1-2. I biny bitwiiyiiy kutal mu ciin bwaal eecy?

Umvumvw bicy hady diifund diwudy mutakamin menmen kadiy difik lwang? Udy mwa kumvwok ku micim kukutalal eeny? Tusumw 13:12 ujaajaadik biin-biin neey: “Kutakamin kudy kakuy ni cihet kubeebeedyesh micim.” Ki udy mwa kwiikal mumanyikok tubingil tulengel tuleeleej bwabiny diifund diwudy mutakamin dilek kufik lwang eeny? Nook, bikuloolomb bwa wiikal mutukij ni mutakamin diifund aady.

² Mu ciin bwaal eecy, twiiyiiy kutal mudy mamw may matam ma mu Bibl mwa kwiitwambulwiish bwa “kutakamin kudy Mawej.” (Mik. 7:7) Cikwaabw, twiiyiiy tukontonon mishind yibidy yiituloolomb bwa twiikal ni kutukij ha kutakamin teng kudy Yehow. Ku bulekel, twiiyiiy kutal musangal uhehet aab boos bady batakamin kudy Yehow.

3. Diiy ditam didyobw baleej mu mukand a Tusumw 13:11 dituloolongweesh biny?

³ Cileejel cileeleej bwa kwiikal ni kutukij i bicileej mu mukand a Tusumw 13:11. I baleebomw nook: “Bihak bihet mu lwang-lwang bijiijimban teng lwang-lwang; ki muut wendend ni kwiibihet ku bikeeh ku bikeeh wiiyiiy kwiibivudij.” I biny bitudy mwa kulongel ku verseh oow? I bya meej bwa kulong myand ni kutukij, ni hakulong nook twiiyiiy kuhet cihet cilengel.

4. Diiy ditam ditusasangan mu mukand a Tusumw 4:18 dituloolongweesh biny?

⁴ Mukand a Tusumw 4:18 wiitwambambil neey: “Njil a baat bawaakan udy bu butook bwa a cyaacy, bwendend kwend ni kutookesh teng ni mucyaacy haash oos.” May aam “njil a baat bawaakan” maleeleeb bwa mushind udy Yehow usokolweel baat bindiy​—myand yidyey mwiibalongolweel ku bikeeh ku bikeeh. Verseh oow uleeleej cikwaabw, mudy mwiin Krist uleej  muyaayey kuuhal mu myand ya mu spirit. Bwa kuy kuuhal mu myand ya mu spirit kabiin bikaam kulong myand lwang-lwang. Ki byangangat diib. Tut tulong ni tukooyel bikasakan mibel yituhehet mu Diiy dya Mawej ni yitwaatwaal bulongolody bwindiy, ku bikeeh ku bikeeh twiiyiiy kwiikal ni buumuut bwa bwiin bwa Krist. Twiiyiiy cikwaabw kumanyik Mawej bilengel. Tutalaay mudy Yeez Mumvwiij bwaal oobw.

5. I cileejel kaay cidy Yeez mutwaal bwa mudy muut ukasakan mu myand ya mu spirit?

⁵ Yeez i mukal mudimw ni cileejel bwa kumvwiij mudy musah a Bukaleng utudiidiil baat mufwanakan ni kun yiikaakasakeen ku bikeeh ku bikeeh mu micim ya baat bady bakat myand yiwaakan. Uleeleeb nook: “Kun yaakady yibadik, yend yikuluuh​—ki muut [udy mukun] oow kaakady mumanyik ney bihiihitakan bicy. Bulab kaayaabw i bwaakady bukashish kun, cya kuuhal habaabadik matab maleeleeh, mahakat tweel, kuunyim ki mikus.” (Mark 4:27, 28) I bwaal kaay bwaakady Yeez ukaam kumvwiij? Waakady Mumvwiij neey: teng bu mudy mutond ukasakan ku bikeeh ku bikeeh, ki mudy muut ukasakan ku bikeeh ku bikeeh mu myand ya mu spirit hadyey wiitab musah a Bukaleng. Cileejel, hady balony biitut ba Bibl ba biin-biin bafweej menmen kudy Yehow, tutaatal mudyobw batwaadij kuleej biikadil bilengel mu shikacil aabab. (Ef. 4:22-24) Ki bikaam tumanyik neey: teng Yehow ki wendend ni kukashish kun.​—1 Kor. 3:7.

6-7. I biny bituloolongel ku mushind udy Yehow muhang bulab?

⁶ Mu myand yoos yiloolongey, Yehow wangangat diib divul ni kutukij bwa kukumbajey mudimw indiy. Uloolong nook bwa kutumbishey diijin dindiy ni bwa musangal a bakwaabw. Tutalaayaak, cileejel eecy, Yehow uyiil ni myand bikeeh bikeeh hakadyey mulongolweel baat bulab.

⁷ Hady Bibl umvwiij mudy Yehow muhang bulab, uleeleeb neey: “waakady muteek mikal yindiy,” ni uteekel “bihand bya bub” ni “waakady  mujik diibw dya mu diikook.” (Yoobw 38:5, 6) Cikwaabw wangacil diib bwa kwanyishey mudimw udyey mulong. (Kbwa. 1:10, 12) Udyok mwa kulangilok hamushind waakady banjel bumvw hatadilobw biit byaakady Yehow muhang eeny? Byaakady bibakemesh! Ki bwabiny baakady “bumb bilabul bya musangal.” (Yoobw 38:7) I dilongweesh kaay dituhehetel mu bwaal oobw? Biit bihangil Yehow byaakady byangat mafuk mavul bwa kukumbaneby, ki haakady Yehow mutal biit byoos bihangiley, uleebel neey: “byaakady bilengel.”​—Kbwa. 1:31.

8. I biny bitwiiyiiy kutal kaabaak?

⁸ Bileejel bitubatal eeby, bituleeleej mudy may matam mavul ma mu Diiy dya Mawej mitulongweesh bwiitut kwiikal ni kutukij. Twiisambilayaak kaabaak ha myand yibidy yileeleej neey: bikaam tutakamin teng kudy Yehow.

9. I bwaal kaay bwaakaabumw bwiituloolomb bwa tutakamin teng kudy Yehow?

⁹ Tudy batakamin bwa Yehow aalabul masambil miitut. Tut tusambil bwa kuhet bukash bwa kuhit bilengel ni diiteet eecy bwa kuhet dyambulwiish bwa kuhit bilengel ni myand hatudy bakooyel mu mabok, tudy mwa kulang neey, bwiitut kumvw bilengel bikaam twindil mafuk mavul. Bwabiny Yehow kiin waalabuloh bend masambil miitut musang aakaabumw?

10. Bwabiny bikaam kutukij hatudy batakamin kudy Yehow bwa kwaalabuley masambil miitut?

¹⁰ Yehow ukukun mat ku masambil miitut. (Mis. 65:2) Wangangat masambil matumuloolongel ni mucim aakaabumw bu cijaadik cya diitabij diitut. (Ebr. 11:6) Yehow wiitaatabij cikwaabw hadyey wiitutal biswiik bwa kwiikal ni shikacil umvumvwangan ni masambil miitut ni bwa kulong lukat lwindiy. (1 Jah 3:22) Nook, bikaam twiikal ni kutukij ni tulong myand bilondeshel masambil miitut ning hatwendend ni kucimun cikadil cibiih eecy kukooyel kwa mu mabok. Yeez uleebel neey: mamw masambil miitut kabakwimaalabuloh bend musang aakaabumw. Yeez uleebel neey: “Lombaay biiyiiy kwiinwaakish; kaamaay nwiiyiiy kumon; kookolaay kucibel biiyiiy kwiinunzulwiil. Bwaal muut woos uloolomb bamwaakaakish, ukaakaam umoomon ni ukookookol ku cibel bamwinzunzulwiil.” (Mat. 7:7, 8) Hatuloolond mubel oow ni ‘twendeleel ni kulomb,’ tudy mwa kuteekel Taat iitut a mu diiwul micim neey: wiiyiiy kwiitumvw ni wiiyiiy kwaalabul masambil miitut.​—Kol. 4:2.

11. I mushind kaay udy mukand a Biin Ebreh 4:16 wiitwambulwiish diib ditudy katuy tuhet musang umw dyaalabul ku masambil miitut?

¹¹ Ning mudy diisambil diitut kadiy dihet dyaalabul musang umw, Yehow i mulaay neey: wiiyiiy kwaalabul diisambil diitut ha “ciisang cikumban.” (Bal Biin Ebreh 4:16, NWT) Ki bwabiny katwiin mwa kuleeboh bend Yehow bibiih hady bwaal butukaakaam kabuy bukumban lwang-lwang. Cileejel, baat bavul basasambil bwa Bukaleng bwa Mawej bwiiy buful myand yibiih ya mubulongolody bubiih oobw. Yeez uleebel cikwaabw neey: bikaam tusambil bwa bwaal oobw. (Mat. 6:10) Ki biikaakal kubul kwa meej hady diitabij dya muut dikooyel halaalangey neey: bulekel budy Mawej mulay baat kabwiishoh bend bufik! (Hab. 2:3; Mat. 24:44) Tuleeleej mutudy ni meej hatutaatakamin kudy Yehow ni tumusambil ni diitabij. Biin-biin bulekel bwiiyiiy kwiikalok ha ciisang cikumban, Yehow kayend i mumanyik “diifuk ecy diib” dyaakiiyebw. Ni diifuk aady diiyiiy kwiikal ciisang cilengel bwa baat boos.—Mat. 24:36; 2 Py. 3:15.

12. I diib kaay didyeby mwa kwiikal bikasan bwiitut kutuukij?

¹² Tudy batakamin ni kutukij koos teng ni diib  diikalobw mwa kutal myand mu buwaakan. Baat ba mu bulongolody oobw, badyaakal balongel baat baakwaabw myand yibiih, bu mudy baat ba mitah yikwaabw, ba ciseb, ba cis eecy ba bibunj bikwaabw. Baat bakwaabw bibakeekengesh bwaal i balemen mu mishind yishiil-shilangan. Baat ba Yehow bavul, i bakengesh bwa malongweesh ma mu Bibl madyobw biitab. Bab bitulongel myand yibiih mu mishind eey, bikaam tuvuluk may ma Yeez maleebeley neey: “Waakashaal mukasakan micim ni ku bulekel, wiiyiiy kuhanduk.” (Mat. 24:13) I biny biwudy mwa kulong uw mumvw bakwambil neey: muut kaahand wa mu cisumbw, i muleeb bibiih menmen bwiibuh? Haanyim ha uw muman kwambil bakul bwaal bwiibuh, udy mwa kushiyok bwaal bwiibuh oobw mu bikam byaababw ni mutakamin ni kutuukij koos neey: biiyiiy baman bwaal aabw bilondeshel lukat lwa Yehow eeny? I biny biikal bakul mwa kulong hady muut ulong pekaat mutam?

13. Yehow ukaakaam bwa bakul balong biny hady muut ulong pekaat mutam?

¹³ Hady bakul bamanyik neey: muut kahand i mulong pekaat mutam mu cisumbw, bakaakaam “meej ma mu mwiiwul” mu diisambil ni kiihacil ka kutal bwaal aabw mu mushind udy Yehow wiibutal. (Jak 3:17) Kiihacil kaababw i ka kwambulwiish mulong a pekaat bwa ‘kuhingomweey mu njil biin-biin’ kuk mushind. (Jak 5:19, 20) Cikwaabw i bakat kulong bwaal boos budyobw mwa kulong ni kiihacil ka kulam cisumbw ni kukashish baat boos badyobw balongel bibiih. (2 Kor. 1:3, 4) Bab bumvw neey: muut i mulong pekaat mutam, bikaam bakul bahet cya kuuhal-hal bijaadik byoos, kulong nook kwangangat diib divul. Cikwaabw, basasambil bwa kutal mushind mulengel wa kutwaalobw mibel idy mu diiy dya Mawej, ni ‘kwiibanyok bu mudyeby bikaam.’ (Jer. 30:11) Bakul kabiin mwa kulaadikij myand, cikwaabw kabiin mwa kwangat dihangadik lwang-lwang. Hady bakul baman myand mu mushind mulengel, cisumbw ciiyiiy kwiikal ni musangal iimwiin weeh. Ning mudy bakul mwa kuman bwaal oobw mu mushind mulengel, muut udyobw balongel bibiih oow, udy mwa kwiikal misang yikwaabw ni kaakunying bwa bwaal aabw. Uw mutal neey: bwaal oobw i bwa biin-biin, i biny biwudy mwa kulong bwa kukeehesh kaakunying?

14. I cileejel kaay cya mu Bibl cidy mwa kukwambulwiish bwa kuhit bilengel ni myand hady mwiin Krist neeb mukulongel bibiih menmen?

 ¹⁴ Bakaady bakulongelok bibiih kudy muut eecy kudy mwiin Krist neeb eeny? Udy mwa kuhet bileejel bilengel bidy mu diiy dya Mawej bidy mwa kwiitulongweesh mushind utudy mwa kutakamin kudy Yehow bwa aman myand. Cileejel, ning mwaakady Yozeefw mukab bwa myand yibiih yaakady ba yaayend bamulongel , kaakadyoh bend mushaal mwiibalamin cinj. Hamut a kulongey nook, waakady mutum meej mindiy teng ku mudimw waakadyey ulongel Yehow, ni Yehow waakady mumufut bwa kutuukij ni kutaatameen kwindiy. (Kbwa. 39:21) Hahicil mafuk, Yozeefw waakady muvulaminok myand yoos yibiih yaakadyobw bamulongel ni kutaley mushind waakady Yehow mu mufiil kis. (Kbwa. 45:5) Teng bu Yozeefw, bitukaakashish ku micim bwa kufweej habwiih ni Yehow ni kumushiil myand bwa yiy kwiiyiman mu mushind muwaakan.​—Mis. 7:17; 73:28.

15. I biny byaakady byambulwiish mwiin-kweet mwaan-mukaj bwa kutaatameeney myand yibiih yaakadyobw bamulongel?

¹⁵ Biin-biin, kiin teng myand yibiih yikasakan yidy mwa kwiitufikil bu mwaakadyey yifikil Yozeefw, ki mushind udyobw bitulongel myand udy mwa kwiitwiit ku micim. Hatudy cilumbw ni muut, kutekelok ni muut udy kay uhambidil Yehow, may matam ma mu Bibl mady mwa kwiitwambulwiish bwa kuman cilumbw bilengel. (Fili. 2:3,4) Twangat cileejel eecy, mwiin-kweet mwaan-mukaj waakady mumvw bibiih menmen haakadyobw bamudingidilobw myand kudy waakadyey ukal nend mudimw. Hamut a kulongey bwaal musang aakaabumw, mwiin-kweet oow wangacil diib dya kulangil ha cileejel cya Yeez. Haakadyobw bamutuk, kaakadyoh bend uhingijilangan matuk. (1 Py. 2:21, 23) Ni bwaal oobw mu meej, waakady mwangat dihangadik dya kulek kulong bwaal bubiih bwa cyaakady cimufikil. Hahicil mafuk, waakady mwiiy mumanyik neey: muut waakadyey ukal nend mudimw aaw, waakady utaatameen lubeel lukasakan ni bwaal oobw, bwaakady bumwaakish kaakunying kavul. Mwiin-kweet mwaan-mukaj oow uleeleeb neey: mwiin mudimw aababw oow kaakadyoh bend Mumvwiij cyaakadyey uleeb. Nook, mwiin-kweet mwaan-mukaj oow waakady muhet musangal muvul bu mwaakadyey mutaatameen  ni kutuukij koos myand yoos yibiih yaakadyobw bamuleeb ni micim yindiy yaatalal.

16. I biny bidy mwa kukukashish uw utaatameen myand yibiih? (1 Pyeel 3:12)

¹⁶ Uw mwiikal utaatameen bwaal bubiih budyobw bakulongel eecy utaatameen bwaal bukwaabw budy bukutah ku micim, vuluk neey: Yehow udy habwiih ni aab bady ni “micim yiman kususik.” (Mis. 34:18, NWT) I mukukat muwuloolong myand ni kutuukij ni bwa muwumutuutuudil bujit budy bukuneemeneen. (Mis. 55:22, NWT) I Zuj wa ha bulab butuutul. Utaatal myand yoos yiloolongek. (Bal 1 Pyeel 3:12.) Bidyok ni buseeb bwiibuh kutakaminok kudy Yehow eeny?

17. Bilondeshel mukand a Yeshaay 30:18, i myand kaay yidy Yehow mwiitulay yiikal mwa kukumban?

¹⁷ Mukalung kakeeh oomw, Taat iitut a mu diiwul wiiyiiy wiitufiil kis ku dyambulwiish dya Bukaleng bwindiy. Mukand a Yeshaay 30:18 uleeleeb nook: “Ki Mawej i mutakamin ney wiiyiiy teng kwiinulongel bilengel, naak wiiyiiy kujuuk bwa kwiiy kwiinufiiley lus. Bwaal Mawej, i Mawej muwaakan, biin dyakatook i baat bataatakamin kudyey.” Boos bady batakamin kudy Yehow biiyiiy kwiikal ni musangal kaabaak ni mu bulongolody buhyaabuhy.

18. I musangal kaay utudy batakamin?

¹⁸ Iikal baat ba Mawej mwa kutweel mu bulongolody buhyaabuhy kabakutaatameenoh bend cikwaabw myand ya kaakunying ni makab madyobw batwiilanganobw naam leeloow. Myand yibiih kayakwiikalok bend ni biitiit. (Yis. 21:4) Katwaakutatoh bend ni meej bwa biit bitwiikal tukaam, bwaal bya kudy biiyiiy kwiikalok bivul. (Mis. 72:16; Ye. 54:13) Bwiiyiiy kwiikal bwaal bwa musangal muvul!

19. I biny bidy Yehow wend wiitulongolweel kubikeeh kubikeeh kaabaak?

¹⁹ Yehow wendend ni kwiitulongolol kaabaak bwa twiikal mu Bukaleng bwindiy ha kwiitwambulwiish bwa kutaatameen biikadil bibiih ni hatuleeleej biikadil bimusaasangeej. Katwiin mwa kukooyeloh bend ku micim ni kulek kukadil Yehow mudimw. Musangal mulengel iimwiin weeh udy kuuhal ook! Bu mutudy batakamin shikacil a musangal kuuhal ook, tudy mwa kutungunuk ni kutakamin kudy Yehow ni mucim woos ni kutuukij bwa akumbaj myand yoos yidyey mulayey!