny bidy mwa kulong bwa twiikal ni kweelakan bwa kulombol dilong dya Bibl?

¹⁰ Tudy bakat mudimw iitut a kulongweesh ni wa kwaalabul baat bwa bashaal biiyij, ning mudyok makab mavul. Tutalaayaak mamw ma ku makab aam ni mushind utudy mwa kwiimataatameen.

¹¹ Tudy ni mikal. Cileejel, bamw bakajaady bakaady bakuluuh menmen eecy kabiin ni makand ma nyeet. Ki mudy shikacil iibuh eeny? Biby naak, tal bwaal bumw butudy bahet ku malongweesh ma cihuh cya KOVID-19. Tudy basangan neey: tudy mwa kulombol bilengel malong ma Bibl kudyambulwiish dya telefon eecy byaamw bikwaabw! Nook, udy mwa kutwaadij kulombol dilong dya Bibl ni kukashish muut uw mushikacil kwiibuh. Ni tudy basangan neey: kudy bwaal bukwaabw bulengel hakulong nook. Bakwaabw i bakat kulong Bibl, ki kabiin ni diib hadyaakal baan-beet bay bwa kwiibatal  bwa kwiibadiil musah. Ki bady mwa kuhet diib kuhacy ni bweh eecy bufuk. Udy mwa kwiikalok ni diib dya kulong Bibl ni muut mu meeb aam eeny? Yeez waakady ulongweesh Nikodem bufuk, ki diib dyaakady Nikodem mukat​—Jah 3:1, 2.

12. I myand kaay yidy mwa kwiitwambulwiish bwa kwiikal balongweesh balengel?

¹² Tudy mwa kulang neey: katwiin mwa kulombol dilong dya Bibl. Misang yikwaabw tudy mwa kulang neey: bikaam twiikal ni dimany divul eecy twiikal balongweesh balengel kuuhal kwa kulong Bibl ni muut. Biby biikal naak bwiibuh, tal myand yisat yidy mwa kukwambulwiish. Bwaal bwa kuuhal, Yehow i mutal neey: udy mukumban bwa kulongweesh bakwaabw. (2 Kor. 3:5) Bwaal bwiibiidy, Yeez udy ni ‘bukookesh mwiiwul ni ha bulab’ i mukutumin diiy bwa kulongweesh. (Mat. 28:18) Bwaal bwiisaat, teekel bakwaabw micim bwa bakwambulwiish. Yeez waakady uleeb teng myand yaakady Taat indiy mu mulongweesh, ni uw byeeb udy mwa kulong nook. (Jah 8:28; 12:49) Cikwaabw, udy mwa kwiisamb ni mulombol a kasumbw kiinun ka mudimw a kudiil baat musah, seb’aa njil mukumban, eecy kajaady mushimat bwa kukwambulwiishobw bwa mushind a kutang kulombol diilong dya Bibl. Mushind a kwiikal mulongweesh mulengel i kulombol dilong dya Bibl ni umw wa ku bakajaady batubateel aab.

13. Bwabiny bikaam twiibidilangan ni mishind yishil-shilangan ya kulongweesh naay?

¹³ Tudy mwa kwiikal bahet lutat bwa kwiibidilangan ni mishind yihyaayihy ni bya kukal naaby mudimw bihyaabihy. Mushind iitut a kulombol nend malong ma Bibl i mushiituluk. Mukand iitut a kulombol nend malong ma Bibl, Iikal ni Buumy Buyiil!, wiituloolomb bwa twiilongolol kuuhal kwiitut kulong ni muut bishilangan ni mushind utwaakady tulombol malong ma Bibl kuuhal. Tubaabal bikos bikeeh ni twiisambiloh bikasakan ni mulony. Hatuloolongweesh Bibl, tukaakal mudimw cikwaabw ni video ni byaab bya kulamin mikand bidy mu byaamw, bu mudy: JW Library^®. Uw kuy uman kukal mudimw ni byaamw eeby, ambil muut udy mumanyik bwa hakulongweesh mushind a kukal naaby mudimw. Tut baat tudyaakal twiibidilangan ni myand yihyaayihy. Kabiinoh bend bihehel bwiitut kwiibidilangan ni mishind yihyaayihy mukulong kwa myand. Ki kudyambulwiish dya Yehow ni dya baat bakwaabw, wiiyiiy kwiibidilangan bilengel menmen ni mishind eey, ni cikwaabw wiiyiiy kwiikal ni musangal hakulong ni baat. Seb’aa njil kaahand i muleeb neey: mushind a kulong nend oow “utwaatwaal musangal kudy mulony ni kudy mulongweesh.”

14. I biny bitudy mwa kuvuluk hatudiidiil baat musah mu teritwaar mukasakan, ni i mushind kaay udy mukand a 1 Biin Korent 3:6, 7 wiitukashish?

¹⁴ Tudy mwa kwiikal mu teritwaar udy mukasakan bwa kutwaadij malong ma Bibl. Baat bakwaabw kabiin bakun mat ku musah utwiibatwaatwaadil eecy bamulwiilwiish. I biny bidy mwa kwiitwambulwiish bwiitut kwiikal ni meej malengel mu teritwaar wa nook? Vuluk neey: shikacil ya baat yidyaakal yishiituluk lwang-lwang mu bulongolody bubiih myand oobw, ni baat baleelek bady mwa kwiiy kuhet micim ya kukaam bulombody bwa Mawej mafuk miiyiiy. (Mat. 5:3) Bakwaabw baakady teng balek mikand yiitut, biiyil kwiitab cikwaabw dilong dya Bibl. Tudy bamanyik cikwaabw neey: Yehow i mwiin budimy bwa biit bidyobw baanun. (Mat. 9:38) I mukat bwa twiikal tukun ni tumbok mwanz, ki, i yiy wiibikaakashish. (1 Kor. 3:6, 7) Ni bitukaakashish bwiitut kuvuluk neey: ning tut katuy bakumban bwa kulombol dilong dya Bibl kaabaak, Yehow wiitufufut bwa kwiikashishomw kwiitut, kiin bwa mushind udy baat mwa kwiitab eecy kulek! *

15. Yehow umvumvw bicy hady muut wiitab bwa kulong Bibl ni ukooyel ku biloolongey?

¹⁵ Yehow udy ni musangal hadyey utal muut wiitab myand ya biin-biin yidy mu Bibl ni wiiyambiloh bakwaabw. (Tus. 23:15, 16) I musangal kaay muvul udy nend Yehow hadyey utal baat bindiy biikal ni cisumy cya kudiil baat musah ni kwiibalongweeh! Cileejel, ning mwaakadyok cihuh ha bulab butuutul mu muvw iitut a mudimw 2020, tudy balombol malong ma Bibl 7 705 765 ni tudy bambulwiish baat 241 994 bwa kwiilambulobw kudy Yehow ni kutambul. Ni biiyij bahyaabahy aab, biiyiiy kulombol malong ma Bibl ni kwaalabul baat bavul bwa bashaal biiyij. (Luuk 6:40) Biin-biin, Yehow udy ni musangal hatuloolongweesh baat bakwaabw ni twiibaalabul bwa bashaal biiyij.

16. I kiihacil kaay kalengel katudy mwa kwiifundil?

¹⁶ Mudimw a kwaalabul baat bwa bashaal biiyij, i mudimw mukasakan, ki ku dyambulwiish dya Yehow, tudy mwa kwiidit byeet mu mudimw a kulongweesh bahyaabahy bwa bakat Taat iitut a mu diiwul. Katwiin mwa kwiifundilok kiihacil ka kutang kulombolok dilong dya Bibl ning dyaakaabumw eeny? Tudy mwa kukem bwa citwiikal mwa kutal hatuloolomb baat batutwiitwiilangan naab bwa kulong naab Bibl. Tudy bajaadik neey: Yehow wiiyiiy kubenesh kwiikashishomw kwiitut.

17. Twiiyiiy kumvw bicy hatuloolombol dilong dya Bibl?

¹⁷ I dyakatook kaay ditudy naady bwa kudiil baat musah ni kwiibalongweesh myand ya biin-biin! Mudimw oow wiitwaakakish musangal a biin-biin. Mupostol Pool, waakady mwambulwiish baat bavul ba mu Tesalonik bwa kushaalobw biiyij, waakady mwiibumvwiij mwaakadyey wiiyumvw haleebeley neey: ‘I baanun, teng baanun batudy batakamin ni biituwaah musangal bwa mudimw utudy balong, twiiyiiy kwiiyumb mwiiwul kuuhal kwa Fumweet Yeez dyaakiiyeyok. Kabwiin bwaal bwa biin-biin eeny? Nun nudy lutumb lwiitut ni musangal iitut’ (1 Tes. 2:19, 20; Yil. 17:1-4) Ki mudy baat bavul leeloow biiyumvw. Cileejel, mwiin-kweet udyobw babiikan neey: Stéphanie, ukaady ni mafuk mavul ni mbaayend, i mwambulwiish baat bavul bwa kufikobw teng ni ku batiisumw, uleeleeb neey: “Kakwiin musangal muvul bu wiin oow bwa kwambulwiish baat bwa biilambul kudy Yehow.”