1. I mushind kaay udy baat bavul bakaam kulong bivul mu mudimw a Yehow?

 TUDY ni bivul bya kulong bu mudy bulongolody oobw bwend ni kufweej ku bulekel. (Mat. 24:14; Luuk 10:2; 1 Py. 5:2) Tut boos tudy bakat bwa kukadil Yehow mudimw bikasakan. Baat bavul bendend ni kuvudij mudimw aabab wa bukajaady. Bakwaabw bakaakaam kushaal baaseb aa njil. Bakwaabw bakaakaam kukal mudimw ku Betel eecy kwambulwiish mu midimw ya lwiibak. Ni baan-beet baan-balum bavul, bendend ni kukumbaj myand yilomb bwa kwiikalobw bakumban bwa kushaalobw bakwanjok ba mudimw eecy bakul. (1 Tim. 3:1, 8) I musangal kaay udy nend Yehow hadyey utal baat bindiy biikal ni cyuuy mu mudimw indiy!​—Mis. 110:3; Ye. 6:8.

2. I biny bitudy mwa kulong tut katuy bakumbaj byumw bya kubiihacil biitut bya mu spirit?

² Nook, micim yidy mwa kwiiy kwiitutalal tut batal neey: tukaady balong mafuk mavul katuy tukumbaj byumw bya ku biihacil biitut bya mu spirit. Eecy tudy mwa kukooyel mu mabok bwaal tukaady bakuluuh eecy bwa shikacil kahand udy mwiitufikil tulang neey: katwiinoh bend mwa kuhet majit. (Tus. 13:12) Ki bwaal buhetel Melissa. * Waakady mukat bwa kuy ku Betel eecy kuy ku Kalaas ka Badiidiil Bukaleng musah, uleeleeb neey: “Nakaady muut mukuluuh. Ciciin mukumban bwa kukumbaj mudimw oow. Hahicil mafuk, niiyil kukooyel mu mabok.”

3. I myand kaay yidy muut mwa kukumbaj bwa kuhetey majit?

³ Bamw baasand, bikaam biikal bashimat ni baleej byumw biikadil bya mu spirit kuuhal kwaakwiikalobw bakumban bwa kuhet majit makwaabw. Cikwaabw, biloolomb bwa biikal ni meej, biikal bihangadik ni biikal ni lukat, mu mushind mukwaabw bikaam bamanyik mwa kwiikalobw ni kutuukij, biikal balong mudimw aababw mu mushind mulengel ni baneemek baat bakwaabw. Uw  mutungunuk ni kwiikal ni biikadil bilengel, wiiyiiy kuhet majit mu cisumbw. Tutalaay cileejel cya Nick. Haakadyey ni mivw 20 waakady mukooyel mu mabok menmen bwaal kaakadyoh bend mushaal mukwanjok a mudimw. Uleeleeb neey: “Naakady mutal ney kudy bwaal bubiih kunady.” Ki Nick kaakadyoh bend mulek. Waakady ni musangal bwa midimw yaakadyey ulong mu cisumbw ni mudimw a kudiil baat musah. Leeloow, ukaakal mudimw mu komiteh wa Filiyal.

4. I biny bitwiiyiiy kulong mu ciin bwaal eecy?

⁴ Ukaady mukooyelok mu mabok bwaal kwiin mwanj kukumbajok biihacil kahand mu mudimw a Yehow eeny? Biby naak, sambil Yehow, umwambil myand yidy yikutond. (Mis. 37:5-7) Cikwaabw, Joojok biin-kweet bakaady bashimat bwa bakuleej ciwudy mwa kulong bwa kulengej mudimw a Mawej, ni wiikashishomw bwa kukooyel ku mubel udyobw bakwaakish oow. Uw mulong nook, biikaakal bihehel bwa kuhet mudimw bilondeshel kiihacil kiibuh. Teng bu Melissa utukaady bateel, mudimw uwukaakaam udy mwa kwiikal kay ning habwiih bwa kiihacil kawukaakaam. I biny biwudy mwa kulong? I mushind kaat uwudy mwa kulam musangal iibuh? Bwa kwaalabul diijooj eedy, ciin bwaal eecy ciiyiiy kwiisambil ha myand yisat: 1) bidy mwa kwiitwaakish musang, 2) muwudy mwa kuvudij musangal iibuh, ni 3) bihacil bidy mwa kuvudij musangal iitut.

5. I biny bitudy mwa kulong bwa kwiikal ni musangal? (Muleej 6:9)

⁵ Mukand a Muleej 6:9, uleeleej cidy mwa kwiitwaambulwiish bwiitut kwiikal ni musangal. (Bal.) Muut udy mwa kwiikal ni musangal ‘wa biit bidyey naaby mutalok ni mees,’ bu shikacil udyey nend. I bishiilangan ni muut udy ni zuk-zuk a biit bilaalangey, ututungunuk teng ni kukaam ciit cidyey kay mwa kuhet. Nook, i dilongweesh kaay kutudy? Bwa kwiikal ni musangal, bikaam tutal teng biit bitudy naaby ni kutakamin bihacil bitudy mwa kukumbaj.

6. Twiiyiiy kwiisambil ha kasumw kaay kaabaak, ni i dilongweesh kaay ditwiiyiiy kuhetelok?

⁶ Biin-biin, udy mwa kwiikalok ni musangal bwa biit biwudy naaby eeny? Haanyim a byoos, hahihit ciisang, twiiyiiy kwiikal ni makab makwaabw. Biin-biin, bidy mwa kwiikal naak. Tudy mwa kwiikal biin-biin ni musangal bwa biit bitudy naaby “batalok ni mees.” I mushind kaay utudy mwa kulong naak? Bwa kuhet dyaalabul, tutalaay kasumw katwaadil Yeez ka talant kady mu mukand a Matewus 25:14-30. Twiiyiiy kwiimanyin ha mushind udy kasumw aak mwa kwiituhetesh musangal ni kuvudij cikwaabw musangal iitut bwa mabenesh matudy mwa kuhet kaabaak.

7. Uvwiij mu may makeeh kasumw ka Yeez ka talant.

⁷ Mu kasumw oomw, baleeleebomw bwa muut ukaakaam kuy kulwend. Kuuhal kwa kuyey, waakady mubiikan bahik bindiy ni kwiibakishey talant bwaababw kwendulukobw naay. * Waakady mwaakish muut woos bilondeshel bukash bwaakady naabw, waakishil muhik a kuuhal talant 5, mwiibidy talant 2, ni mwiisaat talant 1. Bahik babidy ba kuuhal baakady bakal mudimw bikasakan bwa kuvudij talant yaakadyobw biibakish kudy fumwaabw. Muhik mwiisaat kaakadyoh bend mukal mudimw ni fwalang yaakadyobw bamwaakish, ni fumwend umwiihacil.

8. Bwabiny muhik a kuuhal wa mu kasumw oomw waakady mwa kwiikal ni musangal?

⁸ Muhik a kuuhal waakady ni musangal a kwaakish fumwend talant yikwaabw 5. Yaakady fwalang yivul, ni eeby bileeleej neey fumwend waakady mumuteekel micim bikasakan! Ki tudy mwa kuleeb bicy bwa muhik mwiibiidy?  Waakady mwa kukooyel mu mabok bwaal kiin muhet talant yivul bu muhetel muhik a kuuhal. Ki ulongel biny?

9. I biny bidy Yeez kay muleeb bwa muhik mwiibidy? (Matewus 25:22, 23)

⁹ Bal Matewus 25:22, 23. Yeez kiin muleeboh bend neey: muhik mwiibidy waakady mufulul mund eecy muhet kakunying bwaal uhetel teng talant yibidy. Yeez kiinoh bend muleeb neey muhik oow waakady wiileebakeen uleeb neey: ‘bwabiny fumwany i muyakish teng tufwalang tukeeh? Nady byaany mukal mudimw bikasakan! Iikal fumwany mulek kufwiijok, nady mwa kujiik byaany talant yibidy eey ni mim kuy kakal midimw yaamim.’

10. Muhik mwiibidy ulongel biny ni talant yindiy?

¹⁰ Teng bu muhik a kuuhal, muhik mwiibidy waakady mwangat mudimw waakadyobw bamwaakish ni buseeb buvul ni waakady mukadil fumwend mudimw bikasakan. Bu cihet, waakady muvudijil fumwend talant njil yibidy. Fumwend waakady mumufut bwa mudimw mukasakan ukadiley oow. Fumwend kaakadyoh bend teng musangal, kady waakady mulang neey: muhik oow i mukumbanyin kwangat majit makwaabw!

11. I mushind kaay utudy mwa kuvudij musangal iitut?

¹¹ Bya mushind aakaabumw, tudy mwa kuvudij musangal iitut hatwiitwaatwaal bikasakan mu mudimw a Yehow. “Iikal mwiiteek mu mudimw a kudiil baat musah,” ni kal bikasakan midimw ya mu cisumbw. (Yil. 18:5; Ebr. 10:24, 25) Iikal wiilongolol bilengel kuuhal kwa kuy mu bisangil ni utwaal maalabul makakashish bakwaabw. Iikal wangat ni buseeb mudimw woos udyobw bakwaakish wa mu cisangil cya mukacy mwa lubing.  Bab bakulomb bwa kwambulwiish ku tumidimw tukwaabw twa mu cisumbw, iikal habwiih bwa kwiitulong, kulengululoh bend tumidimw tudyobw bakwaakish ootw ulang neey i kuhitij kwa diib. Long mwiibuh moos bwa kulengej mudimw iibuh. (Tus. 22:29) Uw mwiitwaal bikasakan mu myand ya mu spirit, ulong bilengel midimw yidyobw bakoomekel, wiiyiiy kutal muwuyaay kuuhal lwang-lwang ni wiikaakal ni musangal muvul. (Kal. 6:4) Biiyiiy kwiikal bihehel menmen bwiibuh kwiikal ni musangal hawutaatal bakwaabw bahet majit mabwiin ma ukaamin.​—Rom 12:15; Kal. 5:26.

12. I myand kaay yilongel Batemw babidy bwa kuvudij musangal aabab?

¹² Udy muvulukok cyaakady cifikil Melissa, udyobw baleeb mu cikos ciibiidy, mwiin-kweet mwaan-mukaj waakady ukaam kakal mudimw ku Betel eecy kuy ku Kalaas ka Badiidiil Bukaleng musah? Haakadyey kay mukumban bwa kukumbaj myand eey, uleeleeb neey: “Nady mukat bwa kulong bivul mu mudimw aamim a buseeb aa njil ni bwa kulond mishind yishil-shilangan ya kukal naay mudimw. Mudimw oow i muuhetesh musangal muvul.” I mushind kaay waakady Nick muhit bilengel ni kukooyel kwa mu mabok bwa mwaakadyey kay mushaal mukwanjok wa mudimw? “Naakady nakal teng midimw yinaakady mwa kulong​—kuy mu mudimw a kudiil baat musah ni kutwaal maalabul malengel mu bisangil. Cikwaabw, nalombel bwa kukal mudimw ku Betel ni baakady baayiitabil muvw ulondel.”

13. Uw mwiitwaal bikasakan mu mudimw uwukaakal kaabaak, wiiyiiy kuhet biny? (Muleej 2:24)

¹³ Uw mwiitwaal bikasakan mu mudimw uwukaakal kaabaak, kwaakuhetok bend majit miikal mwa kukuhetesh musangal muvul mu mafuk miiyiiy eeny? Bidy mwa kulongek naak, teng bu mwaakadyeby bilongekel Nick. Ki biby kabiy bilongek naak, teng bu Melissa, wiiyiiy kwiikal teng ni musangal muvul, ni wiiyiiy kwiikal ni musangal muvul bwa mudimw woos uwukaakadil Yehow. (Bal Muleej 2:24.) Cikwaabw, wiiyiiy kwiikal biin-biin ni musangal bwaal udy mu manyik neey: usasangeej Fumweet, Yeez Krist.

14. Tut twangat biihacil bya mu spirit ni buseeb, i biny bitudy mwa kulam mu meej?

¹⁴ Kwiitwaal bikasakan mu midimw yitukaakal kaabaak kumvwumvwiijok neey: bikaam tulengulul mishind yikwaabw yidy mwa kwiitwambulwiish bwa kuvudij mudimw utukaakadil Yehow eeny? Kabiin byumvwiijoh bend naak! Tudy mwa kwiifundil biihacil bya mu spirit bidy mwa kwiitwambulwiish bwa kutungunuk ni kuy kuuhal hatwiikaakashishomw bwa kuhatuk bihet bilengel mu mudimw a bukajaady ni kwambulwiish biin-kweet baan-balum ni baan-bakaj. Twiiyiiy kukumbaj biihacil eeby hatukaakadil bakwaabw mudimw ni meej ni mu mushind mulengel hamut a kutal teng musangal iitut kaayeet.​—Tus. 11:2; Yil. 20:35.

15. I biihacil kaay bikwaabw bidy mwa kukwambulwiish bwa kwiikal ni musangal muvul?

¹⁵ I biihacil kaay biwudy mwa kwiifundilok? Lomb Yehow bwa akwambulwiish bwiibuh kujingunun biihacil biwudy mwa kukumbaj. (Tus. 16:3; Jak 1:5) Udyok mwa kukumbaj cyumw cya ku biihacil bidyobw baleej mu  cikos cya kuuhal cya ciin bwaal eecy—ha kushaal seb aa njil mukwanjok eecy wa ha ciibidil, kukal mudimw ku Betel, eecy kwambulwiish mu midimw ya lwiibak eeny? Eecy misang yikwaabw ukaakaam kulong cileebel cyeny ni kiihacil ka kudiil baat bavul musah mulengel eecy bwa kuy kadiil baat ba cyaab cikwaabw musah a Bukaleng. Udy mwa kumanyik myand yikwaabw ha kubal bidyobw baleej mu mukand a Organisés Pour Faire la Volonté de Jéhovah, mu shapitil a 10 ni kwiisamb ni bakul ba mu cisumbw ciinun. * Bu  muwukaakal mudimw bwa biihacil eeby, baat boos biiyiiy kutal muwuyaay kuuhal ni wiiyiiy kwiikal ni musangal muvul.

16. Uw kuy ni mushind a kukumbaj kaabaak kiihacil ka habwaah, udy mwa kulong biny?

¹⁶ Ki uw mwiikal kuy ni mushind a kukumbaj cyumw cya ku biihacil bidy mu bikos bitubahit eeby, i biny biwudy mwa kulong? Udy mwa kukaam kiihacil kakwaabw, kawudy mwa kukumbaj. Tal mishind yikwaabw yiloolond eey.

17. Bilondeshel mukand a 1 Timoteh 4:13, 15, i biny bidy mwiin-kweet mwaan-mulum mwa kulong bwa kwiikaley mulong a mwiisamb mulengel?

¹⁷ Bal 1 Timoteh 4:13, 15. Uw mwiikal muman kutambul, udy mwa kwiikashishomw bwiibuh kushaal mulong a mwiisamb mulengel eecy mulongweesh mulengel. Bwabiny? Bwaal ‘kwiitwaal’ kwiibuh mu kubal, mu kulong kwa mwiisamb, ni mu kulongweesh bilengel, kwiikaakal musangal kudy bakukuukun mat. Teet bwa kwiifundil kiihacil bwa kubal ni kulond mibel yoos yidyobw baleej mu broshir wa Difila kudibala ne kudilongesha. Long dilongweesh dyaakaabumw, iidiibidij bikasakan hawudy ku cibel, ni i kashishomw bwa kulond mibel yidy mu dilongweesh aady hawuloolong mwiisamb. Lomb dyambulwiish kudy mutwaal a mibel eecy kudy bakul bakwaabw “bady biitwaal bikasakan ku kudiilangan Musah Mulengel ni ku bulongweesh.” * (1 Tim. 5:17) Kwiimanyin teng ha kumvw mushind udyobw bakuleej bwa kulong, ki ambulwiish cikwaabw bakukuukun mat bwa kukashish diitabij dyaababw eecy bwa kwiibasak bwa kulondobw myand yidyobw bumvw. Ha kulong nook, nwiiyiiy kwiikal boos ni musangal.

18. I biny bidy mwa kwiitwambulwiish bwiitut kukumbaj bihacil biitut bya mu mudimw a bukajaady?

¹⁸ Tut boos tudy boomekel mudimw a kudiil baat musah ni kwiibaalabul bwa bashaal biiyij. (Mat. 28:19, 20; Rom 10:14) Udy mukatok  bwa kulengej menmen mudimw iibuh wa buseeb oow eeny? Iifundil bihacil bisunguluk bu kulong ni kukooyel myand yidyobw baleej mu broshir wa Kulongesha. Udy mwa kuhetomw myand yikwaabw yiwudy mwa kulond yidy mu Mabeji a Tshisangilu​—tshia Nsombelu ne mudimu wetu wa buena Kristo ni video ya mishind yidyobw baleej bwa kwiisamb ni baat mu bisangil bya mukacy mwa luming. Teetok bwa kukal mudimw ni ngeny yishil-shilangan ni kumanyik lungeny luwudy mwa kukal naalw mudimw bilengel. Hakulond mibel eey, wiiyiiy kwiikal ni musangal ukiish kufwanyikij hakushaal mulongweesh wa Diiy dya Mawej mulengel.​—2 Tim. 4:5.

19. I mushind kaay uwudy mwa kulong bwa kwiikal ni bikadil bya bwiin Krist?

¹⁹ Hawutaatal bihacil biibuh, kulengululoh bend kady ni buseeb buvul​—ka kwiikal ni bikadil bya bwiin Krist. (Kal. 5:22, 23; Kol. 3:12; 2 Py. 1:5-8) I mushind kaay uwudy mwa kulong? Cileejel, fwanyikij neey: ukakaam bwa kukashish menmen diitabij diibuh. Udy mwa kubal biin bwaal bidy mu mikand yiitut mudyobw baleej myand ya kulond yidy mwa kukashish diitabij diibuh. Wiiyiiy kwiikal biin-biin ni musangal hakutal myand yidyobw baleej mu TV wa JW^® mudyobw bumvwiij mudy biin-kweet baan-balum ni baan-bakaj baleej diitabij dikasakan bwa mushind udyobw bataatameen makab mashil-shilangan. Cikwaabw, tal muwudy mwa kwiidikij diitabij dyaababw mu shikacil iibuh.

20. I mushind kaay utudy mwa kwiikal ni musangal muvul ni kukasakanok ku micim bwa myand yidy yitukooyesh mu mabok?

²⁰ Biin-biin, tut boos tudy bakat kaabaak kukadil Yehow mudimw bikasakan. Mu bulongolody buhyaabuhy bwa Mawej, twiiyiiy kwiikal teng tumukadil mudimw. Teng kabaak, tut biikashishomw bwa kukal mudimw woos utudy mwa kulong, twiiyiiy kwiikal ni musangal i mwiin weeh ni twiiyiiy kukasakanok ku micim bwa myand yidy yitukooyesh mu mabok. Bwaal bukwaabw bwa buseeb buvul i bwa nee: twiiyiiy kuh Mawej Yehow iitut lutumb, “Mawej udy ni musangal.” (1 Tim. 1:11, NWT) Nook, twiikalaay ni musangal bwa mutukaakadil Yehow mudimw!